KATO SAPATAH
Sutan Asa :
O malin ( lai ambo )
barundiang jo malin sapatah jo duo nyo ( manitahlah / elok )
Adopun buah parundiangan nan ambo antaan pado malin, sobok basiang di nan tumbuah, alah manimbang di nan ado tumbuah sarupo ko kini. Dek duduak lah sabonta jo duo rokok sabatang lah di isok , bak santano siriah sakapua lah di kunyah, kok lah ka jadi niek ka disampaian kaaua ka dilopaan, kato sapatah ambo japuik ka malin.
malin nagari;
Lah sampai dek sutan? (sapanjang sabuik)
Nan sapanjang parundiangan sutan nan ta adok kapado ambo iyolah kato sabonanyo, tapi
sumantangpun bak itu, lamak siriah lega carano, lamak kato lega buni, nak ambo iyokan kato palegakan buni, mananti sutan sakatiko. ( dalam adat bapakaian / sutan ka mambao kato jo mufakaik, mananti malah ambo)
Ba a nyo sutan ( lai ambo )
Kambali parundiangan ka sutan. ( elok/manitahlah)
Nan ka jadi buah kambali nyo dek ambo, dek adat duduak basamo limbago kato ba iyo, sakatiko mancari paham nan saukua jo bana nan sasuai, jikok manaruah lamo jo lambek,kok talamo ambo balega
talambek sutan mananti, maaf jo pintak bakeh sutan. Nan kajadi sauak jo saponyo sapanjang
parundiangan sutan cako, dek duduak lah sabanta jo duo,rokok sabatang alah diisok, bak santano siriah sakapua lah di kunyah, kok lah kajadi niek ka di sampaianan kaaua ka dilopaan nak manjapuik kato sapatah pado ambo, kan baitu bana kato sutan. ( yo bana )
Iyo lah bana kato sutan lah ambo paiyo patidokan, paukua pajangkauan, nan biaso pakai, pintak biaso buliah kondak biaso balaku, parundiangan kambali pado sutan.
Sutan asa ;
Lah sampai dek malin? ( sapanjang sabuik)
Nan sapanjang parundiangan malin nan lah kambali pado ambo, sangajo ambo mandatangkan salam manibokan rundiang manjapuik kato nan baitu. Baitu jiniah nyo kato malin, jiniah alah bak dibasuah, toreh alah bak ditompi, kok pintak alah buliah kondak alah balaku, Alhamdulillah sajo jaweknyo. ( samo2 alhamdulillah ).
