ASAL MULA SUNGE ORAKNG
Carita rakyat dari kampokng Sajingan Besar, Desa Kaliau’ Kec. Sajingan Besar, Kab. Sambas
Pada jaman de’e iduplah kamuda’ badua adi’ baradi’. Si kaka’ namae tokekng bunga, lalu si adi’ namae Keto. Kabatnne badua nian idup sorakng dah ana’ ba bapa’ ngan uma’ agik. Kabatnne ba dua nian diapm ka timawakng parokng paningaatn bapa’ ngan uma’e nang jauh ka daapm utatn, kahe koa ihan agi’ tampat kabatnne diapm. Kabatnne nian termasok urakng miskin sampe mo’ makatn ja’ pun susah, arus bagago’ tupe, burukng, banokng, pokoke amea aja’ nang bisa dimakatni’.
Pada sete’ ari, adi’ baradi’ nian ngansoh buruknt ka samak paroknge. Kabantnne nian namu burukng seko’. Pas waktu mo’ nunua’ burukng koa api pun ana’ ada. Mao’ bai’lah si kaka’ nian ampus ngago’ api. Sanape’ ia barangkat ngago’ api, ia ba pasatn ka adi’e. jare “di’, ke’e mun kaka’ lambat atakng, kau tidur ja’ boh. Soale kaka’ nian ngagoa’api ka si Janya’ Orakng”. “Auk ka’a. ati-ati ka maraga boh ka’ ame amagia’ kita’ puakng” jare adi’e. “Auk di’a” jare kaka’e agi’. Si kaka’ nian pun barangkat ngan barat ati ningatn adi’e. Ama kamudian si kaka’ ana’ muok-muok, parut si adi’ nian dah bukatn agi’ kaparatne. Tidur ana’ bisa, badiri ana’ bisa, ia pun nyarui ‘ kaka’e sambil nangis. Iya pun bakata “kaka’ o kaka’ mae kaka’ ku badama sitokekng bunga, ngagoa’ api ka sijanya Orakng”. Lague kao ia ngulang tarus sampe talu kai’ sampe tadangar ka antu tajur. Antu tajur koangagui’ asal suara koa. Lalu antu koa pun namui’ kamuda’ nang balagu sambil nangis koa. Antu pun batanya’ “amea kau cu’?”. Si oncet pun nyahut “aku nian nunggu kaka’ ku nang badama si Tokekng bunga ne’a ia ngago’ api ka si Janya’ orakng. Antu koa pun nyuruh si Keto balagu agi’, tapi antu koamao’e sambil ngagoi’ gutu si Keto. Si Keto pun balagu. Tiap kai’ ia balagu “si antu koa noko’ kapala si Keto ngan insaut. Sampe ngulang lagu nang ka tiga, si Keto koa pun mati. Antu koa ngotokng-ngotokng badan si Keto lalu ia ningatn dari.
