Jadah katangah
sutan asa
o pakiah ( lai ambo )
Barundiang jo pakiah sapatah jo duo nyo ( elok / manitahlah )
Adopun parundiangan nan ambo antaan ka pakiah, sobok basiang di nan tumbuah, alah manimbang di nan ado tumbuah sarupo ko kini. Tantang jadah ka tangah, dicaliak hilia jo mudiak, di pandang kiri jo kanan alah maraso bakacukupan, bato sekarang ko kini, aia taisi/satitiak mintak di minum, jadah ba incai mintak di makan, nan taunjuak mintak dijawek, nan taacuang mintak ditarimo dek pakiah basamo2 sarato datuak niniak mamak, ko lah parundiang nan ambo antaan ka pakiah.
Pakiah nagari
Lah sampai dek sutan ( sapanjang sabuik )
Nan sapanjang parundiangan sutan nan ta adok pado ambo iyolah kato sabananyo, tapi sumantangpun bak itu, lamak siriah lega carano, lamak kato lega buni, nak ambo pa iyokan kato palegakan buni, mananti sutan sakatiko. ( dalam adat ba pakaian / sutan ka mambao kato jo mufakaik, mananti malah ambo )
Ba a nyo sutan ( lai ambo )
Kambali parundiangan ka sutan ( elok/ancak/manitahlah )
Nan ka jadi buah kambali nyo dek ambo, dek adat duduak basamo limbago kato ba iyo, sakatiko mancari paham nan sa ukua jo bana nan sasuai, jikok manaruah lamo jo lambek, kok talamo ambo balega talambek sutan mananti, maaf jo pintak bakeh sutan, nan ka jadi sauk jo sapo nyo nan sapanjang parundiang sutan cako, tantang jadah ka tangah, dicaliak hilia mudiak,dipanjang kiri kanan alah maraso bakacukupan,bato sekarang ko kini, aia satitiak mintak diminum, jadah ba incai mintak di makan, nan taunjuak mintak dijawek, nan taacuang mintak ditarimo dek ambo basamo2 sarato datuak niniak mamak, kan ba itu bana nyo sutan ( yo lah / yo bana )
Iyo lah bana kato sutan, lah ambo paiyo patidokan, paukua pajangkauan, nan biaso pakai, nan ta acuang biaso ditarimo, nan taunjuak biaso bajawek, ko lah nan ka jadi kambali nyo dek sutan.
Sutan asa
Lah sampai dek pakiah ( sapanjang sabuik)
Nan sapanjang parundiangan pakiah nan lah kambali pado ambo, sangajo ambo mandatangkan salam, monibo kan rundiang manjapuik kato nan baitu, baitu jiniah kato pakiah, jiniah alah bak dibasuah, toreh alah bak tompi, kok nan ta unjuang lah ba jawek, nan ta acuang lah batarimo, Alhamdulillah sajo
jaweknyo. ( samo2 alhamdulillah).
