masuk hu bagas harajaon ni Naibata.
32Ai na roh do si Johannes hubani nasiam bani dalan hapintoron, tapi seng porsaya nasiam bani, tapi anggo sijalo sohei ampa boru jalang porsaya do.
Iidah nasiam do ai namin, tapi lanjar do seng isolsoli nasiam uhur nasiam laho mangkaporsayaisi.
33Bogei nasiam ma sada limbaga na legan. Adong ma sada tuan na bayak, na mamungkah sada pohon anggur. Ihondor ma ai, inggot, ihurak ma pangilangan ni anggur ibagas, anjaha ipauli ma sada manara. Ipasewahon ma pohon ai hubani piga-piga parjuma-juma, dob ai laho ma ia hu nagori na legan.
34Dob jumpah panorang mambuat buahni, isuruh ma juak-juakni hubani parjuma-juma ai laho manjalo buahni.
35Tapi itangkap parjuma-juma ai ma juak-juakni ai, adong na ibogbogi, adong na ibunuh anjaha adong na ipargijig bani batu.
36Iulaki tuan ai ma use marsuruh juak-juakni, bueinan humbani na
parlobei ai, tapi sonai do homa ibahen bani sidea.
MATIUS 21.37 – 43 104
37Dob ni isuruh ma anakni bani sidea, ai nini uhurni: tontu malang do uhur ni sidea bani anakkin!
38Dob iidah parjuma-juma ai anakni ai, nini sidea ma samah sidea: On do sitean pohon in! Eta, bunuh hita ma ia, ase banta siteanonni ai.
39Jadi itangkap sidea ma ia, isarad hu darat ni pohon anggur ai, lanjar ibunuh.
40Anggo roh simada pohon anggur ai, aha ma sibahenonni bani parjuma-juma ai?
41Nini sidea ma hu-Bani: Tontu bunuhonni ma siparjahat ai, anjaha pohon anggurni ai ondoskononni
hubani parjuma-juma na legan, na ra mamberehon buahni bani panorangni.
42Jadi nini Jesus ma hubani sidea: Ai seng ongga ibasa nasiam ibagas Surat in:
Batu na niambungkon ni tukang rumah, ai do gabe palas parsuhi; pinamasa ni Tuhan do in, anjaha halongangan do in bani matanta?
43Halani ai Huhatahon ma bani nasiam:
Sibuaton ma humbani nasiam harajaon ni Naibata, anjaha berehonon bani
bangsa na legan, na ra mambere buahni.
MATIUS 21.44 – 22.4 105
44Anjaha barang ise, na madabuh bani batu on, mapuntar do, anjaha barang ise nidabuhanni, marosak do.
45Mambogei limbaga ai mangahap ma malim pakon Parisei, ai sidea do na hinatahonni ijai.
46Jadi ipindahi sidea ma dalan laho manangkapSi, tapi mabiar do sidea bani halak na mabuei ai, ai nabi do Ia nini uhur ni sidea.
22
1Dob ai iulaki Jesus ma marsahap bani sidea marhasoman limbaga, nini ma:2Tarpausih do harajaon nagori atas ai bani sada raja, na mambahen pesta parunjokon bani anakni.
3Jadi isuruh ma juak-juakni mandilo na dob niontang ai hinan hubani pesta ai, tapi seng ra roh sidea.
4Isuruh ma use juak-juak na legan, nini ma: Patugah hanima ma bani na dob niontang in: Tonggor ma, domma sirsir pestangku, domma isayat lombu pakon pinahan na dob pinamombur, domma sirsir haganup! Ai pe roh ma nasiam bani pesta parunjukon in.
MATIUS 22.5 – 12 106
5Tapi hampung do uhur ni sidea pasal ontangan ai, gabe laho bei ma, deba hu jumani, na deba nari hu partiga-tigaonni.
6Na legan manangkap juak-juakni ai, iarsik ma anjaha ibunuh.
7Jadi manggila ma raja ai, gabe isuruh ma tenterani mamboiskon haganup
pamunuh ai, anjaha manutung huta ni sidea.
8Dob ai nini ma hubani juak-juakni:
Domma namin sirsir pesta parunjukon in, tapi seng talup na niontang ai.
9Halani ai, laho ma hanima bani ganup sirpang ni dalan, anjaha arahkon hanima ma hu pesta parunjukon on sagala halak na jumpah hanima.
10Jadi laho ma juak-juak ai hubani sagala dalan, anjaha ipatumpu sidea ma haganup jolma na jumpah sidea, parjahat age na bujur, gabe gok ma parpestaan ai bani tamuei-tamuei.
11Sanggah na masuk raja ai manorih tamuei ai, iidah ma sada halak na so marpakeian pesta,
12gabe nini ma hubani: Na sonaha do parmasukmu hujon ambia, ai seng marpakeian pesta ho? jadi sip ma ia.
MATIUS 22.13 – 18 107
13Dob ai nini raja ai ma dompak
juak-juakni: Sangkut hanima ma naheini pakon tanganni, anjaha usir hanima ma ia hu darat bani ianan na golap;
ijai ma masa partangison ampa na patungosngoson.
14Ai buei do na nidilo, tapi otik do na tarpilih.
15Dob ai laho ma Parisei manriah samah sidea, atap sonaha do bahenon ni sidea mambahen tardapot Ia marhitei hataNi.
16Jadi isuruh sidea ma susian ni sidea rap pakon juak-juak ni si Herodes
marayak Jesus, laho manungkun
hu-Bani: Ham Guru, ibotoh hanami, na pintor do Ham, anjaha sintong-sintong do dalan ni Naibata iajarhon Ham; seng mabiar Ham age bani ise, ai seng siidah bohi Ham!
17Ai pe, patugah Ham ma bennami atap sonaha do pingkiranMu: Ai patut do bereon balasting bani Kesar atap lang?
18Tapi ibotoh Jesus do jahat ni uhur ni sidea ai, gabe nini ma: E nasiam sipakulah-kulah! Mase ma ilajou nasiam Ahu?
MATIUS 22.19 – 26 108
19Patuduhkon nasiam ma hu Bakku duit balasting in! Jadi ipatuduhkon sidea ma Bani sada dinar.
20Jadi nini ma dompak sidea:
Gambaran ampa surat ni ise do on?
21Nini sidea ma: Gombaran ni Kesar!
Jadi nini ma dompak sidea: Ai pe, bere ma bani Kesar, na humbani Kesar, anjaha bere ma bani Naibata, na humbani
Naibata!
22Mambogei ai longang ma uhur ni sidea, jadi laho ma sidea, itadingkon ma Ia.
23Bani ari ai, roh ma hu-Bani Sadukei, ai ma, na so marhatongonkon adong parpuhoon humbani na matei, jadi isungkun sidea ma Ia, nini:
24Guru, nini si Musa: Anggo adong matei sada halak, lang martinading, parayakon ni anggini ma parinangonni ai, laho pajongjong ginompar bani saninani ai.
25Jadi adong ma bannami pitu halak na marsanina; mompo ma sikahanan ai, dob ai matei lang martinading, gabe bani tinodohkonni ai ma parinangon ni ai.
26Sonai do na paduahon ampa na patoluhon ronsi na papituhon.
MATIUS 22.27 – 35 109
27Parpudi humbani sidea haganup matei ma homa naboru ai.
28Jadi bani ari parpuhoon ai, ise do humbani sidea na pitu ai simada naboru ai, ai ganup do sidea marjolmahonsi?
29Tapi nini Jesus ma mambalosi sidea:
Na kahou do nasiam, ai seng ibotoh nasiam Surat in age hagogohon ni Naibata!
30Ai bani ari parpuhoon ai seng dong siparunjuk atap na laho, tapi songon malekat do sidea i nagori atas.
31Tapi pasal parpuhoon ni na dob matei, ai seng ongga ibasa nasiam, na hinatahon ni Naibata bani nasiam:
32Ahu do Naibata ni si Abraham, Naibata ni si Isak anjaha Naibata ni si Jakob? Ia Naibata, sedo Naibata ni na matei, tapi Naibata ni na manggoluh do.
33Jadi longang ma halak na mabuei ai mambogei pangajarionNi ai.
34Tapi dob ibogei Parisei, na dob ipasip Jesus halak Sadukei, jadi martumpu ma sidea.
35Anjaha sada halak humbani sidea, ai ma sada sibotoh surat, mambahen sungkun-sungkun Bani laho mangujiSi.
MATIUS 22.36 – 44 110
36Guru, na ija do titah sibanggalan humbani titah in?
37Jadi nini Jesus ma: Maningon haholonganmu do Tuhan Naibatamu humbani gok ni uhurmu, humbani gok ni tonduymu ampa humbani gok ni pingkiranmu.
38In ma titah sibanggalan anjaha na parlobei.
39Na paduahon on pe dos do pakon in:
Maningon haholonganmu do hasomanmu doskon dirimu.
40Titah na dua on do manrimpun sagala titah pakon hata ni nabi-nabi.
41Tapi sanggah na martumpu ai ope Parisei ai, isungkun Jesus ma sidea, nini ma:
42Sonaha do pingkiran nasiam pasal Kristus in? Anak ni ise do Ia? Nini sidea ma hu Bani: Anak ni si Daud!
43Nini ma dompak sidea: Tapi sonaha ma ai, igoran si Daud do Ia Tuhan, niajaran ni Tonduy in, ai ihatahon do:
44Nini Tuhan in do dompak Tuhanku:
Hundul ma Ho hu siamunKu, paima Hubahen munsuhMu sidogei-dogeian ni naheiMu!
MATIUS 22.45 – 23.6 111
45Anggo igoran si Daud do Ia Tuhan, sonaha ma Ia anakni?
46Jadi ise pe lang na boi mambalosiSi, anjaha humbani panorang ai nari sahalak pe lang be na pag manungkunSi.
23
1Dob ai iparsahapkon Jesus ma halak na mabuei ai ampa susianNi,2nini ma: Kursi ni si Musa do na hinundulan ni sibotoh surat pakon Parisei.
3Halani ai, horjahon anjaha irikkon nasiam ma sagala niajarhon ni sidea bani nasiam, tapi ulang ma usihi nasiam pambahenan ni sidea, ai mangkatahon do hansa sidea, seng dong anggo
ihorjahon.
4Irahuti sidea do siboanon na borat, anjaha iampeihon ma ai bani abara ni jolma, tapi sidea sandiri marhitei jari-jari pe seng ra manggiut ai.
5Sagala pambahenan ni sidea ihorjahon sidea do, ase iidah jolma. Halani ai
ipabolag sidea do tali tonggo ni sidea anjaha ipaganjang rambu ni pakeianni.
6Marosuh do sidea, hundul bani ianan na sangap bani parpestaan, sonai
MATIUS 23.7 – 13 112