v
Daftar Isi
Hata Patujolo ... i
Kata Sambutan Dari Dirjen Bimas Kristen ... iii
Daftar Isi ... v
Bagian Parjolo : Ngolu Di Keluarga Na Paradoks 1. Ngolu Parsaripeon Di Halak Kristen ... 1
2. Hape Si Kapolda ... 6
3. Anak Hasian ... 8
4. Wessel Ni Inanta i ... 10
5. Ia Disi Artam, Disi Do Roham ... 13
6. Ringkot Ni Jamu On ... 16
7. Ingkon Sian Singkola Minggu Do ... 18
8. Koras Ni Hata i ... 20
9. Bollang Inanta i Tingki Martangiang ... 22
10. “Ai Ndang Karejo Inanta, Di Jabu Do!” ... 24
11. Bisuk Na Marpanarihon ... 26
▸ Baca selengkapnya: mandok hata sian parboru
(2)Bagian Paduahon : Paradoks di Ngolu Parhuriaon
13. Ringkot Ni Pra Remaja On ... 32
14. Change : We Can Believe In ... 34
15. Pemimpin Vs Penguasa ... 36
16. Martangiang : Holan Amen Boi Mangan ... 38
17. Siingoton di Pesta MBO Huria ... 41
18. “Unang Ariarihon !” ... 43
19. Creatio Ex Nihilo : Sian Na So Adong Gabe Adong ... 45
20. Performance Ni Parhalado Ni Tuhan i ... 48
21. SOP ni Huria ... 51
22. Rinso Ni Huria ... 53
23. Huria Na Pro-Aktif ... 55
Bagian Patoluhon :
Paradoksikal Di Ngolu Marmasyarakat
25. Par-Pilos ... 60
26. Na Mar-FaceBook On ... 62
27. Mangontrak Do Hami ... 64
28. Gabe Pak RT Inanta i ! ... 67
29. Tongtong Adong Na Pogos Di Tongatongamuna ... 69
30. Bisuk Songon Ulok, Lidang Songon Darapati ... 72
31. Ringkot Do Mar-CU ... 74
32. Ndang Sian Toru, Alai Gok Sian Ginjang ... 77
33. Labang Ni Haporseaon ... 79
34. Ndang Tarjou Laho Membela Diri ... 81
35. Ungali Do Di Huta Ni Anaknta Sian Dison . 83 36. Marseragam Amanta i ... 85
v
1. NGOLU PARSARIPEON DI
HALAK KRISTEN
Didok di Heber 13 ayat 4 Ingkon badia situtu pardongansaripeon i rajumi hamu. Ala ni aha ? Ala Debata sandiri do na pajongjonghon rumatangga i. Ndang jolma i, ndada kebiasaan manang tradisi sambing i. Alai tung sada parenta do na sian Tuhanta di sude jolma di portibi on.
Tung marasing situtu do hubungan manang relasi ni pardongansaripeon i sian angka hubungan na asing di hajolmaon. Ia tahaholongi natoras, alai ndang pola songon ganjang ni holong di pardongansaripeon i. Dungi tahaholongi ianakhonta, i ma ala gellengnta i;
hubungan darah do na manorushon sude keke-luargaan.
Holong do roha ni sada guru tu siseanna, alai ndang songon ganjang ni holong di rumatangga. Tu natoras manang ianakhon, ala natoras-nta, manang ala ianakhonta do ingkon haholonganta nasida. Alai ia di parsaripeon jumpang hita ma na dipabalik relasi i asa manghaholongi. Ndang relasi mendahului cinta kasih (holong); alai holong i mendahului relasi, i do pardongansaripeon i. Taida ma, ndada ala dongan saripenta i asa gabe tahaholongi, alai balik do tahe ala tahaholongi do ibana asa donganta saripe, gabe istri manang suami. I ma patuduhon holong na tutu situtu
ni ayat on, “Manongtong ma holong ni roha di dongan!” (Heber 13, 1). Jala parbue na parjolo sian hataridaan ni pangulaon ni Tondi Parbadia i ma holong ni roha (cinta kasih) songon na taida di Galatia 5, 22 i.
**
Tuhanta Jesus Kristus sandiri pe dipasangap do pardongansaripeon ni jolma i. Taida ma tanda halongangan na parjolo sahali na pinatupa ni Tuhanta Jesus i ma dipatupa
di pesta unjuk ala pardongansaripeon di Johannes bindu 2. Sian sude angka halongangan na pinatupa ni Tuhanta, tung di pesta pardongansaripeon i do dipatupa jumolo. Anak ni Jolma i sandiri pasangaphon pardongansaripeon ni jolma na tinompa, ai i do dalan ni Debata melangsungkan kehadiran ni jolma di portibi on marhite pardongansaripeon na badia situtu.
Tuhanta Jesus pasangaphon pardongansaripeon sandiri. Tuhanta sandiri mangalehon semacam restu pardongansaripeon i. Tuhan Jesus hadir di pardongansaripeon ni jolma i. Tuhanta gariada patupa pangurupion di tingki na maol di ngolu pardongansaripeon i. I do asa didok di sude jolma di portibi on, ingkon pasangaponta pardongansaripeon i.
Marriage is
honourable in
Sada dalan mamparsangapi parsaripeon i tarida do sian hita na mangharingkothon ibadah pamasumasuon na badia (ibadah pemberkatan nikah). Taida do otik situtu do halak na ringkot mandohoti ibadah di gareja, alai molo di gedung pertemuan inganan ni pesta i songon i ma torop ni jolma. Aha do mambahen i? Ala ni denggan do hita dohot manghalashon parsaripeon i ndada holan di gedung pasauthon adat, lumobi do marhite na mandohoti ibadah pamasumasuon di gereja. I ma sada dalan mangargai situtu pardongansaripeon ni halak Kristen.
Ala ni panjouon ni Debata di pardongansaripeon i ma sada panjouon na badia situtu. Tung so jadi do hita mangarajumi ia pardongansaripeon holan pardomuan ni baoa dohot boruboru sambing. Jala ala ni ingkon marsitutu do hita manaringoti dasor ni pardongan-saripeon i, songon dalan ni Debata patulushon sangkapna asa masihaholongan jolma (sada baoa dohot sada boruboru); ai ditompa Debata do hagiot i asa denggan i dipangke jolma pasauthon sada keluarga na dipasupasu Debata. Asa dalan ni Debata do rumatangga i pasauthon kelestarian ni jolma di portibi on, hajongjongon ni jolma di sejarah di tano on. Taida ma hinabagas dohot hinabidang ni tujuan ditompa Debata pardongansaripeon i. Ala ni ndang boi hita meremehkan pardongansaripeon i holan gabe sada perhubungan antara baoa dohot boruboru sambing ala ni hagiotna.
I do asa didok “Unang ramun parsaoran
pardo-ngansaripeon i!” (Heber 13, 4). Di hata Indonesia
tumangkas didok “Janganlah kamu mencemarkan
tempat tidur, sebab orang-orang sundal dan pezinah akan dihakimi Allah” (Ibrani 13, 4). Hal-hal parsaoran na
nidokna dison i ma menyangkut habadiaon ni ngolu, asa unang ramun dirajumi. Asa unang adong halak na mangaramuni tempat tidur, gombaran ni ngolu parsaoran ni suami istri songon parsaoran na badia. Ala ni parsaoran ni ama dohot ina na marsaripe ingkon badia do molo tataringoti pe i ndang jadi hita margaitgait. Molo ditaringoti i gabe pargaitan sambing, i ma na mambahen meremehkan hubungan seksual tu inganan na tumoru, tumoru sian saluhut, hal remeh manang pelecehan do i. Ala ni dao ma sian hita pargaitgaiton lumobi molo tataringoti hinaringkot ni pasupasu ni Debata na mengalehon hagiot (lust) sisongon i di pamatangnta on. Ai ditompa Debata do i songon sada bagian silehonlehon na mansai denggan, asa tapangke i hombar tu habadiaon ni ngolu pardongansaripeon (Epesus 4, 29; 5, 3-5).
Marhite on taondolhon do pardongansaripeon na badia situtu di hita halak Kristen. Asa unang adong halak na mangarajumi gok na ramun, na kotor dan jorok disi ala adong parsaoran ni ama dohot ina na marsaripe disi. Molo adong halak na so marrumatangga, unang dirajumi gabe umbadiaan ibana ala ndang bongot tu rumatangga i. Ndang adong poda ni Bibel i mandok songon i! Ai ia adong halak na bernazar ndang marrumatangga, ndang boi parsoadaonna ibana sandiri pe hasil perkawinan do, sian amana dohot inana. Ala ni
ingkon pasangaponna do rumatangga i. Sabalikna, unang adong halak naung marrumatangga gabe ginjang rohana ala adong halak na so mardongansaripe. Alai denggan ma ibana pasangap rumatanggana, manjagahon habadiaon ni rumatangga i songon dalan ni Debata pasauthon sangkap-Na marhite ibana dohot donganna saripe. Tuhanta Jesus do songon jolma Ibana saleleng di portibi on, gabe jolma situtu do Ibana. Alai Ibana do jolma sasadasa na so manghaporluhon pardongansaripeon; jala Ibana tubu di portibi on ndada hasil pernikahan. Ibana sandiri dipasangap do parrumatanggaon i. Ala ni i ma ingkon sude jolma pasangap (menaruh hormat) tu pardongansaripeon i.
2. HAPE SI KAPOLDA
Baliga nibaligahon, barita do nibaritahon.
Jadi adong ma sada panitia kecil ni pembangunan di sada huria na metmet. Goarna pe panitia kecil, jala sibangunonnasida pe ndada pola na mansai balga, metmet do. Jadi marrapot ma nasida tutu di sada tingki di konsistori ni gareja i, manang bilut parhobasan i. Ala gelleng dope gareja i, ba metmet do nang konsistori i di na marrapot i nasida.
Rapot i diuluhon pandita i dohot ketua pembangunan i. Tep, tingki rapot manghuling ma HP ni ketua pembangunan i. Jadi ala sompit do ruang konsistori i, pola do boi songon na masitombisan nasida na marrapot i. Jadi ala jonokjonok do nasida na hundul i gabe boi ma tarbereng ni pandita paboa na “Kapolda” na martelepon tu amanta ketua pembangunan i.
Bah, martelepon poang Kapolda tu Ketua Panitia
pembangunan garejanami, anggo on pe saut nama hita na membangun on, ninna roha ni pandita dibagasan. Ai molo Kapolda martelepon berarti sai bahat na ma sumbanganna tu pembangunan on, songon i ma di roha ni pandita i.
Hape dibege nasida ma panghataion i, asing, songon na manonggahi do amanta ketua i. “Olo! Lagi marrapot do hami nuaeng!” “Olo, di Gareja do au!
Rapot Pembangunan. Olo! Hmm..” ninna amanta i mangalusi. Bah, ai boasa disonggak amanta on Kapolda i. Barani ma ibana, ai ndang na komandan ni angka Polisi i na martelepon i.
Jadi dung sidung na manghatai i nasida, gabe penasaran ma pandita i. Gabe disungkun ma, “Ai boasa songon na gogo nangkin soara ni ketua i, ai ndang na tu Kapolda hamu na martelepon ?” ninna. “He eh, tole ma nian amang pandita, namborum do i di jabu”. Bah, namborum di jabu! “Jadi boasa dibahen hamu goarna Kapolda?” ninna pandita i muse. “I do amang, hubahen goarna si Kapolda, ai sai maos na martelepon on. Satongkin dope iba tarlambat mulak tu jabu, nunga pintor hempot inanta on martelepon. I dope iba laho.
Akh, jut roha” ninna amanta i, “Maosaos martelepon.
So sundat songon polisi panungkunna. Gabe husave ma goarna si Kapolda. Polisi !”. Bah, tahe ninna pandita i muse huhut margak mengkel. Na songon i do hape.
**
Anggo au sai mengkel ma marningot barita i. Hira nunga ris nuaeng di ganup jabu hape manang HP i. Asa mura komunikasi, adong HP ni amanta i, inanta i suang songon i nang anakhonna. Maradu dua manang tolu tahe dipatioptiop amanta i hape, na sai baltuk. Alai tontu sude na i guru di hita do pamangkena. Unang ma antong mago inanta i sian daftar nomor ni HP holan ala dibahen goarna si Kapolda.
