107 年全國語文競賽客家語朗讀文章高中學生組（大埔腔）
編號 01 號
【𤌍 窯】
劉玉蕉原作打早，斯聽著阿奶交代阿姆，去市場割兜豬肉、買兜萋魚轉來，
「欸，古怪！有麼人做生日係無？」問過阿奶正知，係滿姑愛轉妹 家，怪得阿奶恁歡喜！探著滿姑轉來个時間，𠊎走去莊頭阿惜姨个 柑店等，𠊎頭勾勾緊吊望1。姑丈个車吂駛偎，𠊎斯走出去擛手咧，
姑丈車一頓恬𠊎斯蹶上車，滿姑笑緊講：「屎朏吂坐燒，斯愛落車 咧，恁大閒情！」，知佢歡喜，𠊎擠入2車肚斯同姑表姐妹大聲搞起 來咧。
滿姑帶个等路已餳人，逐儕都有一份，車後斗還有一大布袋个 番薯，阿奶講：「番薯恁多仰結煞，無斯來𤌍窯好咧，屋背田項个 泥，上禮拜正翻過，應該乜燥咧，來𤌍窯，愛無？」「好哦！讚 啦！」聽著有好搞，吾這兜黏時斯應口。
起窯哩喲，阿爸扐三矻大泥團做窯門，窯身斯尋像厥拳頭嫲恁 大个泥矻來結，疊高了還過愛慢慢收偎來，幾下到，結到半爛燦斯 屙落來，「唉，老刀嫲無鋼咧，無恁該喢哦！」臨尾還勞擾阿姑丈
1 吊望：音 diauˋ mongˋ；眺望，看動靜。
2 擠入：音 zi+ ngibˋ。
𢯭手，正順勢搣好。窯一起好，阿哥斯指揮命令咧，佢喊𠊎同姑表 姊妹去撿樵枝，阿姊負責起火、架樵，大姊當倚勢得，火畀掌都猛 猛猛，紅紅个火舌嫲對泥矻縫項鑽出來，像愛擘食人个樣，害吾這 兜閃都遠遠遠，無幾久，泥矻燒去像甜柿恁泥紅啾啾咧！
「好勢哩喲，莫過架樵，火退出來了，斯使得擲番薯入去咧！」
阿奶恁泥講。
火炭掊開3來，番薯斯一粒一粒擲入窯肚去。「哇！」表阿哥擎 擔竿一𢫦落去，紅紅个泥矻跈核屙落來，堵好弇在番薯上背，「建 設難，破壞容易」，細人輪核𢫦泥矻，逐個都搣去一頭一面，背尾 還係姑丈來收尾，佢同幼泥掖上背，用砂耙過頓畀拶，上背還過插 一支香，恁泥一屑煙都無出咧，正喊吾等去尞。真無簡單結䟘來个 窯，這下看著已像一個番薯壟呢！
囥人尋个遊戲吂搞罅，遠遠斯鼻著香味咧，影著阿姆在該開 窯，吾這兜遽遽偎過去看佢變奇術，阿姆驚怕番薯畀摟綿，細心細 意在該慢慢挖，寬寬摟，香氣餳都吾這兜口涎溚溚跌，肚屎乜嘰哩 咕嚕緊抗議。田脣項，吾等比比坐，香香个番薯塞歸嘴，天恁清，
番薯恁香，在屋背个田項，吾等搞到斷烏4正轉屋。
3 掊開：音 boi+ koi+；撥開。
4 斷烏：音 ton+ vu+；天完全黑。
107 年全國語文競賽客家語朗讀文章高中學生組（大埔腔）
編號 02 號
【味瑞】
李夢花原作有一種味瑞，毋係用舌嫲嚐得出，係用心肝正感受得著；有一 種味瑞，毋係嚐過斯記入心，係隨時都會觸著心肝頭，毋會毋記得。
阿姆日日㧡水畜豬，愛顧一屋家大細食著，歸日無閒濟借，菜 尾將就攪飯食，這艱苦5个日，到細人日見日大了後正轉甘，這係阿 姆个味瑞。
阿爸逐日汗流脈絡，為著家庭疲爬極蹶煞猛做，底衫罕得燥，
記得還細時節有一擺發燒，阿爸背核𠊎去分醫生看，頭那凴在阿爸 賁賁闊闊个背囊項，有一種燒暖个幸福、鼻著該鹹纖鹹纖6个汗水 味，係𠊎熟事个阿爸个味瑞。
吾个味瑞係仰脣呢？青春年華个記憶，有期待、乜使得發夢 个，叛逆年紀，除撇讀書，心肝肚該粒少女个心，總係期待學校該 個斯文个男同學，使得偎近分享吾个心情故事。斯像吂翕熟个青柿 樣，劍劍又澀喈喈7。酸澀跈核成長火焙、刀削，到尾轉甘，這係𠊎 酸柑茶樣戀愛个味瑞。
5 艱苦：音 gan+ ku^；痛苦難過。
6 鹹纖鹹纖：音 hamˇ siam+ hamˇ siam+；略帶鹹味。
7 澀喈喈：音 seb^ gaiˇ gaiˇ；很澀。
還有一種安做人情味，在客家莊滿哪都有，這片阿罅伯姆喊：
入來坐！該片阿火叔喊：來泡茶！這杯釅茶个溫度，分客家莊个青 草有味、日頭有味，連空氣都帶有純善熱心醹醹个人情味，這係𠊎 出外打拚盡思念个情感。都市人情薄如紙，連戴兩對門都毋相識，
各儕斯像帶一層保護色，大家毋敢交攞忒深，所以愛轉莊下，正尋 得轉該簡單个安然自在。
幸福係麼个味呢？無閒濟借个人，使得停途一下鼻花香；耕田 个人，使得收成歸穀倉；做爺哀个人，使得看著屋家大細康健平安；
單身哥，使得食著餔娘个飯菜香。逐個人享受幸福甜甘味之前，會 受到苦澀个艱難，係畏苦，毋去打拚，斯毋會有成功个日，當然乜 毋會有歡喜个滋味，嫩筍乜愛經過雨涿日炙正會變老竹。
人生情感个酸、甜、苦、辣、鹹、澀，你嚐過幾多種？鼻公酸、
生活苦、目汁鹹，下把下還有兜辣，這轉甜个過程係毋係較有搭歃
8？成半下你試著會跼去敨氣毋出，愛愐著：頭前有烏影，後背斯有 日頭箭核。往語講：「人意好，食水甜。」換一個想法、換一種心 情用心來感受，做下會係甘甜个味瑞。
8 搭歃：音 dabˋ sabˋ；具趣味性。
107 年全國語文競賽客家語朗讀文章高中學生組（大埔腔）
編號 03 號
【阿奶个菜園】
羅瑞霞原作吾奶戴在竹東入去五指山裡背山林壁壢角个半山排，該係𠊎盡 好去个所在，也係𠊎盡想念个位所。
自細，見若堵著尞日，阿爸斯駛車，載阿姆同吾三姊妹，行過 彎彎斡斡个山路，過跋一條大崎，車停到半山排鄰舍个禾埕。阿爸 牽𠊎同老妹，阿姆揇老弟，過再行一截石碫，在一間伙房屋个大門 前停落來，禾埕肚晒鹹菜个阿奶看著吾等歸家屋轉來，笑咪咪來開 大門，嘴肚緊念，「恁早呢」！這間紅磚屋，係阿爹同阿奶戴个所 在，也係阿爸个胞衣跡。
見擺到尞日，阿奶知吾這兜會轉去看佢，早早斯買便當多食个 東西，放在冰箱肚，準備分吾恁多姊妹食。下把下係講阿爸有事情 停途，較慢轉到，該阿奶斯心焦焦哩喲，遠遠斯看著佢頭那勾啊勾，
看著吾等腳一伸出車門，黏時眉開目笑，嘴緊念講︰「仰恁慢呢」！
正正係阿奶惜孫，一屑都毋會差。
阿奶在河壩脣有一坵菜園，該係𠊎恁多姊妹盡好去个所在。菜 園裡肚種當多菜，春天時，阿奶會帶吾恁多姊妹去菜園摘菜，還會 教吾等認菜，這係甕菜、該茄色吊核个係吊菜、還有該青青生竻个 係竻瓜，講撇隨手斯摘落來，衫袖捽捽嚟斯拿分𠊎食，講︰「這瓜
無射藥，食了會康健」，下把會跍落來，在菜廂脣挷草、捉菜蟲。
記得第一擺教吾等認麼个係菜蟲，阿奶手伸落菜葉拈一尾青色軟 軟，還緊停動个菜蟲，老弟看著該緊停動又廿廿趖9个東西，嚇去面 壢青，大嫲牯聲拚命噭，阿奶看著嗄大聲笑講︰「戇孫！這係菜蟲，
有麼个好驚啦？恁無膽。」
菜園脣，有一坵閒田，阿奶知𠊎好食甘蔗，在閒田種幾蒲甘蔗，
冬下時甘蔗好食咧，阿奶會帶𠊎去甘蔗園，喊𠊎坐在菜園个田脣，
佢擎刀去斫甘蔗，順續同頭尾削撇，過再剁一截一截，拿分𠊎喫，
哇！還甜哦！阿奶看著𠊎食去滿足，面項笑咪咪問講︰「好食無？
有甜無？」該下𠊎斯顧食，緊頷頭，阿奶看著乜當歡喜呢！
時間過來當遽，十外年過去咧！吾這兜也大漢咧，阿奶乜轉長 山賣鴨卵咧！毋過，愐著阿奶个菜園，這下毋知變仰脣。心肝肚總 係掛吊核10，舊年，𠊎喊阿姆載𠊎轉去山肚看該間細漢時節，長在 轉去尞个伙房屋，還䟓工行去河壩脣看菜園。毋過，行到河壩脣，
看著該頭擺个菜園跡，草生去比人還較高，唉！阿奶無在，菜園乜 荒撇咧！
9 廿廿趖：音 ngiamˋ ngiamˋ soˇ；蠕動爬行。
10 掛吊核︰音 guaˋ diauˋ hedˋ；心裡時時掛記著。
107 年全國語文競賽客家語朗讀文章高中學生組（大埔腔）
編號 04 號
【椰子樹】
李得福原作老屋家个禾埕脣，種幾下頭椰子樹，生來有三層樓屋恁高，阿 爹用鉛線網圍緊椰子園，不准吾等入去尞，驚怕椰子葉無斯細椰子 跌落來，會𢫦著細人个頭那。逐下晝日頭轉影咧，椰子葉將西曬个 日光遮核，放尞日吾等會兜楯頭11，坐在禾埕尾个涼跡項聽阿爹講 古，講頭擺出大水崩崁頭12，大水打對佐閣莊來，浸死已多人，家 家屋屋都走上茅屋頂高；有兜人跋上椰子樹頂高，椰子樹又乜救著 當多分大水打去浮浮滂滂13个老百姓。記得，高天天个椰子樹，樹 影下無愁無慮个臨暗，有阿爹講都講毋撇个傳。
樹頂椰子打去滿樹之時，阿爸會請隔壁莊个阿順牯來摘，看佢 將大索䌈在腰項，手爬腳箭像猴跋樹个樣，三兩下斯跋上椰子樹 頂，將一擐一擐重鈂鈂个椰子用索溜落來。阿爸在樹下𢯭手解索，
續手將椰子粒扐起來搖搖嚟，係有水聲會瀝瀝落落14響，這粒椰子 定著壞撇咧，裡背个椰子水會臭臭食毋得。忒大粒个椰子較老，水 毋多賣無人愛，將就留來自家食。靚个一斤賣十外個銀，繳吾等細
11 楯頭：音 dun^ teuˇ；沒有椅背的凳子。
12 崩崁頭：音 ben+ kamˋ teuˇ；河岸崩塌河水淹沒。
13 浮浮滂滂：音 poˇ poˇ pang+ pang+；在水上漂浮流動。
14 瀝瀝落落：音 liˋ liˋ logˋ logˋ；起起落落的聲響。
人个學金已足。在五、六十年代該下，農家人若係較煞猛兜，畜兩 隻豬嫲來養豬子賣，抑係種幾頭椰子樹，斯使得繳子弟讀大學。
暗晡頭食飽夜，阿爸會將大大粒个椰子洗淨放在砧枋項，用菜 刀將硬硬又賁个椰子殼，一刀一刀定定削撇，伸著裡背一粒圓圓个 內殼，正過細義用刀尾挑開肚臍瓣，椰子水斯噴出來咧，過來將內 殼倒汫15放在杓嫲畀跌水，無幾久鮮甜个椰子水斯歸杓嫲咧，屋家 人老嫩大細一儕一杯退心火。伸个內殼用菜刀破開來，有一層白色 个椰子瓤，用湯匙摟來食，略略甜甜已像食果凍共樣。聽講老椰殼 乜係做殼弦个材料哦。
摘椰子个日，食飽夜大家在禾埕尞涼，細人逐個都扐緊有瓤个 半析椰子，用扁湯匙摟瓤食，阿奶乜輒輒在禾埕尾唱山歌，幼秀个 歌聲毋會輸電視項个歌星。還細該下食椰子瓤聽阿奶唱山歌个日，
斯像昨晡日个事共樣。
愐起，高天天个椰子樹，越致懷念，懷念該椰影下阿爹阿奶个 身影，同吾心肝肚有椰子味个童年。
15 倒汫：音 doˋ ziangˋ；倒立讓汁液流出。
107 年全國語文競賽客家語朗讀文章高中學生組（大埔腔）
編號 05 號
【掌牛驚魂】
廖聖涵原作人類的好朋友係狗，𠊎相信真多人輒輒聽著無斯看著同狗有關 个真實故事，毋過除了狗以外，牛乜係人類个好朋友。以前台灣係 農業社會，莊下人大部分係耕田人，因致科技無發達，項項都愛靠 人力，所以逐家屋畜牛係真平常个事；大到犁田、拖車、載穀、載 菜、載禾稈這兜真重个事頭，做下愛靠牛來做，人同牛斯像兄弟姐 妹共樣，牛算來乜係屋家个一員。
頭擺還在讀書个時節，放學轉屋家斯愛𢯭做事，事頭真多，像 天暗昏个時，愛將日時頭放出去絡食的雞鴨鵝尋轉來，還愛看雞鴨 鵝有食飽無？若係食無飽，雞愛用拈轉來的禾串餵，鴨鵝斯愛用冇 穀，該拖牛車載番薯轉來个牛，斯愛煮一大桶个番薯葉加米糠分佢 食，牛一下斯食淨淨咧，還愛炆豬菜分豬食，大嫂在灶下無閒煮飯，
做細人个𠊎，乜無好閒，𢯭擇菜 、洗菜、㧡水、顧灶頭火……。
食飽了後正有好在大禾埕坐涼，歇睏，在無冷氣乜無電風个時代，
做下用葵扇16撥涼。
莊下所在蚊啦、烏蠅啦、黃蚻滿壁角，日時頭烏蠅滿哪都係，
16 葵扇：音 kiˇ shenˋ；蒲葵扇。
暗晡頭換蚊來鬥鬧熱，準講行路，蚊、烏蠅乜跈頭那頂，圍身脣飛，
斯像狗跈路共樣，禾埕尾該隻牛分蚊吵去頭晃腳蹬，硬硬安棧毋 得，大哥喊𠊎擎火把去逐牛欄个蚊，毋過蚊無逐著嗄同牛个毛燒淨 淨，實在真無結煞。
牛長年透天做下真無閒，直直愛到過年前成個月正有好歇睏。
記得有一年尞寒，吾屋家該隻牛關在牛欄真多日咧，吾姆喊𠊎同牛 牽去食草行行嚟，牛看著𠊎真歡喜，頭那緊晃，屋背有一條細路，
路脣草真靚，牛在食草𠊎在唱歌，心情真輕鬆，正在歡喜等，玄玄 風看著牛毋食草頭那緊晃，目珠金金看𠊎，像愛同𠊎食落肚个樣，
𠊎一下著屎驚，牛索嗄抨撇17，拚起腳緊走，牛乜跈後背逐來，人 講：牛走直、蛇走彎，𠊎跳過一條差不多 2 米闊个大水圳，牛乜無 認輸咻一下斯跳過去，同別儕田肚个番薯、地豆蹴壞真闊，盡尾該 隻起番癖个牛分吾二哥修理都真功夫，現下愐著還會驚。
17 抨撇：音 biang+ ped^；丟掉。
107 年全國語文競賽客家語朗讀文章高中學生組（大埔腔）
編號 06 號
【阿姆个菜園角】
彭瑞珠原作阿姆个菜園角，有一頭竻葉花18。該竻葉花，原本單淨係一細 截樹枝，分人細心細意插在菜園角。佢像種佢个人共樣恁韌命，毋 驚熱天做風搓、毋驚天公出大水，做佢緊生緊大頭、緊大緊靚。到 佢有半個人恁高个時節，阿姆斯去倒幾支桂竹，插在厥脣項分佢 递。佢緊递緊暢、緊递緊高，递到屋簷恁高，不時開歸樹，新娘色 个花。
探19到屋簷脣个花，還毋甘願，像自家會尋路个樣，又續緊递，
递到二樓阿姆間房个窗門前，還知好莫遮著阿姆个窗門，日日在窗 門下同日頭共下，喊阿姆䟘床。阿姆日日看該頭靚花，準講日頭忒 早喊佢䟘床，乜毋會譴。阿姆總係笑咪咪看該頭花，毋知係看佢仰 恁會大，抑係看樹頂有恁多个鳥在該冤家，恁生趣。
不時，阿姆還會兜一張矮凳在樹下坐。轉熱个時節，竻葉花煞 猛递藤，瓦雀在樹頂做竇，打早斯一半下一樹嘰嘰啾啾，比唊嘴20个 𠊎還較唊嘴！尞涼尞撇，𠊎做𠊎上臺北讀書，佢做佢起勢開花，阿
18 竻葉花：音 ned^ rhabˋ fa+；九重葛。
19 探：音 dam+；伸出，向外延伸。
20 唊嘴：音 giabˋ zhoiˋ；多話。
姆一半下在樹下个日頭縫探頭看花，一半下會行去菜園个另外一 頭，遠遠看該開歸樹鬧鬧个花。
歸樹个花，寒天乜緊開。成半下天時寒、日頭放尞、烏雲賁賁，
又落雨，較靚个花乜活跳毋起來，較靚个色目乜看毋清楚，阿姆斯 會心焦。一放學，斯會接著阿姆个電話「外背起烏𪐞𠘆21哦，你自 家在外地啊，知好著燒來無？毋好寒著！烏天暗地啊，毋好袪袪走
22，𠊎斯已愁哦！恁暗个天，連在屋側角都看毋真竻葉花哦！」
該竻葉花，種在吾姆个菜園角，係𠊎上臺北讀書个前一年，阿 姆喊𠊎去森雄叔屋家，同佢討來个樹枝，插生个花。國中生个𠊎，
將泥摟深深、搤拶拶，竻葉花種在在，毋會橫，在菜園角乖乖大。
𠊎哪知，該花係愛替去外地讀書个𠊎，同阿姆做伴个？好得，該花 知好日日乖乖大、年年開靚靚，替𠊎，安慰著該恁多年，阿姆愁慮 个心情。
21 烏𪐞𠘆：音 vu+ duˋ senˋ；冬末初春陰雨溼冷的天氣。
22 袪袪走：音 kia+ kia+ zeu^；去外面閒蕩。
107 年全國語文競賽客家語朗讀文章高中學生組（大埔腔）
編號 07 號
【遮】
張美容原作無聊个落雨天，一個人無落無著，企在門前看街路項擎緊遮上 上下下个人，有帶走帶走緊拚拚23个，也有定定行享受雨中散步个；
有一個人擎緊遮孤栖、孤栖个，也有兩儕扳肩揇頸共下遮一支遮 个，吾心肝肚想：「一遮一世界，遮底下定著囥核已多故事。」
看著門角凴核像一條瓜个遮，打開來，斯係吾心肝肚个一蕊 花。還細時節，在街路看著一支紅色間24青花个細遮，愛都奈毋得，
打先阿姆嫌忒細支遮雨毋著毋肯買，毋過看𠊎目汁含緊，盡尾還係 買分𠊎。這支遮變做吾个寶貝，一落雨，𠊎斯著紅水靴、擎紅遮，
這家行、該家尞，風神喋喋。好天時，遮也無閒著，毋係拿來搞份 家啦，斯係擎緊來跳舞，該遮花㨎都迷迷迷25，遮下个細阿妹笑去 嘴合毋密26。啊！快樂、純真个童年！
讀小學，見放學堵著打西北雨，阿姆斯會送遮來學校，順續帶 𠊎轉，一路兩子哀挼挼挼挼27講無停，阿姆緊行緊叮嚀：「水窟毋好
23 緊拚拚：音 gin^ biangˋ biangˋ；匆匆忙忙的樣子。
24 間：音 gamˋ；摻雜。
25 㨎都迷迷迷：音 nun^ do+ miˇ miˇ miˇ；轉得很快！
26 合毋密：音 habˋ mˇ mi+；合不攏。
27 挼挼挼挼：音 no+ noˇ no noˋ；說個不停的樣子。
浙28落去、濫濫29个位所愛閃開、遮愛看風向正毋會貶遮花。」遮外 背風合水，遮裡背有阿姆淰淰个愛！到較大兜出外市讀書，阿姆一 看著變天斯愛𠊎帶遮去，𠊎盡驚擎遮去到尾嗄出大日頭，分人看著 斯像毋識出空30个山戇。過再講，該年代小說看多咧，總試著迎緊 雨毛在路項行，係幾羅曼蒂克个事情啊，所以長在為著帶遮、毋帶 遮同阿姆齬齬齖齖31，唉！毋知人好个少年！
緣分實在係奇妙个東西，大咧斯會遇著一個人，甘願自家涿 溼，也愛同你擎遮抵雨；甘願自家光頭落杓32，也愛同你擎遮抵日 頭，陪你行過坎坎缺缺33个人生，不管外背雨幾大、日頭幾烈，遮 肚總係燒暖、安全个。當然，吾心肝肚還有一支盡重要个遮，雖然 看毋著也摸毋著，毋過，佢總係在𠊎堵著大風大浪、失志無助个時 節，將𠊎揞密密、遮塞塞，保護到好好，該斯係爺哀同𠊎撐起來个 愛个大遮，在這支遮下，𠊎無愁無慮、安然自在成人！
熱天時个遮頂，有白雪雪个桐花在該跳舞，落雨天有滴滴篤篤
34个雨水在該唱歌，擎緊遮行在路項个人，定著同𠊎共樣，毋知有 幾多故事在遮下演出！
28 浙：音 zhebˋ；踩踏。
29 濫濫：音 lamˋ lamˋ；泥濘不堪。
30 毋識出空：音 mˇ shid^ chud^ kung+；比喻不曾見過世面。
31 齬齬齖齖：音 ngiˋ ngiˋ ngiaˋ ngiaˋ；口角。
32 光頭落杓：音 gong+ teuˇ logˋ shogˋ；頭上無任何遮擋物。
33 坎坎缺缺：音 kamˋ kamˋ kied^ kied^；坎坷。
34 滴滴篤篤：音 didˋ didˋ dugˋ dugˋ；狀聲詞，此處指雨打在傘上的聲音。
107 年全國語文競賽客家語朗讀文章高中學生組（大埔腔）
編號 08 號
【檳榔樹】
謝惠如原作還細該下，屋家田坵項有種檳榔，對田頭到田尾一行一行種去 直直直，行同行之間有留蔭水、排水个水溝。橫行又乜一頭一頭挷 直線種，看起來嶄然靚。阿爸講行同行間35个闊度一丈，做事行路 都方便，種菁樹退行該下，每一頭个距離斯種八尺闊，橫直闊度愛 種罅來，另次日樹大頭咧，葉同葉正毋會相唚36，割菁个割篙鐮37正 過得。
逐年五月份到九月份，爺哀五更早斯䟘床去菁園割菁，農家人 打早做事較涼爽，晝咧日頭忒烈，目珠看天頂个檳榔菁會晟眼。隔 壁个叔公不時都會笑講：「恁早出門做事愛同鬼搶食咩？」割落來 一弓一弓个菁，用細貨車載轉來簷脣下放。暗晡頭食飽夜，爺哀會 坐在火光下剪菁，一粒一粒對菁弓項剪落來，天光日正載去行口 賣，阿姆講畜子女个飯餐錢，倈妹个學書銀，全靠菁賣个錢來打所 費。
35 間：音 gamˋ；間隔。
36 相唚：音 siong+ zim+；原為嘴對嘴相親，此指互相碰觸之意。
37 割篙鐮：音 god^ go+ liamˇ；用玻纖維做成有伸縮性的長竿，上綁細薄鋒利如彎月形 的鐮刀。
放暑假个時節，阿哥同𠊎愛𢯭手剪菁，老妹還細毋曉使剪驚剪 著手，斯負責摘菁絲，摘一朝脣正摘著一細面盆，阿姆會褒講：「阿 妹呀還慶哦！」逐年到七、八月，學生放暑假咧，菁也堵好大出，
阿姆愛𢯭手割，使兩支割篙鐮在趕事，吾等細人愛去菁園𢯭擐菁，
一弓一弓放上貨車項。自細吾等斯係在田坵勞動中大漢个。
阿爸將割篙鐮一節一節挷有 8 想高38，大約有四丈零長，割菁 時節竹篙搖來搖去，已像擎緊大水筆，向天頂寫無字天書；下把下 又像在綠色畫布項畫符誥，阿爸使个通天筆，每一畫都會通天透 地。四歲个老妹著靴笐、䌈手巾、戴帽，坐在工寮前个藤凳項，已 像細大人在指揮吾等做事，成半下會問：「爸爸，你仰脣無煮檳榔 分𠊎傍飯？」
阿爸應講：「檳榔毋係菜，無人煮來傍飯。」老妹講：「該你使 得像葡萄共樣，洗來分𠊎食看好食無？」
阿爸笑去當大聲講：「做事聽著妹屎講話斯毋會𤸁咧！」
自民國 68 年賽洛瑪風搓過後，菁起大價，比種別樣个農作物 較好，賣較多錢，所以，農民大量種檳榔，田坵無人愛蒔禾咧。六 堆个農民三十零年來，好得有種檳榔，生活過來毋會㜮。
38 8 想高：音 bad^ siong^ go+；八節長的高度，一節約 5 尺半。
107 年全國語文競賽客家語朗讀文章高中學生組（大埔腔）
編號 09 號
【菜瓜】
徐姿華原作記得，阿奶好種菜，佢喊阿爸在屋面前搭瓜棚來種菜瓜，菜瓜 當會打，長在自家食毋去，還使得送分鄰舍，該兜鄰舍當愛食阿奶 種个菜瓜，講又萋又甜，還過煮出來个湯，毋會烏烏，已餳人食。
逐年正月半進前，阿奶斯會同自家點个菜瓜秧徙去瓜棚下種，
佢日日去巡看，幼幼个菜瓜秧，當遽抽高、递藤，阿奶逐日會去巡 菜瓜棚，驚怕正在递个嫩芽，分風吹㪐撇，佢會細義細義將瓜藤牽 轉瓜棚下，用索略略固定在豆莉竹項，分佢好順利攀往上，兩、三 禮拜過，菜瓜藤斯递上棚頂咧。
五、六月，菜瓜當開花、花當鬧，吂入屋肚路項遠遠斯看得著 屋面前該歸棚淰黃个菜瓜花，阿奶知吾等細孲嗶枵豺39，佢當晝睡 䟘來，佢會去菜瓜棚摘十外蕊公个菜瓜花，略略洗淨搵攪好个麵粉 打卵漿落鑊去烰，烰一下嫩嫩个菜瓜花斯虬起來，烰去金黃金黃，
香香酥酥个味瑞餳都吾等口涎水嗒嗒跌，阿奶用碗裝分吾這兜，吾 等細孲嗶暢壞咧，擎緊碗斯走去簷脣下坐核食，該燒燒、酥酥還過 甜香、甜香个味瑞，𠊎到今還記得。
煮菜瓜，阿姆一等慶，佢成半下會用薑嫲菣香，有成下換摻七
39 枵豺：音 iau+ saiˇ；嘴饞愛吃。
賢插40來提味，毋管仰脣煮，該菜瓜湯斯係恁好食，燒燒食當甜、
當好食，冷冷食來攪燒飯過還較慶，因致係自家種个菜瓜，阿姆當 毋驚人食，做下用兩條菜瓜煮一碗公，該菜瓜湯係正正菜瓜个湯，
無加半屑水，硬熻軟个正會恁清甜、恁好食。
阿奶已做家，一半下菜瓜囥在葉下無巡著，兩日無摘過潦老撇 咧，阿奶會同佢留核，留來做種抑係留來做菜瓜布，等到這留落來 个老菜瓜皮變黃黃赤赤，阿奶斯會割落來，將菜瓜皮剝撇，拿去坑 脣抑係圳溝脣，緊拌緊洗41，將菜瓜皮、菜瓜肉同菜瓜子做下拌拌 洗淨，伸著白淨白淨、黃炣黃炣个菜瓜布，正拿去日頭下晒燥，斯 變做洗碗同洗身、鑪㿸當好用个菜瓜布咧！
八月半過，打个瓜安做秋瓜，菜瓜打較少咧，阿奶同阿姆會將 菜瓜藤割撇，菜瓜藤一割撇，阿姆斯會遽遽用盎來盛菜瓜水，莫看 該菜瓜藤恁大棚，正經會出菜瓜水个係菜瓜藤生在地泥下个頭，該 菜瓜藤較壯旺个，斯盛得著幾下罐菜瓜水，這菜瓜水係該個年代盡 素絲个保養品，老老嫩嫩个細妹人做下當好用菜瓜水來搽面，聽講 搽了菜瓜水面會較白、較幼呢！
這菜瓜，雖然毋係麼个高貴个菜，毋過因致佢一身都係寶，對 花、果到藤，做下有厥个用途，正會人人都愛佢；人也毋好看輕 自家，愛學習菜瓜精神，發揮自家个才能，機會自然斯會來！
40 七賢插：音 cidˆ hienˇ cab ˆ；九層塔。
41 緊拌緊洗：音 ginˆ pan+ ginˆ seˆ；邊摔打邊洗。
107 年全國語文競賽客家語朗讀文章高中學生組（大埔腔）
編號 10 號
【身影】
徐貴榮原作年正過撇，春雨落無停，寒囉羅咧！加兩日斯開學愛上臺北，
屋家還無半點錢，毋知愛仰結煞正好？愐無計咧！無奈何，阿爸講 來去同阿明伯先撥兜看哪！
阿明伯係車頭个副站長，月月有月給，兼開礱間，又輒輒貌火 炭請人燒，吾爸斯係長在分佢請去燒火炭个工人。該日朝脣，打早 七點零，雨正落過，天還濛濛，歸路濕溚溚，熟熟个路，哪有麼个 心情去欣賞雨後个景致。阿爸替𠊎背皮箱行頭前，𠊎擐核包袱跈尸 背尾，衫袋肚袋無兩點錢。
去到阿明伯屋家，阿明伯親暱暱行出來，阿爸講「吾倈愛上臺 北讀書，先撥五百箍分𠊎好無？等好天𠊎正做還你，分你堵數！」
五百箍，對這下來講，毋成麼个錢，一日个菜錢都毋止，毋過在四 十年前，係一般人半個零月个工錢。
「無問題！上臺北五百箍仰會罅？」阿爸毋敢借恁多，等阿明 伯問撇，應講「罅啦！罅啦！吾倈讀公費學校。」阿爸對阿明伯手 項接著五百箍个時節，頷頭又頷頭，勞瀝又勞瀝，緊講加兩日，係 好天斯會跈核上工做事。吾心肝肚想：怕係阿明伯看著阿爸一生人
老實白直，做人做事毋識梟批；又怕係看𠊎馴良又恁想愛，正會恁 煞肯借，實在還感心哪！
𠊎接過該五百箍，𠊎知，阿明伯个大恩大德，使毋得毋記得，
遽遽同阿明伯會勞瀝。阿明伯送吾兩子爺到門口，阿爸又同佢講加 一到「勞瀝！」頷加一下頭。該五百箍，車單買撇三十六箍半，斯 伸著四百零忒等，愛用一學期呢！行到月臺，阿爸同𠊎講：「車錢 當貴，毋好恁輒轉來，學期結束正轉好啦！」
天色濛濛，車頭西片个山紅花開咧！探頭看阿爸，恁寒个落雨 天，打赤腳，戴緊笠嫲，著核舊衫，頭犁犁、慢慢行落月臺，𨃰過 鐵支路，一步一步順枕木𨃰過，行上䃗崁，轉屋个身影，到今都還 記得；阿爸个話，還在耳公頭，「車錢恁貴，毋好恁輒轉哦！」匱 人个無奈呀！又想著同阿明伯撥錢該下，頷頭會勞瀝个情景，求人 無恁該啊！
火車起行咧！初中正畢業个𠊎，想著麼个呢？捨毋落故鄉个 心，目汁含緊，當多个理想，跈核火車載到臺北。
