LITURGI TUTUP TAHUN 2020 & BUKA TAHUN 2021
GBKP KLASIS MEDAN KAMPUNG LALANG
Tema: “Ola mbiar, sabab Aku kap ras kam” (Jes. 41:10; Mrk. 4:40)
I. PersikapenMpepayo Liturgi, nikapken si ertugas ras perlengkapen kebaktin.
II. Kebaktin
Kata Penaruh (ibabai Bapa/Nande)
Puji-pujin ras bujur sisehken man Dibata perban enggo itaruhkenNa kita ku bas pengujung tahun 2020 enda janah ersikap kita mengketi tahun si mbaru i bas erkiniteken ras erpengarapen man Kristus. I bas tahun 2020 enda banci jadi melala pengalamen geluh si la bagi ukurta, secara khusus erkiteken Pandemi Covid-19, si mpeturah kebiaren ras aru ate. Tapi guna ngalo-ngalo tahun si mbaru, turahlah pengarapen si mbaru maka tahun si mbaru lebih mehuli asa tahun sienggo lewat. Ipegegehi Tuhan kita guna bengket ku bas tahun 2021, terkhusus alu Sasaren Program bas gerejanta GBKP eme “Anak si nguda jadi pasu-pasu”. Sipindo gegeh man baNa gelah tetap kita ibereNa kepentaren.
Ertoto
Rende KEE 374:1 & 2 “Yesus ulu kegeluhenku”
Yesus ulu kegeluhenku, Kam me ngenca pengendesenku Lalap tedeh ate pusuhku, kupehaga Kam bas geluhku
Ref: O Tuhan pernehen pusuhku, si ertedeh ate man baNdu Kugelem pedah ras padanNdu, kusembah Kam i bas geluhku
Kusembah Tuhan Penebusku, si mereken kekelengenNa
Alu tutus reh aku Tuhan, ras kerina isi jabungku Ref: …..
Invocatio
“Janah ingetlah! Aku tetap kap ras kam seh ku kedungen jaman” (Mat.
28:20b).
Rende KEE 181:1&4 “Segedang-gedang Geluhku”
Segedang-gedang geluhku itemani Penebus Labo kai pe lit si kurang, adi tanNa negu t’rus Dame surga lit bas aku, iusekenNa bangku Kegeluhen jadi senang, kai pe la lit si kurang (2x) Segedang gedang geluhku, Ia singkawalisa Amin kai pe reh man bangku, aku ijagaiNa IteguNa tetap tanku, i bas keleng ateNa
Segedang-gedang geluhku, kuikutken me Ia (2x)
Responsoria “Ende-enden pujin (Masmur 100)
Bapa/Nande: Ersuraklah man Tuhan o pertibi kerina, nembahlah man Tuhan alu ukur meriah, dahilah ku adep-adepenNa janah rende meriah
Perp: Ngendeken Ref. KEE 308
Haleluya, haleluya puji gelarNa. Haleluya, haleluya puji gelarNa
Bapa/Nande : Ola lupa maka Tuhan kap Dibata, Ia sinepa kita, emaka sikerajangenNa nge kita,kita kap bangsaNa, kita kap rarasenNa.
Perp: Ngendeken Ref. KEE 308
Haleluya, haleluya puji gelarNa. Haleluya, haleluya puji gelarNa Bapa/Nande: Bengketlah ku bas pintu gerbangNa alu ende-enden
pengataken bujur, ku bas kesainNa alu puji-pujin. Katakenlah bujur man baNa dingen pujilah Ia.
Perp: Ngendeken Ref. KEE 308
Haleluya, haleluya puji gelarNa. Haleluya, haleluya puji gelarNa
Bapa/Nande: Sabab Tuhan mehuli kap dingen tetap Ia erkeleng ate, Ia setia, tetap rasa lalap.
Perp: Ngendeken Ref. KEE 308
Haleluya, haleluya puji gelarNa. Haleluya, haleluya puji gelarNa
Rende KEE 468:1 & 2 “Tuhan Demi Salu KataNdu”
Tuhan demi aku salu KesahNdu, Tuhan demi aku salu KesahNdu Pusuhku bagi tambe ku baba ku pancurNdu,
Tuhan demi aku salu KesahNdu
Tuhan demi aku salu kataNdu, Tuhan demi aku salu kataNdu Pusuhku bagi tambe kubaba ku pancurNdu,
Tuhan demi aku salu kataNdu.
Renungen → Jesaya 41:10; Markus 4:40 (Ertoto sope & kenca renungen)
Pengakun Kiniteken
Nehken Persembahen Pengataken Bujur man Tuhan
Marilah siendesken pengataken bujurta man Tuhan i bas IA enggo ngepkep k’rina jabunta i bas tahun si lewat guna bengket ku tahun si mbaru. Kata Dibata kerna persembahen pengataken bujurta: “Geluhndu arus erpalasken keleng ate, bagi Kristus enggo engkelengi kita dingen ngendesken KesahNa man gunanta, IA enggo mpersembahken si merim si ngena ate Dibata” (Epesus 5:2).
Rende KEE 471 “Ermengkah Ukurku”
Ermengkah ukurku, ras ngataken bujur Tuhan Kelengi min aku, Kam Empu geluhku
Enda ngenca Tuhan persembahenku Kerina geluhku, kesah ras kulangku La kap lit bas aku erta kebayaken Si cukup meherga ’lah kupersembahken Sada ngenca Tuhan lit pemindonku Aloken min Tuhan persembahenku
Pakeken geluhku jadi perkakasNdu, segedang geluhku
Pertoton Persembahen & Sapaat
Tekad guna mengketi Tahun si Mbaru
Bapa/Nande: O Tuhan Dibata si mada kuasa, alu bulat ukurku kukataken bujur baNdu. Kubengketi tahun si mbaru alu dem pengarapen man baNdu.
Perp : O Tuhan, kerina kami erpengarapen man baNdu, i bas persadan ras Kam o Tuhan, mejuah-juah kami i bas mengketi ras ndalani tahun si Mbaru enda.
Kerina: Man Dibata saja kita erpengarapen, IA kap singkawali kita i bas kerina paksa-paksa kegeluhenta, tetap ukurta perban Dibata setia nemani kita. Amin.
Rende KEE 117:1-3 “Nggo Mentas Tahun Male e”
Nggo mentas tahun male e, Kam me ku puji Tuhan e Jaga kawali Kam tetap, tendingku ras dagingku kap
O Yesus Kam Penebusku, keleng ateNdu man bangku Tahun si mbaru enda pe, taruhken perpulungen e Ras kami min kataNdu e, man tendang ukur kami e Pedauh min k’rina dosa e, ras percuban si jahat e
Pertoton Tuhan
Renungen
“Ola mbiar, sabab Aku kap ras kam” (Jes. 41:10; Mrk. 4:40) Mbiar eme perasaan si sangat manusiawi. Labo lit ise pe manusia si la memiliki kebiaren. Emaka, mbiar e sifatna universal. La ngenen umur, jenis kelamin, ntah pe status sosial. Sibuat sada contoh, Joseph Stalin (Pemimpin Uni Soviet si diktator), kepe ia pe menyimpan ketakutan tersendiri. Ia nggeluh ibas bayang-bayang kebiaren bakal iracuni ntah pe ibunuh kalak. Perban si e, lit 8 (waluh) kamar inganna medem si terkunci seaman ruang penyimpanen sen i bank. Tiap berngi, pindah-pindah inganna medem, emaka la ise pe metehsa i ja ia medem. La kin siakap menyedihken bagenda? Sendalanen ras si enda, Ann Landers, sekalak konselor surat kabar terkenal, tiap bulan rata- rata ngaloken 10.000 surat. Janah si mbuena kal isi surat e nuriken kebiaren.
Tapi si menarik, lit sekalak peneliti ngatakenca bahwa 90% kerna hal-hal si
erbahanca kita mbiar situhuna labo pernah jadi. Uga dage situhuna ras searusna geluhta?
Tahun 2020 nandaken nggo ka 20 tahun erdalan kegeluhen bas Abad 21 enda. Manusiawi kal lit kebiaren bas geluh, tapi labo sieteh Pandemi Covid- 19 jadi bas tahun enda, si cukup cukup mpeturah kebiaren ras kearun ateta.
Erguapa ndia bas ukurta: uga nge masa depan jabunta, persekolahen anak- anakta, perdalinen pendahin/usahanta, perdalinen perpulungen/gerejanta, bahkan masa depan bangsa ras doni enda?
Anem pe manusiawi, tentu kebiaren labo arus sipelihara. Sabab, labo lit si lebih ngasup mematahkan semangat selain kebiaren. Ketakutan itu bisa memperhamba. Tapi seh i bas paksa enda, wari pengujung bas tahun 2020 enda kita lit uga litna keberadanta, ermengkah ateta, sikataken bujur man Dibata. Terlebih, mari kita erlajar arah kata Dibata si seh man banta berngi enda. Bahwa i bas kebiarenta e Dibata tetap ras kita, nemani kita, bahkan bertindak konkrit engkelini kita. Nina Dibata, “Aku kap ras kam, ola mbiar”
(Jes. 41:10). Kebiaren, sada sisi banci berdampak negatif. Tapi adi ikelola alu mehuli, arah kebiaren turah ukur si njemba kita reh rembakna ras Tuhan.
Kebiaren ntah pe perbeben si deban sijadiken sebagai batu loncaten gelah reh selketna kita ku Dibata, labo reh selpatna. Si enda banci jadi tentuna alu sada kata kunci, eme kiniteken. Nina Jesus man ajar-ajarNa i bas Markus 4:40
“Engkai maka kam mbiar kal? Langa kin kam tek?” Alu kiniteken enggo sidalani 365 wari tahun 2020 enda. Bage me pe alu kiniteken sidalani tahun si mbaru. Sabab kalak si tek ngasup ngidah peluang di balik tantangen. Tapi sebalikna adi la pake kiniteken, terjeng ancamen si teridah di balik tantangen.
Tek kita man Jesus si Mada kegeluhen, si ngatanken kita ndalani tahun 2020, siendesken geluhta bas ndalani tahun si mbaru 2021, si secara khusus
gerejanta netapken sasaren program eme “Anak si nguda jadi pasu-pasu”
(Generasi muda menjadi berkat). Anak si nguda labo terjeng pemilik masa depan, tapi pe masa kini. Kesempaten guna berkarya, guna majuken jabu, gereja ras masyarakat cukup mbelin faktorna bas peran generasi muda.
Mari sipakeken waktu alu mehuli, erlumba alu tutus, gigih, serius ras lit tekad si bulat. Berkarir, erdahin tutus, erkiniteken pe tutus. Ibas make waktu cuba si nen ku dirinta masing-masing enggo nge sipakeken kerina alu mehuli? Siingetlah, waktu e bergerak linier (lurus memanjang) labo siklus (erputar-putar ). Waktunta 24 jam/wari = 8.760 jam/tahun. Bicara ibereken Tuhan umurta i doni enda seh 70 tahun = 613.200 jam lit waktu nta i doni enda alu perincian: Waktu istirahat 6-8 jam (8 jam x 365 wari = 2.920 jam/tahun x 70 tahun = 204.400 jam istirahat, jadi lebih kurang sekitar 408.800 jam saja waktunta beraktivitas guna kegiatan rutin (ridi, erbaju, ersepatu, ersuri, rsd.), erdahin (ku kantor, kujuma, erbinaga, rsd.), penyaluran hobi (ngkawil, ercatur, rsd.) bagepe kebaktin (erMinggu, perpulungen jabu- jabu, PA Moria/Mamre, ku gereja, rsd). Nginget kerna kesempaten e labo lalap jadi sikerajangennta perlu kel kita ngergaken waktu siibereken Tuhan.
Berekenlah waktunta si khusus guna Tuhan, ula sisa-sisana sibereken. Janah siinget dingen sicikep padan Dibata, nina Jesus banta, “Aku tetap kap ras kam seh ku kedungen jaman” (Mat. 28:20b). Amin
