LITURGI RAS BIMBINGEN PEKAN PENATALAYANEN
GBKP
WARI PELIMAKEN, KAMIS 21 Januari 2021
I. PERSIKAPEN
1. Adi Pekan Kebaktin Penatalayanen enda ilakoken i rumahta sekalak- sekalak, maka adi la serayan Tuhan (Pdt, Pt, Dk) si mbabaisa maka votum, salam ras pemasu-masun la padah sibelasken.
2. Adi enggo banci ilakoken i bas sektor ntah jabu kepkepen maka enggo banci sidalanken bagi semalna saja si ikuti Panduan Adaptasi Kebiasaan Baru.
3. Adi via daring (zoom, google meet, rsd) maka banci siaturken situasinta rikutken situasina gelah erdalan kerina alu mehuli.
4. Siusahaken maka anak-anakta pe ikut i bas kebaktinta enda.
II. KEBAKTIN Kata Penaruh
Salam ras mejuah-juah i bas gelar Tuhanta Jesus Kristus...
Perpulungen si ikelengi Tuhan, la erngadi-ngadi sikataken bujur man Dibata i bas keleng ateNa si tetap nemani ras njaga kawali kegeluhen kalak si tek man baNa. Enggo ituduhken Dibata maka keleng ateNa e la erleka i bas kegeluhen manusia. Aminna kai pe si terjadi keleng ateNa e tetap man manusia. Bage pe i bas situasi pandemi erkiteken Covid 19 si enggo idalani kita enda. teridah maka seh asa genduari tan Tuhan tetap negu-negu kalak si erkemalangen man baNa. I bas masa pandemi si enggo si bentasi e, iajari Dibata kita gelah ngasup njagai diri bage pe ekonomi jabunta. Gelahna pentar kita makeken si lit guna kiniulin jabunta. Mari dage si pesikap pusuhta alu radu ras kita ertoto……
Si puji Tuhan Dibata alu radu ras kita rende arah ende-endenta: KEE No.
278:1,3 “Ku Dahi Rumah Persembahen” (Perp. Tedis)
Kudahi rumah persembahen, segelah aku jumpa Tuhan Ban Ia sumbul keriahen, ‘nggo b’reNa bangku kesangapen
Reff: Ersada me anakNdu k’rina, bas kiniteken tetap paguh Bagem biak anak Dibata, tetap nembah ras muji gelarNdu
Begikenlah Kata Dibata, em kap si nerangi geluhta Jadikenlah wari-warinta, penembahenta e man baNa Reff: Ersada me anakNdu k’rina……
Votum + Salam
L I bas gelar Dibata Bapa si enggo nepa doni enda, i bas gelar Jesus Kristus si enggo nelamatken manusia, ras i bas gelar Kesah si Badia si nemani ras engkawali manusia.
Perkuah ate i bas Dibata Bapa, i bas anakNa Jesus Kristus ras i bas gelar Kesah si Badia. Amin.
P Amin…Amin…Amin… (iendeken)
Invocatio
L “Kalak pentar tetap bayak dingen nggeluh i bas kemewahen tapi kalak bodoh ikerikenna duit si mbaru ialoken” (Kua. 21:20)
Si puji Tuhan arah ende-endenta: KEE No. 290:1-3 “Labo Erkiteken
Beluhku”
Labo erkiteken beluhku, labo erkiteken pentarku
Tapi perbahan penampatNdu, mbelin tergejap bas ngasupku Labo erkiteken dahinku, labo erkiteken pangkatku Tapi perbahan perkuahNdu, malem ateku tuhu-tuhu Labo erkiteken ertangku, labo erkiteken bayakku
Tapi perbahan pemereNdu, pasu-pasuNdu simpar bangku
---Perp. Kundul--- Pujin Man Dibata si Mada Kegeluhen Manusia
L Dibata kap sumbul kerina kepentaren bas kegeluhen manusia.
P Terpuji dingen termulialah Tuhan, sumbul kepentaren kalak si tek man baNa.
L Dibata kap sinikapken kerina si lit bas doni enda, guna kiniulin ras kesangapen manusia.
P Terpujilah Tuhan, si tetap mereken kiniulin ras kesangapen man kami manusia.
L Si puji Tuhan: KEE No. 61:1,3 “Nggo Jumpa ras Perkuah Ate”
Nggo jumpa ras, perkuah ate, metunggung gia aku lang I bas si e la aku mate, emaka ’te ku megedang
Perkuah ate Tuhan kin, perkuah ate Tuhan kin Makana aku terkelin, makana aku terkelin
Perkuah ate Tuhan nari, penalemenku saja e Kupuji Tuhan e gundari, si nginget aku lalap me Emaka las ukurku pe, emaka las ukurku pe
Ngikutken lalap Tuhan e, ngikutken lalap Tuhan e
Kinilangasupen Manusia Makeken Pemere Dibata I bas Geluhna
L Itepa Dibata doni enda alu mehuli, guna encukupi keperlun geluh manusia.
P Megati kal Tuhan, la igejapken kami doni enda itepaNdu dingen irancangNdu guna kiniulin kami manusia. Alemi min kami o Tuhan… L Dibata nehken keleng ateNa arah doni enda gelah manusia pentar
makeken pemere i bas Dibata nari.
P Ngaku kami Tuhan, biak kerangapen ras kearun ate megati kal engkuasai perukuren kami. Si e erbahanca kami lanai pentar ngelitken ras ngaturken pemereNdu e. Alemilah kami o Tuhan…
L Marilah siakuken tole kinilangsupenta i lebe-lebe Dibata arah ende- endenta: KEE No. 440:1,3 “O Bapa Salah Lepakku Ku’teh Nge”
O Bapa, salah lepakku ku’teh nge
Dosangku pe rusur kuinget, man baNdu aku erdosa Reff: Mekuah ateNdu min, erkiteken liasNdu
SasapkenNdu min, k’rina dosangku o Tuhan O Bapa geluhku dem alu dosa
I bas bertin nari pe aku, enggo ikuasai dosa Reff: Mekuah ateNdu min……
Padan Dibata man Manusia
L Kata Dibata si jadi sumbul pengarapen kalak si tek, niNa: “Sabab i bas
persadanndu ras Kristus, kam enggo ipebayak i bas kai pe, i bas pengeranandu bage pe i bas pemetehndu, la kam kurang kai pe kerna pemere-pemereNa.” (1 Kor. 1:5,7b) Malem kal ate kalak si tetap
nggeluh erpengarapen man Dibata, e maka si puji Tuhan alu ngendeken: KEE No. 121:1,4 “Tuhan Yesus Penebusku”
Tuhan Yesus Penebusku, IA penalemenku IA si nggalar utangku, sai ibanNa dosangku
K’leng ateNa tangkas bangku, kegeluhen seh man bangku Perban e kupuji Kam, seh si rasa lalap e
Kata Dibata
Ku bas tanNdu ras naheNdu, ipakuken paku e Mambur ka ban e darehNdu, i kayu silang kepe E me sumbul peridin, gelah aku pe terkelin Perban e ku puji Kam, seh si rasa lalap e
a. Ngoge Kata Dibata Bagin Si Pemena (Rut 2:1-3)
L Ketuahen kalak si megiken Kata Dibata, dingen si makekenca i bas geluhna si teptep wari, Haleluya.
P Haleluya, Haleluya, Haleluya (iendeken)
b. Kotbah : 1 Timotius 6:6-10
Tema : Encukupken Keperlun Geluh
(Ketahanan Keuangan/Resesi)
Salah sada perbeben si ihadapi jelma si nterem bas doni enda kenca pandemi Covid 19 e me masalah ekonomi. Sabab hampir 10 bulan perekonomian la erdalan alu mehuli. Melala pabrik arus tutup erkiteken la banci produksi, melala pusat-pusat binaga pe la erdalan erkiteken kalak si nukur pe kurang. Melala masyarakat lanai banci nukur bahan-bahan si iperlukenna erkiteken lanai ia erdahin. Sitik ras mbelin situasi si e erpengaruh kal ku bas kegeluhen masyarakat. Masyarakat pe genduari arus pentar i bas ngaturken kegeluhen jabuna. Arus ia beluh makeken kerina si lit i bas ia dingen encukupken kerina keperlun geluhna. Sabap dampak pandemi enda langa bo ieteh katawari kari maka enggo mehuli kerina. Langa bo ieteh katawari kari ekonomi enda enggo pulih bagi si gelgel. E maka iajuk kal selaku kalak si erkemalangen man Dibata, arus nge ipakekenNa kepentaren guna ngaturken kegeluhen ras keperlun i bas jabuna.
Kepentaren e sada bagin si penting ras arus teridah i bas kegeluhen kalak si erkiniteken man Dibata. I bas invocatio ituriken nina: “Kalak pentar tetap
bayak dingen nggeluh i bas kemewahen tapi kalak bodoh ikerikenna duit simbaru ialoken”. (Kua. 21:20). Ertina maka lit nge kepe pembedaan i bas
kegeluhen kalak si makeken kepentaren Dibata ras kalak si la makeken kepentaren Dibata. Adi pentar i bas Dibata, melala pe kiniliten entah erta- erta i bas ia, labo kerina ikerikenna. Aminna pe ia nggeluh bas kemewahen, tetap ka nge lit isusunna guna dirina. E maka tetap nge ia bayak. Sabab enggo beluh ia ngaturken kai si perlu ras kai si la perlu bas geluhna. Tapi kalak
bodoh, kerina sen si lit i bas ia, minter ikerikenna guna kesenangen dirina saja ngenca. Kasa kai si lit i bas ia minter keri kerina. Em si mbedakensa kalak si pentar i bas Dibata ras si la ia makeken kepentaren Dibata.
Bage ka nge si ilakoken Rut bas kegeluhenna. Perbeben secara ekonomi cukup mbelin kal man Rut ras Naomi bibina. Latih dingen ndele kal akapna duana, erkiteken lanai lit erta-ertana dingen si arusna pe ngaturken ras encukupken keperlun geluhna duana pe lanai lit (enggo mate perbulangenna). Sadar kal Rut maka adi kem saja i rumah labo banci icukupina kai keperlun geluhna. E maka turah inisiatifna guna ndarami dahin si banci idahikenna. Aminna pe ia terjeng kalak pertandang i kuta e, labo e erbahanca ia mekisat erdahin. Justru ituduhkenna maka mbelin kal semangat ras motivasi i bas ia lako ndahiken dahin e. La inehenna dahin kai si man dahinken. Tapi si penting man bana, dahin e ngena ate Dibata janah banci mereken ulih lako encukupi keperlun geluhna. Prinsip si bagenda penting kal man kalak si erkiniteken i bas masa si genduari enda. Dahikenlah dahin si banci mereken ulih guna encukupi keperlun geluh.
Salah sada pengajaren si isehken Paulus man Timotius e me ngergaken kerina pemere si ibereken Dibata man bana. Cara ngergaken pemere Dibata e me kap:
1) Sipemena e me: alu ngataken bujur katawari paksa pe man Tuhan.
Kalak si nggejap maka si lit i bas ia e bekas pemere Dibata, tentu la banci lang ngasup ka pe ia ngataken bujur man Tuhan. Sabab ietehna kerina si lit bas ia e rehna i bas Dibata nari kap. Tentu ngataken bujur me si erbahanca kalak si erkiniteken ngasup ngergaken pemere Dibata e i bas geluhna.
2) Sipeduaken: lit penggejapen maka si lit i bas ia pe bias iakapna.
Ertina maka teptep jelma banci min merasa cukup i bas geluhna. Adi nina Paulus man Timotius, tingkat kecukupen e lit nge sukat-sukatna. E
maka cukup min siakap adi lit nakanta ras uista (1 Tim. 6:8). Tentu
sederhana kal pemikiren enda. Sabab kalak si perukurenna bage, tentu lanai ia ikuasai biak si merangap si erbahanca turah atena morah nandangi kiniliteken kalak si deban. Tapi alu kesederhanaan, tercukupina keperlun si lit i bas ia e pe enggo jadi sada kinibayaken kal man bana. Lakinlah standar geluhta e erbahanca lanai kita pernah
merasa cukup bas geluh enda. tentu enda sada perenungen si penting kal man kalak si erkiniteken.
3) Sipeteluken: Naluken biak kerangapen i bas pusuh.
Musuh si mbelinna i bas manusia e me biak kerangapen. Adi nina Mahatma Gandi: kerina si lit bas doni enda situhuna cukup guna
keperlun geluh manusia. tapi labo bias guna encukupi kerangapen manusia. Megati kal kerangapen e si erbahanca manusia bene i bas
geluhna. Si lit i bas ia e pe lanai ia beluh ngaturkenca. Seh maka kai si lit bas kalak si deban pe enggo mengga atena. Erkiteken mengga atena, piahna ipakena cara-cara si la mehuli guna ndatkenca. Biak-biak si bage me si perlu italuken kalak si erkiniteken. Tuduhkenlah maka si lit e pe banci ipakeken guna encukupi keperlun geluh.
Pandemi Covid 19 mereken dampak si cukup mbelin bas kegeluhen manusia idoni enda. Si e kerina teridah i bas perekonomian dunia ras negaranta cukup tergoncang. Melala negara-negara si mengalami resesi ekonomi. Si kin akibatna kurang mehuli man perekonomian sada negara. Dampak e la terjeng bas ekonomi dunia ras negaranta Indonesia enda saja ngenca. Tapi berimbas pe ku bas ekonomi jabunta bage pe i bas ekonomi gereja. Sabab ekonomi gerejanta enda tentu palasna ekonomi jabunta nge. Perdalanen keuangen gerejanta rehna i bas persembahen si isehken perpulungen e. E maka erdampak keuangen jabu, tentu erdampak ka nge ku bas keuangen gereja. Tapi labo si pergogoi situasi si jadi e. Labo si pertangisi keadaan si genduari enda. Sabab lit pemeteh ras kepentaren ibereken Dibata man banta. Kepentaren ras pemeteh e arus nge si pakeken guna njagai ketahanen ekonomi ras ketahanen pangan i bas jabu. Ertina maka teptep jabu arus gundari nari mulai rukur, kai si perlu itukur ras kai si labo perlu itukur. Umpamana: teptep pernanden enggo banci nuan cina i bas pekarangen jabu. Si isuan e banci erbahanca kita lanai nukur cina adi ateta nggule. Tentu enda mengurangi biaya pengeluarenta. Enda contoh-contoh sederhana i bas kita erjuang guna encukupi keperlun geluhta. Alu bage, perlu ka pe siukurken caranta guna menopang keuangen gerejanta pe. Sabab la banci lang enda bagin tanggung jababta selaku kalak si erkiniteken man Dibata. Dibata simasu-masu kita kerina i bas ngalaken dampak pandemi enda.
Pengakun Kiniteken (Perp. Tedis)
a. Kata Dibata si jadi palas i bas kite nehken persembahen, e me kap:
“Dage ntah kai gia ibahanndu, subuk i bas ngerana ntah i bas perbahanen, bahanlah e i bas gelar Tuhan Jesus janah ngataken bujur man Dibata Bapa arah IA”. (Kol. 3:17)
b. Iherta ngendesken persembahen, ras kita rende arah ende-endenta:
KEE No. 343:1 “Pasu-pasu bas Tuhan Nari”
Pasu-pasu bas Tuhan nari, gejapken kami teptep wari Bas paksa-paksa geluh kami, kam me kap tetap si ngkawali Pasu-pasu bas Tuhan nari, jadi pergegeh tendi kami
Guna ndalani wari-wari, si rehna bas Kam Tuhan nari
Reff: Pasu-pasu dage o Tuhan, persembahen kami anakNdu Labo kapen enda metunggung, persembahen si nggo pepulung AjariNdu pe kami gelah min, tetap ngasup mere man Tuhan Aloken min dage o Tuhan, persembahen kami anakNdu
Labo ban beluh kami Tuhan, lako mere kuadepenNdu Pakeken min dage o Tuhan, persembahen kami anakNdu
Guna pebelangken kataNdu, nandangi k’rina tinepaNdu Reff : …
c. Pertoton Persembahen ras Sapaat
Notoken gelah cukup keperlun geluh
Notoken keuangen gereja
Siturah i bas perpulungen
Perpadanen Kalak si Erkiniteken (Perp. Tedis)
L Dibata kap simasu-masu kegeluhen manusia. IberekenNa pemereNa simpar man manusia.
P Erpadan kami Tuhan, tetap makeken pemereNdu jadi sada kinibayaken bas geluh kami guna nampati kalak si deban.
L Dibata mereken kepentaren man manusia guna ngaturken kiniulin geluhna.
P Erpadan kami Tuhan, makeken kepentaren si iberekenNdu man kami guna njagai ras encukupi keperlun geluh kami i bas situasi si mesera enda. L Sipeteguhi perpadanenta arah ende-endenta: KEE No. 255:1,3,4
Talenta si ni b’reken Dibatanta, jadi min erlipat ganda
Reff: Kalak si malang nandangi Tuhan
La kap nggit nimbak labo nggit nogan Maka dahikenlah alu tutus
Ola lakoken alu mekarus
Ersadalah min arihta kerina, make kata ras pedahNa
Gelar ni Tuhan ‘lah tetap mulia, ije me t’ridah i bas lagu langkahta Reff: Kalak si malang……
Ulihta lit kap bas Tuhan Dibata, mulia rikut mehaga
Adi perkisat labo lit gunana, jelma mejingkat maka ngena ateNa Reff: Kalak si malang……
Pertoton Tuhan Pemasu-masun
L Pentarlah kam ngaturken ras encukupken keperlun geluhndu. Guna jadi gegehndu, alokenlah pasu-pasu idur Dibata nari:
“Ipasu-pasu janah ikawali Dibata kita (kam), siang ayo Dibata ersinalsal ibabonta (ndu). Janah melias ate-Na ngenehen kita (kam). Itatap Dibata ku kita (kam), janah malem ateta (ndu) ibahan-Na. “ Amin.
P Amin…Amin…Amin… (iendeken)
III. DISKUSI
1. Oge mulihi 1 Timotius 6:8. Enggo nge turah penggejapen si bage i bas geluhta si teptep wari?
2. Turikenlah potensi-potensi kai si lit i bas kita sekalak-sekalak si banci ikembangken guna njaga ketahanen pangan ras ekonomi i bas jabunta bage pe i bas gerejanta.
IV. AKSI
Bahanlah seminar ntah pe lokakarya i bas sektor guna pengembangen potensi ntah pe ketrampilen si mendukung usaha rumah tangga perpulungen.
