LITURGI MINGGU PENINGKATEN EKONOMI JEMAAT, 26 JULI 2020 1. Ngogeken Momo
2. Kata Penaruh
Kekelengen Tuhan, minggu enda igelari Minggu Peningkaten Ekonomi Jemaat. Enda salah sada minggu khusus iaturken gerenta guna banci mereken pengertin ras penjemba kerna pentingna peningkaten ekonomi jemaat. Salah sada dampar sehna Berita Si Meriah ku bas kegeluhenta eme mabai reh sikapna ras reh pentarna kita ndarami ras makeken ulih pencarinta. Mari radu ras kita kerina ersembah man Dibatanta Si Badia ibas kehamaten ras keriahen ukur .---Erkata Lonceng---, rende KEE 424:1,2 (Perp. Tedis)
3. Votum-Salam
L Ibas gelar Dibata Bapa si masu-masu kerina pendahinta (ndu), ibas gelar AnakNa Jesus Kristus si tetap erdahin guna kiniulin manusia ras ibas gelar Kesah Si Badia si tetap mpelimbarui gegeh ras kepentarenta (ndu)
Perkuah ate ras dame ibas Dibata Bapa ras ibas Tuhan Jesus Kristus nari, ibas kerembaken Kesah Si Badia ras kita (kam) kerina gelah. Amin….
P Amin….Amin…..Amin….(iendeken) 4. Berita Kerna Sura-Sura Dibata (Invocatio)
“Kalak sinangko gel-gel nari, olanai ia nangko. Erdahinlah ia alu mehuli guna ncariken keperlunna, janah gelah lit ibas ia guna nampati kalak si lit ibas kepiceten” (Ef. 4:28). Erpalasken kata Dibata enda si puji IA alu ras ngendeken KEE 75:1,2
5. Pengakun Dosa Perp. Kundul
Turang rasa senina, bage ulina rencana Dibata man banta ras doni enda. Marilah siakuken kinikoten ras kelepakenta ibas makeken gegeh, kesehaten ras kepentaren si enggo ijujurken Dibata, emaka nintalah sekalak-sekalak ibas ukurta: “Ngaku kami o Tuhan, megati kal gegeh, kesehaten ras kepentaren si iberekenNdu lenga ipakeken kami alu mehuli. Megati kami la megermet ibas kelepaken kami. Seh maka pendahin kami la mereken ulih si mehuli, dingen la nambahi kemalemen ate man kami, bagepe man teman kami manusia. Tuhan alemilah kami. ---(Paksa Teneng)--- Mari tole siakuken dosanta arah nde-ndenta KEE 304:1-3
6. Berita Pengalemi Dosa Perp. Tedis
Kata Dibata kerna pengalemi dosa ibas Jesaya 1:18b : “Kita (kam) enggo erkubang-kubang ibahan dosa, tapi iperidiNa kita (kam) maka bersih bagi salju. Amin gia erkiteken dosanta (ndu) kita (kam) enggo mbiring bagi tengguang, mulihi kita (kam) jadi mbentar bagi kapas”. Meriah ukurta erkiteken dosa-dosanta enggo ialemi Dibata, emaka si puji IA alu ras kita rende KEE 184:1,3
7. Ngoge Kata Dibata Si Pemena: Ulangen 8:11-20 (Tunggal) Perp. Kundul
L Ketuahen kalak si megiken kata Dibata, dingen si makekenca ibas geluhna si tep-tep wari, Haleluya……
P Haleluya…Haleluya….Haleluya (iendeken) 8. Kotbah: 2 Tesalonika 3:6-15 (Tunggal)
9. Pengakun Kiniteken Perp. Tedis
10. Persembahen
L Ibas kita nehken persembahen pengataken bujurta man Dibata si jadi palas man banta ibuat ibas Kolose 3:17: ”Dage ntah kai gia ibahanndu, subuk ibas ngerana ntah ibas perbahanen, bahanlah e ibas gelar Tuhan Jesus janah ngataken bujur man Dibata Bapa arah IA”. Tupung siendesken persembahenta mari ras kita rende arah KEE 420:1-
Pertoton Persembahen ras Syafaat
11.Rende KEE 430:1,2 Perp. Tedis
12. Pertoton Tuhan
13. Pengeutusen ras Pasu-pasu Dibata
L Bengketilah kegeluhenta (ndu) sitep-tep wari, dalankenlah kata Dibata si begi kita (ndu) ibas wari enda. Guna mpegegehi kita (kam) alokenlah pasu-pasu idur Dibata nari: “Dibata sumbul kemalemen ate, e gelah sincukupi keperlunta (ndu) guna ndalanken si sentudu ras peratenNa. Janah Dibatalah erdahin ibas kita (kam) arah Jesus Kritus gelah kita (kam) ngelakoken si ngena ateNa. Man Kristuslah kemulian seh rasa lalap.” Amin.
P Amin….Amin…..Amin……
