Manduduak an alek
Sutan Asa :
O malin ( lai ambo )
barundiang jo malin sapatah jo duo nyo ( manitahlah / elok )
Adopun buah parundiangan nan ambo antaan pado malin, sobok basiang di nan tumbuah manimbang di nan ado tumbuah sarupo ko kini. Tan kato alek lah datang, limbago jamu lah tibo, kok alek lah sapanuah rumah, kok jamuan lah sapanuah Korong, lah sasak rumah jo tanggo, lah sanang hati datuak niniak mamak, lah santoso hati ibu jo bopo, tapi nan marusuah nan ma ibo, tantang kadudukan malin kini ko, aluran ditangah kok ditapi, baris diateh kok di bawah, dek juwaro nan manduduak an, pagawai nan ma aturan, nak izin jo maaf kami pintak, nak basamo malin mambari, ko lah parundiangan nan ambo antaan ka malin.
malin nagari;
Lah sampai dek sutan? (sapanjang sabuik)
Nan sapanjang parundiangan sutan nan ta adok kapado ambo iyolah kato sabonanyo, tapi sumantangpun bak itu, lamak siriah lega carano, lamak kato lega buni, nak ambo paiyokan kato palegakan buni, mananti sutan sakatiko. ( dalam adat bapakaian / sutan ka mambao kato jo mufakaik, mananti malah ambo ).
Ba a nyo sutan ( lai ambo )
Kambali parundiangan ka sutan. ( elok/manitahlah)
Nan ka jadi buah kambali nyo dek ambo, dek adat duduak basamo limbago kato ba iyo, sakatiko mancari paham nan saukua jo bana nan sasuai, jikok manaruah lamo jo lambek,kok talamo ambo balega
talambek sutan mananti, maaf jo pintak bakeh sutan. Nan kajadi sauk jo saponyo sapanjang parundiangan sutan cako, tan kato alek lah datang, limbago jamu lah tibo, kok alek lah sapanuah rumah,kok jamuan lah sapanuah Korong, lah sanang hati datuak niniak mamak, lah santoso hati ibu jo bopo, tapi nan marusuah jo ma ibo tantang kedudukan ambo kini, aluran di tangah kok ditapi, baris diateh kok dibawah, dek juwaro nan manduduak an, pagawai nan ma aturan, nak izin jo maaf sutan mintak, nak basamo ambo mambari, kan baitu ban nyo sutan? ( yo bana / yo lah ).
Iyo lah bana kato sutan lah ambo paiyo patidokan, paukua pajangkauan, nan biaso pakai kok sampik di tampek, lapang dihati, itulah nan ka jadi jawabannyo. Nan parundiangan kambali ka sutan.
Sutan asa ;
Lah sampai dek malin? ( sapanjang sabuik)
Nan sapanjang parundiangan malin nan lah kambali pado ambo, sangajo ambo mandatangkan salam manibokan rundiang manjapuik kato nan baitu. Baitu jiniah nyo kato malin, jiniah alah bak dibasuah, toreh alah bak ditompi, kok maaf ambo pintak lah basamo malin mambari, Alhamdulillah sajo jaweknyo.
( samo2 alhamdulillah).
