107 年全國語文競賽客家語朗讀文章高中學生組（饒平腔）
編號 01 號
【𤌍 窯】
劉玉蕉原作打早，斯聽著阿嬤交代阿姆，去市場割兜豬肉、買兜萋魚轉來，
「欸，古怪！有麼人做生日係無？」問過阿嬤正知，係滿姑愛轉外 家，怪毋得阿嬤恁歡喜！探著滿姑轉來个時間，𠊎走去莊頭阿惜姨 个雜貨店等，𠊎頭勾勾緊眺望。姑丈个車吂駛偎，𠊎斯走出去擛手 咧，姑丈車一頓恬𠊎斯蹶上車，滿姑笑等講：「屎朏吂坐燒，斯愛 下車咧，恁大閒情！」知佢歡喜，𠊎尖入車肚斯摎姑表姐妹大聲爽 起來。
滿姑帶个等路異餳人，逐儕都有一份外，車後斗還有一大布袋 个番薯，阿嬤講：「番薯恁多仰結煞，無斯來𤌍窯好咧，屋背田肚 个泥，上禮拜正翻過，應該乜燥咧，來𤌍窯，愛無？」「好哦！
湛啦！」聽著有好爽，𠊎這兜黏時斯應口。
起窯哩喲，阿爸扐三矻大泥團做門，窯身斯尋像佢个拳頭嫲恁 大个泥矻來結，疊高了還過愛慢慢收偎來，幾下到，結到半爛燦斯 屙落來，「唉，老刀嫲無鋼咧，無恁該哦！」臨尾還勞攪姑丈𢯭手，
正順勢搣好。窯一起好，阿哥斯開始派事頭咧，佢喊𠊎摎姑表姊妹 去撿樵，阿姊負責起火、架樵，大姊當倚恃得，火分佢掌都猛猛猛，
紅紅个火舌嫲對泥矻縫鑽出來，像愛擘食人个樣，害𠊎這兜閃到遠 遠遠，無幾久，泥矻斯像紅柿恁樣紅啾啾咧！
「好勢哩喲，樵莫過架，火退出來，斯做得擲番薯落去咧！」
阿嬤恁樣講。
火炭撥開來，番薯斯一粒一粒擲入窯裡肚去。「哇！」表阿哥 个擔竿一𢫦落去，紅紅个泥矻跈等屙下來，堵好弇在番薯上背，「建 設難，破壞容易」，細人仔輪等𢫦泥矻，逐個都搣著一頭一面，背 尾還係姑丈來收尾，佢摎幼泥掖到上背，用砂耙過頓分佢拶，上背 還過插一支香，恁樣一屑煙都無出咧，正喊𠊎兜去爽。真無簡單結 起來个窯，這下䀴起來斯像一個番薯壟呢！
囥人尋爽吂罅擺，遠遠斯鼻著香味咧，影著阿姆在該開窯，𠊎 這兜遽遽偎過去䀴佢變奇術，阿姆驚怕番薯分佢摟綿，細心細意在 該慢慢挖，定定摟，香氣餳到𠊎這兜口涎水溚溚跌，肚屎乜嘰哩咕 嚕緊抗議。田脣項，𠊎兜比比坐，香香个番薯塞歸嘴，天恁清，番 薯恁香，在屋背个田肚，𠊎兜爽到斷烏正轉屋。
107 年全國語文競賽客家語朗讀文章高中學生組（饒平腔）
編號 02 號
【味道】
李夢花原作有一種味道，毋係用舌嫲嚐得出，係用心肝正感受得著；有一 種味道，毋係嚐過就記入心，係隨時就會觸着心肝頭，毋會輕放忒。
阿姆日日㧡水供豬，愛顧一屋大細食著，歸日舂頭磕額，菜湯 腳刻耐仔攪飯，這苦篤篤个日仔，到細人仔日見日大了後正轉甜，
這係阿姆个味道。
阿爸逐日汗流脈絡，為了家庭疲爬極蹶煞猛做事，底衫總係溚 潦，記得細个時節有一擺作燒，阿爸背等𠊎去䀴醫生，頭那凴等阿 爸賁賁闊闊个背囊，有一種燒暖个幸福、鼻著該鹹渧渧个汗水味，
係𠊎熟事个阿爸个味道。
𠊎个味道係仰般个呢？青春年華个記憶，有期待、乜做得發夢 个，反叛个年紀，除忒讀書，心肝肚該粒少女个心，總係期待學校 該個緣投个男同學，做得偎近分享𠊎个心情故事。斯像吂翕熟个青 柿樣仔，鹼鹼又澀鋸鋸。酸澀跈等成長火焙刀削到尾轉甘，這係𠊎 酸柑茶樣仔戀愛个味道。
還有一種安到人情味，在客家莊滿哪仔就有，這片張伯姆喊：
落來坐！該片阿火伯喊：來泡茶！這杯釅茶个溫度，分客家莊个青 草有味、日頭有味，連空氣都帶有親切熱心醹醹个人情味，這係𠊎
出外打拚最思念个情感。都市人情薄如紙，就算戴兩對門就毋相 識，各儕就像帶層保護色，互相毋敢交摎忒深，所以轉莊下正尋得 轉簡單个安然自在。
幸福係麼个味呢？無閒洎杈个人，做得停跎一下鼻花香；耕田 个人，做得收成歸間穀倉；做爺哀个人，做得䀴著一屋大細康健平 安；單身哥仔，做得食著餔娘个飯菜香。逐儕人感受著幸福甜甘味 之前，會受到苦澀澀个艱難，係畏苦，毋去打拚，就毋會有成功个 日仔，當然乜毋會有歡喜个滋味，嫩筍乜愛經過水涿日炙正會變老 竹。
人生情感个酸、甜、苦、辣、鹹、澀，你嚐過幾多種？鼻空酸、
生活苦、目汁鹹，下把仔還有兜辣，這轉甜个過程係毋係較有搭碓？
成時你試著會跼到敨氣毋出，愛想等：頭前有烏影，後背就有日頭 箭等。俗話講：「有情食水甜。」換隻想法、換種心境用情來感受，
全部會係甜滋滋个味道。
107 年全國語文競賽客家語朗讀文章高中學生組（饒平腔）
編號 03 號
【阿嬤个菜園】
羅瑞霞原作𠊎嬤戴在竹東落去五指山裡背山林壁壢角个半山排，該係𠊎最 愛去个所在，也係𠊎最想念个位所。
從細細開始，斯愛堵著尞日，阿爸斯駛車仔，載阿姆還過𠊎三 姊妹，行過彎彎斡斡个山路，跋過一隻大崎，車仔停到半山排鄰舍 个禾埕。阿爸牽𠊎摎老妹，阿姆揇老弟，再過慢慢仔行一截石碫仔，
在一間伙房屋大門前停下來，禾埕肚炙鹹菜个阿嬤䀴著𠊎兜一家人 轉來，笑咪咪行過來開大門，嘴肚緊念，「恁早呢」！這間紅磚屋，
係阿公摎阿嬤戴个所在，也係阿爸个胞衣跡。
見擺到尞日，阿嬤知𠊎兜會轉去䀴佢，早早斯買便當多食个東 西，放在冰箱肚，準備分𠊎恁多姊妹食。下把仔係講阿爸有事情停 跎，較慢轉到，該阿嬤斯開始心焦心焦，遠遠斯䀴著佢个頭那勾啊 勾，係䀴著𠊎兜腳一伸出車門，黏時開容笑面，嘴緊念講︰「仰恁 慢呢」！正式係阿嬤惜孫，一滴都毋會差。
阿嬤在溪壩脣有一坵菜園，該係𠊎恁多姊妹最好去个所在。菜 園裡肚種當多菜，春天時，阿嬤會渡𠊎恁多姊妹去菜園摘菜，還會 教𠊎兜認菜，這係甕菜、該茄色懸等个係茄、還有該青青有竻个係
竻瓜仔，講忒隨手斯摘下來，衫袖捽捽啊斯提分𠊎食，講︰「這瓜 仔無打藥仔，食咧會康健。」下把會跍下來，在菜廂脣挷草、捉菜 蟲。記得第一擺教𠊎兜認識麼个係菜蟲，阿嬤手伸落菜葉捉一尾青 色軟軟還緊停動个菜蟲，老弟䀴著該緊停動又廿廿趖个東西，嚇到 面壢青，大嫲牯聲盡唩，阿嬤䀴著嗄大笑講︰「戇孫仔！這係菜蟲，
有麼个好驚啦？恁無膽得著。」
菜園脣頭，有一坵閒田，阿嬤知𠊎好食甘蔗，在閒田種幾壟甘 蔗，冬下時甘蔗好食咧，阿嬤會渡等𠊎去甘蔗園，喊𠊎坐在菜園个 田脣，斯擎等刀仔去斬甘蔗，順續摎頭尾削忒，再過剁一截一截，
提分𠊎喫，哇！還甜哦！阿嬤䀴著𠊎食著滿足，面項笑咪咪問講︰
「好食無？有甜無？」該下𠊎斯顧食，緊頷頭，阿嬤䀴著乜盡歡喜 哦！
時間過到當遽，十過年過去咧！𠊎兜大咧，阿嬤乜轉長山賣鴨 蛋去咧！毋過，想著阿嬤个菜園，這下毋知變仰般。心肝肚總係憶 等1，舊年，𠊎喊阿姆載𠊎轉去山肚䀴該間細細時節，長透轉去尞个 伙房屋，還䟓工行去溪壩脣䀴菜園。毋過，行到溪壩脣，䀴著該頭 擺个菜園跡，草生到比人還較高，唉！阿嬤無在，菜園乜荒忒咧！
1 憶等︰音 rhidˋ denˋ；心裡有所掛記。
107 年全國語文競賽客家語朗讀文章高中學生組（饒平腔）
編號 04 號
【椰仔樹】
李得福原作老屋下个禾埕脣，種幾下頭椰仔樹，生啊三層樓屋恁高，阿公 用鉛線網圍等椰仔園，不准𠊎兜入去尞，驚怕椰仔葉無就細椰仔跌 下來，會擲著細人仔个頭那。每下晝日頭轉影咧，椰仔葉將西箭日 遮等，放尞日𠊎兜會兜楯頭仔2，坐在禾埕尾个涼樹下聽阿公講古，
講頭擺發大水崩河頭3，大水打對佐仔閣莊來，浸死4盡多人，家家 戶戶都囥在茅屋頂高；有兜人跋上椰仔樹頂高囥，椰仔樹又乜救著 當多分大水打到漂漂冇冇5个老百姓。記得，高天天个椰仔樹，樹影 下無愁無慮个臨暗，有阿公講都講毋忒个傳仔。
樹頂椰仔打到滿樹時，阿爸會請隔壁莊个阿順牯來摘，䀴佢將 大索䌈在腰仔項，手爬腳箭像猴仔跋樹樣，三兩下就跋上椰子樹 頂，將一葩一葩重鈂鈂仔个椰仔用索仔溜下來。阿爸在樹下𢯭手解 索仔，續手將粒把椰仔扐起來搖搖啊，係有水聲會瀝瀝落落6響，這 粒椰仔定著壞忒咧，裡背个椰仔水會臭臭食毋得。較大粒个椰仔較
2 楯頭仔：音 dunˋ teu erˋ；沒有椅背的凳子。
3 崩河頭：音 benˇ ho teu；河岸崩塌河水淹沒。
4 浸死：音 zimˋ siˋ淹死。
5 漂漂冇冇：音 po po pangˋ pangˋ；在水上漂浮流動。
6 瀝瀝落落：音 lid lid log log；起起落落的聲響。
老氣，水毋多賣無人愛斯好留來自家食。靚个一斤賣十過个銀，繳 𠊎兜細人仔个學費盡足。在五、六十年代該下，農家人係過煞猛兜 仔，畜兩條豬嫲來養豬子7賣，抑係種幾頭椰仔樹，就做得繳子弟讀 大學。
暗晡頭食飽夜，阿爸會將大大粒个椰仔洗淨放在砧枋項，用菜 刀將硬硬又賁个椰仔殼，一刀一刀定定仔削忒，裡背有一粒圓圓个 內殼，再細義个用刀尾挑開肚臍瓣，椰仔水就噴出來咧，再將內殼 倒漀8放在水勺分佢滴水，無幾久鮮甜个椰仔水就歸杓嫲，屋下人老 嫩大細一儕一杯退心火。伸个內殼用菜刀剖開來，有一層白色个椰 仔瓤，用湯匙挖來食，甜甜當像食果凍樣。聽講老椰殼乜係做弦仔 个材料。
摘椰仔个日仔，食飽夜後在禾埕尞涼，細人仔儕儕都扐等有瓤 个半析椰仔，用扁湯匙挖瓤食，阿嬤乜輒常在禾埕尾唱山歌，幼秀 又丟个9歌聲毋會輸電視項个歌星。還細食椰仔瓤聽阿嬤唱山歌个日 仔，就像昨晡日。
愐想起，高溜高溜个椰仔樹，越發分𠊎懷念，懷念該椰影下阿 公阿嬤个身影，摎𠊎心肝肚有椰仔味个童年。
7 養豬子：音 rhiongˇ zhuˇ ziiˋ；生小豬。
8 倒漀：音 doˋ giangˋ；倒立讓汁液流出。
9 丟个：音 diuˇ gaiˋ；音域高。
107 年全國語文競賽客家語朗讀文章高中學生組（饒平腔）
編號 05 號
【攔牛驚魂】
廖聖涵原作人類个好朋友斯係狗，𠊎相信當多人輒輒聽著抑係䀴著摎狗有 關个真實故事；毋過除了狗以外，人類个好朋友斯係牛；以前臺灣 係農業社會，莊下人大部分係耕種，因為科技無發達，步步愛靠人 力，所以逐家屋畜牛斯係當平常个事情；大牛愛犁田、拖車、載殼、
載菜、載禾稈，這兜當重个事頭，都愛靠牛來完成，牛摎人斯像兄 弟姐妹共樣，乜係屋下个一丁。
頭擺還在讀書个時節，放學轉來屋下斯愛𢯭做事，事頭當多當 多，親像斷烏時愛摎日時頭放出去討食个雞、鴨、鵝尋轉來，過愛 䀴雞、鴨、鵝有食飽無？若係食無飽，雞愛用撿轉來个禾串分雞食，
鴨、鵝愛用冇穀；牛拖牛車載番薯轉來，愛煮一大桶个番薯葉加米 糠，牛一下仔斯食淨淨；乜愛煠豬菜分豬食；大嫂在灶下煮飯無閒，
𠊎兜細人仔个、乜無好閒，𢯭擇菜、洗菜、㧡水、起火燒樵……。
食飯食飽了後斯在禾埕尞涼，該量時無冷氣乜無電風，全係用旗扇 撥涼。
莊下个所在蚊仔、烏蠅、蜞蚻滿壁角，日時頭烏蠅滿哪位都係，
暗晡時換蚊仔來鬥熱鬧，就算行路，蚊仔、烏蠅乜跈在頭那頂，膴
身脣，斯像狗跈路共樣；綯在禾埕尾該條牛分蚊吵著，頭緊拂、腳 緊跳，硬硬會綯毋核，大哥喊𠊎點火把去摎牛熏蚊仔，毋過蚊仔無 熏著嗄摎牛个毛燒淨淨，實在當慘。
牛歸年透天都當無閒，愛直直到過年前成隻月正有歇睏，記得 有一年个寒假，𠊎屋下該條牛綯在牛稠當多日，𠊎姆喊𠊎摎牛牽去 食草行行仔，牛䀴著𠊎當歡喜頭那緊拂，𠊎屋下後背有一條細路，
路脣草當青，牛一頭食草、𠊎一頭唱歌，心情當輕鬆，正在該歡喜 定，好點點䀴著牛毋食草，頭那緊拂，目珠金金䀴𠊎，斯像愛摎𠊎 食落去樣，𠊎一下著驚，牛索放分佢去，拚起腳緊走，牛乜跈在後 背走來，人講：牛走直、蛇走彎，𠊎跳過一條差毋多兩米闊个大水 圳，牛乜無認輸咻一下斯跳過去，摎別儕田底个番薯、地豆躪壞當 闊，落尾該條無乖个牛分𠊎二哥修理到當工夫，這下想起來還會驚。
107 年全國語文競賽客家語朗讀文章高中學生組（饒平腔）
編號 06 號
【阿姆个菜園角】
彭瑞珠原作阿姆个菜園角，有一頭葉仔花10。該葉仔花，原本單淨係一細 截个樹枝仔，分人細心細意个插在菜園角。佢像種佢个人共樣恁 牛，毋驚熱天發風搓、毋驚天公做大水，做佢緊生緊高、緊大緊靚。
到佢有半人恁高个時節，阿姆就去斬幾支仔堅韌个桂竹11，插在佢 脣頭分佢递。佢緊递緊暢、緊递緊高，递到屋簷恁高，不時開到滿 樹，桃紅色个花。
探12得著屋簷个花，還毋甘願，像係自家會尋路樣仔，又續等 递，递到二樓阿姆間房个窗門前，還知好莫遮著阿姆个窗門，日日 在窗門下摎日頭共下，喊阿姆跆起。阿姆䀴等該頭靚花，就算日頭 忒早喊佢跆起咧，乜毋會閼。阿姆總係笑咪咪仔䀴等該頭花，毋知 係䀴佢仰恁會大，抑係䀴樹頂有恁多个鳥仔在該冤家，恁心色。
不時，阿姆還會兜一張矮凳仔在樹下坐。轉熱个時節，葉仔花 煞猛递藤，屋簷鳥在樹頂作竇，打早就一樹嘰嘰啾啾，比唊嘴个𠊎
10 葉仔花：音 rhiab erˋ faˇ；九重葛。
11 桂竹：音 guiˋ zhugˋ；桂竹。
12 探：音 damˇ；伸出，向外延伸。
還較唊嘴13！暑假尞忒，𠊎做𠊎上臺北讀書，佢做佢起勢開花，阿 姆有時在樹下个日頭花仔臥頭䀴花，有時會行去菜園个另外一頭，
遠遠仔䀴該一樹个花。
一樹个花，寒天乜緊開。成時，天時寒、日頭放尞、烏雲賁賁，
合落起雨來，較靚个花乜活跳毋起來，較靚个色水乜䀴毋清楚，阿 姆就會心焦。一放學，就會接著阿姆个電話：「外背做烏貯潹哦，
你自家在外地啊，知好著燒來無？毋好寒著！烏天暗地啊，毋好弄 弄仔走14，𠊎斯異愁咧！恁暗个天，連在屋側角都䀴毋真哦，葉仔 花啊！」
該葉仔花，種在𠊎姆个菜園角，係𠊎上臺北讀書个前一年，阿 姆喊𠊎去森雄叔屋下，摎佢討來个樹枝仔，種起來个花。國中生个 𠊎，牛樣仔摎泥挖到深深、撳到拶拶，葉仔花走毋忒，毋會橫，在 菜園角乖乖大。𠊎哪知，該花係愛代去外地讀書个𠊎，摎阿姆共下 做伴个？好得，該花知好日日乖乖大、年年開到靚靚哦，代𠊎，安 慰著該恁多年，阿姆愁慮个心情。
13 唊嘴：音 giab zheˋ；多話。
14 弄弄仔走：音 nungˋ nungˋ erˋ zeuˋ；去外面閒蕩。
107 年全國語文競賽客家語朗讀文章高中學生組（饒平腔）
編號 07 號
【遮仔】
張美容原作無聊个落雨天，一個人無落無著，企在門前䀴等街路町15擎等 遮仔上上下下个人，有帶走帶走緊搐搐仔16个，也有定定仔行享受 雨中散步个；有一儕人擎支遮仔孤栖、孤栖个，也有兩儕扳等肩頭 共下抵一支遮仔个，𠊎心肝肚想：「一遮一世界，遮仔底下一定囥 等盡多故事。」
䀴等門角企等像一條瓜个遮仔，撐開來，就係𠊎心肝肚个一蕊 花。還細時節，在街路䀴著一支紅色間等青花个細遮仔，愛到奈毋 得，原旦阿姆嫌忒細支抵雨毋著毋肯買，毋過䀴𠊎目汁含等，最尾 還係買分𠊎。這支遮仔變𠊎个寶貝，一落雨，𠊎就著起紅水靴、擎 等紅遮仔，這家行、該家尞，風神唉唉17仔。好天時，遮仔也無閒 著，毋係提來爽份家啦，就係擎等來跳舞，該遮花捩到幾轂18哪，
遮仔下个細阿妹仔笑到嘴斯合毋密19。啊！快樂、純真个童年！
讀小學，見放學堵著打風時，阿姆就會送遮仔來學校，順續渡 𠊎轉，一路兩子哀叨叨叨叨20，阿姆一下仔、一下仔叮嚀：「水窟毋
15 街路町：音 gieˇ luˊ nenˇ；街道上。
16 緊搐搐仔：音 ginˋ chug chug erˋ；匆匆忙忙的樣子。
17 風神唉唉：音 fungˇ shin ngaiˋ ngaiˋ；很神氣的樣子。
18 捩到幾轂：音 lidˋ doˋ giˋ gugˋ；轉得多快！
19 合毋密：音 hab m miˇ；合不攏。
20 叨叨叨叨：音 do do doˋ doˋ；說個不停的樣子。
好跺落去、濫濫21个位所愛閃開、遮仔愛䀴風向正毋會綻忒。」遮 仔外背風合雨，遮仔裡背有阿姆淰淰个愛！到較大兜在都市讀書，
阿姆一䀴著天變變22就愛𠊎帶遮仔去，𠊎最驚擎支遮仔背尾嗄出大 日頭，分人䀴著就像毋識出空23个山精大戇樣。再過講，該隻年齡 小說䀴多咧，總試著迎等雨微仔行在街路町，係幾羅曼蒂克24个事 情，所以常下為著愛帶遮仔、毋帶遮仔摎阿姆齬齬齖齖，唉！無識 人好个少年！
緣分實在係奇妙个東西，大咧就會遇著一個人，甘願自家涿 溼，也愛摎你擎遮仔抵雨；甘願自家光頭落杓25，也愛摎你擎遮仔 抵日頭，陪你行過坎坎坷坷26个人生，不管外背雨幾大、日頭幾烈，
遮仔肚總係溫暖、安全个。當然，𠊎心肝肚還有一支最重要个遮仔，
雖然䀴毋著也摸毋著，毋過，佢總係在𠊎堵著大風大浪、失志無助 个時節，摎𠊎揞密密、抵塞塞，保護到好好，該就係爺哀摎𠊎撐起 來个愛个大遮仔，在這支遮下，𠊎無愁無慮、安然自在長大！
熱天時个遮頂，有白雪雪个桐花在該跳舞，落雨天就有滴滴涿 涿27个雨水在該唱歌，擎等遮仔行在街路町个人，一定摎𠊎共樣，
毋知有幾多故事在遮仔下演出！
21 濫濫：音 namˋ namˋ；泥濘不堪。
22 天變變：音 tienˇ bienˋ bienˋ；要變天的樣子。
23 毋識出空：音 m shidˋ chudˋ kungˇ；比喻不曾見過世面。
24 羅曼蒂克：音 loˊ manˋ diˋ kerˋ；外來語，指充滿感性氣氛。
25 光頭落杓：音 gongˇ teu log shog；頭上無任何遮擋物。
26 坎坎坷坷：音 kamˇ kamˇ kiedˋ kiedˋ；坎坷。
27 滴滴涿涿：音 did did dug dug；狀聲詞，此處指雨打在傘上的聲音。
107 年全國語文競賽客家語朗讀文章高中學生組（饒平腔）
編號 08 號
【檳榔樹】
謝惠如原作還細該下，屋下田坵有種檳榔樹，對田頭到田尾一行一行種到 筆直，行摎行之間有留引、排水个水壢。橫行又乜一頭一頭挷直線 種，䀴起來嶄然靚。阿爸講行摎行个闊度種一丈闊，做事行路較方 便，種菁仔樹退行時，兩頭之間留八尺闊，橫直闊度愛種罅來，另 日樹仔大咧，葉仔摎葉仔正毋會相唚28，割檳榔菁个割篙鐮29正過得。
每年五月份到九月份，爺哀五更早就跆起去菁園割菁仔，農家 人打早做事較涼爽，晝咧日頭較烈，目珠䀴天頂个檳榔菁會晟眼。
隔壁个叔公不時都會㖸講：「恁早出門做事愛摎鬼搶食乜？」割下 來一弓一弓个菁仔，用細貨車載轉來屋簷下放。暗晡頭食忒夜，爺 哀會坐在火光下剪菁仔，一粒一粒對菁弓項剪下來，天光日正載去 行口賣，阿姆講畜子女个飯餐錢，倈仔、妹仔个學費，全部靠檳榔 菁賣个錢來打所費。
放暑假个時節，阿哥摎𠊎愛𢯭手剪菁仔，老妹較細毋曉使剪仔 驚剪到手，所以負責摘菁絲，摘一晨早正摘著一細面盆，阿姆會褒
28 相唚：音 siongˇ zimˇ；原為嘴對嘴相親，此指互相碰觸之意。
29 割篙鐮：音 godˋ goˇ liam；用玻纖維做成有伸縮性的長竿，上綁細薄鋒利如彎月形 的鐮刀。
講：「阿妹恁慶哦！」每年到七、八月，學生仔放暑假咧，菁仔也 堵好大出，阿姆愛𢯭手割，使兩支割篙鐮來趕事，𠊎兜細人仔愛去 菁仔園𢯭擐菁仔，一弓一弓放上貨車頂。從細𠊎兜就係在田坵勞動 大个。
阿爸將割篙鐮一節一節挷到八想高30，大概有四丈零長，割菁 仔時竹篙搖來搖去，盡像提等大水筆，向等天頂寫無字天書；下把 仔又像在綠色畫布項畫符誥，阿爸使个通天筆，每一畫都會通天透 地。四歲个老妹著靴筒、蒙陽巾、戴帽仔，坐在工寮前个藤椅凳項，
異像細大人在該指揮𠊎兜做事，成時會問：「爸爸，你仰般無煮檳 榔分𠊎傍飯？」
阿爸應講：「檳榔毋係菜，無人煮來傍飯。」老妹講：該你做 得將菁仔像葡萄共樣，洗來分𠊎食䀴啊好食無？」
阿爸㖸到異大聲講：「做事聽到妹仔屎講話就毋會悿咧！」
自民國 68 年賽洛瑪風搓後，菁仔大起價，比種其他个農作物 較好，賣較多錢，所以，農民大量種檳榔樹，田坵無人愛蒔禾仔咧。
六堆个農民三十零年來，好得有種檳榔樹，生活過得毋會差。
30 八想高：音 badˋ siongˋ goˇ；八節長的高度，一節約 5 尺半。
107 年全國語文競賽客家語朗讀文章高中學生組（饒平腔）
編號 09 號
【菜瓜】
徐姿華原作記得，阿嬤好種菜，佢喊阿爸在屋面前搭瓜棚來種菜瓜，菜瓜 當會打，長透自家食毋去，還做得送分鄰舍，該兜鄰舍當愛食阿嬤 種个菜瓜，又萋又甘甜。
逐年正月半進前，阿嬤斯會摎自家點个菜瓜秧種落瓜棚下，佢 日日用心照顧，幼幼个菜瓜秧，當遽抽高、递藤，阿嬤逐日做下會 去巡菜瓜棚，驚怕正在該递个嫩芽，分風吹㪐忒，佢會細心細義同 瓜藤牽轉瓜棚下，用索略略固定在，分佢好順利跋往上，兩、三禮 拜過，菜瓜藤斯递到棚頂咧。
五、六月，菜瓜當會開花、當會打，行在路項遠遠都䀴得著屋 面前該歸棚淰黃个菜瓜花，阿嬤知𠊎兜細孲仔當豺，睡當晝跆起，
佢會去菜瓜棚摘十過蕊公个菜瓜花，略略仔洗淨搵攪好个麵粉卵落 鑊烰，烰一下嫩嫩个菜瓜花斯虬起來，烰到金黃金黃，香香酥酥个 味緒餳到𠊎兜口涎水嗒嗒跌，阿嬤用碗裝分𠊎這兜，𠊎兜細孲仔暢 壞咧，擎等碗斯走去簷脣下坐等食，該燒燒、酥酥還過甜香、甜香 个味緒，𠊎到今還記得。
煮菜瓜，阿姆一等慶，佢成下會用薑嫲菣香，成下換七層插來 調味，毋管仰般煮，該菜瓜湯斯係恁好食，燒燒食當甜、當好食，
冷冷食來攪燒飯還較湛，因爭係自家種个菜瓜，阿姆當毋驚人食，
做下用兩條菜瓜煮一碗公湯，該菜瓜湯係正正菜瓜个湯，無加半屑 水，正會恁清甜、恁好食。
阿嬤異做家，一半下菜瓜囥在葉下無巡著，兩日無摘忒老咧，
阿嬤會摎佢留等，留來做種抑係留來做菜瓜布，等到這留下來个老 菜瓜皮變黃黃赤赤，阿嬤斯會割下來，摎菜瓜皮剝忒，提去坑脣抑 係圳溝脣，緊拌緊洗，將菜瓜皮、菜瓜肉摎菜瓜子做下拌拌仔洗淨，
伸著白淨白淨、黃炣黃炣个菜瓜布，過摎菜瓜布提去炙燥，斯變做 洗碗摎鑪豬皮31當好用个菜瓜布咧！
到八月半，菜瓜打較少咧，阿嬤摎阿姆會將菜瓜藤割忒，菜瓜 藤一割忒，阿姆斯會遽遽用盎來承菜瓜水，莫䀴該菜瓜藤恁大棚，
正經會出菜瓜水个係菜瓜藤生在地泥下个頭，該菜瓜藤較旺壯个，
斯承得著幾下罐菜瓜水，這菜瓜水係該個年代盡素絲个保養品，老 老嫩嫩个細妹人做下當好用菜瓜水來搽面，聽講搽了菜瓜水面會較 白、較幼呢！
這菜瓜，雖然毋係麼个難得个植物，毋過因爭佢一身都係寶，
對花、果到藤，做下有佢个用途，正會人人都愛佢；俚也毋好 䀴輕自家，愛學習菜瓜精神，發揮自家个能力，自然斯會有人欣賞
啦！
31 鑪豬皮：音 luˋ zhuˇ pi；此處指洗澡。
107 年全國語文競賽客家語朗讀文章高中學生組（饒平腔）
編號 10 號
【身影】
徐貴榮原作年正過忒，春雨落無停，寒颼颼仔！䀴等加兩日就愛開學上臺 北，屋下還無半點錢，毋知愛仰結煞正好？愐無計咧！無奈何，阿 爸講來去摎阿明伯先撥兜䀴啊！
阿明伯係車頭个副驛長，月月有月給，兼開礱間，又輒輒貌炭 仔請人燒，𠊎爸就係長透分佢請去燒炭个工人。該日晨早，打早七 點零，雨正落過，天還濛濛，歸路濕溚溚，熟熟个路，哪有麼个心 情去欣賞雨後个景致。阿爸摎𠊎背等皮箱行頭前，𠊎擐等包袱跈到 後背，衫袋肚袋無兩銑錢。
去到阿明伯屋下，阿明伯親暱暱行等出來，阿爸講：「𠊎倈仔 愛上臺北讀書，先撥五百箍分𠊎好無？等好天𠊎正做還你，分你堵 數！」五百箍，對這下來講，見毋着麼个，一日个菜錢就毋止，毋 過在四十年前，係一般人半個零月个工錢。
「有麼个問題！上臺北五百箍仰會罅？」阿爸毋敢借恁多，等 阿明伯問忒，回講「罅啦！罅啦！𠊎倈仔讀公費學校。」阿爸從阿 明伯手町接著五百箍个時節，頷頭又頷頭，承蒙又承蒙，緊講加兩 日仔，係好天就會跈等上工做事。𠊎心肚想：怕係阿明伯䀴著阿爸
一生人忠實耿直，做人做事毋識梟批；又怕係䀴𠊎馴良乖巧，正恁
「阿莎力32」，實在還感心哪！
𠊎接過該五百箍，𠊎知，阿明伯个大恩大德，做毋得毋記得，
煞煞摎阿明伯承蒙。阿明伯送𠊎兩子爺到門前，阿爸又摎佢講加一 到「承蒙！」頷加一下頭。該五百箍，車單買忒三十六箍半，就伸 着四百零定定，愛用一學期呢！行到月臺，阿爸摎𠊎講：「車錢當 貴，毋好恁輒轉來，學期結束正轉好啦！」
天色濛濛，車頭西片个山紅花33開咧！探頭䀴阿爸，恁寒个落 雨天，赤腳麻叉，戴等笠婆，著等舊衫，頭犁犁、慢慢行下月臺，
34過鐵枝，一步一步順等「均工35」，行上駁坎，轉屋个身影，到 今都還記得；阿爸个話，還到耳窟頭，「車錢恁貴，毋好恁輒轉哦！」
窮苦人个無奈呀！又想著該下摎阿明伯撥錢時，頷頭多謝个情景，
求人無恁該啊！
火車發行咧！初中正畢業个𠊎，想著麼个呢？開始留戀起故鄉 來，目汁含等，當多个理想，跈等火車載到臺北。
32 阿莎力：音 aˇ sa liˋ；日語，乾脆。
33 山紅花：音 sanˇ fung faˇ；山杜鵑、野杜鵑。
34 過：音 kiamˋ goˋ；跨過。
35 均工：音 giunˇ gungˇ；當地話把「枕木」稱為「均工」。
