Tali ayam
Sutan Asa :
O malin ( lai ambo )
barundiang jo malin sapatah jo duo nyo ( manitahlah / elok )
Adopun buah parundiangan nan ambo antaan pado malin, sobok basiang di nan tumbuah manimbang di nan ado tumbuah sarupo ko kini. Tantang adat nan katangah, nan bakalian dalam nan bagantuangan tinggi, ka ateh di agiah singan pamanpatan, ka bawah diagiah singgo buku, k ateh kok alah singan pamanpatan, k bawah kok alah singgo buku, lapeh pandang pandiliak an kito, supayo adat nak santoso, nan ka jadi harapan kami nan taunjuak mintak dijawek, nan taacuang mintak ditarimo, ko lah
parundiangan nan ambo antaan ka malin.
malin nagari;
Lah sampai dek sutan? (sapanjang sabuik)
Nan sapanjang parundiangan sutan nan ta adok kapado ambo iyolah kato sabonanyo, tapi sumantangpun bak itu, lamak siriah lega carano, lamak kato lega buni, nak ambo paiyokan kato palegakan buni, mananti sutan sakatiko. ( dalam adat bapakaian / sutan ka mambao kato jo mufakaik, mananti malah ambo ).
Ba a nyo sutan ( lai ambo )
Kambali parundiangan ka sutan. ( elok/manitahlah)
Nan ka jadi buah kambali nyo dek ambo, dek adat duduak basamo limbago kato ba iyo, sakatiko mancari paham nan saukua jo bana nan sasuai, jikok manaruah lamo jo lambek,kok talamo ambo balega
talambek sutan mananti, maaf jo pintak bakeh sutan. Nan kajadi sauk jo saponyo sapanjang
parundiangan sutan cako, Tantang adat nan katangah, nan bakalian dalam nan bagantuangan tinggi, ka ateh di agiah singan pamanpatan, ka bawah diagiah singgo buku, k ateh kok alah singan pamanpatan, k bawah kok alah singgo buku, lapeh pandang pandiliak an kito, supayo adat nak santoso, nan ka jadi harapan kami nan taunjuak mintak dijawek, nan taacuang mintak ditarimo, kan ba itu bana nyo sutan? ( yo bana / yo lah ).
Iyo lah bana kato sutan lah ambo paiyo patidokan, paukua pajangkauan, nan biaso pakai ka ateh alah singan pamanpatan, kabawah alah singgo buku, nan taacuang alah ba jawek, nan taunjuak alah batarimo, nan parundiangan kambali ka sutan.
Sutan asa ;
Lah sampai dek malin? ( sapanjang sabuik)
Nan sapanjang parundiangan malin nan lah kambali pado ambo, sangajo ambo mandatangkan salam manibokan rundiang manjapuik kato nan baitu. Baitu jiniah nyo kato malin, jiniah alah bak dibasuah, toreh alah bak ditompi, ka ateh alah singan pamanpatan, kabawah alah singgo buku, kok nan taacuang lah bajawek, nan taunjuak lah batarimo, Alhamdulillah sajo jaweknyo. ( samo2 alhamdulillah).
