IBADAH KELUARGA GBKP
SABTU, 04 JUNI 2022
1. Rende “Bila Roh Allah Ada di Dalamku” (Ibabai Anak) Bila Roh Allah ada di dalamku
Ku kan menari s’perti Daud menari Bila Roh Allah ada di dalamku
Ku kan menari s’perti Daud menari Ku kan menari (3x)
S’perti Daud menari Ku kan menari (3x) S’perti Daud menari 2. Ertoto (Ibabai Nande)
3. Rende KEE No. 218 “Nggo Kenca Seh iBas Paksana”
(Ibabai Anak)
Nggo kenca seh ibas paksana Si orati me Kata Dibata
Idur Pustaka si Badia
Gelah tambah rusur pengertinta
Reff: Si bas Berita si Meriah perukuren tetap min ergiah Bas si la tangka minter nilah
G’luh si mbaru ‘lah madin peturah 4. Renungen (Ibabai Bapa)
Teks : 1 Korinti 12:1-6
Tema : Pemere Kesah Si Badia
Kegeluhen itengah-tengah doni enda dem alu kompetisi si erbahanca turah perubaten akibat litna cian ate/iri ate. Engkai maka banci turah ukur cian ate (iri hati)? Ukur si ercian ate e jadi erkiteken turah kerincuhen daging i bas kita. Erkiteken turah kerincuhen daging i bas kita, maka lupa kita sebage gereja itengah-tengah doni enda. Gereja e me persadan kalak si tek man Tuhan. Salah sada bukti kalak si tek dingen setia man Tuhan e me tuhu-tuhu ernanam nandangi kegeluhen perpulungen bagepe nandangi doni enda. Si enda banci jadi adi gereja tetap encidahken kiniersadan itengah-tengah perpulungen.
Perpulungen e encidahken kiniersadanna alu litna sepengodak- sepengole lako ngayaki tujun si seri, e me Gereja si erguna nandangi doni enda. Gereja selaku kula ni Kristus arus jadi pelindung nandangi kerina manusia si lit itengah-tengah doni enda. Si enda banci jadi adi si pedauh ibas kita nari egoista, la kita mentingken dirinta saja, tapi kita arus mentingken keperlen jelma si enterem, gelah banci gereja e tuhu-tuhu jadi ernanam nandangi jelma si enterem. Gereja arus jadi sira ras terang nandangi doni enda. Ula si bahan gereja e jadi arena kompetisi si erbahanca turah si cian-cianen ras banci mpeturah perjengilen, perpecahen i tengah-tengah gereja, si erbahanca gereja e lanai jadi ingan cicio.
Tapi adi gereja e tuhu-tuhu palasna tek dingen setia man Tuhan,
maka gereja e tuhu-tuhu jadi sira ras terang man kerina manusia lako ndatken kegeluhen damai sejahtera.
Latar belakang surat Paulus man perpulungen Korinti enda e me litna perpecahen erkiteken ermegah ate nandangi pemere Kesah si Badia. I bas pengakap perpulungen enda ise si mbuena pemere Kesah si Badia i bas ia nuduhken maka ia me si hebatna, ia me si badiana. Janah kalak si la lit pemere Kesah Si Badia i bas ia ianggap rendah. Masalah enda jadi masalah serius, em sababna Paulus mpersingeti perpulungen Korinti. Lit 3 dampar si ituriken Paulus man perpulungen Korinti; si pemena Paulus mpersingeti perpulungen kerna statusna, nai ia kalak perbegu si ersembah man berhala-berhala, tapi gundari ia enggo iselamatken.
Sipeduaken selaku kalak si enggo iselamatken ibereken Tuhan tugas ras tanggung jawab guna ngelai, janah guna si e Dibata mereken kengasupen man kerina kalak guna ndahiken dahinna.
Jadi pemere e murni ipergunaken guna pelayanen. Pemere Kesah Si Badia enda ipake guna mbangun gereja, mbangun perpulungen. Kerina guna mpermuliaken Dibata, labo guna kepentingen pribadi, labo guna persaingan ntah pe mpeteruk temanta.
Praktek kegeluhen perpulungen Korinti banci jadi lit ka nge i bas kegeluhen perpulungenta si genduari, si erbahanca turah
perjengilen ras perubaten itengah-tengah perpulungen. Turahna perpecahen itengah-tengah perpulungen erkiteken lenga dewasa kita i bas erkiniteken man Tuhan. Megati lebih mpelebe sura-sura ras kerincuhen dagingta asangken sura-sura Tuhan, erkiteken si ikutken rusur sura-sura entah pe kerincuhen dagingta, e maka teridah me egoista, seh maka dirinta saja ngenca rusur sipesenangken labo ngukuri kalak sideban, e maka terjadi me perjengilen dingen perubaten itengah-tengah perpulungen seh maka jadi me perpecahen. Kalak si dewasa kinitekenna ngasup ngaloken kelebihen ntah pe kekurangen temanna, la ercian ate nandangi kelebihen teman ntah pe la mpeteruk teman si dem alu kekurangen. Talenta, pemeteh, gegeh ras materi ipakeken guna mpermuliaken Dibata, alu bage mereken kiniersadan itengah- tengah perpulungen. “Soli Deo Gloria”
5. Rende KEE No. 209:4 “Perpulungen Ersadalah”
(Ibabai Anak)
Erbage-bage pemere man banta kerina Tujunna sada me kepe terpuji Dibata Ersada ukur me jine
O Kristen japa pe
Anem melala ringring pe Sada kula kepe
6. Pertoton Sapaat ras Pertoton Tuhan (Ibabai Nande)
