107 年全國語文競賽客家語朗讀文章高中學生組（詔安腔） 編號01 號

107 年全國語文競賽客家語朗讀文章高中學生組（詔安腔）

編號 01 號

【炕窯】

^{劉玉蕉原作}

打早，即聽著阿媽交代阿依，去市場打一垤豬肉、買一尾萋 魚轉來，「啊，怪奇！係麼儕做生日？」問過阿媽正知，係滿姑討 轉外家，難怪阿媽恁歡喜！䀴滿姑討轉來个時間，𠊎走去莊頭阿 惜姨个雜貨店等，𠊎頭勾勾直頭䀴。姑丈个車吂駛偎，𠊎即走出 去擛手啊，姑丈車一擋恬𠊎即跋上車，滿姑即笑講：「屎朏吂坐 燒，即愛落車啊，恁多時間！」知佢歡喜，𠊎尖入車底即和姑表 姊妹大聲賞起來。

滿姑隨个等路足餳人，逐儕攏有一份，車後斗猶有一大布袋 个番薯，阿媽講：「番薯恁多愛仰子好，無即提來炕窯好啊，屋背 田底个泥，上禮拜正翻過，應當嘛燥啊，人來炕窯，好無？」

「好哦！讚啦！」聽著有好賞，𠊎這兜人黏時即應好。

起窯啊！阿怙掇三垤大泥圝做門，窯身即尋像佢个拳頭嫲恁 大粒泥圝來疊，疊高了後猶愛慢慢收偎來，加疊幾下粒，半站嗄 崩落來，「唉，老刀嫲無利，無恁好趁食！」收尾猶愛麻煩姑丈鬥 腳手，正順勢做好。窯正起好，阿哥即命令𠊎人，佢喊𠊎和姑表 姊妹去撿樵，阿姊負責起火、架樵，大姊真靠會核，火顧到猛猛

猛，紅紅个火舌，對泥圝縫鑽出來，像討燒人共款，害𠊎人閃到 遠遠遠，無幾久，泥圝即像甜柿紅激激！

「會用啊，樵毋好擱囥落去，火愛退出來，即會用擊番薯落 去！」阿媽恁講。

火炭掊開，番薯即一粒一粒擊入窯內底去。「哇！」表阿哥提 樹棍一掊落去，紅紅个泥圝揞落來，堵好弇在番薯面上，「起窯 難，打壞快」，細子人輪流掊泥圝，逐個攏舞到一頭一面，落尾猶 係姑丈來收尾，佢拁幼泥𢲴起去，用砂耙頓拶，面上擱插一支 香，恁泥墩一兜仔煙都無出來，正喊𠊎人去尞。真無簡單拁窯疊 好，這滿䀴起來即像一個番薯壟！

藏得人尋个遊戲吂賞罅，遠遠即鼻著香香个味啊，睞著阿依 在遐開窯，𠊎人緊緊偎過去䀴佢變奇術，阿依驚番薯耬綿去，小 心細義在遐慢慢耬，款款耬，香氣餳𠊎人口涎溚溚汀，食肚嘛嘰 哩咕嚕直鳴。田脣上，𠊎人排排坐，香香个番薯塞歸嘴，天恁 清，番薯恁香，在屋背个田底，𠊎人尞到烏昏正轉屋下。

107 年全國語文競賽客家語朗讀文章高中學生組（詔安腔）

編號 02 號

【味素】

^{李夢花原作}

有一種氣味，毋係用舌食會出，係用心肝正感受會著个；有一 種氣味，毋係食過即記入心，係隨時即會連到心肝頭，毋會添放去 个。

阿依逐日擔水供豬，愛顧歸屋下大細食著，歸日舂頭磕額，菜 湯尾刻耐攪飯，這苦篤篤¹个日子，到細子一日一日大了後正轉甜，

這係阿依个氣味。

阿怙逐日流汗溚滴，為著家庭犁頭戴鑊，煞著做事，內底衫總 係濕漉漉。記得細漢時有一擺發燒，阿怙揹𠊎去得醫生䀴，頭那凴 在阿怙賁賁闊闊个背脊骿，有一種燒暖个福氣，鼻著遐鹹篤篤²个汗 味，係𠊎熟事个阿怙个氣味。

𠊎个氣味係仰子个咧？青春年華个記憶，有期待，嘛會用發夢。

反叛个年歲，讀書以外，心肝底遐粒少年妹子个心，總係希望學校 遐個緣投个男子同學，會用偎來分享𠊎个心情故事。即像吂翕熟个 青柿，澀嘰乖³。酸澀隨著成長个火烘刀削到尾轉甘，這係𠊎酸柑茶

       

1 苦篤篤：音 kuˆ dagˋ dagˋ；苦苦的樣子。 

2 鹹篤篤：音 heemˋ duˊ duˊ；很鹹的樣子。 

共款个戀愛味素。

猶有一種號做人情味，在客莊滿哪位都有。這裡張伯㜷喊：落 來坐！遐裡阿火伯喊：來泡茶！這杯釅茶个溫度，得客莊个青草有 味，日頭有味，和空氣都隨有好禮、熱心、賁賁个人情味，這係𠊎 出外打拚頭思念个情感。城市人情像紙薄，即算蹛兩對門嘛無熟事，

各儕即像加一緣保護色，毋敢相交陪傷深。所以，轉莊下，正尋會 轉單純个安然自在。

福氣係麼个味咧？無閒洎杈⁴个人，會用擋恬一下，鼻花香；作 穡个人，會用收成歸間穀倉；做爺母个人，會用䀴著歸屋下大細康 健平安；單身阿哥，會用食著夫娘个飯菜香。逐儕感受著福氣甘甜 味進前，會受著苦澀澀个艱難。若係驚苦，毋去打拚，即毋會有成 功个日，當然嘛毋會有歡喜个滋味，嫩筍嘛愛得雨涿日炙正會變老 竹。

人生情感个酸、甜、苦、馦、鹹、澀，你食過幾多種？鼻空酸、

生活苦、目汁鹹，一半下猶有一兜仔馦，這轉甜个變化係毋係較合 咧？有時務你會感覺挶到氣敨毋會出，愛想著：頭前有烏影，後背 即有日頭在照。老儕事講：「有情食水甜。」換一個想法，換一種心 境，用心來感受，歸下會係甜漬漬个味素。

3 澀嘰乖：音 sebˊ giˇ guainnˋ；形容很澀的口感。

4 無閒洎杈：音 moˋ heenˋ ciˆ caˆ；很忙碌。 

107 年全國語文競賽客家語朗讀文章高中學生組（詔安腔）

編號 03 號

【阿媽个菜園】

^{羅瑞霞原作}

𠊎媽蹛在竹東落去五指山內底山林壁角个半山骿，遐係𠊎頭愛 去个所在，嘛係𠊎頭思念个所在。

自細細起，若有堵著歇睏日，阿怙即駛車，載阿依猶擱𠊎三姊 妹，行過彎彎斡斡⁵个山路，跋過一個大崎，車歇在半山骿隔壁个禾 坪。阿怙牽𠊎和阿妹，阿依攬阿弟，擱來慢慢行一截石礹⁶，在一間 大落屋大門前擋恬，禾坪底炙鹹菜个阿媽䀴著𠊎人歸火灶轉來，微 微笑行過來開大門，嘴著面講：「恁早哦！」這間紅磚屋，係阿公和 阿媽蹛个所在，嘛係阿怙个血跡。

見擺到歇睏日，阿媽知𠊎人會轉去䀴佢，早早即拁真多食个物 件買便，囥在冰箱內底，準備得𠊎恁多姊妹食。一半下若講阿怙有 事踟躕著，較慢轉來，阿媽即擘心起來，遠遠即䀴著佢个頭那勾啊 勾，若䀴著𠊎人腳一伸出車門，黏時嘴笑鼻噳⁷，嘴著面念講︰「仰 子恁慢咧！」正經係阿媽惜孫，一兜仔都無毋著。

阿媽在溪底有一垤菜園，遐係𠊎人姊妹頭愛去个所在。菜園內

       

5 彎彎斡斡：音 bbanˇ bbanˇ bbadˊ bbadˊ；彎彎曲曲。 

6 石礹：音 sha ngamˆ；石階。

7 嘴笑鼻噳：音 zheˆ siooˆ pinn ngiˇ；眉開眼笑。 

底種真多菜，春天時，阿媽會渡𠊎人姊妹去菜園捋菜，猶會教𠊎人 認菜──這係蕹菜，吊在遐茄色个係茄，猶有青青有竻个係竻瓜。

講煞，隨手即捋落來，衫袖捽捽个即提得𠊎食，講︰「這瓜無射藥，

食著會康健。」一半下會跍落來，在菜股脣挷草、捉菜蟲。記得第 一擺教𠊎人熟事麼个係菜蟲，阿媽手伸落菜葉，捉一尾青色軟軟猶 一直停動个菜蟲。阿弟䀴著遐直停動又蠕蠕趖⁸个物件，驚到面青青，

大嫲聲直唩。阿媽䀴著嗄大笑講︰「戇孫！這係菜蟲，有麼个好驚 啦？恁無膽，仰子會用咧！」

菜園脣頭，有一垤閒田，阿媽知𠊎愛食蔗，在閒田種幾下行蔗。

冬尾時，蔗好食啊，阿媽會渡𠊎去蔗園，喊𠊎坐在菜園个橫頭，即 擎刀去裁蔗，順續拁頭、尾削莫，正擱剁一截一截，提得𠊎喫。哇！

足甜个！阿媽䀴𠊎食著真滿足，笑噳噳⁹問講︰「好食無？有甜無？」

遐時𠊎正顧食，直頕頭，阿媽䀴著嘛真歡喜咧！

時間過著真緊，十外年過去啊！𠊎人大漢啊，阿媽嘛轉長山賣 鴨卵去啊！毋過，想著阿媽个菜園，這滿毋知變做仰子，心肝底總 係掛念。舊年，𠊎喊阿依載𠊎轉去山底䀴遐間細漢時務，不時轉去 尞个伙房屋，猶撥工行去溪脣䀴菜園。毋過，行到溪脣，䀴著遐成 過个菜園，草發到比人猶較高，唉！阿媽無在，菜園嘛荒去啊！

8 蠕蠕趖：音 nuˊ nuˊ sooˋ；蠕動爬行的樣子。 

9 笑噳噳：音 siooˆ ngiˇ ngiˇ；笑嘻嘻。 

107 年全國語文競賽客家語朗讀文章高中學生組（詔安腔）

編號 04 號

【椰子樹】

^{李得福原作}

舊屋个禾坪脣，種幾下頭椰子樹，生有三層樓恁高。阿公用鉛 線網圍椰子園，毋得𠊎人入去尞，驚椰子葉抑細粒椰子跌落來，會 搉著細子人个頭那。逐日下晝日頭徙影啊，椰子葉拁西照个日頭光 遮蹛。歇睏日，𠊎人會擔凳，坐在禾坪尾有影个所在，聽阿公講古。

講成過做大水崩溝，大水對佐子閣莊來，蔭死真多人，逐火灶攏閃 到茅屋面上；有一兜人跋起去椰子樹面上，椰子樹嘛救著真多得大 水打到浮浮沉沉个老百姓。記得，高天天个椰子樹，樹影下無擘無 心个烏昏，有阿公講嘛講毋會煞个古。

樹崠椰子打到淰淰个時，阿怙會請隔壁莊个阿順來捋。䀴佢拁 大索䌈在腰，手爬腳蹬像猴跋樹共款，兩三下即跋上椰子樹崠，拁 一揹一揹重鈂鈂个椰子用索溜落來。阿怙在樹下鬥敨索，順手拁一 粒粒椰子提起來搖搖个，若有水聲會哩洛咈，這粒椰子定著壞去啊，

內底个椰子水會臭臭，毋會食个。過頭大粒个椰子較老氣，水無多，

賣無人愛，只好留落來自家食。靚个一斤賣十外個銀，納𠊎人細子 个學費，真罅。在五、六十年代遐時，作穡人若較拚兜，供兩隻豬        

10 丁丁：音 dingˇ dingˇ；硬硬的。 

嫲來降豬么賣，抑係種幾下頭椰子樹，即會用得子弟讀大學。

暗夜時頭，食過暗頓，阿怙會拁大大粒个椰子洗淨俐，囥在砧 面上，用菜刀拁丁丁¹⁰擱賁个椰子殼，一刀一刀慢慢削莫。內底有一 粒圓圓个內殼，擱細義用刀尾挑開腹臍㼓，椰子水即噴出來啊。擱 拁內殼倒頭囥在水杓，得佢流水，無幾久，甘甜个椰子水即歸瓠杓，

屋下老嫩大細，一儕一杯退心火。伸个內殼用菜刀破開，有一緣白 色个椰子瓤，用湯匙耬來食，甜甜真像食果凍共款。聽講老椰子殼 嘛係做弦子个材料。

捋椰子个日子，食過暗頓了後，在禾坪歇涼，細子逐儕攏提有 瓤个半裡椰子，用湯匙耬瓤食；阿媽嘛恬在禾坪尾唱山歌，幼秀又 高音个歌聲，毋會輸電視面上个歌星。猶細漢，食椰子瓤，聽阿媽 唱山歌个日子，真像昨日。

想起來，高挑高挑个椰子樹，越得𠊎思念，思念遐椰子影下阿 公、阿媽个身影，和𠊎心肝底有椰子味个童年。

107 年全國語文競賽客家語朗讀文章高中學生組（詔安腔）

編號 05 號

【攔牛驚魂】

^{廖聖涵原作}

人類个好朋友即係狗，𠊎相信真多人恬會聽著抑係䀴著和狗有 關个真實故事，毋過狗以外，人類个好朋友即係牛。成過臺灣係農 業社會，莊下人大部分係作穡，因為科技無發達，一步步攏愛靠人 力，所以逐火灶供牛即真普通个事情。大討犁田、拖車、載穀、載 菜、載禾稈這兜真重个事頭，攏愛靠牛來做，人和牛即像兄弟姊妹 共款，嘛係屋下个一員。

成過猶在讀書个時務，放學轉來屋下即愛鬥做事。事頭真多真 多，像烏昏時愛拁日時頭放出去絡食个雞、鴨、鵝尋轉來，擱愛䀴 雞、鴨、鵝有食飽無？若係食無飽，雞愛用撿轉來个禾得佢食；鴨、

鵝愛用冇穀¹¹；牛拖牛車載番薯轉來，愛煮一大桶个番薯葉加米糠，

牛一下子即食淨淨；嘛愛煠豬菜得豬食。大嫂在灶下無閒煮飯，𠊎 人做細子个嘛無通閒，鬥擇菜、洗菜、擔水、燸火……。食飯飽了 後，即在禾坪歇涼，遐睏子無冷氣嘛無電器風，攏嘛用葵扇撥啊撥 啊來撥涼。

莊下所在，蚊啦！烏蠅啦！黃蚻滿壁角。日時頭烏蠅滿哪位攏        

11 冇穀：音 pangˆ guˊ；結實不飽滿的穀子。 

係，夜時頭換蚊來鬥鬧熱。就算行路，蚊、烏蠅嘛跈在頭那崠、膴 身脣，即像狗跈路共款。䌈在坪尾遐隻牛得蚊吵到頭直晃，腳直跳，

硬討䌈毋會核。大哥喊𠊎擎火把去拁牛攔蚊，毋過蚊無攔著，嗄拁 牛个毛燒淨淨，實在真壞。

牛歸年透冬攏真無閒，一直到過年前成個月正有通歇。記得有 一年歇寒，𠊎屋下遐隻牛䌈在牛滌真多日啊，阿依喊𠊎拁牛牽去食 草、行行个。牛䀴著𠊎，真歡喜，頭那直直晃。𠊎人屋下後背有一 條細條路，路脣草真青，牛著面食草，𠊎著面唱歌，心情真輕鬆。

正在歡喜定，雄雄䀴著牛毋食草，頭那一直晃，目珠金金䀴𠊎，即 像討拁𠊎食落去共款。𠊎一下著驚，牛索放莫，起腳拚命走，牛嘛 跈在後背捎來。人講牛走直，蛇走彎。𠊎跳過一條大討兩米闊个大 水圳，牛嘛毋認輸，咻一下即跳過去，拁別儕田底个番薯、地豆蹬 壞真闊。落尾，遐隻無乖个牛得𠊎二哥修理到真工夫，現時想起來，

猶真驚。

107 年全國語文競賽客家語朗讀文章高中學生組（詔安腔）

編號 06 號

【阿依个菜園角】

^{彭瑞珠原作}

阿依个菜園角，有一頭九重葛。遐九重葛，本底正係一細截个 樹椏定，得人斟酌細義插在菜園角。佢像種佢个人共款恁牛，毋驚 熱天做颱風，毋驚天公做大水，做佢越生越高，越大越靚。到佢有 半個人恁高个時，阿依即去裁幾下支較韌个桂竹，插在佢个脣頭，

得佢递。佢越递¹²越暢，越递越高，递到屋崠恁高，不時開到歸頭樹 桃紅色个花。

探會著屋崠个花，猶毋甘願，像係自家會尋路共款，又直頭递，

递到二樓阿依房間个窗子門前，猶知好莫遮著阿依个窗子門。日日 在窗子門下和日頭共下，喊阿依起來。阿依䀴著遐頭靚花，即算日 頭傷早喊佢起來，嘛毋會氣。阿依總係微微笑䀴遐頭花，毋知係䀴 佢仰子恁會大，抑係䀴樹崠有恁多个鳥在遐冤家，恁心色。

不時，阿依猶會擔一張矮凳在樹下坐。轉熱个時務，九重葛煞 著递藤。屋簷鳥在樹崠做藪，打早即歸頭樹嘰嘰啾啾，比唊嘴个𠊎 猶較唊嘴！歇熱過後，𠊎做𠊎上臺北讀書，佢做佢開始開花。阿依 有時在樹下个日頭縫臥頭䀴花，有時會行去菜園个另外一頭，遠遠        

12 递：音 taiˆ；蔓延。 

䀴遐歸樹个花。

歸樹个花，寒天嘛直直開。一半下，天氣寒，日頭放假，烏雲 賁賁，合起來落雨，較靚个花嘛毋會活跳起來，較靚个色地嘛䀴毋 會清，阿依即會心肝不安。一放學，即會接著阿依个電話，「外頭做 烏暗、清冷哦，你自家在外地，知好著燒暖無？毋好寒著！烏天暗 地啊，毋好著面行著面尞，𠊎會真擘心哦！恁暗个天，和在屋角攏 䀴毋會真，九重葛啊！」

遐九重葛，種在𠊎依个菜園角，係𠊎上臺北讀書个前一年，阿 依喊𠊎去森雄叔屋下，拁佢討來个樹椏，種起來个花。中學生个𠊎，

若牛拁泥耬到深深，擪到拶拶¹³，九重葛走毋會去，毋會橫，在菜園 角乖乖大。𠊎哪知，遐花係討代去外地讀書个𠊎，和阿依共下做伴 个？好佳載，遐花知好日日乖乖大、年年開到靚靚哦！代𠊎，安慰 遐恁多年，阿依擘心个心情。

13 拶拶：音 zadˋ zadˋ；密實的樣子。 

107 年全國語文競賽客家語朗讀文章高中學生組（詔安腔）

編號 07 號

【雨傘】

^{張美容原作}

無聊个落雨天，一個人無著無落，企在門前䀴街路擎雨傘來來 去去个人，有半行半走緊掣掣个，嘛有款款子行享受雨中散步个；

有一個人擎一支雨傘孤單、孤單个；嘛有兩儕捍肩頭共下擎一支雨 傘个。𠊎心肝底想：「一傘一世界，雨傘矮下一定藏有真多故事。」

在門角企蹛像一條瓜个雨傘，打開，即係𠊎心肝底个一蕊花。

猶細漢時務，在街路䀴著一支紅色摻青花个細支雨傘，愛到堵毋會 核。打先阿依嫌傷細支，遮雨毋會過，毋肯買。毋過䀴𠊎目汁含蹛，

落尾猶係買得𠊎。這支雨傘變做𠊎个寶貝，若落雨，𠊎即著紅鞋笐，

擎紅雨傘，這屋行，遐屋尞，真風神。好天，雨傘嘛無閒著，毋係 提來賞辦家貨，即係擎來跳舞。遐雨傘花轉幾下輪，雨傘下个妹子 么笑到嘴合毋會偎。啊！歡喜、單純个細子時！

讀小學，放學若堵著西北雨，阿依即會送雨傘來學校，順續渡 𠊎轉。一路兩子哀念遐念這，阿依一下一下吩咐：「水窟毋好蹬落去，

溼溼个所在愛閃開，雨傘愛䀴風向正毋會開花。」雨傘外頭風和水，

雨傘內底有阿依淰淰个愛！到較大兜，在城市讀書，阿依一䀴著變        

14 坎坎坷坷：音 kamˆ kamˆ kiedˋ kiedˋ；路不平的樣子。 

天，即愛𠊎隨雨傘去。𠊎頭驚擎一支雨傘，落尾嗄出大日頭，得人 䀴著即像毋識出空个山精大戇共款。擱講，遐個年歲小說䀴多啊，

總感覺迎雭雭雨，行在街路，係幾浪漫个事情。所以不時為著討隨 雨傘、毋隨雨傘和阿依相爭，唉！毋識人好个少年！

緣分實在係奇妙个物件。大啊即會堵著一個人，甘願自家涿溼，

嘛愛拁你擎雨傘遮雨；甘願自家炙日頭，嘛討拁你擎雨傘遮日頭，

伴你行過坎坎坷坷¹⁴个人生。毋管外頭雨幾大、日頭幾猛，雨傘下總 係燒暖、平安个。當然，𠊎心肝底猶有一支頭要緊个雨傘，雖然䀴 毋會著嘛摸毋會著，毋過，佢總係在𠊎堵著大風大浪、失志無助个 時務，拁𠊎揞密密、遮塞塞，保護到好好，遐即係爺母拁𠊎擎个愛 个大支雨傘。在這支雨傘下，𠊎無煩無惱，安然自在大漢！

熱天時个雨傘面上，有白雪雪个桐花在遐跳舞，落雨天即有滴 滴溚溚个雨水在遐唱歌。擎雨傘行在街路个人，一定和𠊎共款，毋 知有幾多故事在雨傘下演出！

107 年全國語文競賽客家語朗讀文章高中學生組（詔安腔）

編號 08 號

【檳榔樹】

^{謝惠如原作}

𠊎猶細个時，屋下田底有種檳榔樹，對田頭到田尾一行一行種 到直直，行和行中央有留引、排水个溝。橫行又嘛一頭一頭揪直線 種，䀴起來嶄然¹⁵靚。阿怙講行和行个闊度留一丈闊，做事行路較利 便。種檳榔樹退行个時，逐頭相離即留八尺闊。橫直闊度愛留得佢 罅，另日樹大頭啊，葉和葉正毋會相唚，割檳榔个長勾鐮正過會過。

逐年五月份到九月份，爺母五更早即跋起來去檳榔園割檳榔，

作穡人打早做事較涼；晝啊，日頭過頭猛，目珠䀴天崠个檳榔會晟 目。隔壁个叔公不時都會笑講：「恁早出門做事，討和鬼相搶食係 無？」割落來一揹一揹个檳榔，用細臺貨車載轉來屋簷頭前囥。暗 頭食飯飽，爺母會坐在火光下剪檳榔，一粒一粒對歸揹剪落來，韶 日正擱載去行口賣。阿依講供子女个食飯錢，後生阿女个讀書錢，

做一下靠賣檳榔个錢來做所費。

歇熱个時務，阿哥和𠊎愛鬥相共剪檳榔。阿妹傷細漢毋會用剪，

驚剪著手，所以負責捋檳榔絲，捋一晨早正捋一細面盆。阿依會褒 講：「阿妹恁𠢕！」逐年到七、八月，學生歇熱啊，檳榔嘛堵好大出。

       

15 嶄然：音 zamˆ rhenˋ (變音 zamˇ men⁺)；非常。 

阿依愛鬥相共割，用兩支長勾鐮在攔事，𠊎人細子愛去檳榔園鬥擐 檳榔，一擐一擐囥上貨車崠。自細𠊎人即係在田底勞動大漢个。

阿怙拁長勾鐮一節一節䌈到八節高，大討有四丈外長。割檳榔 个時，竹篙搖來搖去，真像提大毛筆，向著天崠寫無字天書；一半 下又像在青色畫布面上畫符。阿怙用个通天筆，逐畫攏會通天透地。

四歲个阿妹著鞋笐、戴頭巾、戴帽，坐在工寮前个藤椅凳面上，真 像細子大人在指揮𠊎人做事。一半下會問：「阿怙，你仰子無煮檳榔 得𠊎傍飯？」

阿怙應講：「檳榔毋係菜，無人煮來傍飯。」阿妹講：「恁你會 用拁檳榔像葡萄共款，洗來得𠊎食䀴望好食無？」

阿怙笑到真大聲講：「做事若聽著妹子么講事即毋會悿啊！」

自民國六十八年賽洛瑪颱風了後，檳榔起大價，比種別款个農 作物較好，賣較多錢。所以，農民大量種檳榔樹，田底無人討蒔禾 啊。六堆个農民三十外年來，好佳載有種檳榔樹，生活正過了毋會 䆀。

107 年全國語文競賽客家語朗讀文章高中學生組（詔安腔）

編號 09 號

【薍薺】

^{徐姿華原作}

記得，阿媽愛種菜，佢喊阿怙在屋下頭前搭瓜棚來種薍薺¹⁶。薍 薺真會打，不時自家食毋會去，猶會用送得屋邊。遐兜屋邊真愛食 阿媽種个薍薺，萋萋擱甘甜。

逐年正月半進前，阿媽即會拁自家點个薍薺秧種落瓜棚下，佢 逐日用心照顧，幼幼个薍薺秧，真緊抽高、递藤。阿媽逐日攏會去 巡薍薺棚，驚正在递个嫩芽，得風吹㪐去。佢會小心細義拁瓜藤牽 轉瓜棚下，用索略略固定在豆籬面上，得佢好順利跋起來，兩、三 禮拜過，薍薺藤即递到棚崠啊。

五、六月，薍薺真會開花、真會打，行在路，遠遠攏䀴會著屋 前遐歸棚金黃个薍薺花。阿媽知𠊎人細子頭枵豺，當晝睡起來，佢 會去薍薺棚捋十外蕊公个薍薺花，略略洗淨，搵攪好个麵粉卵，落 鑊炸。炸一下，嫩嫩个薍薺花即虬¹⁷起來，炸到金黃金黃，香香酥酥 个味素餳到𠊎人口涎水溚溚汀。阿媽用碗裝得𠊎人，𠊎人細子暢壞 壞，碗捧个即走去屋簷下坐落食。遐燒燒、酥酥猶擱香甜香甜个味 素，𠊎到今猶記得。

煮薍薺，阿依一等慶。佢一半下會用薑嫲菣香¹⁸，一半下換用七        

16 薍薺：音 lon zeˆ；絲瓜。 

17 虬：音 kiuˋ；蜷曲、彎曲的。 

層塔來合味，毋管仰子煮，遐薍薺湯即係恁好食。燒燒食，真甜、

真好食；冷冷食，攪燒飯猶擱較好食。因為係自家種个薍薺，阿依 毋驚人食，做一下用兩條薍薺煮一碗公湯，遐薍薺湯係正額薍薺个 湯，無加半點水，正會恁甘甜、恁好食。

阿媽𠢕捍家。一半下薍薺藏在葉下無巡著，兩日無捋，傷老啊，

阿媽會拁佢留蹛，留來做種抑係留來做薍薺布。等到這留落來个老 薍薺皮變黃黃赤赤，阿媽即會割落來，拁薍薺皮剝莫，提去坑脣抑 係圳溝脣，著面揢著面洗。拁薍薺皮、薍薺肉和薍薺籽做一下罅罅 洗淨，正伸白淨白淨、黃金黃金个薍薺布。擱拁薍薺布提去炙燥，

即變做洗碗和鑢¹⁹若像豬皮个膴身真好用个薍薺布啊！

八月半啊，薍薺打較少啊，阿媽和阿依會拁薍薺藤割莫。薍薺 藤一割斷，阿依即會攔緊用盎來承薍薺水。莫䀴遐薍薺藤恁大棚，

正經會出薍薺水个係薍薺藤生在泥下个頭。遐薍薺藤較旺个，即承 有幾下罐薍薺水。這薍薺水係遐個年代頭好个保養品，老老嫩嫩个 妹子人攏真愛用薍薺水來抹面，聽講抹了薍薺水，面會較白、較幼 呢！

這薍薺，雖然毋係麼个難得个植物，毋過因為佢一身攏係寶，

對花、果到藤，做一下有佢个用途，正會儕儕攏愛佢。人嘛毋好 䀴輕自家，愛學習薍薺个精神，發揮自家个能力，自然即會有人欣 賞啦！

18 菣香：音 kienˆ hiongˇ；加配料增加香味。 

19 鑢：音 liˆ；刷洗。 

107 年全國語文競賽客家語朗讀文章高中學生組（詔安腔）

編號 10 號

【身影】

^{徐貴榮原作}

年正過，春雨落無歇，寒搐搐²⁰！䀴加兩日即討開學上臺北，屋 下猶無半點錢，毋知愛仰子正好？想無步啊！無奈何，阿怙講來去 拁阿明伯先撥兜䀴望！

阿明伯係車頭个副站長，逐個月有月俸，兼開□米間，又恬恬 貌炭請人燒，𠊎怙即係不時得佢請去燒炭个工人。遐日晨早，打早 七點外，雨正落過，天猶濛濛，歸路濕溚溚。熟熟个路，哪有麼个 心情去欣賞落過雨个景色。阿怙拁𠊎揹皮箱，行頭前，𠊎擐包袱跈 在後背，衫袋內底袋無兩點錢。

去到阿明伯屋下，阿明伯真好禮行出來，阿怙講：「𠊎後生討去 臺北讀書，先撥五百箍得𠊎好無？等好天𠊎正做還你，得你堵數！」

五百箍，對這滿來講，䀴係無麼个，一日个菜錢即毋罅，毋過在四 十年前，係普通人半個外月个工錢。

「有麼个問題！上臺北五百箍，仰子會罅？」阿怙毋敢借恁多，

等阿明伯問煞，回講：「罅啦！罅啦！𠊎後生讀公費學校。」阿怙對

       

20 寒搐搐：音 honˋ diuˊ diuˊ；很冷的樣子。 

21 頭犁犁：音 teuˋ le le；形容頭部低垂的樣子。 

阿明伯手底接著五百箍个時務，頕頭又頕頭，勞力擱勞力，直講加 兩日，若好天即會隨上工做事。𠊎心肝底想：驚係阿明伯䀴著阿怙 一世人條直老實，做人做事毋識惑人；又驚係䀴𠊎乖乖聽事，正恁

「阿莎力」，實在真感心啊！

接過遐五百箍，𠊎知，阿明伯个大恩大德，毋會用添放，攔緊 拁阿明伯感謝。阿明伯送𠊎人兩子爺到門前，阿怙又拁佢加講一句

「勞力」！擱加頕一下頭。遐五百箍，車單用去三十六箍半，正伸 四百外定，愛用一學期呢！行到月臺，阿怙拁𠊎講：「車錢真貴，毋 好恁捷轉來，學期煞啊正轉即好！」

天色濛濛，車頭西片个山紅花開啊！探頭䀴阿怙，恁寒个落雨 天，打赤腳，戴笠婆，著舊衫，頭犁犁²¹，慢慢行落月臺，𨃰過鐵枝，

一步一步順枕木行起去䃗塍²²。轉屋下个身影，到今猶會記得。阿怙 个事，猶在耳空底，「車錢恁貴，毋好恁捷轉哦！」散人个無奈啊！

又想著遐時拁阿明伯撥錢个時，頕頭勞力个情景，求人無恁快啊！

火車駛行啊！初中正出業个𠊎，想著麼个咧？開始留戀起故鄉，

目汁含蹛，真多个理想，跈火車載到臺北去。

22 䃗塍：音 booˊ shinˋ；堤岸。