Anak mudo katangah
Sutan Asa :
O malin ( lai ambo )
barundiang jo malin sapatah jo duo nyo ( manitahlah / elok )
Adopun buah parundiangan nan ambo antaan pado malin, sobok basiang di nan tumbuah, alah manimbang di nan ado tumbuah sarupo ko kini. Pihak anak mudo katangah, nan capek kaki ringan tangan, capek kaki kok panaruang, ringan tangan kok pamacah, kok ado ta adok tabalakangi, ta ereng tagendengi, nak izin jo maaf ambo pintak, nak basamo malin mambari, ko lah parundiangan nan ambo antaan ka malin.
malin nagari;
Lah sampai dek sutan? (sapanjang sabuik)
Nan sapanjang parundiangan sutan nan ta adok kapado ambo iyolah kato sabonanyo, tapi sumantangpun bak itu, lamak siriah lega carano, lamak kato lega buni, nak ambo paiyokan kato palegakan buni, mananti sutan sakatiko. ( dalam adat bapakaian / sutan ka mambao kato jo mufakaik, mananti malah ambo ).
Ba a nyo sutan ( lai ambo )
Kambali parundiangan ka sutan. ( elok/manitahlah)
Nan ka jadi buah kambali nyo dek ambo, dek adat duduak basamo limbago kato ba iyo, sakatiko mancari paham nan saukua jo bana nan sasuai, jikok manaruah lamo jo lambek,kok talamo ambo balega
talambek sutan mananti, maaf jo pintak bakeh sutan. Nan kajadi sauk jo saponyo sapanjang parundiangan sutan cako, Pihak anak mudo katangah, nan capek kaki ringan tangan, capek kaki kok panaruang, ringan tangan kok pamacah, kok ado ta adok tabalakangi, ta ereng tagendengi, nak izin jo maaf sutan pintak, nak basamo ambo mambari, kan baitu bana nyo sutan? ( yo bana / yo lah ).
Iyo lah bana kato sutan lah ambo paiyo patidokan, paukua pajangkauan, nan biaso pakai dima gerak nan datang, disitu takadia mananti, dima salah jo kilafat, disitu maaf dibari, ko lah na jadi kambali nyo dek ambo.
Sutan asa ;
Lah sampai dek malin? ( sapanjang sabuik)
Nan sapanjang parundiangan malin nan lah kambali pado ambo, sangajo ambo mandatangkan salam manibokan rundiang manjapuik kato nan baitu. Baitu jiniah nyo kato malin, jiniah alah bak dibasuah, toreh alah bak ditompi, kok maaf ambo pintak lah basamo malin mambari, Alhamdulillah sajo jaweknyo.
( samo2 alhamdulillah).
