(299) “Hamu raja ni parboruonnami, mangkatai ma hita. (300) Tadok ma mauliate tu Amanta Debata, ai didongani do hita di saluhut ulaonta sadari on. (301) Nunga sun mardalan sude angka adatadat sibahenonta sadari on. (302) Jadi nuaeng pe sauran ma i tutu. (303) Asa dohononnami ma tu hamu hata sigabegabe dohot hata pasupasu. (304) Jalo hamu ma.
Balintang ma pagabe, tumUndalhon sitadoan; Ingkon saut do angka ianakkonta I horas jala gabe, ai nunga denggan hita masiolooloan.
(305) Sai asi ma roha ni Tuhanta sai dibahen ma nasida gabe ripe na uli jala na denggan sibahen las ni rohanta jala sibahen pujipujian di Tuhanta Pardenggan basa i.
Bintang ma na rumiris tu ombun na sumorop; Anak pe dinasida sai riris, boru pe torop.
(306) Sahat ma na uli sahat na denggan dihamu sude parboruonnami. Boti ma.
(307) Hata sitambaan do i. (308) Jadi tar songon on ma di rohangku asa maratur. (309) Parjolo ma dongan sahuta manambai, dungi sada sian boru dohot bere, udut tusi ba sada ma sian hulahulanami, jala diujungi hasuhuton ma i.
Boti ma. (310) Ditambai dongan sahuta ma.”
Hata sigabegabe sian dongan sahuta :
(311) “Na patut do hita parjolo mandok mauliate tu Tuhanta Pardenggan basa i na mandongani hita manipat sadari on. (312) Nunga tutu mardalan sude angka paradatan na patut bahenon ni paranak tu parboru, laos songon i na patut bahenon ni parboru tu paranak. (313) Nunga dapot songon nidok ni umpasa:
Aek Siurukuruk tu siallan Aek Toba;
Ndang adong be hita na marungutungut, nunga sude marlas ni roha.
(314) Pangidoan tu Tuhanta di hamu na dua pihak, unang be nian holan dibagasan sadari on hamu rap marlas ni roha, alai satorusna ma songon i. (315) Songon i ma dohot angka ianakkon i, sai gabe ripe halomoan ni rohanta ma nasida, tarlobilobi tahe na gabe halomoan ni roha ni Tuhanta.
Situbu laklak ma i situbu singkoru di dolok ni Purbatua; Sai tubuan anak ma nasida tubuan boru donganna saurmatua. Boti ma. Ditambai dongan.”
Hata sigabegabe sian bagian boru dohot bere.
(316) “Ala nunga marujung sude paradatan sadari on, ba ampara nama dohononnami tu hamu bagian paranak, ai rap boru nama hita nuaeng di hulahulanta on. (317) Jadi di hamu amparaniba on ma dohononnami : suang do songon nidok ni angka amanta na parjolo nangkin, parjolo ma tasombahon hamauliateon tu Tuhanta Parasi roha na mamasumasu ulaonta sadari on, ai dilehon do di hita dame dohot roha na masipauneunean dohot hulahulanta. (318) Tu joloansa on pe antong sai mian ma dame i di hita dohot di angka hulahulanta. (319) Taringot di anakta dohot parumaenta, sai asi ma roha ni Tuhanta, sai na marrongkap ma nasida songon bagot marsibar songon ambalang, na mardomu ma nasida songon buhu tu ruas.
Tangki ma jala ualang, galinggang ma jala garege; Sai tubu ma di nasida angka anak partahi jala ulubalang, dohot angka boru parmas jala pareme.
Boti ma. Hatangki hata sitambaan.”
Hata gabegabe sian hulahula :
(320) “Olo ma tutu, tambaannami ma hata sigabegabe dohot pasupasu di hamu parboruon ni borunmai. (321) Nang hami pe dohononnami do, parjolo ma hita mandok mauliate dohot pujipujian tu Tuhanta Parasi roha i, na mangalehon roha bisuk dohot holong di hamu nadua pihak manipat sadari on, gabe boi marujung ulaonta dibagasan dame dohot las ni roha. (322) Tu joloansa on pe sai tongtong ma mian dame dohot holong di hamu na marhula marboru, asa sai dapotan pasupasu hamu sian Amanta Pardenggan basa i. (323) Tu hamu raja ni boru dohononnami ma : nunga sahat be berenami gabe parumaenmuna, ba sai parumaen siboan tua ma i dohot las ni roha di hamu. (324) Sai tibu ma berenami :
Dangka ni hariara ma pinangaitaithon;
Sai tubu ma anak dohot boru, sitongka panahitnahiton. Boti ma. Dipaujung hasuhuton ma.”
Hata pasupasu panimpuli sian hasuhuton parboru :
(325) “Hamu lae, ito dohot sude hamu raja ni parboruonnnami. (326) Tapuji ma Amanta Debata Parasi roha i na mandongani hita di sude ulaonta sadari on. (327) Diurupi do hita gabe boi hita masipauneunean di sude sibahenonta. (328) Tu hamu lae dohot hamu ito, dohononku ma : Gomgom ma parumaenmuna
i. (329) Sai marpanganju hamu huhut di ibana, nanget ajarajari hamu asa gabe parumaen silas ni rohamuna ibana. (330) Sai manumpak ma Amanta Debata di parsaripeon ni angka ianakkonta i, asa sihalomohonon ni Tuhanta nasida jala sibahen las ni rohanta saluhutna. (331) Songon i ma nang hita natorasnasida, tontong ma hita sai masiaminaminan songon lampak no gaol jala masitungkoltungkolan songon suhat di robean.
(332) Tu hamu lae dohot hamu ito dohononku ma : Andor halumpang togutogu ni lombu;
Sai saur ma hamu saurmatua pairingiring pahompu. (333) Taringot di angka ianakkonta :
Na hinunti hirang, marisi gadong sipapua;
Badan nasida ma na so olo sirang sahat ro din a saurmatua. (334) Tu hita saluhutna dohononku ma :
Siambora gukguk, rarak di atas amak;
Horas ma hita jala mamora apala luhut, sai torop ma boru Boti ma. I ma sahat ni hatanami. Ampu hamu ma.”
Raja parhata ni paranak paampuhon hata sigabegabe dohot hata pasupasu tu hasuhuton :
(335) “Rajanami raja ni hulahulanami. (336) Manomba hami jolo dohot jarijari sampulu pasampulu sada simanjujung laho manjalo hata na uli hata na denggan tarlobilobi hata pasupasumuna rajanami. (337) Mauliate malambok pusu ma angka rajanami dohononnami saluhutna tu hamu. (338) Ampe ma i antong saluhutna di sambubunami tarlobi di hasuhutonnami dohot di anak nang parumaennami, tuak di abaranasida jala ampu diabingannasida.
Turtu ma ninna anduhur tio ma ninna lote;
Saluhut hatamuna na uli i tarlobilobi pasupasumuna, sai unang muba, unang mose.
(339) Sahali nari huulahi ma mandok mauliate angka rajanami di hamu saluhutna. (340) Sai Tuhanta Pardenggan basa i ma mambalos lagumuna na uli i marlipat ganda. Boti ma. (Dung i didompakkon ma bohina tu hasuhutonna jala didok) : (341) Nuaeng pe ampara, nunga ria angka hulahulanta mandok hata sigabegabe dohot hata pasupasu tu hita, ba diampu amparangku ma i sude. Boti ma.”
(342) “I ma tutu angka rajanami, raja ni hulahulanami, nunga marliat hamu mandok hata nauli hata na denggan songon i dohot hata pasupasu tu hami parboruonmuna, ba sai liat ma hami parboruonmuna gabe sai liat ma dohot horas laos songon i dohot hamu raja ni hulahulanami tumpahon ni Amanta Debata. (343) Sai ampe ma i antong sude di simanjujungnami tuak di abaranami, jala abing di ampuannami, tarlobilobi di helamuna dohot parumaennami.
Doding ni doding tu doding ni mandalasena;
Hata na uli dohot angka pasupasu i, sai unang muba unang sesa.
(344) Jala tu hamu hulahulanami pe dohononku do hata ni umpasa, alai ndada na laho mamasumasu hamu rajanami, ai hamu do silehon pasupasu di hami asa songon tangiangnami do on di hamu :
Andor has ma andor his tu andor Purbatua;
Sai horas ma hamu sude hulahulanami jala torkis, sai gabe jala saur matua. (345) Huulahi ma mandok mauliate godang di hamu angka rajanami.