Digumpul sereta dikarang Gregory Nyanggau Mawar Diedit Pengajar Juspine Gani Illustrasi digaga Pengajar Richard Boon J. Timban

(1)



(2)

Semua kuasa nyelak dijaga. Sebarang bagi dalam bup tu enda tau disalin ngena jalai ti tau ditunda baru, sekalika nya ngena jalai elektronik, injin penyelak, injin begambar tauka sebarang jalai bukai, enti nadai pemendar ari Penulis empu.







Digumpul sereta dikarang Gregory Nyanggau Mawar Diedit Pengajar Juspine Gani

Illustrasi digaga Pengajar Richard Boon J. Timban

Perpustakaan Negara Malaysia Cataloguing-in-Publication Data, Ensera Anak Mit Vol.1 Ditulis Gregory Nyanggau Mawar, 2010-

ISBN xxx-xxx-xxxxx-x-x Published by Gregory Nyanggau Mawar, Lot. 7041, Lorong 10-1, Jalan Dato Permaisuri 5B, Bandar Baru Permyjaya, 98107 Miri, Sarawak, Malaysia

Email: [email protected] http://[email protected]

Printed by Yushan Company, Lot 1656 Piasau Jaya Industrial Estate,

98000 Miri, Sarawak, Malaysia

(3)

Acknowledgement

Enggau pengaga ati, aku meri besai terima kasih ngagai Pengajar Juspine Gani ke udah nulung aku ngedit ensera tu ngena jalai sepil Iban ke baru enggau Pengajar Richard Boon ke udah nulung aku ngaga illustrasi dalam ensera tu. Aku mega meri terima kasih besai ngagai Pengajar Padang Luna, ari Unit Bahasa Etnik, Pusat Perkembangan Kurikulum, Kementerian Pelajaran Malaysia ke udu meransang aku nusun semua kereban penemu asal, jerita lama enggau ensera Iban ke udah dipublish dalam weblog aku di http://gnmawar.wordpress.com/. Aku arapka bala anembiak kedudi hari nemu beguna ka kereban ke bisi ditu.

Pun Jaku

Munyi ku jaku sempama, ngedangka buluh belabuh ari tubu. Ngena jalai bensera, aku arapka bup tu ulih dikena ngepunka pengerindu bala anembiak belajarka jaku bansa Iban ari tingkat sekula baruh ngagai sekula tinggi. Jaku bansa Iban, penemu lama enggau main asal tu pesaka bansa ti besai bendar dikena urang ngelala bansa Iban. Nengkebang pengerindu bala anembiak bakatu, tau meri peransang ati ngagai sida iya ngembuan-nyimpan pesaka lama bansa Iban ngambika tau meruan diguna sereta mansang ngerembai ke dudi hari ila. Nambah ka nya, pesaka kitai tau meri pengangkun, pemegah ati enggau pengering diri ti meruan dikena nyerakup anak bansa Iban. Pengawa baka tu ukai baka urang ke ngerumban adan, tang dipupuk ba tiap-tiap serak turun kitai. Ari nya tadi, bansa Iban meruan besukungka diri sama diri awakka dikelala, dipandang tinggi sereta dipebasaka bansa urang bukai ke besaruk pendiau enggau kitai didunya tu.

Ensera tu siti jalai lama dikena bansa Iban ngenataika pelajar tauka penemu ngagai bala anembiak papak perenggang, sida ke mit lelachit benung mansang. Sida tu baru deka berengkah belajar sereta baru ngelala bemacham pekara ti nyadi didunya tu. Ari betusuika ensera, sida tau belajarka ulah ti patut nyadika teladan, sereta ngelala bagi ulah ti tau dititih.

Ensera tu endang cherita kelulu ti tau ngasuh bala anak kitai rindu ketawa, gaga ati, sinu ngenang, berasai takut sereta ngasoh bala anembiak belajar berunding kediri dalam semua pekara ti nyadi dalam pendiau sida. Ensera tau mai mayuh peragam ba ati anembiak sereta tau dikena ngerembaika akal sida iya dalam tiap-tiap tingkat pelajar enggau pendiau sida jemah ila.

Ensera ke ditulis ditu mega tau dikena meransang bala anembiak belajarka jaku bansa Iban awakka jaku Iban meruan ngerembai maju ari serak siti ngagai serak ke dudi agi. Enggau tu aku ninggalka segenteran dua jaku sempama ngagai bala pelajar anembiak munyi tu:

Dikelala bungai ari kayu, Dikelala buah ari langgu, Dikelala basa ari penyiru, Dikelala bansa ari jaku.

Enti bejalai betungkatka adat, Enti tinduk bepanggalka pengingat.

Arapka kita mujur dalam semua pelajar kita ngagai tikas ti pemadu tinggi awakka kita senang lantang ngidupka diri didunya tu.

_________________________

Gregory Nyanggau Mawar

(4)

TUSUN ENSERA

1. Indai Alui Nyadi Antu Lakak 2. Apai Alui Jaga Upih

3. Apai Alui Jadi Tukang Tujum 4. Indai Alui Abis Garam

5. Apai Alui Besilih Rumah Enggau Apai Umang 6. Apai Alui Nyumpit

7. Apai Alui Nan Abau

8. Apai Alui Ngaga Diri Nyadi Berakup 9. Apai Alui Mati Kentut

Jaku Peransang Ngagai Pemacha Anak Mit:

Baka nya penyiru jaku dikena besampi ngagai Petara,

Baka nya mega penyiru sada nyawa dikena meri basa ngagai apai-indai, Laban bebasaka apai-indai sebaka reti bebasaka Petara,

Endang adat kitai diatur Petara idup begulai sejalai, Minta Petara ngiring lalu ngemata,

Ari biak nyentukka kitai tuai,

Ngasuh kitai pandai bulih penemu dalam sekula, Awakka bisi pengidup ti menyana meruan nyamai, Nyadika teladan anak bansa,

Nyadika chuan anak kitai,

Nitihka arus pemansang dalam dunya,

Ke endur kitai besaruk diau begulai bedamai.

(5)

1. Indai Alui Nyadi Antu Lakak

Nyadi Apai Alui tu urang ke udu bendar rinduka pengawa nyumpit enggau berikan.

Laban nya endang batang pengidup sida sebilik kelimpah ari ke bumai betaun. Bisi sekali dia iya berunding deka ngasu ngagai kampung puang ti enda jauh ari tisi umai sida, laban bekau babi bisi bendar ngachau utai ti ditanam sida ba umai. Nya alai pagi hari siti, agi urap hari, dia Apai Alui lalu ngasuh bini iya Enchelegit berapi nyendiaka bekal dikena iya.

“Oh Indai Duat, berapi nuan nyangkungka bekal aku dia. Aku tu deka bejalai katas kia pagi tu,” ku iya ngerak Indai Alui.

Nyadi Enchelegit lalu nyaut, ninga Apai Alui ke deka nurun ngasu. “Pama agi nuan begiga ikan ke ulu Sungai Madu, endur ikan betelu nyaru, ngabu nyungkangka batang.

Nama guna nyumpit semina ngulihka kunchit ke mesai bulu mata,” pia ku Indai Alui nyaut.

Udah nya Indai Alui lalu angkat berapi surung jari, surung kaki. Jari nyau baka ke deka muar kesa, kaki nyau baka ke sengat semada. Asap melap datai di para asi pan lega, asap melap datai di sadau asi pan mansau. Asap melap datai di perabung asi pan ditanggung.

Udah asi iya mansau, Indai Alui lalu mungkus bekal ngena upih. Iya lalu nyimpan garam, belachan, semakau enggau daun gentu ke insap Apai Alui. Udah Indai Alui tembu ngaduka bekal, dia Apai Alui lalu mupuk nurun ngasu. Lebuh iya deka nurun, iya lalu ngangauka ukui iya ke benama Jela.

“Diiiiih Jela, dih-dih-dih-dih,” ku iya ngangauka ukui iya. Jela lalu kaung-kaung nguitka iku, ransing ati nitihka Apai Alui. Datai seduai iya ba tisau serarai dia iya lalu ninga nendak muak ke kiba, lepas nya lalu dibalas nendak tunga ke kanan.

“Oh! Manah burung tu,” ku ati Apai Alui, “laban nya burung surung Unggat, burung ngayuka manduk jelu,” ku iya bejaku kediri berandau nengali. Enda berasai iga iya bejalai ari endur iya ke ninga burung nya tadi, dinga iya tak nyerarat bunyi salak Jela.

“Jamah Jela jamah, jamah Jela jamah!” ku iya ngangauka ukui ia. Iya seruran nitihka tunga salak ukui. “Chih! Chih! Chih! As-Jela-as! as-Jela-as!” ku iya meransang ukui iya.

Enda lama udah nya, dinga iya nekus babi nya naanka salak Jela. Iya lalu beguai-guai belanda ngagai babi ti naan. Tang tak enda mukai-mukai kaki iya lalu tesangkut. Iya pan lalu bebaring belat lalu teberapka pun rutan duduk.

“Hah deh! Pachal ga kaki tu enda meda jalai!” ku iya muchau munyi Melanau nimbau bangkung. Iya lalu ngeransi ngentakka kaki diri empu, empa pemedis ati iya. “Akai!” ku iya ga engkakai, “Pedis endar kaki aku!”.

Udah nya iya lalu beguai kejingka angkat, lalu belanda baru, nitihka Jela. Bekal iya nyau abis tebarayan sabelah babas, empa pamendar iya ke belanda. Nyau kelama Apai Alui udah nitihka Jela, iya pan datai ga ba endur babi ke nanka salak Jela. Nya baru iya meda babi siku besai bendar. Babi nya nyau tekup-tekup disalak Jela ba ulu lebak. Udah nya Apai Alui lalu ngansak semak ke agi. Nyau umbas penyauh alai iya nikam, nya baru iya numbuk babi enggau sangkuh kebat, peda tak lalu chuit-chuit lekat ba rusuk kanan babi.

“Kena endar abi disalinting Apai Duat,” ku iya bejaku muji pengelandik diri empu. Udah babi nya mati, iya lalu nyabut sangkuh kebat iya nya tadi.

(6)

Gambar 1 - Apai Alui bulih babi

“Hah! Tu baru iya lagi!” ku Apai Alui gaga ati udah bulih babi. Udah nya baru iya mulaika diri mai bangkai babi. Bulih semaut pemanjai taring babi ke ulih iya nya tadi. Babi nya lalu disan Apai Alui segala-gala. Nyau bungkuk undang belakang Apai Duat kena tating babi ngemesai nya. Singkang kaki iya pan nyau changkuh, enda tentu lurus pejalai.

(7)

Lebuh iya nyan bangkai babi nya, dia iya lalu berunding enggai mai babi nya pulaika rumah tang ditinggalka iya ba tisau umai.

“Kapa aku kiruh nyan babi nya pulai, ngenyauh nya bejalai. Manah agi aku ninggalka iya ditu dulu. Malam lagi nya baru aku napatka iya baru,” ku Apai Alui bejaku kediri. Iya lalu ngengkah babi nya ba tisi umai sida lalu mulaika diri ke rumah.

Datai iya di rumah, sereta udah begari, iya lalu ngaga diri baka ke nadai bulih utai ga ulah iya. Iya lalu minta api dikena iya bekindu.

“Meri aku api nuan dia, Enchelegit, kena aku bekindu. Chelap bulu tu,” Ku iya ngangauka Indai Alui.

Enchelegit pan lalu pansut ga ari bilik mansang mai ungun api dikena Apai Alui bekindu ba bedilang iya, laban Apai Alui kumbai iya amat chelap bulu udah pulai ngasu.

Nyadi lebuh iya bekindu nunga bedilang iya dia, Apai Alui lalu ngulurka iku sirat iya ngagai api. Udah nya lalu ngangau ke Enchelegit baru. “Oh! Indai Duat! Indai Duat! Meri aku kayu mayuh ke agi, chelap bulu tu.” ku iya. Dia lalu ngaga diri digak-digak chelap.

“Heh! Iku sirat nuan angus apai.” ku Alui ngerara iku sirat apai iya empa api.

“Enda apa, aku chelap, lak ke angat agi,” ku apai iya nyaut anak iya.

Indai Alui pan lalu pansut ari bilik mai kayu seberekas mesai kisar lalu diengkahka iya semak bedilang endur Apai Alui bekindu.

“Kapa nuan kayu ngemayuh nya, Apai?” ku Alui nanya.

“Eh! Kena ke sengkilu. Dikena aku bira lagi,” ku iya nyaut.

Udah nya Apai Alui lalu nurun deka mansang bira. Nyadi Indai Alui, laban ke nemu bendar ulah Apai Alui, endang sangkaka iya bisi bulih babi ngasu tadi. Iya lalu berunding enggau Alui nengkilaka ulah apai iya ke nurun bira.

Nyau kelama Apai Alui udah nurun, nya baru Alui seduai indai iya nurun nitihka apai iya.

Datai seduai ba tisi umai sida, dia seduai meda api Apai Alui nyau melap-melap dikena iya emparu babi ulih iya ngasu.

“Nyah! Peda nuan Alui, endang amat munyi ku aku. Nya deh ulah apai nuan enggau kitai. Endang beduan kitai iya tu. Lagi tua malas, ngaga diri nyadi Antu Lakak tua. Iya takut bendar ke Antu Lakak,” ku indai iya nganu Alui

Udah nya Alui seduai indai iya lalu belalai ngaga diri nyadi Antu Lakak enda bangat jauh ari Apai Alui ke emparu babi. Dia seduai lalu bemunyi. “Lakak! kak! kak! kak! kak!. Meri pah sepiak. Enti enggai meri, peruti perut nuan lagi,” ku Enchelegit.

(8)

Gambar 2 - Apai Alui makai belalai kediri

(9)

Ninga Antu lakak bisi bemunyi minta babi semak iya dia, Apai Alui pan lalu tekenyit.

Labanka takut bendar ke Antu Lakak, dia iya lalu netak pah babi sepiak lalu ditikauka iya ngagai babas.

“Nyah, nya meh untung enggi kita, anang minta, anang nyanda agi!” ku Apai Alui.

Enda bangat lama udah nya, kira udah tembu Apai Alui emparu pah babi ke sepiak agi, bemunyi baru ga Alui seduai Indai iya. “Lakak! kak! kak! kak! kak!. Meri pah sepiak agi.

Enti enggai meri, keruk leka mata nuan lagi ngambika nuan buta enda meda.”

Ninga Antu Lakak agi minta babi munyi nya, Apai Alui pan lalu netak pah babi sepiak agi lalu ditikauka iya ke babas baru. Nyau ke suah Antu Lakak minta babi, tak enda berasai semua isi babi ke manah nyau abis diberi ngagai antu. Semina tinggal pala enggau perut babi agi ke ungkup Apai Alui. Semua isi bukai udah diberi ngagai Antu Lakak magang.

Alui seduai Indai iya pan mulai kediri ke rumah, mai babi babas ke ulih seduai ari Apai Alui tadi. Babi nya tadi lalu dibela sereta dipanduk Indai Alui ke sida sebilik di rumah.

Udah tembu Apai Alui makai pala enggau perut babi nya tadi, iya lalu mupuk mulaika dirika rumah. “Ah! Nya baru tembu endar nyawa tu,” ku iya bejaku kediri, gaga ati udah nengali makai pala enggau perut babi. “Nya baru nyamai nyengkilung baka sawa natka telan lagi,” ku iya berunding kediri deka tinduk ngenatka perut kenyang. Datai di rumah, iya lalu bekindu baru. Udah nya iya lalu ninduk ke diri. Lebuh iya ke tinduk, labanka udah kenyang makai babi, dia mulut iya lalu rangap-rangap tebuka. Indai Alui lalu nyungkit tinga iya, nyau bulih semangkuk batu pemayuh tinga iya disungkit Enchelegit.

Meda tinga ngemayuh nya, lalu dilulun Indai Alui nyau bulih seruas munti. Udah mansau lulun tinga Apai Alui, lalu dituang ke dalam mangkuk tachu. Pagi nya Enchelegit lalu ngumbai makai. “Makai Apai Duat! Makai kitai tu,” ku Indai Alui.

“Au, lapar perut tu,” ku Apai Alui nyaut. Nyadi mangkuk pansuh tinga diengkah ke Indai Alui semak chapak Apai Alui, lalu lauk ke manah nya diengkah ke Enchelegit semak seduai Alui.

Udah nya sama makai sereta meh sida tiga menyanak. Nama agi deh, nyau nyinuk Alui seduai indai iya makai, nyamah gumpal lauk nyamai.

“Heh ! heh ! heh !, seduai bedau ensepi utai ke nyamai ditemu aku demalam,” ku Apai Alui ketawa dalam ati diri sambil nyeling ngagai Alui seduai indai iya ke bedamai makai.

Apai Alui pan lalu berengkah ga makai, ngauk lauk ari tachu iya. Sepi Apai Alui lauk iya tak penat. “Oh, nama lauk tu tak penat asai Indai Duat?” ku iya. Enchelegit endang enda nyaut seleka mukut, enda malas sekali nimbas. Meda baka nya iya lalu nyepi lauk Alui seduai Indai iya. Sepi iya tak nyamai. “Nama lauk seduai tak nyamai deh? Lauk aku tak penat, nadai asai,” ku iya nanya Indai Alui.

“Enda nemu meh Apai Duat, sama belaukka lauk nya ga kitai,” ku Enchelegit.

“Enda ah, tak lain gamal enggi aku tu. Tak bau telu manuk banggar,” ku Apai Alui.

“Enggi seduai bisi kerat besai, enggi aku tak pamur baka sepur,” ku iya.

(10)

Gambar 3 - Nyungkit tinga Apai Alui

(11)

“Ehhhh! Nuan ga tambap-lap ansang ke lubang, alit lubang burit,” ku Enchelegit.

“Nama penambap aku? Ukai aku enda nemu asai lauk,” ku iya nyaut ngelaban Indai Duat.

“Nama utai ditanya ke nuan, tinga nuan meh nya, tinga nuan empu ke lauk nuan nya,”

ku Enchelegit madah ngagau Apai Alui.

“Beduan aku nuan Enchelegit,” ku saut Apai Alui. Gamal iya pan nyau gitik-gitik anak buah isi iya bai iya ngering kediri bejaku.

“Nadai beduan nuan kami tu, tang nuan ke beduan kami duai Duat. Nuan ga bam angam, nuan ke tambap lap. Nya meh nuan disemaka aruk-aruk burit kali, pagila lusa dudi hari, urang nemu malas. Nuan ke mungkal beduan kami nengali babi kediri enda nemu ngampitka bini-anak di rumah,” ku Enchelegit nyaut iya. Iya tak nyau chinang- chinang leka mata empa pemedis ati iya.

Ninga jaku indai Alui munyi nya, iya pan lalu tendu mimit bejaku, ngasai kediri endang amat salah deka nengali babi nya kediri. “Dini agi bisi babi! Udah dipinta Antu Lakak nya alai aku nadai mai pulai ke rumah,” ku iya bejaku sambil ngaru bulu pegu diri.

“Badu enda meh Apai Duat. Kami dua Alui ke ngaga diri nyadi Antu Lakak tadi, meda nuan bangat angam bam nengali babi,” ku Enchelegit.

“Ohhhh!!! bangkai seduai tu deh! Enti aku nemu nya seduai ke nyadi Antu Lakak tadi, anang ke isi, tunjing enggai meh aku meri,” ku iya nyaut. Tang iya nyau balat bendar udah maluka pengawa diri. Angkat iya ari nya, iya lalu nyau pansut ke ruai. Nyau semetup munyi pintu diempaska iya. Iya lalu enda makai agi, laban ke agi ringat bekau dikeduan Indai Alui tadi. Datai iya di ruai lalu gali bebungkur apus enggau pua tekalung.

Munyi ku jaku sempama, adat berumah betuntung temetung, adat ngasu bebagi semeliyung. Ari ensera antu lakak tu tadi, arapka bala pelajar ngelala pengawa ti tau nyadika teladan kitai begulai enggau diri sebilik. Semua utai ti dikemisi ke kitai endang manah dikunsika enggau diri sebilik. Ari nya tadi kitai belajar enda tau rangka enggau pangan diri sereta lalu nemu betulungka apai-indai, diri menyadi enggau urang bukai ke sama begulai pendiau enggau kitai. Kitai mega enda tau beduan diri sebilik tauka urang bukai. Baka sempama jaku ti nyebut, aruk-aruk burit kali, pagila lusa dudi hari. Reti nya, kitai anang dulu mungkal beduan urang, laban kedudi hari ila, enti urang nyau malas kitai, kitai tau mega pulai malu nyadi ke engkeramba urang bukai.

(12)

2. Apai Alui Jaga Upih

Nyadi Apai Alui tu endang sigi urang ke nadai tentu batang pengawa ti menuku dikerja tiap-tiap hari, kelimpah ari iya ti nyumpit, nginti ikan, nan bubu, manjuk enggau ngelakar urang kulu-kili. Bumai pan dikereja iya mega, tang ke lebih agi ngintu pengawa umai nya Indai Alui ke dikumbai Enchelegit. Nyadi bisi sekali lebuh umur Apai Alui kira agi biak, baru udah beranakka Alui, dia iya bisi nerima surat panggil Perintah ngasuh iya datai ngagai balai Pulis. Meda diri nerima surat panggil ari upis Pulis, iya lalu tusah ati laban iya enda nemu penyalah diri alai Pulis manggil. Hari siti iya lalu undur mai surat panggil ngagai kubu. Datai iya di kubu iya lalu nyuaka surat panggil nya ngagai kunsil.

“Nama penyalah aku tu Tuan Kunsil! Nama kabuah alai perintah tak manggil aku?” ku Apai Alui nganu kunsil. “Aku enggai ditekanka kita salah ngapa, laban aku nadai nemu penyalah diri” ku iya nampung jaku diri.

Udah nya Kunsil lalu nerangka kebuah alai Apai Alui ke kena panggil perintah.

“Ukai baka ni alai perintah ke manggil nuan Apai Alui,” ku Kunsil, “tang laban nuan ditemu kami gagah, berani, lurus ati serta bisi pemintar, tambah agi nuan endang penikar dalam pengawa main baka bekuntau enggau bepencha. Nya alai diatu perintah deka begunaka nuan ngambi nuan kerja nyadi jaga,” ku Kunsil madah ngagai Apai Alui.

Ninga munyi nya andal bendar meh ati tudah Apai Alui nya tadi. Iya nyau betempap pah sereta lalu muka bunga pencha mimit ba mua kunsil. “Ah deh, tu meh ke dikumbai urang nemu beliyung enda ngambuh, bulih tapang enda ningkuh,” ku Apai Alui bejaku kadiri.

Udah nya Kunsil lalu rakah-rakah ketawa meda ulah Apai Alui. Kunsil nya tadi lalu ngasuh iya betemu enggau Sap-Pulis ngambika Sap nya madahka ni maya iya belabuh kereja. Apai Alui lalu diuluka urang mata-mata siku, betemu enggau Sap-Pulis nya.

Lebuh seduai iya tama bilik, Sap-Pulis nya benung nulis.

Enda chechamang agi, laban ati ke udu gagit-gaga, Apai Alui lalu ngentakka kaki iya meri tabi ngagai Sap-Pulis nya tadi,

“Gud Muning tuan Sap!” ku Apai Alui nabi iya. Sap nya tadi lalu tekenyit bendar ati laban enda ngadang urang ke datai nya lalu nabi iya baka nya. Pinsil ti dikena Sap nulis lalu tepelanting ari jari iya. Urang mata-mata ke nguluka Apai Alui pan sama tekenyit sereta takut enggaika dianu Sap nya tadi. Udah lantang seput Sap nya tadi, nya baru iya ngasuh Apai Alui duduk.

“Du..du..dudok Apai Alui,” ku Sap nya, agi kesal, ngasuh Apai Alui duduk.

“Ting kiyu sar!” ku iya nabi Sap nya baru, sambil nudukka diri.

Udah nya Sap pan lalu bejaku enggau iya. “Nyadi nuan diatu Apai Alui diambi perintah nyadi mata-mata. Nya alai nuan pagila pukul lapan pagi niki upis, lalu belabuh jaga,” pia ku Sap madahka iya.

“Barang iya meh Sap,” ku iya.

“Kati nuan nemu surat?” ku Sap nanya iya.

“Enda aku nemu urang nya,” ku iya nyaut Sap. “Dini alai iya diau deh Sap?”

(13)

Nyadi leka jaku „surat‟ nya dikumbai Apai Alui nama urang.

Gambar 4 - Apai Alui betemu enggau Sap Pulis

“Ukai nanyaka urang ke benama surat aku,” ku Sap, “tang nanya enti nuan nemu macha enggau nulis surat,” pia ku Sap bejaku enggau Apai Alui.

“Diatu apin nemu aku,” ku saut Apai Alui. “Tang enti udah belajar pagila lusa nama kebuah nya enda nemu deh,” ku saut Apai Alui. “Jaku ngelis deh nemu mimit aku, taja aku nadai kala niki sekula. Ukai nya baka ke pedis ngelurka dilah,” ku iya ga nampung jaku diri.

“Badas meh nya enti nuan bisi nemu jaku English,” ku Sap. “Nya alai uji saut ulih nuan tanya aku tu,” ku Sap.

“Yiis sah” ku saut Apai Alui.

Tanya Sap baru ga iya, “What is your name?”

“No! No nem,” ku saut Apai Alui.

“Nyangka tak salah dinga Apai Alui jaku aku tadi," ku Sap berunding dalam ati diri.

Udah nya iya lalu nanya Apai Alui baru. “Where did you come from?” ku Sap nya nanya iya baru.

(14)

Saut Apai Alui, “U-rait! ku iya.

Ninga saut Apai Alui tak nadai senentang enggau tanya iya, dia Sap nyauka ringat-ringat ati. Mua Sap nyau bisi bebali merah. Nya alai iya lalu nanya Apai Alui baru, ku iya, “Are you foolish?”

“Ting kiu-yu sar” ku Apai Alui nyaut Sap nya baru. Apai Alui lalu ketawa rakah-rakah.

Kebuah iya ke ketawa, laban ku ati iya semua saut iya betul magang.

Nyadi randau seduai lalu enda setimbal bejaku ngena jaku English, laban Apai Alui semina nemu seleka dua jaku English. Leka jaku ke ditemu iya seleka dua nya tadi ukai utai ti patut dikena iya nyaut Sap, taja pan iya ngumbai diri ulih nyaut semua tanya Sap nya tadi.

Udah nya tadi Apai Alui lalu diasuh Sap sama diau begulai enggau urang mata-mata bukai ba rumah birik Pulis. Kejang iya deka tinduk lemai nya, dia Apai Alui berundingka jaku Sap ke ngasuh iya niki upih, “Nyelai bendar pengawa aku tu diasuh Sap, tak niki upih. Nyangka bisi guna iya upih nya,” ku iya bejaku kediri.

Apin jam pukul lapan pagi iya pan lalu dani, empungas mua, lalu begari. Ngeli iya endang enda kala diberus, semina engkurup ai aja. Udah nya Apai Alui lalu bejalai gining-gining ngiga pinang ke bisi upih. Iya lalu niki pinang ke semak rumah alai iya diau, lalu muai upih. Udah nya iya lalu mai upih nya ngagai Sap dikubu. Datai iya din lalu nyuaka upih nya ngagai Sap.

“Tu, upih ti diasuh nuan tiki aku Sap,” ku Apai Alui.

“Eh! Upih nama nya!” ku Sap tekenyit. "Nadai aku ngasuh nuan niki upih deh,” ku sap.

“Palui nuan tu! Nikika kubu tu asuh aku, ukai niki upih, nemu nuan?” ku Sap merak iya.

“Nemu aku tuan, nuan ga udah madah, nya utai dipadahka nuan nya ga utai dikereja aku,” ku saut Apai Alui.

Nyau kira seminggu Apai Alui udah bekereja gawa nyadi mata-mata, iya lalu diasuh Serejin ti nguasa sida jaga jam, laban maya nya nyau kena idar Apai Alui jaga.

“Pagila enti jam pukul lapan, palu enggau iya,” ku Sap

“Au Serejin,” ku iya nyaut Serejin. “Ukai nya baka ke pedis malu jam nya deh,” ku iya.

(15)

Gambar 5 - Nyuaka upih pinang ngagai Sap-Pulis

Pagi siti, Apai Alui lalu nurunka Upis. Tumu bendar iya nurun pagi nya, agi besebun ambun labuh, laban enggaika enda sempat malu jam. Lebuh jam bemunyi maya pukul lapan pagi, iya enda chachamang lalu dipalu iya enggau kayu belantan jam nya tadi.

“Nyah! Udah pukul lapan meh jam tu,” ku iya bejaku kediri.

(16)

Gambar 6 – Apai Alui Malu jam

Nama deh, nyau redak meh jam nya udah bekau palu Apai Alui. “Ukai Serejin enda nemu pengering aku deh, enti pasal bepalu, nadai kala dudi aku tu diambi urang,” ku iya ngedarka lengan sambil bejaku kediri.

Enda lama udah nya, Serejin pan lalu datai ga di Upis. Lebuh iya mansa ba mua pintu ti endur jam nya digantung, peda iya jam nyau redak bekau dipalu Apai Alui.

“Apo! Parai laban nuan tu,” ku iya. “Abis jam perintah dipalu nuan. Kati gila nuan, alai nuan malu jam baka nya?” ku Serejin nanya iya.

“Enda aku gila tuan, nuan ke ngasuh aku malu jam, enti iya udah bemunyi pukul lapan,”

ku Apai Alui nyaut Serejin.

“Ukai jam nya ke diasuh aku palu nuan, nyin besi digitang ba mua pintu, ke diasuh aku palu nuan enti jam mangkung pukul lapan,” ku Serejin. “Merinsa ga ngasuh urang ti beli baka nuan tu, enda nemu reti pengawa,” ku iya.

“Nuan nadai madahka aku ngasuh malu besi nyin, kati ku aku nemu malu iya deh. Aku tu urang baru masuk kereja, dini aku nemu utai ulu enggai ili, nya utai asuh kita nya ga utai dikereja aku,” ku Apai Alui nyaut Serejin.

(17)

Udah nya Serejin lalu nguingka mua iya ke bukai empa pemedis ati iya. Tang iya mega nemu diri silap jaku lebuh ke meri tugas ngagai Apai Alui.

Lebuh ditanya Sap, Apai Alui madahka Serejin ke ngasuh malu jam. Serejin pan madahka diri silap, laban enda madah ngagai Apai Alui enggau terang agi, lalu iya minta ampun ngagai Sap. Udah nya Serejin lalu diasuh nganti jam nya enggau jam baru. “Nya alai nuan Apai Alui sekiraka enda tentu salah, tambah nuan agi baru bekereja, laban nya aku agi ngampun nuan. Tang kagi tu ila, enti nuan apin tentu nemu reti pengawa ti diasuh urang, anang enda betanya enggau silik, anang terus ngereja utai enggau buta,”

ku Sap madah ngagai iya. ”Aku empu pan agi meh belajar ngatur pengawa enggau ngatur orang gawa, taja aku tu tuai ka kita ditu,” ku Sap-Pulis nya nampung jaku iya.

“Ting kiu yu Tuan! Laban nuan udah meri aku peluang belajar sereta gawa ditu,” ku Apai Alui. Iya lalu ngentakka kaki iya nabi Sap. Sap nya pan nyau mansang rindu meda gaya Apai Alui ti deka belajar sereta rajin ngerja utai ti diasuh iya. Iya lalu ngasuh Serejin dia ngemataka pemansang Apai Alui, awakka iya tau nyadi urang ti menyana lalu tau dikarapka Perintah ngerja pengawa jemah ila.

Lepas nya baru Apai Alui nyau mansang nemu gawa sereta betanyaka utai ti enda temu iya. Iya mega belajar macha enggau nulis, serta belajar ke jaku urang putih. Nyau manah jaku English iya. Ukai baka urang ke enda pintar deh tudah tuai enti diajar enggau chara ti betul. Iya endang sigi rajin betanya sereta ngereja pengawa, enda ibuhka urang ke ngumbai iya palui. Iya ukai baka urang ke kedil pending, enda ngasi tauka enda nemu maluka pengawa ti salah. Iya nyau enda ngamatka diri agi baka ke dulu sereta enda ngambat penemu urang bukai enti sida berandau, laban iya nemu taka penemu ti muat ungkupka diri empu. Semua pengawa diasuh urang, endang enda disakal iya magang, tak dikereja iya enggau likun. Iya mega enggai dikumbai urang lawa kerubung, semina bisi seregah, tang nadai penemu tauka pengelandik.

Lima taun udah nya, Apai Alui lalu ditikika urang ngagai Pangkat Koperal. Alui seduai Indai iya pan sama diau ba birik enggau Apai Alui. Pengidup enggau pendiau sida menyanak pan nyau mansang baka urang bukai. Alui pan nyau tau dianjung Apai iya masuk skula ti menyana, begulai belajar enggau anembiak bukai, nyentukka iya masuk universiti bulih degree.

Nyadi penemu ke dipelajarka kitai ari ensera tu tadi iya nya, nasib kitai mensia tau berubah nyadi manah enti kitai bisi pengelikun enggau pengerajin ngereja pengawa ti dikereja kitai. Nasib tu nadai milih gamal siku-siku mensia, tang iya deka ngubah pendiau urang ti rajin sereta pintar ngerja pengawa. Pengerajin enggau pemintar tu ulih dilatih tauka diansah kitai sehari-hari lebuh kitai nimba penemu di sekula tauka lebuh kitai udah bekereja jemah ila. Arapka bala anembiak rajin belajar sereta pintar dalam semua pengawa sida.

(18)

3. Apai Alui Nyadi Tukang Tujum

Nyadi sekali kelia sida Apai Alui sebilik belangkau nyembuah ba tebing tasik ari ili nengeri Raja Merom. Langkau sida menyanak mit, semina numbas endur sida tiga diau.

Pendiau sida tiga menyanak tu merinsa amat, kair pantuk baka pengidup manuk, kair sehari empa sahari. Suah mega sida menyanak ngelaung makai, laban nadai utai diempa. Kategal pendiau ti seruran *ngapung pupu bakanya, nya ti mun ke sida selalu bekuli ba urang bukai, ngiga pemakai. (*”ngapung pupu” tu jaku kelaung dikena nyebut urang ti seruran suntuk pemakai)

“Enda pia Indai Duat,” ku Apai Alui, “saritu aku deka ke pasar ngiga jereki.”

“Nama bansa jereki ti deka digiga nuan deh Apai Duat? Gamal ke baka nuan nya, anang arapka diri bulih utai. Indah urang ke pama agi pendiau ari kitai pedis tulih ke jereki,” ku Indai Duat bejaku. Laban pendiau ke endang seruran ngapung pupu, Indai Alui endang nemu Apai Alui nya nadai utai dikarap sereta nadai arah tuju dalam pengidup. Baka jaku sempama ti nyebut, arapka bubu pesuk, endang nadai jalai tau bulih utai tauka pengidup ke manah agi.

Apai Alui enda pedulika jaku bini iya Enchelegit. Taja pan pendiau iya bakanya, Apai Alui tu sigi urang ke bisi pengarap ba diri empu tulihka utai ti manah, seagi-agi iya beseput.

Iya lalu nurun bejalai ke pasar. Nyau kepuas iya ke bejalai kia-kia sebelah pasar ngiga jereki, enda ga bulih utai ti ku ati. Ensepi diri baka nya, iya pan lalu mulai kediri. Nyadi lebuh iya bejalai pulai ba rantu jalai, dia iya endang enda ngetu merening utai kiba- kanan, nyangka bisi utai urang berayan sebelah jalai nya dia. Nyau kepuas iya ti malik ke kiba malik ke kanan, nya baru iya tepeda ke puchung puang siti, garing-garing ba tisi jalai. Puchung nya lalu diambi iya, sereta lalu dibai iya pulai ke langkau.

Datai iya dilangkau, “Kati deh Apai Duat, bisi bulih jereki nuan tadi?” ku Indai Alui nanya iya.

“Bulih, peda nuan jereki aku tu,” ku iya mandang ke puchung puang ngagai Indai Duat.

“Keba nuan tambap,” ku Indai Alui, “Lain jereki ulih urang, lain ga jereki ulih nuan.”

Ninga anu Indai Alui munyi nya, iya endang enda nyaut seleka mukut. “Ukai nya bisi utai ulih, enti semina besaut ka leka jaku enggau pangan diri,” kenu ku ati Apai Duat dia.

Nurun iya ke tanah lalu ditekung-tekung iya burit puchung nya tadi, peda lalu pechah.

Udah burit nya pechah lalu diansah iya enggau batu ba senentang ti tajam.

“He! he! he!” ku iya ketawa kediri meda gamal butul nya tadi. “Nuan tu meh digela aku puchung rumpung burit, terupung tenung nasit,” ku iya bejaku kediri. Udah nya lalu disimpan iya dalam raga sandik iya.

Pagi siti, lebuh urang benung mayuh mansa jalai enda jauh ari langkau sida tiga menyanak, dia Apai Alui bediri ba tisi jalai, lalu nerupung utai ngena puchung rumpung burit iya nya. Terupung iya ke kiba, terupung iya ke kanan, ngaga diri baka ke bisi utai digiga. Sekeda urang ke mansa dia bisi lalu ngerara ulah iya.

“Eh! Nama utai diterupung nuan enggau puchung ngenyai nya, Apai Alui?” ku sida nanya iya.

“Cheh! Kita berani-rani ngumbai tu puchung jai,” ku iya. “Enti kita nemu, tu meh terupung diberi antu ke aku, digela puchung rumpung burit, terupung tenung nasit,” ku Apai Alui nyaut sida.

(19)

“Ni kami nemu nya terupung diberi antu ke nuan deh, enti nuan enda madah. Bah, Nama utai diterupung nuan dia deh aya?” ku sida ga nanya Apai Alui.

“Nya meh, demalam manuk sabung ke dikesayauka aku lenyau, dichuri urang. Aku ke nerupung tu deka ngiga endur bala penchuri ngelalaika iya,” ku iya nyaut, sambil kitau- kitau nguwing ka terupung iya kiba-kanan.

Enda lama udah nya, “Nyey! ... Nyin manuk sabung aku ke dichuri urang,” ku iya.

“Dilalai ke penchuri ba baruh jangkar pun kara ke ari atas pasar,” ku iya nunjuk ngagai tunga pun kara.

“Uji kami ga meda ngena terupung nya, enti amat bisi,” ku siku ari urang ke dia. Disua ke Apai Alui terupung nya ngagai iya. Lalu diterupung urang nya tadi ngagai tunga pun kara ti ku Apai Alui nya tadi, nadai ga iya tepeda ke manuk dia.

Gambar 7 - Nerupung ngena puchung rumpung burit

“Bah, nama aku tak nadai meda manuk deh? Pun kara nya deh enda ulih dipeda, anang ke manuk nya,” ku urang nya bejaku.

“Cheh! Dini kita ulih meda ngena terupung nya, kita ga enda sebulu enggau antu,” pia ku saut Apai Alui.

Ninga munyi nya, semua urang ke bisi dia, bela sama deka enggau Apai Alui ngabas manuk sabung iya ke dichuri urang. Nitihka jaku iya, manuk nya ditanchangka urang baruh pun kara. Datai sida ba pun Kara, amat bisi ga manuk dia, ditanchangka urang ba urat kara.

“Nyah! Peda kita,” ku iya, “Kumbai kita bula aku tadi. Kedudi hari ila, anang urang berani deka ngenchuri utai aku, kini-kini pan urang ngelalaika utai aku, temu aku meh.

Kita apin nemu sapa aku. Apai Duat tu!” ku iya nempap dada diri.

(20)

“Enti pia, tau meh nuan nujum urang ngenchuri utai,” ku urang bejaku enggau iya dia.

“Nya enda tusah akan. Tak sebarang maya utai kita lenyau tauka dichuri urang, padah aja ngagai aku, awak ke aku nujum iya. Enda kala lebu enti puchung tu agi ba jari aku,”

ku Apai Alui madahka bala mayuh dia.

Udah nya Apai Alui lalu mupuk mulai kediri ngagai langkau sida menyanak. Sida ti bisi enggau iya dia tadi lalu nyau mega majak ke pejalai diri. Semanuanya urang bekenangka pengawa Apai Alui ke tau nyadi Tukang Tujum. Lalu pia mega, sida lalu nusui pengawa Apai Alui ngagai urang menua bukai ti bisi enggau sida betemu. Enda lama alai urang menua nya nemu rita Apai Alui ke landik nujum.

Kira dua-tiga hari udah bekau nya tadi, bisi siku urang ke diau semak menua nya, bisi serabana ke diri lenyau kambin sepuluh iku. Urang ke diau sebelah nya lalu ngasuh iya minta tulung Apai Alui, ngiga endur urang ngelalaika kambin iya ke lenyau nya.

“Anang tusah kita,” ku sida. “Enti kambin kita dichuri urang, uji padah ke Apai Alui. Iya pandai amat nerupung sereta nujum utai lenyau,” ku sida. Ninga berita nya, urang ke bempu kambin pan lalu madahka Apai Alui, ngasuh iya ngiga kambin sida ke lenyau.

Nyadi Apai Alui pan nadai ga beleman nyanggup nulung sida ngiga kambin sida ke lenyau, enti sida setuju ka upah iya.

“Upah aku ngiga utai kita ke lenyau, enti aku tetemuka,” ku Apai Alui, “siku kambin tiga ringgit upah. Enti sepuluh iku kambin ditemu magang tiga puluh ringgit upah,” ku iya.

“Enti kita besetuju ke upah nya, nyadi meh aku ngiga,” ku iya. “Enti kita enda besetuju, enda mega aku nyadi nerupung,” ku iya nganu urang ke empu kambin. Urang ke bempu kambin nya nadai beleman madahka diri setuju engau penyampau upah ti dipinta Apai Alui nya tadi.

Ninga saut urang ke bempu kambin udah setuju, dia Apai Alui lalu nyengkau terupong rumpung burit iya ari raga ke selalu dikena iya mindah ngiga jereki. Iya lalu ngaga diri malik ngagai matahari idup, udah nya mutar ngagai matahari mati. Mulut iya dipeda kulap-kulap bejaku, tang enda tentu didinga leka. Udah nya baru iya ngedarka puchung rumpung burit iya dia. Terupung iya kia-kia, nadai ga tepedaka kambin ke lenyau. Nyau kelama baru iya nuju ke terupung iya ngagai Pulau Pendam Iban, dinga sida tak manjung Apai Alui. “Apu! Nyin bala kambin kita, ditanchang ke urang ba tisi Pendam Iban muak ari ili. Nasit bendar apin ditabanka urang jauh,” ku iya.

Udah nya, sida pen sama lalu ngabas ngagai pendam ti ku iya. Datai din, peda sida amat, tak nyau tekasak bala kambin sepuluh iku ditanchangka urang ba anak kayu sebelah tisi pendam. Gaga meh urang ke empu kambin meda bala kambin udah temu.

Sida lalu nyuaka upah ti udah disemaya sida enggau Apai Alui. Sida lalu pulai mai kambin, lalu Apai Alui pen pulai ga ngagai langkau sida menyanak.

Iya ke pulai tu, kenu ku leka ensera tak nyau betanda iya serantu jalai gagaka diri bulih duit ngemayuh nya. Datai iya dilangkau. “Nyah! Peda nuan Enchelegit nangga langit, Enchelegi nangga hari. Peda nuan Indai Duat, Indai Digat,” ku iya, ”Nuan suba ngumbai aku tambap, ngumbai aku lap, meda aku bulih jereki lain ari enggi urang. Enti nyau suah agi ila tentu kaya kitai menyanak,” ku iya bejaku enggau Enchelegit. Indai Alui enda bermunyi ninga iya munyi nya.

Nya meh gaya pengawa Apai Alui ngiga pengidup ke sida menyanak. Udah lepas pengawa tu tadi, agi suah iya diasuh urang ngiga utai lenyau. Semua utai urang ke lenyau pan nadai enda temu iya magang. Pia mega pengidup tudah sida menyanak bisi bendar insur. Semua bala penchuri endang nyau takut bendar ke Apai Alui.

(21)

Tang kita ke nembiak, anang saru ke pengawa Apai Alui ti baka nya. Lebuh malam hari iya berengkah ngenchuri utai urang, lalu dilalaika iya ba sebelah babas, sebelah kampung enggau sebarang endur bukai. Iya ngelalai ke utai urang ke dichuri iya awakka nyamai iya nujum ngena terupung rumpung burit. Udah nya lebuh urang ngasuh iya nujum, dini iya enda nemu endur, ga iya empu ke ngenchuri lalu ngelalaika semua utai nya.

Nyau kelama udah nya, dia deh bisi siku Raja ke benama Raja Abu ke diau diseberai tasik besai, ti jauh ari menua Raja Merom. Raja nya lenyau tinchin. Iya sayau amat ke tinchin iya nya, laban tinchin iya nya bemataka batu gemala. Ari tinchin nya meh terubah peturun iya nyadi Raja, lalu tinchin nya nyadi ke pesaka besai peturun Raja menua nya.

Udah tinchin nyau lenyau dichuri urang, dia Raja Abu enda ngetu begigaka urang ke pandai tenung. Bala beliau enggau manang sama-sama udah nguji mai batu tenung, batu karas dikena sida nujum urang ke ngenchuri tinchin Raja nya tadi. Siku pen nadai ari sida nya tetemu ke tinchin Raja Abu nya.

Nyau kelama udah nya, Raja Abu pan bisi ninga rita urang siku ari nengeri Raja Merom ke pandai amat ngiga barang urang ke lenyau. Ninga rita nya, Raja Abu lalu ngasuh Jeragan kapal dua iku ngambi tukang tujum nya ari nengeri Raja Merom, ngena kapal iya ke pemadu besai. Berita Apai Alui ke landik bendar nujum tu endang lama udah didinga urang ari menua bukai.

Raja Abu amat tusah bendar ati sereta udu ringat meda tinchin iya lalu enda ditemu. Iya jampat ngeransi lalu mua iya suah berapi-api kenu ku gamal, enti iya ringat bendar.

Bala pemesai nengeri nya enda berani siku bejaku enti maya iya ke ngeransi. Nya kebuah iya berat bendar ngasuh jeragan dua iku nya, enda tau enda mai Apai Alui datai ngagai Astana Raja. ”Enti iya enggai datai enggau kita, bunuh iya! Enti iya deka enggau, tang enda tetemu ke tinching nya, iya mega deka dibunuh! Tang enti iya mujur lalu tetemuka tinchin nya, aku deka meri iya kapal besai sebuah, diisi penuh enggau barang reta tengkira, nyadika upah iya. Enti seduai enda mujur mai tukang tujum nya kitu, seduai pan kena ukum mati enti seduai pulai ila,” ku Raja nya bejaku enggau Jeragan dua iku nya. Ninga Raja Abu munyi nya, seduai iya pan takut lalu beguai besikap lalu ngerah bala kelasi, mai sida angkat belayar ngagai menua Raja Merom.

Datai sida ba menua Raja Merom, serta udah sangkai ba pengkalan, sida lalu terus bedarat nuju langkau Apai Alui. Sida Apai Alui sebilik lalu tekenyit meda bala temuai ti enda dikelala tak lalu nikika rumah sida menyanak. Enda nganti Apai Alui nanyaka pejalai, sida lalu nusui pejalai diri ti diasuh Tuan Raja menua sida ngambi Apai Alui nujum tinchin Raja ti udah lenyau. Jeragan nya lalu nusui jaku Raja Abu pasal ukum enggau upah ti deka diberi Raja nya ngagai Apai Alui.

Ninga jaku temuai ngemeratnya munyi, tusah deh ati Apai Alui. Nyau sema ka baka buah ilang ulu tudah Apai Alui, diempa parai apai, enda diempa, parai indai. Iya lalu madah ke diri enda ulih enggau sida mindah.

Ninga saut Apai Alui munyi nya, sida lalu deka munuh iya. ”Enti nuan enggai enggau kami, manah agi kami munuh nuan, laban kami mega tentu kena ukum bunuh, enti kami pulai puang ila,” ku bala Jeragan

Nyau nadai mua agi kenu ku gamal Apai Alui ninga jaku Jeragan dua iku nya tadi, empa pengesal ati iya din. Tang ati jeragan dua iku nya tadi endang enggai munuh Apai Alui, laban seduai iya tentu dibunuh Raja Abu enti seduai iya pulai puang ila. Seduai iya pan sama-sama abis akal, enda nemu daya agi.

(22)

“Tu parai aku Indai Duat dibunuh urang. Aku madah ke diri enda ulih enggau sida, deka dibunuh sida ga aku. Enggau pan aku lagi, enti aku enda tetemuka tinchin Raja, deka dibunuh Raja ga aku. Dini alai aku tau idup deh?” ku Apai Alui.

“Kasih meh nuan Apai Duat, Apai Digat, dibunuh urang. Sapa ke nupi, sapa ke nengkani, sapa urang ngidup ke kami dua menyanak ditinggalka nuan parai enggau urang ke gensarai redak tanchang? Keba aku ngerara nuan suba, enda ngasuh nuan ngereja pengawa mayuh macham. Nuan endang enda bedulika jaku tagang aku,” ku Indai Alui.

Gambar 8 - Sebuah kapal besai sangkai

Udah nya Apai Alui lalu bejaku kediri enggau Indai Alui. “Aku diatu teulihka runding siti, enti kapal ke dikena aku nyau nadai dipeda ari tebing, dia seduai Alui lalu nunu langkau

(23)

kitai tu. Ari kapal aku lalu ngaga diri nerupung tunga kitu. Aku madahka langkau kitai angus, tentu sida deka dibai aku nikal, lalu enda nyadi enggau sida,” ku iya.

Udah nya nyau meh Apai Alui belayar dibai Jeragan kapal nuju negeri sida. Iya nyau nadai dipeda agi tebing, dia Apai Alui ngaga diri nerupung ke tebing.

“Apu! Parai meh bini anak aku din Jeragan,” ku iya. “Peda nya langkau kami menyanak udah angus empa api. Tu enda tau enda nikal kitai,” ku iya.

Ninga munyi nya, lalu diputarka Jeragan kapal sida, sereta lalu nikal baru ngagai nengeri Raja Merom ngabas pengamat jaku Apai Alui. Datai ditebing, peda sida Jeragan amat udah retung langkau sida Apai Alui diempa api. Apai Alui lalu madahka diri enda nyadi enggau sida mindah, laban nadai ngaga langkau ke sida menyanak. Nyadi Jeragan nya tadi enda ulih disempia ke iya ngapa. Jeragan dua iku nya lalu ngerah semua bala kelasi, ngasuh sida ngaga rumah baru ka Apai Alui.

Nama agi deh, dua hari lepas nya lalu tembu deh rumah Apai Alui digaga sida. Rumah ga besai dua tingkat, semua geladak papan magang, dinding papan, atap tebilian magang. Baruh rumah disemin magang. Nyau malu semua urang ti diau bekelingi dalam negeri nya meda pemanah rumah Apai Alui digaga bala kelasi.

Udah tembu rumah, dia Apai Alui lalu dibai urang belayar baru. Nadai akal agi dikena iya mai sida nikal baru. Iya pen nyau tusah ati baru ngenang diri ti deka dibunuh Raja.

“Manah, besai pan rumah, enti kitai ke bempu lalu mati, nadai meh guna,” ku ati iya dalam nyin.

Lemai siti, kena iya ngelantangka ati diri, dia iya duduk ba perabung kapal. Mua iya tunga ke luan. Iya ngaga diri nerupung utai kiba-kanan. Terupung iya kia-kia. Nyau kelama iya ke bemain enggau terupung iya, dia iya tepedaka burung Lang dua iku terebai bebintih-bintih tinggi dilangit din. Meda burung nya bebintih iya lalu bejaku gut- gut kediri.

“Enti enda iya ke burak, iya ke chelum ga alah. Enti enda ke chelum, iya ke burak ga alah,” ku Apai Alui bejaku.

Iya ke bejaku nya tadi betul-betul ari belakang Jeragan dua iku ke benung ngemudika kapal sida. Dia Jeragan siku ninga jaku Apai Alui munyi nya, Iya lalu nyitul pangan iya enggau siku. “Dinga nuan buat, utai ke disebut beliau nya. Enti enda ke chelum, iya ke burak ga alah,” ku Jeragan nya bejaku.

Jeragan dua iku nya nyau rawan ati ninga jaku Apai Alui munyi nya, laban seduai iya enda meda burung ke diterupung Apai Alui ari dalam kapal. Nyadi bulu lang siku nya chelum, lalu bulu iya ke siku agi nya burak. Nya utai ke dirara Apai Alui, enti enda chelum menang, burak ga menang. Nyadi pekayan jeragan dua iku pan bakanya ga, siku ngena pekayan chelum, lalu siku ngena pekayan burak, setimbal enggau bulu burung lang dua iku ke terbai nya tadi.

“Nyah! Dinga nuan buat, udah temu iya tua enchuri tinchin Raja. Manah tua minta ampun ngagai iya aja, enti enda, tentu tua parai dibunuh Raja,” pia ku jaku jeragan siku.

“Amat nya. Manah tua meri tinchin nya ngagai Apai Alui. Udah nya tua minta tulung iya anang ngasuh iya madahka Raja, tua ti udah ngenchuri tinchin nya,” ku saut Jeragan siku ga. Ninga Jeragan nya bejakui munyi nya, tak lalu diputarka Apai Alui burit terupung iya nuju jeragan dua iku nya, sereta lalu nyebut enggau nyawa ke inggar amat munyi tu.

(24)

“Ohhhh .... Nya iya, enti enda burak, chelum ga alah, enti enda chelum burak ga alah,”

ku iya.

Nyau asaika dipandam dada seduai iya meda ulah Apai Alui bakanya. Tak enda ulih tat ke agi ati seduai iya, laban ngumbai Apai Alui udah nemu seduai ti enchuri tinchin Raja.

Dia seduai lalu beguai ngasuh Apai Alui duduk ngimbai seduai iya dia, lalu bejaku enggau iya.

“Akai rai Aya Beliau, kami duai tu minta ampun sereta minta tulung nuan meh aya Beliau,” ku seduai iya. “Amat pandai nuan nujum barang urang ke kena churi. Mayuh bendar beliau enggau manang udah ngiga urang ke ngenchuri tinchin Raja nya, tang siku pen nadai ga udah tetemuka urang ke ngenchuri nya. Amat kami dua tu meh ke enchuri tinchin Raja nya. Nya alai kami duai mai nuan bepakat. Anang madahka Raja, enggaika kami duai dibunuh iya,” pia ku jeragan dua iku nya.

“Nyey ... Aku sigi udah nemu,” ku Apai Alui. “Keba aku lembau dibai seduai betemu enggau Raja, laban aku nemu, sigi seduai ke enchuri tinchin Raja. Diatu tak semadi seduai udah mai aku bepakat, nadai ku enggau meh. Kasihka seduai, enggaika dibunuh Raja,” Ku Apai Alui.

Apai Alui lalu ngajar Jeragan dua iku nya, ngasuh seduai iya ngelalaika tinching nya.

“Tanchang seduai tinchin nya enggau benang mirah. Udah nya benang mirah nya tanchangka ba urat kayu dalam pegung ari atas padang ba belakang Astana Raja. Atas pegung ke endur seduai ngelalaika tinchin gaga ke tanda,” ku Apai Alui.

Udah nya lantang meh ati Jeragan dua iku nya, nemu diri enda dibunuh Raja, ninga Apai Alui deka dibai bepakat. Nyau asaika baru lepas ari nyawa baya kenu ku jaku sempama.

Lemai siti, maia matapanas nyau deka padam sida pan datai ba negeri Raja ke nyau tinchin. Apai Alui lalu melitka sirat kanggan iya lalu mai terupung puchung rumpung burit. Raja endang udah nganti Apai Alui ba penyangkai kapal. Datai dia, Apai Alui lalu dibai Raja terus ngagai Astana. Lemai nya udah tembu makai, mayuh utai dikerandau enggau Tuan Raja.

“Kati nuan deka ka langkau?” ku Tuan Raja nanya Apai Alui.

“Eh! Enggai aku Tuan Raja,” ku saut Apai Alui, “Besai langkau aku din. Ukai langkau agi nyau rumah tegap enggi aku nya dia.”

“Ukai rumah ku aku. Kati nuan deka ngirup arak chap langkau?” Ku Raja nya nandu jaku iya baru.

“Arak deka aku, nya endang utai di irup aku dimenua kami din,” ku iya.

Tuan Raja lalu mai iya ngirup langkau mimit. Lebuh Raja ngenang pasal tincin iya ke nyau, dia Apai Alui enda ngasuh iya tusah ati. “Pagila aku nerupng tinchin nuan nya, iya tetap temu aku,” Ku iya.

Nambahka nya, Raja madahka Apai Alui mega, enti iya enda tetemuka tinchin nya, iya deka dibunuh. Enti iya udah tetemuka tinchin nya, iya deka diberi Raja kapal besai sereta sarat di isi enggau reta tengkira. Udah nya laban nyau jauh malam sida lalu tindok.

Pagi siti udah sida dani, Apai Alui lalu dibai Raja makai pagi. Udah badu makai, Apai Alui lalu pansut ngagai luar Astana, lalu ngaga diri nerupung utai sabelah nya dia. Tujuka iya ke atas, tujuka iya ke baruh ga terupung rumpung burit iya nya tadi, gilikka iya ga pala iya. Nyau ke lama udah nya baru iya nerupung tunga ngagai pegung ke ari atas padang

(25)

Astana Raja. Tuan raja seruran baka buah kundong mata empa pemedis ati iya meda tinchin lalu nadai temu, endang ati deka munuh Apai Alui gamal iya.

“Oh! Ampun Tuanku, anang tusah nuan! Nyin tinchin nuan dilalai ke penchuri dalam pegung datas din, sereta ditanchang ke ngena benang mirah ba urat kayu dalam pegung,” ku Apai Alui.

Gambar 9 - Tetemuka endur penchuri ngelalaika tinchin Raja

Ninga munyi nya Raja lalu mai Apai Alui enggau bala iya bejalai beguai-guai ngagai pegung. Datai dia, “Nuan ngumbai tinchin aku dilalaika penchuri dalam pegung tu, ba ni senentang iya ditanchangka penchuri dalam ai din?” ku Raja nanya Apai Alui. Lebuh ke bediri ba tisau pegung, Apai Alui endang udah meda tanda ke digaga Jeragan.

“Tu senentang iya Tuan Raja, Asuh soldadu nuan nyelam iya bejimat-jimat enggai ke kena indik sida. Utai nya alus,” ku iya. Siku soldadu lalu diasuh Raja nyelam. Digama iya begadai-gadai dalam ai, sepi iya amat bisi utai asai tinchin kena sagam iya, ditanchangka urang enggau benang mirah dalam ai din. Dibuka soldadu begadai-gadai

(26)

tali benang mirah. Udah nya baru iya mai tinchin nya pansut. Peda tak amat tinchin Raja ke lenyau sereta ditanchang ngena benang mirah, munyi ku padah Apai Alui.

Nyangka tak enda brasai agi pengaga ati Raja, lalu manjong meda tinchin iya udah ditemu. Enda nemu agi jaku Tuan Raja nya muji Apai Alui. Apai Alui enda bemunyi dipuji Tuan Raja, samina naka tuchom tekura aja, enggai tak ngayan ka pengaga ati diri ke bulih reta tengkira ari Raja nya. Raja pan enda ga bula ke samaia lalu di isi iya kapal besai sebuah enggau reta tengkira enggau macham pesaka ke lama-lama, ke mana- manah. Pia mega pamayuh duit diberi Tuan Raja nyau sarat kapal. Raja lalu ngasuh Jeragan enggau kelasi nganjung Apai Alui pulaika menua iya empu ba negeri Raja Merom.

Datai ba menua diri, dia Alui seduai indai iya Enchelegit Nangga Langit, Enchelegi nangga hari nyau tekenyit meda reta tengkira, duit mua pemayuh enggau kapal sebuah ke ulih Apai Alui.

“Enda sangka aku Apai Duat, Apai Digat ke utai tau nyadi baka tu. Dikumbai kami duai Alui udah mati nuan ngelamatu. Tiap hari kami duai Alui nyabak ke nuan. Enda nemu nya nuan pulai mai keresa tengkira ngemayuh tu,” ku Indai Alui.

Enda tentu tindok sida menyanak malam nya berundingka pengereja diri baka nya.

Tumu pagi hari siti Apai Alui ngambi terupung puchung rumpung burit lalu dipechahka iya. Udah nya ditunu iya ba api. “Nuan tu ke nyau deka mai aku mati ngelamatu. Nuan tu udah aku tunu. Badu meh urang ngambi aku nerupung barang urang ke kena churi.

Diatu aku nyau udah kaya. Manah agi ti kami duai Alui jadi Jeragan bejalai ke kapal,” ku Apai Alui mutap kadiri. Barengkah ari nya, Apai Alui seduai Alui pan lalu bejalaika kapal meraka tasik ke begilik linggang Gumbang, bedajaka barang ari menua siti ngagai menua siti. Lantang meh pengidup sida menyanak nguan menua.

Ensera tu tadi ngajar kitai bakenaka pemintar ngemansangka pendiau diri empu. Kitai mesti bejimat bejaku tauka ngepun ka kerja, enggai ka kitai kena sintak amba diri empu. Reti nya, kitai empu tau bulih pemedis ari ulah tauka jaku diri empu. Lalu nalesaika pengawa tauka mulaika jaku diri empu nya utai ti pemadu iya pedis dikerja, laban kitai nadai nemu endur nyurukka mua kitai agi, ngenat ka pemalu. Tu mega nyau deka sama reti enggau jaku sempama, ngambi kayu dikena mangkung pala diri, ngerja pengawa ti tau mai penusah ka diri empu. Bala anak-anak mesti sikar nalesaika penusah tauka penanggul dalam pengidup sida awakka pengidup sida tau mansang sereta nyadi urang ke beguna enti udah besai jemah ila. Pemintar kitai mega mesti dikena enggau betul enggaika mai penusah ngagai kitai empu. Nya kabuah kitai mesti nemu ngelala, nemu mida entara ulah ti manah enggau ulah ti enda manah enggaika kitai nyadika engkeramba urang, lalu urang deka ketawaka ulah kitai ti enda menyana.

Ari ensera tu, kitai tau nemu reti jaku sempama ke nyebut ”baka akal Apai Alui”. Reti jaku tu, madah ka urang ti ngena akal ti beli, akal ti tuyu tauka akal ti manchal dikena ngerja pengawa, tang akal nya teulihka asil ti menyana ke tau diguna kitai, lalu pulai ka pemanah. Nya alai akal tu beguna bendar dikena kitai ngerja pengawa awakka pengawa kitai mudah diputar lalu mujur dikerja. Endang sigi adat anak mensia, sapa bisi agi akal, nya meh lebih agi pintar sereta sikar dalam semua pengawa, lalu maju agi pendiau tauka tebilang agi berita ari urang bukai ke nadai akal. Taja pia, kita enda tau sekali-kali jai akal lalu semina deka nipu tauka ngemediska urang aja. Kita mesti ngena akal kita enggau betul sereta lurus.

(27)

Gambar 10 - Apai Alui sebilik jadi kaya

(28)

4. Indai Alui Abis Garam

Nyadi Apai Alui tu endang urang ke pintar bejaku dalam menua nya. Tang taja iya pintar baka nya, suah mega iya saru pengawa dikereja tauka saru jaku dipansutka ngagai urang. Suah mega iya empu ke salah anggap ka tuju jaku orang bukai, laban runding enggau penemu iya ti nyelai agi ari urang bukai. Kadang-kadang, lain utai disebut urang, lain ga utai dikerja iya.

Nyadi tumu pagi siti, dia Enchelegit Nangga Langit, Enchelegi Nangga Hari, bini Apai Alui angkat berapi pagi ke sida sebilik. Lebuh asi udah mansau, dia iya lalu berengkah mela tubu ke lauk pagi nya. Udah tembu mela tubu, nya baru iya ingatka garam sida udah abis.

“Oh Apai Duat, abis garam aku tu,” ku iya bejaku kediri berandau nengali. “Nama penyadi tubu tu nadai garam kena ngulai.”

Ninga indai Alui bejaku kediri, dia deh Apai Alui lalu nanya, “Nama utai dikerandauka nuan, Enchelegit?”

“Eh! Kitai nadai agi garam. Manah nuan nemuai ngagai sida indai di Panggau minta garam,” ku Indai Alui.

“Nama guna enggau garam deh?” ku Apai Alui nanya

“Eh! Dikena aku ngerami paku tubu,” pia ku saut Indai Alui.

“Au! Lagi meh aku minta garam,” ku Apai Alui.

”Lalu minta kain ga nuan ba indai din lagi,” ku Enchelegit ngangau ari dapur.

”Kapa nuan kain deh?” ku Apai Alui ga nanya.

”Eh .... kena aku nampal tanah merekah meh, dini nya bisi dikena bukai,” ku Enchelegit nyaut.

Udah nya angkat iya lalu begari. Pasukka iya baju bisi charik, pasukka tanchut bisi rubik.

Belitka labung gari batik. Tangkin duku jungkang tarik.

Udah tembu begari, lalu nurun meh tudah tuai. Nyadi rumah sida mentua iya numbas ga penyauh ari nya. Enda tentu berasai iya bejalai lalu datai. Dia iya lalu niki ke rumah sereta napatka ruai sida mentua iya, lalu terus tama ke bilik. Iya lalu nudukka diri di bilik.

“Akai rai! Lelak aku tu bejalai,” ku iya nyapa mentua iya.

“Oh! Nama kabuah nuan bangat ngenumu nya deh, Apai Duat? Nama utai dipeguaika nuan?” ku mentua iya nanya.

“Es! Nadai kebuah bukai, semina diasuh Indai Duat minta garam kena ngerami paku- tubu enggau kain kena nampal tanah merekah,” ku saut Apai Alui.

“Au, Apai Duat,” pia ku saut mentua iya. Udah nya lalu ditungkuska mentua iya garam enggau kain kangan siti, lalu disimpan dalam ma Apai Alui. “Nya, Apai Duat udah aku simpan garam enggau kain ba ma nuan,” ku mentua iya.

“Au, manah meh nya. Enti udah, aku mulaika diri dulu,” ku Apai Alui.

(29)

Udah nya iya lalu mulai kediri. Di rantau jalai iya ke mulai kediri, dia iya mansa madang paku. Lama iya ngenung dia. “Oh, nya madang paku, tentu paku nya diasuh Indai Alui gerami aku garam,” ku iya bejaku kediri berandau nengali. Iya lalu ngambi upih ari ma iya, lalu digerami iya madang paku ngena garam nya.

Angkat iya ari nya, lalu datai ba tanjung madang perin rigai, peda iya tubu mayuh bendar nyumbuk sebelah nya dia.

“Bah! Nya madang tubu! Tentu tubu nya ke diasuh Indai Duat gerami aku ngena garam,” ku iya bejaku kediri berandau nengali. Iya mega lalu berengkah ngerami tubu dia datai ke garam iya abis.

“Nya baru tubu tu masin ila, udah digerami enggau garam,” ku iya bejaku kediri, gaga ati ke pengawa diri udah tembu.

Gambar 11 – Apai Alui Ngerami tubu enggau garam

Udah tembu ngerami paku enggau tubu, iya pan lalu mulai kediri ke rumah iya empu, ari ili Nanga Panggau. Datai iya ba tebing ai semak rumah sida, dia iya lalu meda tanak bisi merekah.

“Bah, ditu meh alai ke bisi tanah merekah. Nyangka tanah merekah tu ke deka ditampal Indai Duat,” ku iya bejaku kediri. Nama agi deh, lalu dicharikka iya kain kangan tadi lalu ditampal ka iya ngagai tanah ke bisi merekah sebelah nya dia.

(30)

“Nyah, ukai nya pedis nampal tanah merekah. Nya baru nadai meda tanah merekah agi,” ku Apai Alui gaga ati bejaku kediri, meda pengawa iya udah tembu.

Datai iya di rumah sida empu, hari pan nya deka tengah hari. Sereta datai iya lalu tama ke bilik. Ma iya lalu diengkah iya ba tempuan, disandihka iya ba dinding. Meda iya datai lalu beguai meh Indai Alui nyerungkai ma iya, peda iya upih sarang garam udah puang, semina mimit aja garam bisi lekat ba selepak upih nya. Kain pan semina chebik mit ke agi tinggal.

“Ni garam enggau kain dibai nuan deh, Apai Duat?” ku Enchelegit.

“Nama utai ditanyaka nuan! Bisi aku bulih garam diberi ibu tadi, tang udah abis dikena aku ngerami paku tubu di rantau jalai. Kain pan udah ga dikena aku nampal tanah merekah dia tadi. Aku ga nitihka jaku nuan. Nuan madahka garam nya kena ngerami paku tubu, kain kena nampal tanah merekah,” pia ku saut Apai Alui.

“Kasih-kasih meh nuan nya deh Apai Duat, enda nemu reti jaku. Ukai nya dikena ngerami paku tubu dalam babas ku aku. Dikena ngerami engkayu kitai di rumah. Kain nya ga deka dikena aku nganti kain aku ke udah charik tu, ukai tanah merekah ke ditanah din. Amat tambab meh nuan Apai Duat, lansang ka lubang, alit lubang burit,” ku Enchelegit nganu Apai Alui.

“Nuan ngumbai aku tambap, aku enda tambap. Nuan ke tambap enda nemu bejaku.

Nuan ngasuh aku minta garam ngagai sida indai nuan di Panggau kena ngerami paku tubu ku nuan. Nya alai paku tubu ga digerami aku ngena garam. Tu dikena ngerami daun kayu ga ku nuan. Dini agi bisi garam kena ngerami utai ngemayuh nya?” ku Apai Alui.

Enchelegit lalu ketawa rakah-rakah berundingka jaku Apai Alui. “Patut nuan tu tambap lap, enda nemu reti jaku urang,” ku ati Indai Alui dalam nyin. Udah nya sida sebilik sama makai merarau belauk tubu tabar.

Ensera tu tau ngajar kitai merati sereta meretika tuju jaku ti dipadah tauka disebut urang ngagai sida. Sida enda tau enda belajar ka jaku kelaung tauka jaku silup, awakka mereti ka jaku urang. Ari nya tadi, sida tau ngansah runding sida awakka tajam ati nangkap jaku enggau semua utai ti diajar bala pengajar enggau apai indai sida. Tambah mega, jaku silup tu tau dikena kitai mandangka penyiru basa enggau jaku kitai enti berandau enggau urang. Munyi ku sempama jaku Iban, dikelala bungai ari kayu, dikelala buah ari langgu, dikelala basa ari penyiru, dikelala bansa ari jaku.

(31)

5. Apai Alui Besilih Rumah Enggau Apai Sumang-umang

Nyadi sekali Apai Alui ngaga rumah limas sebuah. Semua tiang rumah iya digaga ari kayu tebelian magang, lalu ramu bukai bisi mega kayu ke lembut agi, tang iya bansa kayu ke teguh lalu enda mudah buruk tauka diempa bubuk.

Lebuh semua ramu udah chukup nuntung magang ba endur ke deka alai berumah, dia Apai Alui lalu nyediaka diri deka ngentak. Nyadi endur ke deka ngaga rumah baru nya, enda jauh ari ili rumah iya ke diatu. Lalu nama endur nya dikumbai Emperan Embawang.

Kebuah alai dikumbai Emperan Embawang laban dia mayuh kayu embawang tanam Aya Bujang Tuai seduai Apai Keling menya. Enti sema maya buah, Apai Alui sebilik enda jauh ngumpul buah ke labuh.

Lebuh ke ngentak nya, Apai Alui minta tulung sida Tutung enggau Ngelai ari Gelong enggau bala sida Keling ari Panggau. Nama enda agi deh, urang Panggau enggau urang Gelong endang sigi kering tulang. Enda lama alai rumah Apai Alui nya bediri, tembu terus ka perabung. Udah nya Apai Alui sebilik empu besaup ngaga rumah nya datai ke tembu. Pengelama sida menyanak nembuka rumah nya kira tiga bulan.

Nyadi lebuh ke deka berumah tu, Apai Alui seduai Apai Sumang-Umang endang udah bisi aum sama deka berumah laban rumah sida iya udah kelalu lama lalu patut diganti baru. Apai Sumang-Umang dudi agi ngentak ari Apai Alui. Iya ngaga rumah enda nampung Apai Alui tang enda berapa jauh ari nya, didinga kukuk manuk. Lalu endur Apai Sumang-Umang berumah iya nya dikumbai Munggu Lensat laban mayuh lensat tumbuh dia. Lensat nya tumbuh ari leka lensat ke ditikauka urang Panggau enggau Urang Gelong lebuh ke bisi ngetu mansa menua nya, pulai sida ke ngembuah lensat.

Nyadi ramu rumah Apai Sumang-Umang tu digaga ari buluh, lalu betiangka buluh payan magang. Semua gelegar enggau dinding, digaga ari buluh magang. Kira sebulan pengelama Apai Sumang-Umang ngaga rumah alai iya tembu.

Nyadi lebuh rumah seduai sama udah tembu dia seduai sama bebai pindah, taja pen rumah seduai enda betampung tang seduai deka pindah sama sereta hari lalu ngintai maya bulan agi mansang tauka maya anak bulan. Apin seduai iya pindah, seduai dulu ngiga burung ke manah kena pindah.

Udah tembu pengawa nya, Apai Alui pan pindah ngagai rumah baru iya di Tembawai Embawang. Pia mega Apai Sumang-Umang lalu pindah ngagai rumah baru iya di Munggu Lensat.

Kira sebulan Apai Alui udah pindah ngagai rumah baru alai iya lalu nirika gawai Pangkung Tiang. Tang apin iya menyadi gawai dulu iya nanya Apai Sumang-Umang. Pagi siti Apai Alui lalu nemuai ngagai Apai Sumang-Umang. Lebuh iya datai ba kaki tangga iya lalu ngangau.

“Oh, akan! Jadi rumah nuan?” ku iya.

“Jadi,” ku saut Apai Sumang-Umang. “Niki meh, lalu, duduk kitu.” Apai Sumang-Umang lalu nganchau tikai. Apai Alui mega lalu duduk.

“Nama pejalai nuan deh, akan, beguai tauka pejalai lantang?” ku tanya Apai Sumang- Umang.

“Au meh, akan, aruh iya nuan nanya pejalai. Ni tau nadai kebuah, iya ke sama tuai baka kitai tu,” pia ku Apai Alui. “Aku bejalai nemuai ngagai nuan, ensepi diri baru datai ba rumah baru. Nya alai aku madahka diri deka begawai Pangkung Tiang lalu enggau Gawai