(222) “Hamu raja ni hulahulanami, didok angka ompunta sijolo-jolo tubu: Butong mangan na godang mokmok mangan na otik, taringot di taragu na huboan hami i sai pamurnas mai tu pamatang, saudara tu bohimuna. (223) Tung otik pe nuaeng sipanganon i ndada holitnami i rajanami , alai tung sura pe holit, ba sai lam tu godangna ma di hami borumuna tu joloansa on, asa tarbahen hami dope patupa na tumabo jala na gumodang laho pasangap hamu akka hulahulanami. (224) Jadi songon hata ni umpasa ma dohononnami:
Sititi ma sihompa, golanggolang pangarahutna;
Tung so sadia pe nuaeng na hupatupa hami i, ba sai godang ma pinasuna. Boti ma.”
Huhuasi mangido tumpak
songon wakil ni hasuhuton paranak mandok hata saotik. (227) Jumolo ma hudok hami mauliate malambok pusu siala haroromuna tu pestanta on. (228) Hamu angka napinarsangapan, songon naung tangkas diantusi hamu mangihuthon adatta na uli i, ba tingkina ma nuaeng pasahathon sinamot tu hulahulanta. (229) Tangkas do huhut diboto hamu, ndang tarusung sahalak pandingdingan, laos songon i do nang na pasahat sinamot tu hulahula, na ingkon do pangidoon pangurupion sian tuturniba tarlobilobi boru, dongan sabutuha, dongan sahuta, aleale ro di sude na mangkaholongi iba. (230) Laos adong do pandohan ni angka ompunta sijolojolo tubu na mandok: Nang pitu gaja nilapa, molo so ada na mangido ba ndang adong na mala. (231) Dibahen i jongjong do au nuaeng dison songon wakil ni hasuhuton pasahat pangidoannami, tu hamu. (232) Patar do dohononnami tu hamu angka na pinarsangapan, tung hamu do na hupangasahon hami, umbahen na barani hami manjama ulaon on. (233) On pe hamu angka na pinarsangapan, angka amanta raja dohot inanta soripada, tarlobilobi hamu angka parboruonnami, tung hirim situtu do rohanami di buha ni rohamuna mangurupi hami. (234) Nuaeng pe ro ma hamu mamboan tumpakmuna, nunga rade hami manjalo. (235) Mauliate ma jumolo hupasahat hami tu hamu sudena.”
Hata hamauliateaon sian paranak tu angka silean tumpak
(236) “Hamu angka na pinarsangapan, angka amanta raja dohot angka inanta soripada, raja ni parboruon, raja ni dongan sabutuha, raja ni dongan sahuta, angka aleale ro di sude tutur na asing, tarlobilobi raja ni hulahulanami. (237) Mauliate malambok pusu ma dohononnami tu hamu saluhutna siala tumpakmuna na godang i. (238) Ndang na tarbalos hami i tu hamu angka na pinarsangapan, alai adong do Amanta Pardenggan basa na sumurung. (239) Sian Ibana sai na jaloonmuna do balos ni na denggan na binahenmuna tu hami marlipat ganda.
Bagot na marhalto ma na tubu di robean;
Horas ma hami manjalo tumpakmuna i, ba sai lam Martamba ma sinadongan di hamu na mangalean Boti ma.”
(240) “ Mangkatai ma hita raja ni anakkon. (241) Ba nunga dison pinggan sitio soara na hot di hundulanna, sai tio ma antong parnidaanta tu jolooan on, jala sai hot ma di hita pasupasu sian Amanta Debata.
(242) Peak di atasna napuran sirata bulung hasoloan ni boru ni raja ba sai rata ma antong di hita tu joloan on pansamotan dohot parhorasan. (243) Adong do huhut dison parbue santi, siriburribur, parbue sipir ni tondi anggiat ma antong sakti madingin, sakti matogu angka pomparanta, matorop maribur huhut matangkang manjuara.
(244) Laos adong do dison ringgit na marmata, tinongos ni negaranta, sipalas roha ni na torop dohot amanta raja. (245) Sai martamba ma antong ria dohot las ni roha di hita tu joloan on !
(246) Songon i muse peak di atasna juhut tanggotanggo na godang, i ma na songon simbol ni hatanggoon dohot tuhatoguon ni partuturanta dohot parrohaon na denggan di angka na marhula marboru di hita tu joloan on.
(247) Jadi amang raja ni boru, na manungkun ma hami jolo taringot di hata ni sipanganon. Parjolo dohononnami tu hamu :
Bagot na marhalto, na tubu di robean;
Sai horas ma hami na manjalo, ba sai lam martamba di hamu na mangalean.
(248) Ia nunga jagar hami bosur mangan indahan na las, jala jagar sagat marlompan juhut na tabo i, jala sombu minum tuak na tinahumuna i, ba :
Dia ma langkatna, dia unokna;
Dia ma hatana dia nidokna. Sibegeon ni pinggol peopon ni roha. Boti ma di raja ni boru.”
Alus sian pandehata ni paranak :
(249) “Horas ma jala gabe rajanami. (250) Sai haroan ma marharoan tu joloan on. (251) Taringot di sipanganon i Rajanami :
Sai pamurnas ma I tu pamatangmuna, saudara tu bohi; Sipasindak panaili, sipaneang holiholi.
(252) Tumpak ma sahalamuna Rajanami, manuai tondimuna marhite tangiangmuna tu Amanta Debata, asa sai lam tamba di hami ianakkonmuna sinadongan, asa boi dope patupaonnami sipanganon na tumabo jala na dumenggan
pasangaphon hamu hulahulanami. (253) Jadi ianggo lapatan ni sipanganon i Rajanami, panggabean, parhorasan do.
Boti ma.”
Hata ni pandehata ni parboru :
(254) “Ba ianggo ido hape, ba sai asi ma roha ni Amanta Debata sai ditambai dope asi ni rohana dohot pasupasuna di hamu, tamba ni hagabeon dohot parhorasan naung adong.
Bona ni Aek Puli di dolok ni Sitapongan
Sai tubu ma di hamu angka na uli, lam martamba nang sinadongan.
(255) Alai amang raja ni boru, sai marangkup do na uli, mardongan do na denggan, jadi tangkas ma paboa hamu sibegeon ni pinggol sipeopon ni roha :
Ranting ni bulu duri, jait masijaotan;
Angkup ni hata na uli, dia ma na naeng taringotan. Boti ma da.”
Hata sian pandehata ni paranak :
(256) “Gabe ma hita jala horas rajanami! (257) Ido tutu rajanami, sai marangkup do na uli, mardongan do na denggan, jadi nuaeng pe paboaon ma tu hamu siangkupna songon na hundul sidonganan songon na mardalan. (258) Songon naung taboto Rajanami, nunga be dijangkon hamu anaknami gabe helamuna, jala nunga taadopi nangkin nasida manjalo pasu-pasu sian Tuhanta marhitehite naposona di bagas gareja. (259) Sai saut ma antong sahat pasu-pasu i tu nasida tumpahan ni Amanta Debata. (260) Jadi nuaeng pangidoannami Rajanami asa dohot ma hamu mamasumasu anak dohot parumaennami i laos dohot mamasumasu sude hami parboruonmuna, asa gabe jala horas huhut mamora tumpahan ni Amanta Pardenggan basa i.
(261) Angkup ni ianggo taringot tu adat dohot uhum na mangonai sinamot, ninna rohangku nunga sude i marreso dipatupa suhutnami, alai hudok pe songon i, molo tung adong dope na so beres ba rade do hami manggohisa; alai ianggo naung gok do sude ba pasupasu hamu ma hami sude jala paborhat hamu ma anak dohot parumaennami asa huboan hami tu hutanami. (262) Ba songon i ma da Rajanami hatanami.
Hata ni parboru mangalusi :
(263) “ Hamu raja ni borunami, ianggo pasupasu i sai na lehononnami do i tu hamu parboruonnami.
Aek na tio do hami, riongriong di pinggan pasu; Hulahula na basa do hami, na ringgas mamasumasu.
(264) Alai raja ni boru, andorang so huhatahon hami hata pasupasu tu hamu, tangkasannami dope jo tu suhutnami dison, manang na olat ni dia naung margarar dibahen hamu. (265) Ale ampara, beha nunga margarar sude parjambaran?
Di ujungna dipangido parboru ma jambar ni tulang ni hela na i. Dung dijalo i sian paranak, laos parboru ma pasahat i tu tulang ni hela i, jala didok ma : (266) Nunga saboru hita umbahen na ingkon pangigilhononhon jambarmu sian borunta on. (267) On pe ampara, nunga be hupangido jambarmu songon jambar ni parboru situtu, jala pasahatonku ma i nuaeng. (268) Las ma roham manjalo. (269) Tung otik pe i sai godang ma pinasuna. (270) Mamasumasu ma tondim manuai sahalam marhite tangiang tu Tuhanta Pardenggan basa i, asa sahat horas jala gabe borunta i.
Boti ma.”
Hata sian tulang ni hela dung dijalo jambar tintin marangkup
(271) “Mauliate ma ampara ala tangkas do hami dipangigilhon hamu. (272) Jadi nunga be tutu hujalo dison jambar tintin marangkup sian borunta i. (273) Tutu do songon na nidokmuna i nunga gabe saboru hita nuaeng. (274) Jala i do antong na satutuna, ai ido alana umbahen na didok angka ompunta sijolojolo tubu :
Hot pe jabu sai tong do i margulanggulang;
Tung sian dia pe mangalap boru bere i, sai hot doi boru ni tulang
(275) Nuaeng pe ampara, sai satahi saoloan ma hita huhut sauduran mangoloi borunta on : ia ho di jolo ba ahu dipudi, ia ahu dijolo ba ho dipudi. (276) Sai tibu ma antong gabe borunta on.
Tubu lata ni singkoru di dolok Purbatua;
Tibu ma nasida maranak marboru dongan nasida saurmatua (277) Nang hamu ampara :
Horas ma hita. Boti ma.”
Hata ni raja parhata ni parboru
(278) “Hita saluhut bagian parboru, dongan sabutuha, boru, dongan sahuta dohot hulahulanami. (279) Andorang so hupangido hami jambar pangabis tu hulahula bona ni ari, masipaingotan hita jolo jambar tu ise dope na so tajouhon, ai manurut aturan ni adatta, molo nunga mardalan jambar pangabis habis ma pangigilon parjambaran.”
Hata ni sijalo jambar pangabis :
(280) “Songon panimpuli ni sude parjambaran ba nunga hujalo dison dibagasan las ni roha jambar pangabis. (281) Ba dohononku ma nuaeng hata pasupasu tu hamu raja ni parboruonnami.
Dengke salesale dengke ni siborotan;
Siangkup ni na gabe, sai ro ma pansamotan.
Sahat ma nasida leleng mangolu jala sahat tu panggabean. Boti ma.”
MANGULOSI (M)
Parjolo do dipasahat suhut parboru ulos pansamot tu ama ni helana didok ma hatana :
(282) “On ma da lae, ulos pansamot di hamu. (283) Sai dipargogoi Tuhanta ma hamu mangalului siapari dohot mangalului pansamotan. (284) Sai dapot ma antong songon hata ni umpasa :
Dolok ni Purbatua tondongkon ni Siborotan,
Sai saur ma hamu sarimatua, jala tiur nang pansamotan. Boti ma da, lae!”
Dipasahat suhut parboru ma muse ulos pargomgom tu natoras boru ni helana jala didok ma hatana:
(285) “On ma ito, ulos pargomgom di ibotongku gomgom ma parumaenmu. (286) Alai lambok ma ho ito mangajarajari parumaenmi, ai :
Andor halumpang, togutogu ni lombu; Mamboan tu onan gambiri;
Sai saurmatua ma ibotongku, pairingiring pahompu, Sahat tu na marnono dohot marnini.
Boti ma da, ito”
(287) “Songon on ma da amang, dohot ho inang!
(288) Ulos na ganjang ma on di hamu na suminatahon rap ganjang umurmuna jala rap hamu saurmatua.
(289) Ulos parhorasan ma on na umpinta tubu ni anak dohot boru di hamu.
(290) Ulos sibahen na las ma on di tingki ngali ni ari, sibahen na borgo di tingki las ni ari.
(291) Ulos simbol ni holong ni rohanami do on di hamu huhut ulos sitindangi na jonok do hami tongtong tu hamu marhitehite tangiangnami. (292) Sai dapot ma songon hata ni umpasa ni ompunta sijolojolo tubu :
Dangka ni arirang, na peak di tonga onan;
Badanmu ma na sora sirang, tondimuna masigomgoman.”
Dungi mangkuling ma raja parhata ni paranak :
(293)“Rajanami raja ni hulahulanami, molo tung adong dope sian hamu na marsangkap mangulosi anak dohot parumaennami, ba saonari ma pasahat hamu, asa sae na tu nasida jala boi maninggalhon inganan on.
Boti ma, mauliate.”
Hata sigabegabe dohot pasupasu sian tulang ni hela :
(294) “Ale bere dohot ho inang, tadok ma mauliate tu Amanta Debata ai nunga dapot di hamu sadari on na nidok ni umpasa :
Jumpang na niluluan, dapot na jinalahan;
I ma dongan sahaholongan, dohot dongan sapangkilalaan.
(295) Tu ho bere, on ma dohononku : Didok angka ompunta sijolojolo tubu : Hot pe jabu i, sai tong doi margulanggulang;
Sian dia pe mangalap boru bere i, sai tong do i boru ni tulang.
(296) On pe bere, ingot ma tu joloan on, borungku do on na nialapmon. (297) Jala tu ho pe inang dohononku ma : ingot ma tu joloan on, apala amangmu do ahu na dohot mangkaholongi ho. (298) Nuaeng pe pasahathonku ma pasu-pasu tu hamu :
Aek sihoruhoru tu sampuran Siguragura;
Rap leleng ma hamu mangolu, huhut rap saurmatua. Boti ma.”
MARHATA SIGABEGABE (MS)