PEKAN PENATALAYANEN GBKP TAHUN 2017 1 ejuah- juah ngawan ni perpulungen bage pe Serayan Tuhan Gereja Batak Karo Protestan ibas kerina wilayah pelayanenta. Sikataken bujur man Dibata ibas Jesus Kristus maka ibas perkuah ras Lias ateNa saja maka enggo itaruhkenNa kita nadingken tahun 2016 guna banci bengket kubas tahun 2017. Tek kal kita maka ibas ndalani tahun 2017, Dibata tetap masu-masu kita arah kerina dampar kegeluhenta. Visi GBKP 2016 – 2020 (Garis- Garis Besar Pelayanan GBKP 2016 – 2020) ngatakenca “ GBKP Aron Dibata Guna Jadi Pasu- Pasu Man isi Doni”. Sedangken Misi GBKP 2016 – 2020 eme:
1. Menumbuhkembangkan spritualitas jemaat berbasis Alkitab. 2. Menegakkan keadilan, perdamaian dan keutuhan ciptaan Allah.
3. Memperkuat semangat gotong royong antar sesama Jemaat dan Masyarakat.
4. Menggali dan menumbuh kembangkan potensi jemaat untuk bersekutu dan bersinergi.
Tujuan GBKP eme : “ Meningkatnya panggilan dan komitmen warga dalam
melakukan pelayanan (berteologi, pendidikan dan kesehatan, berpolitik dan kegiatan ekonomi, pelestarian lingkungan, budaya dan pemanfaatan teknologi informasi). Sasaren si ateta icapai alu radu ras ibas periode 2016 – 2020 enda
eme : “ terjadinya transformasi warga GBKP secara efektif”. Khusus ibas tahun 2017 enda sasaren si ateta icapai eme : “ Meningkatkan Kemampuan Warga
GBKP Dalam Kehidupan Berteologi Dan Menumbuhkan Motivasi Belajar Secara Mandiri (Self Learning)”.
Tema Umum Pekan Penatalayanen GBKP 2017 enda emekap : “ Nandai Dibata Muat Bagin I Bas DahinNa ” (Berteologi : Belajar Untuk Melakukan; Matius 28 : 20 ; II Korinti 8 : 4). Emaka tema Wari perwarina si bakal ibahas kita alu radu ras emekap :
1. “Nandai Dibata Muat Bagin I Bas DahinNa (Berteologia: Belajar Untuk Melakukan)”. 2. “Nandai Dibata, Ndalanken Sura-SuraNa”.
3. “Aron Dibata Si Nggit Ras Tutus Erlajar Mandiri”.
4. “Aron Dibata Si Muat Bagin I Bas Jabu Ras sangkep Nggeluh”. 5. “Aron Dibata Si Muat Bagin I Bas Pelayanen Gereja”.
6. “Aron Dibata Si Muat Bagin I Bas Masyarakat, Bangsa Ras Begara”. 7. “Kubuat Baginku Selaku Aron Dibata”.
PEKAN PENATALAYANEN GBKP TAHUN 2017 2 Lagu- lagu si enggo itamaken ibas Kebaktin Pekan Penatalayanen GBKP 2017 enda enggo isesuaiken ras Kitab Ende- Enden GBKP si enggo ipersada (Kitab Ende- Enden GBKP, Penambahen Ende- Enden GBKP ras Suplemen Ende- Enden GBKP ) si jumlahna 500 lagu. Emaka ipindoken kami alu mehamat man banta gelah Kitab Ende- Enden GBKP si enggo jumlahna 500 lagu enda banci ilitken.
Gelah perdalinen Kebaktin Pekan Penatalayanen GBKP 2017 enda banci kerina erdalan alu mehuli bage pe ras diskusina perlu kap iakap kami gelah sibahan sermon kerna bahan Pekan Penatalayanen GBKP 2017. Selain gelah perdalinen Kebaktin Pekan Penatalayanen GBKP erdalin alu mehuli, bahan Pekan Penatalayanen GBKP 2017 enda pe banci njabap perbeben, tantangen ras arapen ngawan ni perpulungen bage pe gerejanta. Gelah arah perdalinen Pekan Penatalayanen GBKP 2017 tetap empermuliaken gelarNa si Badia. Banci ka kita mpersiapken bahan Pekan Penatalayanen GBKP si darami ka literatur / bacaan sideban guna melengkapi persikapenta. Moderamen GBKP ngataken bujur man Pusat Pembinan Warga Gereja (PPWG) GBKP ikut pe ras timna, Penulis, Toko Buku ras Percetakan GBKP Abdikarya – Kabanjahe, ngawan ni perpulungen bagepe Serayan Tuhan Gereja Batak Karo Protestan si enggo mereken masuken / usulen ras ngelitken bahan Pekan Penatalayanen GBKP 2017. Isedari kami maka lit denga kekurangen ibas bahan Pekan Penatalayanen GBKP 2017 enda. Ipindoken kami alu mehamat banta gelah banci iberekenndu masuken/ usulen guna pehuliken bahanta enda ibas wari- wari sireh enda arah lembar saran si enggo ilitken. Alu perkuah ras lias ate Dibata sidalani tahun 2017 alu tetap erpengarapen man baNa saja bage pe silakoken Pekan Penatalayanen GBKP 2017 enda alu tetap erkemalangen man Dibata.
“ Selamat Ngikuti Pekan Penatalayanen GBKP Tahun 2017” Rikut Tabi Ras Mejuah- Juah,
MODERAMEN GEREJA BATAK KARO PROTESTAN
Ketua Umum, Sekretaris Umum,
PEKAN PENATALAYANEN GBKP TAHUN 2017 3
DAFTAR ISI
Kata Penaruh ... 1 Daftar Isi ... 3 Liturgi Ras Renungen Pekan Kebaktin Penatalayanen GBKP Tahun 2017 Wari I ... 4 Liturgi Ras Renungen Pekan Kebaktin Penatalayanen GBKP Tahun 2017 Wari II ... 12 Liturgi Ras Renungen Pekan Kebaktin Penatalayanen GBKP Tahun 2017 Wari III . 20 Liturgi Ras Renungen Pekan Kebaktin Penatalayanen GBKP Tahun 2017 Wari IV . 29 Liturgi Ras Renungen Pekan Kebaktin Penatalayanen GBKP Tahun 2017 Wari V ... 40 Liturgi Ras Renungen Pekan Kebaktin Penatalayanen GBKP Tahun 2017 Wari VI .. 50 Liturgi Ras Renungen Pekan Kebaktin Penatalayanen GBKP Tahun 2017 Wari VII . 58 Tim Sinikapken Pekan Kebaktin Penatalayanen GBKP Tahun 2017….. ... 66 Lembar Saran ... 67
PEKAN PENATALAYANEN GBKP TAHUN 2017 4
LITURGI RAS RENUNGEN PEKAN PENATALAYANEN GBKP
WARI/BERNGI I, MINGGU 15 JANUARI 2017
I. PERSIKAPEN :
Pertua, Diaken radu ras perpulungen nikapken si ertugas ras perlengkapen sini perluken i bas kebaktin.
II. KEBAKTIN : Pertua/
Diaken:Ibas kita menaken kebaktinta mari si puji Tuhan alu ras –ras rende KEE GBKP NO : 205:1-3
1. Rehlah min o Tuhan sikap kami krina ersembah man bandu jenda Nusurlah min Tuhan bahan sikap krina ukur kami pe badia O Bapa b’re gelah daten pasu-pasu kami krina enda
2. Tuhan Dibatanta lit bas rumah enda nembah kita krina baNa Alu kehamaten mungkuklah man baNa kula tendi pe kerina Aloken kataNa ras pasu-pasuNa usekenNa banta
3. Tuhan Dibatanta Badia kap IA, Surga pe muji gelarNa Malekat pe rende Tuhan e Badia Dibata si telu sada Dengkehken kataNa, ikut rende krina pehaga gelarNA
Kata penaruh Pertua/
Diaken: Turang ras senina i bas Tuhan Jesus Kristus, sikataken bujur man Tuhan arah Jesus Kristus Tuhanta, si enggo naruhken kita ku bas tahun 2017 enda alu dem kejuah-juahen. Tuhan tetap setia nemani,ngarak-ngarak ras numpak-numpak anak-anakNa mentasi kegeluhen i doni enda. Kesempaten si mehergakal ibereken Tuhan man banta banci kita bengket ku bas tahun si mbaru enda, emaka si ergakenlah pemereNa e alu muat bagin pekena-kena doni enda. Rikutken Garis Besar Pelayanen GBKP i bas tahun 2017 enda eme nggit nambahi pemeteh ras kengasupen i bas erteologi. Ertina ngawan perpulungen GBKP i bas kegeluhenna si teptep wari nuduhken kinitekenna selaku kalak Kristen si nggit nampati, ras mpekena-kena sekelewetna. Erpalasken si e si jadi Tema Umum Pekan Penatalayanenta i bas tahun enda eme : “Nandai Dibata Muat Bagin i Bas DahinNa (“Berteologia : Mengajar Untuk Melakukan”), janah eme pe si jadi tema i bas wari/berngi si pemena enda.
PEKAN PENATALAYANEN GBKP TAHUN 2017 5 Dage mari si pesikap ukurta i bas kebaktinta dingen si endesken
dirinta man baNa arah pertotonta. Ertoto
Rende : KEE GBKP NO : 348: 1,3,7 (Perp. Tedis) (Ngendesken Perlengkapen Kebaktin Man Si Mabai Kebaktin)
1. Ersembah perlu i bas doni enda, E desken bingke bas kegeluhenta.
Ersembah em pedah Kata Dibata, Pehaga Tuhan bas kegeluhenta. 3. Ersembah kita bas perpulungenta, Pehaga Tuhan si mada geluhta. Ersembah labo pesenang ukurta, Si sembah Tuhan pehaga gelarNA. 7. Ersembah em kap geluh teptep wari, lagu langkahta encidahken mehuli. Mari si sembah Dibata si dahi cidahken ukur erbahan mehuli.
1. Votum, Salam :
L : I bas gelar Dibata Bapa si njadiken doni enda ras kerina isina, i bas gelar anakNa Jesus si nelamatken doni enda alu dareh ras KesahNa, ras i bas gelar Kesah Si Badia si mereken kengasupen man banta (ndu) muat bagin pekena-kena sekelewetta (ndu). L : Perkuah ate ras dame i bas Dibata Bapa, ras i bas Tuhan Jesus
Kristus nari, i bas kerembaken Kesah si Badia ras kita (kam) kerina gelah. Amin.
P : Amin...Amin...Amin (iendeken)
L : “ Alu meseksek ipindokena man kami gelah ibereken kesempaten man bana guna ikut muat bagin i bas nampati kalak Kristen i Judea” (2 Korinti 8:4)
Sipenangkih puji-pujinta man Tuhan alu ras kita rende KEE GBKP NO. 68:1,3
1. DahinNdu si mbelin Tuhan, kerajang kami pe,
Ban Kam si mada kerajan, la masap lalap e Tapina bagi page me, gelah ersuli turah pe E mate kap benih lebe Bage pe kami krina nge Nggit mate pe lah turah page nge
3. Di Kam bagi benih kap e, kuburen dungna kin? Lang! kegeluhen lalap nge, K’rajangku me pagin Min suruh aku japa pe, M’ritaken kegeluhen e Lah ise pe ngakuken me, Di tek, de atan me kepe Nggit kami pe, Mritaken bana pe.
PEKAN PENATALAYANEN GBKP TAHUN 2017 6 2. Nandai Dirinta I Lebe-Lebe Dibata (Responsoria)
L. : Turang ras senina, Dibatanta enggo netapken kita jadi bangsaNa, janah IA kap Dibatanta. Selaku bangsaNa iberekenNa tanggungjawab man banta gelah ermediate man teman manusia ras sekelewetta, sebab kita pe enggo leben iperdiateken Dibata. P. : Megati aku lupa maka aku e bangsa si enggo ipilihNdu Tuhan, si
erbahansa labo lit kuakap tanggungjawabku mpekena-kena temanku ras sekelewetku i doni enda. Kai si lit bas aku e kuakap gunana man bangku saja.
L. : Turang ras senina, labo lalap geluhta terjeng nampati, lit pagi paksana kita pe man sampaten teman, enggo kin bage orat nggeluh ibahan Dibata eme nampati ras isampati. Sada kesempaten si mehergakal ibereken Dibata man banta tupung kita banci denga nampati, enda me si ngena ate Dibata.
P. : O Tuhan megati la kuergaken kesempaten si iberekenNdu lako nampati kalak si deban, lupa aku maka geluhku ras kerina si lit bas aku e pe bekas penampatNdu. O Tuhan alemindu lah kerina kekurangenku.
L. : I bas kerina kekurangen ras kelepakenta mari sipindo pengalemi Tuhan alu ras kita rende : KEE GBKP NO. 362:1-3
1. AlemiNdu aku bas dosangku, alemiNdu aku bas lepakku
O Tuhan sasap min, O Jesus sasap min, alemi dosangku
2. Si la payo dem i bas geluhku, ngaku aku bandu o Yesusku
O Tuhan sasap min, o Jesus sasap min, alemi dosangku
3. Ku janari ku baba geluhku, dengkehkenNdu min pingko-pingkoku
O Tuhan sasap min, o Jesus sasap min, alemi dosangku ---Perp. Tedis ---
L : Turang ras senina meriah ukur Tuhan ngidah kita si reh man BaNa i bas kiniteruken ukur ngakuken salah ras dosanta, emaka niNa man banta : “Aku me Dibata si nepa doni enda alu kemulianKu, Aku setia man bandu, perkeleng ateKu tetap rasa lalap, amin gia kam rusur ndabuh i bas dosa, keleng ateKu la urak man bandu. Tetap Ku endesken dahin ngepkep doni enda man bandu, Ku alemi dosandu, ras kubereken kengasupen. Ernalemlah man bangKu, sebab Aku kap Ulu gegehndu.
PEKAN PENATALAYANEN GBKP TAHUN 2017 7 Si puji Tuhan erkiteken kita enggo ndatken pengalemi dosa, mari
ras kita rende arah KEE GBKP NO. 184:1, 2
1. Yesus Tuhanku njaminisa krina dosangku tebusiNa
Geluh si mbaru jujurkenNa mriah ukurku ngalokensa Tuhanku Yesus Kam me tetap pengendesenku rasa lalap Temani aku o penampat Tuhanku Yesus Juru Slamat
2. Ngendes man baNa sikap tuhu, Keleng ateNa negu-negu
Mindo man baNa ola medu, Maka ibreNa pasu-pasu Tuhanku Yesus Kam me tetap pengendesenku rasa lalap Temani aku o penampat Tuhanku Yesus Juru Slamat
---Perp. Kundul ---
3. Ngoge Kata Dibata
L. : Turang ras senina seh paksana kita ngoge kata Dibata bagin si pemena ibuat i bas : Ulangen 29:10-15 (Iogeken Si Mada Jabu) L. : Ketuahen kalak si megiken Kata Dibata dingen si makekenca i
bas geluhna si tep-tep wari. Haleluya P. : Haleluya...Haleluya...Haleluya (iendeken) 4. Renungen :
a. Ertoto
b. Renungen : Matius 28 : 20, II Korinti 8:1-15
c. Tema : “Nandai Dibata Muat Bagin I Bas DahinNa” (“Berteologi : Belajar untuk Melakukan”)
Bujur ninta man Dibata i bas Jesus Kristus erkiteken perkuah ras lias ateNa maka enggo bengket kita kubas tahun 2017 enda. Enggo sitadingken tahun pelayanen GBKP “Meningkatken Komitmen Warga GBKP Yang Misioner Untuk berpartisipasi Dalam Pelayanan ” ras genduari bengket kita kubas sasaren pelayanen GBKP tahun 2017 eme “Meningkatken Kemampuan Warga GBKP Dalam Kehidupan Berteologi Dan Menumbuhkan Motivasi Belajar Secara Mandiri (Self Learning)”. Gelah bage tersehi sasaren pelayanen GBKP ibas Periode 2016-2020 eme “ Terjadinya Transformasi Warga GBKP Secara Efektif ”. Adi enggo kita bengket kubas tahun 2017 enda, labo ngatakenca maka sasaren pelayanen tahun sebelumna lanai ipake ntah pe ilupaken tapi merupaken kelanjuten i bas sasaren pelayanen tahun sebelumna gelah lit pergeraken ku terulin pelayanen itengah-tengah Gerejanta. Inti
PEKAN PENATALAYANEN GBKP TAHUN 2017 8 pelayanen ibas gerejanta (GBKP) i bas tahun enda eme “berteologi” bagepe “belajar mandiri” (“Self Learning”). Gelah ras –ras kita “belajar untuk melakukan” (Matius 28 : 20). Emaka ibas sada Minggu enda ibas Pekan Penatalayanen GBKP ibas tahun 2017 enda, ibabai kita ibas Tema Umum eme “Nandai Dibata Muat Bagin I Bas DahinNa” (“Berteologi : “Belajar Untuk Melakukan” ; Matius 28 : 20 ; II Korinti 8 : 4). Gelah alu bage pemahamamenta kerna berteologi labo terjeng secara pemeteh (otak) saja tapi pe nggit ras pang kita guna jadi usihen nandangi Kata Dibata. I bas wari/ berngi sipemena enda ibabai kita ibas sada tema eme : “Nandai Dibata Muat Bagin I Bas DahinNa” (“Berteologi : Belajar untuk Melakukan”). Arah Kata Dibata sijadi bahan renungenta ras-ras i bas wari / berngi enda ibabai kita gelah teridah min ibas pusuh si ersuruh (kerelaan), mere asa ngasupna, ergiah-giah i bas nampati rikutken talenta.
Bahan invocatiota ncidahken kerna kai si ilakoken ngawan ni perpulungen i Makedonia ituriken Rasul Paulus ibas ayat 2 maka aminna gia ngawan ni perpulungen i Makedonia enggo i uji alu mesangat alu kiniseran-kiniseraan si inanamina. Tapi keriahen si simpar dingen kemusilenna si la teralang e erbanca ia melumbar mere, tempa- tempa ia bayak. Terdauhen ibas ayat 2 ituriken Rasul Paulus maka ngawan ni perpulungen i Makedoni enggo mere asa ngasupna, lebih nge pe asa ngasupna alu ukurna ersuruh. Emaka ibas ayat 4 isuratken meseksek ipindokenna gelah ibereken kesempaten guna muat bagin ibas nampati kalak Kristen si i Judea. Arah enda teridah uga ngawan ni perpulungen i Makedoni ibas keterbatasenna “Belajar Untuk Melakukan” guna muat bagin i bas dahinNa.
Bahan ogenta ncidahken kerna perpadanen Tuhan man Bangsa Israel i Moap. Perpadanen Tuhan e eme guna muat bagin ngaloken tanggungjawab i bas perpadanen si ibahan Tuhan Dibatandu (ayat 12). Tujunna eme gelah banci itetapken Tuhan bangsa Israel selaku bangsaNa ras IA jadi Dibata bangsa Israel sue ras si ipadankenNa man nini-nini bangsa Israel Abraham, Isak ras Jakup (ayat 13). Perpadanen si ipeseh Tuhan man Bangsa Israel enda mereken penegasen maka lit tanggungjawab man bana guna ncidahken kegeluhen sebage bangsa
PEKAN PENATALAYANEN GBKP TAHUN 2017 9 pilihenNa. Bahan renungenta i bas Matius 28 : 20 merupaken perentah bagepe tanggungjawab si ipeseh Jesus man ajar-ajarNa guna terus erberita kerna IA (ngajari) kerina si enggo ipesehNa bagepe IA tetap ras ajar-ajarNa seh ku kedungen jaman. Ajari ia mereken pengertin maka ajar-ajarNa arus lebe jadi usihen nandangi pengajaren Jesus si iberitakenna. Labo enda tugas si menukah guna ndalankenca, tapi lit padanNa maka ajar-ajarNa labo pernah itadingkenNa.
Bagin sideban ibas bahan renungenta wari / berngi enda si jadi bagin pe bahan invocatiota ncidahken perpulungen i Makedoni si mere alu melumbar i bas nampati kalak Kristen si i Judea. Aminna gia ngawan ni perpulungen i Makedoni lit ibas kiniseran si mesangat tapi melumbar ia mere tempa- tempa ia bayak (ayat 2). I bas ayat 9 ituriken Rasul Paulus kerna palas ngawan ni perpulungen i Makedoni ibas melumbar ia mere eme liasna Tuhan Jesus Kristus, maka aminna bayak gia IA tapi guna kiniulinndu, i pemusilNa baNa, gelah arah kemusilenNa jadi bayak kam. Ipindoken Rasul Paulus pe gelah guna iterusken dahin keleng ate e ras ndungisa. Teridah arah bahan kotbahta enda kerna uga ngawan ni perpulungen i Makedoni ikut muat bagin ibas dahin pelayanenNa.
“Belajar Untuk Melakukan ” enda labo kal si menukah guna ilakoken kalak si tek bas kegeluhenna. Enda ncidahken maka nandai Dibata arus muat bagin ibas dahinNa. Nandai Dibata labo banci terjeng secara pemeteh saja tapi pe arus pang kita ngelakokennca bas kegeluhenta. Emaka arah kerina teks Pustaka Si Badia ibas wari/ berngi enda maka kalak si tek man baNa arus lebe jadi usihen i bas ngelakoken Kata Dibata bas kegeluhenna. Labo terjeng kata-kata saja tapi Kata Dibata e arus ipraktekken bas kegeluhen si teptep wari. Tetap silakoken si e bas kegeluhenta erkiteken Dibata ibas Jesus Kristus labo pernah itadingkenNa anak-anakNa. “Selamat Belajar Untuk Melakukan” bas kegeluhenta si teptep wari.
5. Pengakun Kiniteken (Perp. Tedis)
PEKAN PENATALAYANEN GBKP TAHUN 2017 10 L. : Kata Dibata i bas kita nehken persembahen : “Dage tah kai gia ibahanndu, subuk i bas ngerana entah i bas perbahanen, bahanlah e kerina i bas gelar Tuhan Jesus Kristus janah ngataken bujur man Dibata Bapa arah IA”. (Kolose 3:17)
P. : Rende : KEE GBKP NO. 289: 1 - 3
1. Lalap si kataken bujur beritaken kemulianNa
Mbelin pemereNa banta, Puji gelarNa Reff Dibatakap cilinggementa, Malem ateta
Tuhan Dibata penalementa penanam-nanam bas geluhta 2. K’leng ateNa kapen nusur lalaplah ngataken bujur
Ingetlah pedahNa rusur, Segedang Umur…..Reff 3. Adi seh sura-suranta, Labo e perban gegehta Maka ula kita lupa, IA mrekenca…. Reff
7. Pertoton Persembahen Ras Pertoton Syafaat Topik Pertoton Syafaat :
1. Persembahen
2. Simada jabu ras tuan rumah Wari / Berngi si pagi.
3. Gelah kerina ngawan GBKP tetap erlajar kerna kata Dibata i bas kerina dampar geluhna.
4. Gelah ngawan perpulungen encidahken buah Kinitekenna man Dibata alu nggit muat bagin nampati teman ras sekelewetna 5. Si turah bas perpulungen
8. Perpadanen Man Tuhan : (Perp. Tedis)
L. : Dibatanta enggo netapken kita jadi bangsaNa, janah IA kap Dibatanta i bas diri Jesus Kristus. Selaku bangsaNa iberekenNa tanggungjawab man banta gelah ermediate man teman manusia ras sekelewetta.
P. : Erpadan aku Tuhan ngelakoken tanggunggungjawab si iberekenNdu guna mpekena-kena teman ras sekelewetku. Kam kap guruku, man baNdu aku ernalem.
L. : Dibata nge si mereken kesempaten man banta lako ncidahken buah kinitekenta, tandana kita enggo leben ngaloken kekelengenNa arah diri Jesus Kristus si enggo mate guna kita. P. : Ku ergaken kesempaten si iberekenNdu Tuhan alu nggit muat
bagin i bas nampati teman ras sekelewetku. Nampati e enggo jadi keriahen man bangku.
PEKAN PENATALAYANEN GBKP TAHUN 2017 11 L. : Turang ras senina, sipepaguhi perpadanenta arah ende-endenta
KEE GBKP NO. 295:1,3
1. Merih kal ukurku mritaken gelarNa,
Berita kerna Yesus ras keleng ateNa Meriah kal ukurku nuriken si benar, Peturah kiniteken ukurku tergintar
Pembarkenlah KataNa kempak kerina jelma Kerna Yesus Tuhanta ras keleng ateNa 3. Meriah kal ukurku mritaken gelarNa
Bas tetap ku ulihi ertambah malemna,
Meriahkal ukurku mbelin kuasaNa
Lah si lenga metehsa ikut ngalokenca
Pembarkenlah KataNa kempak kerina jelma
Kerna Yesus Tuhanta ras keleng ateNa.
9. Pertoton Tuhan 10. Pemasu-Masuna :
L. : Berkatlah! Meriahlah ukurta (ndu) i bas nampati teman rikutken tanggungjawab si enggo ibereken Dibata man banta (ndu). Si jadi gegehta (ndu) alokenlah pasu-pasu idur Dibata nari. Ipasu-pasu janah ikawali Dibata kita (kam), siang ayo Dibata ersinalsal i babonta (ndu) janah melias ateNA ngenehen kita (kam), itatap Dibata ku kita (kam) janah malem ateta (ndu) ibahanNa. Amin. P. : Amin....Amin...Amin (iendeken).
DISKUSI :
1. Kai nge sierbanca maka ngawan ni perpulungen i Makedoni ersuruh ukurna guna nampati kalak Kristen i Judea? Turikenlah!
2. Kai si arus tetap silakoken gelah tetap kita nggit muat bagin ibas dahinNa? Turikenlah!
PEKAN PENATALAYANEN GBKP TAHUN 2017 12
LITURGI RAS RENUNGEN PEKAN PENATALAYANEN GBKP
WARI/BERNGI II, SENIN 16 JANUARI 2017
I. PERSIKAPEN :
- Si ertugas ersikap guna mengketi kebaktin alu ertoto.
- Si maba pertoton syafaat sekalak Moria, Mamre ras sekalak ibas Pertua / Diaken.
- Asa bancina sikapken song leaders ras pemusik. II KEBAKTIN :
KATA PENARUH (I babai sekalak Pertua/Diaken) :
Senina ras turang, seh me kita ku bas Pekan Penatalayanen GBKP wari/berngi si peduaken. Ibas wari/berngi si pemena enggo kita i babai kerna evaluasi komitmenta selaku aron Dibata, seh ija kita enggo muat bagin bagi si icakapken kita ibas tahun 2016 si lewat. Jadi aron Dibata, tetap jadi perayakenta seh ku bas tahun 2020. Wari/berngi enda kita i babai ku bas sada tema eme “Nandai Dibata, Ndalanken Sura-SuraNa”. Ertina maka adi ninta kita nandai Dibata (berteologi) teridah arah keriahen ukurta ndalanken sura-sura ras si ngena ate Dibata. La ate Dibata kita terjeng beluh ngerana kerna Kata Dibata, beluh nuri-nuri tapi seh ku bas beluh ndalanken Kata Dibata ibas kegeluhenta teptep wari.
Mari dage radu ras si bengketi kebaktinta enda alu dem ketutusen ate janah man bandu kemahen Tuhan si ipakeNa ibas wari/berngi enda itaruhken kami kam ibas pertoton. Mari radu ras kita ertoto...
Mari ras kita tedis kerina, sipuji Tuhan ibas kerina kiniulinNa si sehkenNa banta alu ras kita rende ibas KEE GBKP NO 354:1, 3 (Perp. Tedis) 1. Kam si Mbelin, Kam terbrita, Kam kap si termulia.
Mehuli Kam dingen erkuasa, Kam si mada krina sinasa. Ref... Sinalsal keleng ate Tuhan, Bagi emas si labo luntur.
Rejin tuhu dolatNdu Tuhan, Ngarak-ngarak kegeluhen. 3. Genduari, O Dibata, Ku sehken bujur baNdu.
Terpuji Kam si mada k’rina, Si ngkelengi kegeluhenku. Ref...
PEKAN PENATALAYANEN GBKP TAHUN 2017 13 VOTUM-SALAM-INTROITUS :
L I bas gelar Dibata Bapa si nepa doni ras kerina isina, I bas gelar AnakNa Jesus Kristus si jadi penebus man manusia perdosa, i bas gelar Kesah Si Badia ulu gegeh man kalak si erkiniteken. Perkuah ate ras dame ibas Dibata nari, ibas Tuhan Jesus Kristus nari, Ibas kerembaken Kesah Si Badia ras kita (kam) kerina gelah. Amin.
P Amin...Amin...Amin... (Iendeken)
L “ Batang si mehuli tentu mehuli nge buahna, tapi batang si la mehuli tentu pe la mehuli buahna” (Matius 7:17).
RENDE :
L Mari tole si puji Tuhan ibas kerina kemulianNa ibas KEE GBKP NO. 317:1- 3.
1. Si puji Tuhan arah geluhta, Si inget tetap ngaruhNa banta
Ban k’leng ateNa, nebusi kita. Terkelin kita, si tek man baNa 2. Segedang g’luhta, inget Dibata, Bas krina paksa ngaraplah baNa
Tetap ukurta rembak ras IA, Erban si erguna ula erleja
3. Reh pendungina wari-warinta, Lit kap paksana reh me Tuhanta IpepulungNa kerina jelma, Kita si s’tia malem ateta.
--- Perpulungen Kundul --- KINIULIN DIBATA IBAS KEGELUHENTA :
L O TUHAN , Kam bujur kempak kalak si tutus man baNdu, kiniulinNdu serta man kalak si serta.
P Kiniulin dingen kebujurenlah si ngkawali aku, sabap aku ernalem man baNdu.
L Sada ngenca pemindonku man TUHAN , sada ngenca sura-surangku e me ringan i bas Rumah TUHAN kidekah geluhku guna nggejapken kiniulin TUHAN dingen mindo gelah itegu-teguNa.
P Tek aku maka kunanami me kiniulin TUHAN i bas kegeluhen enda.
L Pernembeh ateNa kentisik ngenca, kiniulinNa tetap asa umur geluhta. Iluh mambur i bas berngi si gelap, tapi kenca matawari mbincar erpagi-pagi reh keriahen.
PEKAN PENATALAYANEN GBKP TAHUN 2017 14 L+P Andiko buena kiniulinNdu, si isikapkenNdu man si pemuliaken
Kam! Kerina kalak meteh kai si ilakokenNdu, man kalak si cilinggem kempak Kam.
RENDE :
L Mari radu ras kita muji Dibatanta arah KEE GBKP NO. 289:1-2 1. Lalap si kataken bujur, Beritaken kemulianNa
Mbelin pemereNa banta, Puji gelarNa
Ref... Dibata kap cilinggementa, malem ateta Tuhan Dibata, Penalementa,
Penanam-nanam bas geluhta
2. K’leng ateNa kapen nusur, Lalaplah ngataken bujur Ingetlah pedahNa rusur, Segedang umur Ref.... PENGAKUN DOSA :
L Ibas wari-wari kegeluhenta, si gejap nge tuhu maka megati kita kote dingen ndabuh ku bas erbage-bage perbahanen dosa. La kita ngasup njagai kiniteken bage pe ndalanken perpadanenta subuk man Dibata bage pe man temanta manusia.
P O Tuhan mekuah min ateNdu man kami, alemilah dosa-dosa kami. L Megati lenga si penalem gegeh Tuhan ibas ndalani kegeluhen
enda. Tuhu sibelasken maka Tuhan nge gegeh ras ulu pasu-pasu situhu-tuhu tapi ibas kinata maka lenga bo bagi si belasken e pendalankenta ibas kegeluhen enda.
P O Tuhan mekuah min ateNdu man kami, alemilah dosa-dosa kami.
L Dibata ertedeh ate gelah si tandai min IA ibas kerina perbahanen ras keleng ate si enggo icidahkenNa man doni enda. Arah penandaita si payo maka reh pangna kita erpengendes ras ngarapaken IA ibas kerina dampar
kegeluhenta. La ate Dibata kita terjeng ngelebuh gelarNa ibas toto ras ibas kebaktin-kebaktinta tapi nggit ras pang ndalanken si sura-sura ras si ngena ateNa.
P O Tuhan mekuah min ateNdu man kami, alemilah dosa-dosa kami.
PEKAN PENATALAYANEN GBKP TAHUN 2017 15 RENDE : KEE GBKP NO. 377:1-2
1. Ku akuken me dosangku i lebe Tuhan. Megati aku lalar bas kegeluhenku. Keleng ateNdu, Pengarapenku
I teruh perkuahNdu malem me pusuhku Keleng ateNdu, Pengarapenku
I teruh perkuahNdu malem me pusuhku 2. Erlebuh aku baNdu O Yesus Tuhanku
Alemi min O Bapa salah ras lepakku Keleng ateNdu pengarapenku
Tedeh teku ngidah belinna perkuahNdu Keleng ateNdu pengarapenku
Tedeh teku ngidah belinna perkuahNdu
PENGALEMI DOSA (Perp. Tedis)
Kenca kita nulihken kegeluhenta sedekah enda maka enggo si idah
kekotenta selaku manusia si perdosa. Mekuah ate Dibata adi kita ngakuken dosa-dosa ras kesalahenta man baNa. Jenari ngena ateNa maka kalak si ersura-sura nggeluh si mbaru. Man kalak si bage ukurna nina Dibata: “O anakKu, malem atendu dosandu enggo ku alemi. Mulihlah kempak Aku, Aku kap si ngkelengi kam.” Bage nina Dibata man banta kerina. Emaka meriah ukurta radu kita rende KEE GBKP NO. 423:1-2
1. Kam nebusi aku Tuhan, Kam si peteneng tendingku. Tendi si ndube tertaban, teguNdu ku adepenNdu. Reff... Malem kal ateku Bapa, Ban keleng ateNdu
Ku puji gelarNdu Bapa, Mulia gelarNdu
TeguNdu lah aku Tuhan, Ibas pusuhku Kam ringan PetetapNdu aku Tuhan, Lah dosa talu me ku ban 2. Kam ngalemi aku Tuhan, Kam si pepalem pusuhku
Pusuh si megati nogan, mbaru perbahan kelengNdu Reff....
--- (Per. Kundul) --- PENGOGEN SI PEMENA
L Kata Dibata si jadi pengogen si pemana i bas wari/berngi enda eme ibas 2 Raja-Raja 4:8-17.
PEKAN PENATALAYANEN GBKP TAHUN 2017 16 L Ketuahen kalak si megiken Kata Dibata dingen si ndalankenca
ibas kegeluhenna si teptep wari. Haleluya. P Haleluya...Haleluya...Haleluya... (iendeken) RENUNGEN (Ertoto Sope Ras Kenca)
Renungen : Matius 7:21-23
Tema : Nandai Dibata, Ndalanken Sura-suraNa (Berteologi : Mengajar untuk Melakukan)
Kitab Matius mpetandaken Jesus jadi pemimpin agama si mbaru ibas kalak Jahudi. Pemimpin agama si mbaru labo ibas erti nggantiken pemimpin si sedekah enda enggo lit, umpamana Guru Undang-Undang, Parisi ras kalak Saduki. Pemimpin agama si mbaru ibas erti maka Jesus me si patut ibegiken janah iusih sabab IA la terjeng iajarkenNa Peraten Dibata tapi idalankenNa. Enda me si mbedaken Jesus ras pemipin-pemimpin agama Jahudi. Adi Jesus kai siajarkenNa idalankenNa tapi kalak Guru Undang-Undang, kalak Parisi ras kalak Saduki iajarkenna tapi la idalankenna (bdk Matius 23:1-3).
Kegeluhen kalak eragama paksa jaman Jesus tuhu kerah (kering). Kalak eragama terjeng kebiasan, terjeng ndalanken aturen/kewajiben lanai seh ku bas pusuh. Si enda erkiteken kenca mulih i Babil nari tuhu-tuhu iajari bangsa enda alu ketat (disiplin) guna patuh man Undang-Undang Musa. Itambahi aturen-aturen erpalasken tafsiren nandangi Undang-Undang seh buena enem ratus sepuluh telu. Kedungenna pemimpin-pemimpin agama radu ras bangsa enda enggo sibuk ngukuri terjeng aturen-aturen saja tapi Dibata si mada Undang-Undang e lanai idahna (beragama tanpa mengenal Allah). Agama adi terjeng aturen, terjeng kebaktin, terjeng ritual formal maka kegeluhen kiniteken (spritual) kerah ras kaku. Tanda-tandana merincuh ndarami salah kalak, murah megelut janah erpengakap dirina si payona. Erdandanken sie maka Jesus ibas pengajarenNa ibas kitab Matius enda rusur nekanken maka “Nandani Dibata arus teridah seh ku bas perbahanen.” Banci si nen piga-piga contohna Matius 5:20,”Kukataken pe man bandu
maka labo kam banci bengket ku bas Kinirajan Surga adi la kin tutusen atendu erbahan si ngena ate Dibata asa guru-guru agama ras kalak Parisi."
Matius 12:50,”Ise ndalanken kai si ngena ate Dibata, BapangKu, ia kap
seninangKu, turangKu, ras nandengKu."Bage me ibas bahan renungenta
ibas wari/berngi si peduaken enda ija Jesus nuriken maka labo kerina kalak si erlebuh Tuhan, Tuhan bengket ku bas Kinirajan Surga tapi kalak si
PEKAN PENATALAYANEN GBKP TAHUN 2017 17 ngelakoken si ngena ate BapangKu. Erlebuh man Tuhan mehuli, tapi adi terjeng si lebuh gelarNa labo si dalanken sura-suraNa maka kalak si bage labo Kristen tuhu-tuhu. Sope bagin renungen enda maka ibas Matius 7:16-20 enggo ituriken Jesus maka itandai batangna arah buahna. Itandai kinitekenNa arah perbahanenna. Itandai nabi palsu arah perbahanenna. Itandai Kristen asli tah palsu arah perbahanenna. Man kalak si terjeng erlebuh Tuhan, Tuhan labo idalankenna sura-sura Dibata maka ibas wari pendungi pe pagi la itandai Tuhan Jesus ia. La itandai Jesus ertina la akui Jesus ia ajar-ajarNa, janah ipelawesNa ibas adep-adepenNa nari. Man kalak si erlebuh Tuhan, Tuhan tapi labo idalankenna sura-sura Dibata maka kalak si bage igelari Tuhan kalak jahat.
Alu enda dage maka nandai Dibata (Berteologi) la terjeng ngerana,erlebuh, erteori tapi arus kepeken idalanken kai sura Dibata. Ndalanken sura-sura ras si ngena ate Dibata labo guna ndatken keselamaten tapi erkiteken kita enggo iselamatken. Lit dua dampar ijenda si perlu si perdiateken. Dampar si pemena eme keselamaten si ibereken Dibata man kalak si tek man baNa eme “perkuah ate” (keselamatan sebagai anugerah). Si peduaken eme Keselamaten si enggo ibereken Dibata man banta mpeturah sada komitmen (anugerah melahirkan komitmen bdk Roma 12:1-2). Komitemen guna nggeluh simbaru. Nggeluh si mbaru eme kegeluhen si ndalanken sura-sura ras si ngena ate Dibata.
Prioritas Program tahun enda eme “Meningkatkan Kemampuan Warga GBKP Dalam Kehidupan Berteologi dan Menumbuhkembangkan Motivasi Belajar Secara Mandiri.” Berteologi si imaksudken gerejata la terjeng ngerana kerna Dibata, la terjeng erlebuh, ertoto man Dibata tapi seh ku bas ndalanken sura-sura ras si ngena ate Dibata ibas kegeluhenta (Mengajar Untuk Melakukan). Bagi si ilakoken pernanden i Sunem. La mbue cakapna tapi teridah perbahanenna si mehuli. Bage me arusna kegeluhenta pe maka tangkas min idah kalak perbahanenta si mehuli guna nuduhken ise situhuna Dibata si sembah kita.
Ibas negaranta enda labo kurang kalak beluh ngerana, beluh ngajar, beluh erteori, beluh erpidato tapi bagi si kurang sigejap kalak si nandai Dibata situhu-tuhu sabab megati la si katakenna idalankenna. La si ijanjikenna idalankenna. Ibas gerejanta pe labo kurang kalak pentar, labo kurang kalak si nuriken penggejapen teptep PJJ, labo kurang kalak si erjabaten. Tahun
PEKAN PENATALAYANEN GBKP TAHUN 2017 18 enda ningetken kita mulihi gelah ula ka min kurang kalak si nggit ndalanken sura-sura ras si ngena ate Dibata. Sabab labo lit gunana erteori la ipraktekken, eragenda la erkredenda, eragama la erdibata. Nina Tuhan ibas pendungi man kalak si bage, “lawesalah iadepenKu nari, la kam ku tandai.” Gelah enda ola jadi man banta emaka mari dage ibas kerina dampar kegeluhenta si cidahken dage buah kinitekennta man Dibata arah ngelakoken sura-sura ras si ngena ateNa (anugerah melahirkan komitmen). Lit sekalak Pt Emeritus pernah ngerana nina,”bagi perkinitekenna nge perkadena pe.” Ertina uga kinitekenta, ise Dibatanta kerina itandai arah perbahanennta. Nina Invocatio, batang si mehuli buahna pe mehuli.
ERTOTO
PENGAKUN KINITEKEN :
L Mari radu ras kita kerina tedis. Mari siakuken kinitekenta raduken kerina kalak si tek ibas kerina paksa ras ingan i doni enda ninta dage radu ras “Aku tek man Dibata Bapa,...
---Perp. Kundul --- PERSEMBAHEN :
L Seh me paksana kita nehken persembahen pengataken bujurta man Dibata. Si bereken si mehulina man baNa tanda keleng ateNa si gejap ibas kegeluhenta. Palas Kata Dibata i bas kita ngendesken persembahen enda eme ibuat ibas Kuan- Kuanen 8:21”Man kalak si ngkelengi Aku ku bereken kebayaken melala, rumahna ku demi alu erta-erta si meherga.”
Iherta ngendesken persembahen mari radu ras kita rende ibas KEE GBKP NO. 424: 1- 2
1. Ipuji kami Kam, Dibata si mbelin, Alu ende-enden si meriah
Suari ras berngi kawali kami min, Segelah la celus bas percuban Reff... Sangap kap kalak si r’nalem baNdu e,
Daten tuah ras kesenangen pe
Sangap kap kalak si r’nalem baNdu e, Daten tuah ras kesenangen pe.
2. Dibata sajalah tetap si man pujin, Endeskenlah g’luhta man baNa min Tetap IA si mperdiateken kita min, KelengNa man banta la erkerin Reff…
PEKAN PENATALAYANEN GBKP TAHUN 2017 19 - Kerna persembahen ibabai sekalak Moria.
- Kerna si mada jabu ibabai Pengkotbah.
- Kerna si turah ibas perpulungen i babai sekalak Mamre.
PERPADANEN MAN DIBATA (Perp. Tedis)
L Dibata erngena ate man kalak si megiken KataNa dingen ndalankenca ibas kegeluhenna.
P Erpadan kami Bapa ertedeh ate man baNdu ras ndalanken sura-suraNdu.
L Kalak si megiken KatangKu dingen ndalankenca maka isaksikenNa me keleng ateKu man doni enda.
P Erpadan kami Tuhan naksiken Kam arah kata ras perbahanen kami. L Si pepaguhi dage perpadanenta alu ras kita rende : KEE GBKP
NO. 309:1-2
1. Pengasup kami o Tuhan, Gelah pedahNdu banci idalanken
Em kap tendang kami bas kegeluhen, KataNdu si man gelemen Gelah tangkas kata ras perbahanen, Ban min kami tetap bas kebujuren SurgaNdu kap perayaken.
2. Temani kami o Tuhan, Bengket ku doni si dem keguluten SampatiNdu kami lako naluken, Dosa si man sirangkenken Emaka ola kal kami tadingken, I bas kami ndalani kegeluhen G’lah dat kami kemenangen.
PERTOTON TUHAN RAS PEMASU-MASUN
L Ertoto kita bagi ni ajari Tuhan Jesus ninta dage ras-ras... Dalankenlah sura-sura ras si ngena ate Dibata ibas kegeluhenta(ndu). Enda me tandana maka si tandai Dibata i bas kegeluhenta (ndu). Guna sie alokenlah pasu-pasu idur Dibata nari jadi pergegehta (ndu): “Ipasu-pasu janah ikawali Dibata kita (kam), siang ayo Dibata ersinalsal i babonnta (ndu), janah melias ateNa ngenehen kita (kam). I tatap Dibata ku kita (kam) janah malem atenta (ndu) i bahanNa. Amin.
P Amin...Amin...Amin... (iendeken) DISKUSI :
1. Kai nge si ban gelah sue min kiniteken ras perbahanen i bas kegeluhenta? Dalankenlah!
PEKAN PENATALAYANEN GBKP TAHUN 2017 20
LITURGI RAS RENUNGEN PEKAN PENATALAYANEN GBKP
WARI/BERNGI III, SELASA 17 JANUARI 2017
A. PERSIKAPEN :
- Ngaturken si ertugas i bas kebaktin.
- Nuratken kai-kai saja si man totonken si turah i bas perpulungen guna itotoken i bas pertoton syafaat.
- Si ertugas ras perpulungen nikapken pusuh ras ukur guna ngadap man Tuhan.
B. KEBAKTIN (Ibabai Runggun Gereja): 1. Kata Pengalo-Ngalo :
Turang ras senina i bas Tuhanta Jesus Kristus, selaku serayan Tuhan, ikataken kami mejuah-juah man banta kerina. Si kataken bujur man Tuhan bas kesempaten enda, sabab tetap kita ikawaliNa i bas mentasi sada wari enda, iberekenNa kecukupen geluhta ras kerina isi jabunta. I bas Pekan Kebaktin Penatalayanen wari/berngi si pe teluken enda, man banta isehken kerna: - Aron Dibata si nggit erlajar mandiri.
- Kita banci tole erlajar arah turi-turin kegeluhen Nikodemus ras Sakeus. - Kai-kai saja ulih nandangi aron Dibata si nggit erlajar mandiri.
Mari dage sisembah Tuhan arah kebaktin enda dingen si endesken dirinta man Tuhan baNa. Man bandu kemahen Tuhan siipake-Na ibas wari/berngi enda, maka itaruhken kami kam guna ngelai perpulungen alu pertoton. Pengarapen kami pe maka ipake Dibata kam nehken sura-sura-Na arah kebaktin enda. Mari radu ras kita ertoto ...
Ertoto
Rende : KEE GBKP NO: 192 :1,2 - Perp Tedis - (Janah Ngendesken Perlengkapen Kebaktin Man Si Mabai Kebaktin) 1. Meriah kita ras krina si puji Dibatanta.
Perban lias ateNa e i sehkenNa man banta pe.
Nggo pulung kita krina pe i bas ingan enda, I bas ingan enda. 2. Dage gegehi bantalah, Muji Tuhan perkuah.
I bas keleng ateNa nge, Seh banta keriahen pe.
Gundari subuk ras pagin tuhu meriah min tuhu meriah min. 2. Votum – Salam :
L I bas gelar Dibata Bapa si enggo encidahken kuasaNa arah kerina tinepa, i bas gelar AnakNa Jesus Kristus si maba rupa Dibata ku doni
PEKAN PENATALAYANEN GBKP TAHUN 2017 21 enda, ras i bas gelar Kesah si Badia nampati kita (kam) nandai perukuren Dibata.
Malem ateta (ndu) erkiteken seh wari enda, Dibata mpetandaken diriNa man banta (ndu) si erbahanca tuhu-tuhu sitandai IA ras sura-suraNa, gelah kita nggeluh erkiniteken man baNa. Amin.
P Amin... Amin... Amin... (Iendeken)
3. Berita Kerna Perbahanen Ras Sura-sura Dibata (Invocatio) :
L “Bena-bena kepentaren e me erkemalangen man TUHAN . Man kalak si erkemalangen man baNa iberekenNa kap pemeteh si mehuli. Terpujilah Dibata seh rasa lalap” (Masmur 111:10).
Erpalasken Kata Dibata enda, sipuji IA alu ras kita rende : KEE GBKP NO: 338: 1, 3
1. Kam ku sembah ulu tuah, Ajar aku me gelah, La nurihi puji kami, Lalap la erngadi-ngadi.
Lias ras keleng ateNdu, JujurkenNdu man bangku, Nteguh paguh la terundu Kuasa ras MuliaNdu. 3. Pasu-pasu Surga nari ku gejap tiap wari,
Kepentaren berekenNdu nehken sura-suraNdu. PakekenNdu lah min aku, Jadi persuruhenNdu,
Jenda aku suruh aku nehken kekelegenNdu.
4. Pujin Man Dibata Selaku Ulu Kepentaren Perp. Kundul L Dibatanta kap Ulu kepentaren sabab kerina si nasa lit Dibata kap
sinjadikenca alu kuasa ras kepentarenNa.
P Ipuji kami Kam Tuhan, tangkas man kami maka kerina si enggo itepaNdu erpalasken kuasa ras kepentarenNdu.
L Man manusia ibereken Dibata kepentaren segelah ngasup ndahiken dahin-dahin si rehna i bas Dibata nari.
P Bujur Tuhan, ibahanNdu kami jadi aronNdu, ertambah-tambahlah kepentaren kami si rehna i bas Kam nari.
L Guna ndatken pemeteh, si pemenana si la banci la lit i bas kalak e me mehamat dingen erkemalangen man TUHAN . Kalak lenge la nggit mperdiateken kepentaren dingen la ia nggit erlajar.
L Sipuji Tuhan alu ras kita rende arah : Rende KEE GBKP NO: 354 :1-2 1. Kam si mbelin, Kam terbrita, Kam kap si termulia
Mehuli Kam, dingen erkuasa, Kam si mada krina sinasa Reff. Sinalsal keleng ate Tuhan Bagi emas si labo luntur Rejin tuhu dolatNdu Tuhan ngarak-ngarak kegeluhen
PEKAN PENATALAYANEN GBKP TAHUN 2017 22 2. Erta- erta, kebayaken, I bas Kam nari rehna
Kam merentah, alu kuasa, ras gegehNdu Tuhan Dibata Reff...
5. Kinata Kegeluhen Manusia i Bas Ngaloken Kepentaren Dibata :
L O anakku, begikenlah ajar nande bapandu! Megermetlah, gelah mbages pengertinndu. Si kuajarken man bandu e mehuli kal, e maka inget-ingetlah kerina. Aku anak sada-sada i bas nandengku; tupung aku kitik denga, iajarken bapangku aku nina, “Ingetlah kai katangku man bandu, ola lupa. Lakokenlah sentudu ras si kukataken man bandu maka kam nggeluh. Jadilah pentar janah pebagesi pengertindu. Ola kam lupa, ola kam nilah i bas kai i kukataken.”
P Ngaku aku Tuhan maka lenga aku serta i bas megiken, ngantusi ras ndalanken kepentarenNdu. Alemi kel aku Tuhan ras pengasupken kel aku segelah tutus i bas megiken, ngantusi ras ndalanken kepentarenNdu. Alemi kel aku i bas kinilatunggungenku.
L Sisehken pingko-pingkonta man Dibata alu ngendeken: KEE GBKP NO: 182:1-2
1. O Tuhan Kam tetap, Tedehku man baNdu. Arapku lalap min, Nemani geluhku.
Reff : O Tuhan rasa lalap, Geluhku temani. Ola tadingken, Ras Kam tetap.
2. O Tuhan Kam tetap, Ajarilah aku. Lah kai pe si kuban, Mehuli man baNdu.
Reff : …………..
6. Padan Dibata Man Si Ngakuken Kinilatunggungenna : Perp. Tedis L Tapi kalak si megiken kepentaren, teneng geluhna janah la perlu ia
mbiar."
Selaku persuruhen Dibata, aku nehken kataNa man banta (ndu) si erkadiola dingen nggit jera ibas dosa ras kelepakenta (ndu) :
“Ingetlah Dibata i bas kerina si idahikenndu e maka Ia si nuduhken dalan si payo man bandu. Ola iakapndu pentar kam lebih asa patutna; erkemalangenlah man Dibata janah ola kam nggit ngelakoken si jahat. Adi bage pengelakondu, perbahanenndu e desken tambar si pepalem penakit ras si mesuindu” (Kuan-Kuanen 3:6-8).
Meriah ukurta i bas kita enggo ngaloken padanNa, emaka rende kita ibas : KEE GBKP NO : 110:1,3
PEKAN PENATALAYANEN GBKP TAHUN 2017 23
1. Mari ku Yesus dahi pedas, Begi pedahNa bahan bujur. Mari ku Yesus dahi terus, IA me Penebus.
Senang mriah ukurta kepe, Adi masap krina dosa e. Mari me kita ku Surga e, Ku kesenangen e.
3. Mari ku Yesus, dahi pedas, Maka dosandu min nggo kelas. Yesus perkeleng, melias pe, Malem ukurndu e.
Senang m’riah ukurta kepe, Adi masap krina dosa e. Mari me kita ku Surga e, Ku kesenangen e
7. Kata Dibata : Perp. Kundul
a. Ngoge Kata Dibata Bagin Si Pemena : Johanes 3:1-10
L Ketuahen kalak si megiken Kata Dibata, dingen si makenca i bas geluhna si teptep wari. Haleluya.
P Haleluya... Haleluya... Haleluya... (Iendeken) b. Renungen: Lukas 19:1-10 (Ibenaken Ras Idungi Alu Pertoton)
Tema: “Aron Dibata Si Nggit Ras Tutus Erlajar Mandiri”
Sedar kita ntah la sedar maka tep-tep kalak si enggo ngaloken Tuhan Jesus jadi Tuhan ras Juruselamatna maka ia enggo bengket ku bas bagin jadi ‘aron’ Dibata. Kata ‘aron’ i bas kalak Karo eme sada persadaan si anggotana piga-piga kalak si enggo ersada arih ras sura-surana lako ras-ras i bas ndahiken sada-sada dahin, nggeluh sisampat-sampaten, sikeleng-kelengen ras gotong-royong. Tep-tep anggota aron la mpersoalken anem gia tep-tep anggota aron e la bali gegeh ras kengasupenna. I bas la bali e me teridah kebayaken guna i persada i bas aron e (“saling melengkapi”). Kata ‘aron’ banci pe iertiken desken ‘sada kula melala ring-ringna (1 Korinti 12:1-20). Tep-tep ring-ring si lit kerina tama guna ras labo lit siganjang teruken (penting, seh kel pentingna ntah kurang penting).
Man banta sekalak-sekalak enggo ibereken Dibata kengasupen si pelain-lain. Sura-sura Dibata man tep-tep anggota aronNa eme nggit ras tutus erlajar. Manusia si nggit ras tutus erlajar semalna eme erkiteken:
“motivasi intrinsik”, ertina i bas tep-tep manusia lit turah penjemba si rehna i bas dirina sendiri lako nggit ras tutus erlajar. Penjemba enda turah e me erkiteken meriah ras erguna kel iakapna i bas geluhna kerna pelajaren siniajarken man bana. Umpamana, kalak si meriah iakapna rende maka uga pa pe mbelin kel penjemba si rehna i bas dirina lako latihen rende. Kalak si meriah kel iakapna megiken ras ngoge Kata Dibata maka mbelin kel penjemba i bas dirina lako ngoge Pustaka, reh ku perpulungen ras sidebanna.
PEKAN PENATALAYANEN GBKP TAHUN 2017 24 “motivasi ekstrinsik”, ertina i bas tep-tep manusia lit turah penjemba lako nggit ras tutus erlajar si rehna i darat dirina nari. Umpamana, adi ndatken nilai si mejile maka ibereken me hadiah ras sidebanna. Kalak si erkiniteken nggo tek ras nggejapken kerna belinna perkuah ate Dibata enggo ialokenna i bas geluhna, emaka iendeskenna geluhna man Dibata. Kasa gegeh ras kengasupenna lit nggit dingen tutus erlajar kerna kai-kai saja si ngena ate Dibata guna idalanken. Kai-kai saja pe si idalankenna eme guna mpermuliaken Dibata, la ia nggit ngelakoken si jahat. Kai-kai saja pe siilakokenna isik-sikna lebe maka itindesna, iukurina lebe maka ibelaskenna. Sue nge ras sura-sura Dibata ntah lang si kulakoken? Enda me si jadi sukat-sukat i bas geluhna.
“Motivasi” ntah penjemba enda duana labo terpesirang, duana mereken penjemba man manusia lako nggit ras tutus erlajar mandiri. Selaku kalak si erkiniteken man Tuhan perlu kel kita megermet i bas geluh enda segelah ula kita salah i bas erlajar ras kai-kai saja si man pelajaren. Tangkas i kataken i bas Invocatio: “Bena-bena kepentaren e me erkemalangen man TUHAN . Man kalak si erkemalangen man baNa iberekenNa kap pemeteh si mehuli. Terpujilah Dibata seh rasa lalap” (Masmur 111:10). Ertina Pemasmur nggejapken maka erkemalangen man TUHAN me si pentingna i bas geluh enda. Kalak si erkemalangen man TUHAN teridah arah nggit muji TUHAN, ngukuri ras ndalanken Kata TUHAN i bas segedang geluhna. Alu bage maka si jadi ulih man kalak si erkemalangen man TUHAN e me ibereken TUHAN pemeteh si mehuli. Pemeteh si maba kejuah-juahen dingen kesangapen nggeluh, subuk man dirina jine bagepe man sekelewetna. I bas renungen kebaktin Pekan Penatalayanen wari/berngi si peteluken enda, kita erlajar arah motivasi/penjemba i bas Nikodemus ras Sakeus.
Nikodemus, e me sekalak peminpin agama kalak Jahudi, ia kalak Parisi. Lit penjemba i bas diri Nikodemus lako nambahi pemeteh, pengangkanna ras penandaina kerna Jesus. Nikodemus enggo meteh maka Jesus me Guru si isuruh Dibata ras tanda-tanda sengget si ni
PEKAN PENATALAYANEN GBKP TAHUN 2017 25 bahan Jesus. Selaku peminpin agama kalak Jahudi gelah ula terang-terangen i bas sura-surana lako nambahi pemeteh maka ijumpaina Jesus i bas paksa berngi. Teridah tuhu maka Nikodemus nggit ras tutus i bas erlajar, i bas la iangkana ijumpaina langsung Guru eme Jesus si jadi ulu pengajaren. I bas perjumpan e tutus kel ate Nikodemus, piga-piga kali pe ia nehken penungkunen man Jesus i bas lenga payo pengangkanna. Si jadi tujun Nikodemus e me gelah payo pemeteh, pengangkan ras penandaina kerna Jesus. Sabab megati pemeteh, pengangkan ras penandai kalak Parisi kerna Jesus la payo, kerehen Jesus iakapna imbang si man kernepenken erkiteken megati isehken Jesus pengajaren lako mandang perbahanen kalak Parisi si pekulah-kulah.
Sakeus, e me sekalak si pendahinna pengalo cuke, ia bayak. Dahin pengalo cuke i bas kalak Jahudi e me la payo rikutken Torat. Emaka nina jelma sienterem tupung kesilang Jesus ku rumah Sakeus “jungut-jungut kalak si nterem ngidah si e nina, "Kesilang IA i rumah kalak perdosa." Si penting siidah e me litna motivasi/penjemba i bas diri Sakeus, si teridah arah:
Merincuh kal Sakeus ngidah ise kin Jesus e.
I bas kerincuhenna e icidahkenna arah kininggitenna ras ketutusenna ngusahaken gelah iidahna Jesus. La jadi soal man bana anem gia lit perbeben (nterem kal jelma arah lebena dingen ia pe gendek ka). E maka kiam ia ngelebei jelma si nterem e, jenari inangkihna batang kayu, guna ngenehen Jesus si mentas arah dalan e. Si jadi ulih man Sakeus si enggo alu tutus ate ngelakoken kuga
carana maka banci iidahna Jesus eme: seh me sura-surana iidahna Jesus si mentas arah dalan e. Lebih asa si isurakenna pe ialokenna, iperkuanken Jesus ia, kesilang Jesus i rumahna janah meriah kel ukur Sakeus ngalo-ngalosa.
Ulih perjumpan Sakeus ras Jesus pe erbahanca Sakeus jera i bas dosa-dosana nari, tedis Sakeus janah nina man Tuhan, "Setengah i bas erta-ertangku kubereken man kalak musil; janah adi lit kalak enggo kutipu, kuulihken man bana empat kali lipat." Ngaloi Jesus nina, "I bas wari enda enggo reh keselamaten man isi jabu enda. Kam pe kesusuren Abraham kap.
PEKAN PENATALAYANEN GBKP TAHUN 2017 26 Keselamaten si rehna i bas Jesus nari me si jadi ulih man isi jabu Sakeus, si enda kerina banci jadi e me erkiteken Sakeus nggit ras tutus erlajar man Jesus anem gia geluh Sakeus sedekah enda enggo papak. Kenca jumpa ras Jesus kerina jadi mehuli.
Marilah i bas segedang-gedang geluhta pe tetaplah erlajar. Peturahlah motivasi/penjemba guna nggit ras tutus erlajar mandiri. Labo lit kepentarenta i bas ngalaken perbeben ras percuban nggeluh i bas doni enda. Tek kita maka alu kepentaren si rehna i bas Dibata nari maka ertambah-tambah kepentarenta ras ulihna e me kemalemen ate. Labo lit kalak motu ijadiken Dibata, kerina banci jadi kalak pentar. Sipenting e me kininggiten ras ketutusen ateta erlajar i bas geluh enda. Kata Dibata ersinget “TUHAN kap si mereken kepentaren, i bas IA nari kap manusia ndatken pemeteh ras pengertin. Man kalak benar ras bujur iberekenNa penampat ras ampang-ampang. TUHAN si ngkawali kalak si bujur perbahanenna janah iampang-ampangiNa kalak si tutus man baNa” (Kuan-Kuanen 2:6-8). Teridah arah kegeluhen Nikodemus bagepe Sakeus i bas kurang pengangkan ras pengertinna maka ijumpaina Jesus, kedungenna malem me atena.
8. Pengakun Kiniteken Perp. Tedis
9. Persembahen : Perp. Kundul
L Kata Dibata si jadi palas i bas kita ngendesken persembahenta man Dibata :
“Mehamatlah man TUHAN alu mpersembahken ulih jumandu si mehulina kal man baNa. Adi bage perbahanenndu la banci lang dem lumbungndu alu gandum dingen lau anggurndu sampur, seh maka lanai siat ingan munikenca pe” (Kuan-Kuanen 3:9-10).
Tupung si endesken persembahenta ras kita rende ibas KEE GBKP NO: 445 : 1: 3
1. Si pepulung me persembahenta, Si endesken dage man Dibata. Tanda riah ukur ban pasu-pasuNa, Si simpar breNa man banta. Ref... Asa si nggio isikapken, Asa si nggo itotoken.
Em pengataken bujurta, Kempak Dibata.
2. Tuhu simpar pemere Dibata, Man perjuma ras erbinaga.
Krina si erdahin, singarap man baNa, Ituahi pasu-pasuNa. Ref... 3. Pengataken bujur man Dibata, Enda mbelin ka tuhu gunana. Jadiken geluhta, kula ras tendinta, Persembahenta si nggeluh. Ref..
PEKAN PENATALAYANEN GBKP TAHUN 2017 27 - Pertoton Persembahen ras Pertoton Syafaat
a. Persembahen.
b. Gelah kerina serayan Tuhan (Pandita, Emeritus, Pertua ras Diaken) nggit ras tutus tetap erlajar nambahi kepentaren i bas ndahiken dahin-dahin gereja Tuhan.
c. Gelah tep-tep ngawan ni perpulungen nggit ras tutus erlajar mandiri, segelah i bas kerina dampar geluhna makeken kepentaren si rehna i bas Dibata nari.
d. Siturah i bas perpulungen.
e. Ingan pulung ras si ertugas wari/berngi enda bagepe wari/berngi si pepagi.
10. Perpadanen Man Dibata: Perp. Tedis
L Pelajarilah si kukataken man bandu o anakku, janah ola kal kam lupa si kuturiken man bandu. Megermetlah nandangi kepentaren jenari cubakenlah ngantusisa pe. O anakku, pindolah pemeteh, seksekilah ndatken pengertinna.
P Erpadan aku Tuhan, kasa gegeh ras ngasupku lit, kupala-palai tetap erlajar kerna kepentarenNdu.
L Daramilah e desken ndarami emas, ayakilah e desken ndarami erta si terbuni. Alu bage maka ietehndu kai ertina erkemalangen man TUHAN, jenari idatndu me pemeteh kerna Dibata.
P Erpadan aku Tuhan, kasa gegeh ras ngasupku lit, kupala-palai tetap erlajar kerna kepentarenNdu.
L TUHAN kap si mereken kepentaren, i bas IA nari kap manusia ndatken pemeteh ras pengertin. Man kalak benar ras bujur iberekenNa penampat ras ampang-ampang. TUHAN si ngkawali kalak si bujur perbahanenna janah iampang-ampangiNa kalak si tutus man baNa. Adi idengkehkenndu Aku, ietehndu kai si bujur, si benar dingen adil. Ietehndu pe kai si arus ilakokenndu.
P Bujur Tuhan, erpadan aku, kasa gegeh ras ngasupku lit, kupala-palai tetap erlajar kerna kepentarenNdu ras ndalanken kepentarenNdu. L Kam jadi kalak pentar janah pemetehndu mereken kesenangen man
bandu. Kebeluhen dingen pengertinndu kap si ngkawali kam. P Amin
L Guna peteguhi perpadanenta (ndu) man Dibata, sipuji Tuhan alu rende : KEE GBKP NO: 309 : 1- 2
1. Pengasup kami o Tuhan, Gelah pedahNdu banci idalanken. Em kap tendang kami bas kegeluhen, KataNdu si man gelemen.
PEKAN PENATALAYANEN GBKP TAHUN 2017 28
Gelah tangkas kata ras perbahanen, Ban min kami tetap bas kebujuren, SurgaNdu kap perayaken.
2. Temani kami o Tuhan, Bengket ku doni si dem keguluten. SampatiNdu kami lako naluken, Dosa si man sirangenken. Emaka ola kal kami tadingken, I bas kami ndalani kegeluhen,
Glah dat kami kemenangen.
11. Pertoton Tuhan
12. Pengutusen Ras Pasu-pasu Dibata :
L TUHAN njadiken doni enda alu kepentarenNa, alu kebeluhenNa itamakenNa langit i bas inganna. Alu pemetehNa ibahanNa maler lau belin, bage me embun si mereken udan ku doni enda. Erkiteken si e o anakku, ola kal sirangi kepentaren ras pemeteh! Ola pulahi pe. E kap si mereken kegeluhen, kegeluhen si senang dingen dame man bandu. Guna mpengasup kita (kam) erlajar ras ndalanken kepentaren Dibata alokenlah pasu-pasu si rehna i dur Dibata nari :
“Dibata sumbul kemalemen ate e gelah sincukupi keperlunta (ndu) guna ndalanken si sentudu ras peratenNa. Janah Dibatalah erdahin i bas kita (kam) arah Jesus Kristus, gelah kita (kam) ngelakoken kai si ngena ateNa, man Kristuslah kemulian seh rasa lalap”. Amin.
P Amin... Amin... Amin... (Iendeken) SHARING :
1. Si jadi motivasi/penjemba man Nikodemus i bas njumpai Jesus e me: erlajar guna nambahi pemeteh, penandai ras perngangkan kerna Jesus ras ajarenNa. Turiken pengalamenndu, adi lit sedekah enda kurang pemeteh ras pengangkanndu sedekah enda kerna Kata Dibata, kai nge si ilakokenndu?
2. Nina Jesus "I bas wari enda enggo reh keselamaten man isi jabu enda.” Enda me si ibelasken Jesus tupung kesilang IA ku rumah Sakeus. Kai nge erbahanca maka i bas wari e isehken Jesus keselamaten man isi jabu Sakeus?
3. Turikenlah! Enggo nge igejapkenndu maka ku bas se isi jabundu pe enggo isehken keselamaten?
PEKAN PENATALAYANEN GBKP TAHUN 2017 29
LITURGI RAS RENUNGEN PEKAN PENATALAYANEN GBKP
WARI/BERNGI IV, RABU 18 JANUARI 2017
A. PERSIKAPEN :
Sope kebaktin ibenaken, Majelis Runggun Gereja iarapken enggo mperdiateken kerina keperlun siperlu isikapken guna kiniulin perdalanen kebaktin e. I bas wari/ berngi enda, asa bancina min si mabai doa syafaat eme tegun kalimbubu ntah pe puang kalimbubu tuan rumah. Emaka, mehuli kal dikune si pepulung lebe topik doa syafaat si turah itengah-tengah perpulungen e.
Kerina ngawan ni perpulungen ras serayan Tuhan si reh, iarapken kal guna mperdiateken bagin i bas ngoge liturgi. Tegun siibahan i bas liturgi e erpalas kempak si mada jabu. Selaku Sukut, Kalimbubu ras Anak Beru, ikutken arah tegun si mada jabu ingan pulung sendah. Sidalanken sue ras kuga kin sedekah enda tuturta nandangi si mada jabu e.
B. KEBAKTIN :
1. Kata Pengalo-Ngalo : Ibabai Simada Jabu
Turang ras senina i bas Tuhanta Jesus Kristus, bage pe kerina kam tegun sembuyak senina kami bage pe kam kerina serayaan Tuhan, ras pe kalimbubu bage pe anak beru kami, ikataken kami mejuah-juah man bandu kerina. Kerehendu kerina nambahi keriahen man kami sada jabu bage pe man banta kerina si pulung i bas wari/ berngi enda. Janah, ikataken kami bujur ibas kerehenndu kerina. Ersentabi kami dikune lit si kurang i bas pengalo-ngalo kami nandangi kam kerina, ajarindu kami i bas salah lepak kami maka reh terpujina Tuhan. Ertoto kita maka kerina kita banci muat bagin i bas wari/ berngi enda, bage pe man turang senina nta si langa seh, Tuhan lah si masu-masuna dingen si naruhkenca seh ku rumahta enda.
2. Kata Penaruh : Ibabai Majelis Runggun Gereja
Turang ras senina, i bas wari/ berngi enda erlajar me kita guna jadi ”Aron
Dibata Si Muat Bagin I Bas Jabu Ras Sangkep Geluh” ta. Si enda silakoken
erkiteken enggo siidah uga ulina perukuren ras sura-sura Dibata si enggo isuankenNa jadi orat nggeluh i bas budayanta. Bagepe, Dibata ersura-sura segelah kita kerina anak-anakNa e banci min jadi sekalak si ersuruh ukurna guna muat bagin i bas kerina dahin-dahin jabu ta bage pe itengah-tengah sangkep geluhta e.
PEKAN PENATALAYANEN GBKP TAHUN 2017 30 Selaku aron Dibata siitamakenNa itengah-tengah doni enda – subuk bapa, nande bage pe anak-anak – rutang kap kita lako nggeluhken kegeluhenta guna jadi pasu-pasu. Erkiteken enggo sialoken ras sinanami pasu-pasuNa e emaka kita pe arus ka mpepaler pasu-pasuNa e man kerina isi jabu nta bage pe sangkep geluhta e. Rikutken Pekan Penatalayanen e, perlu kap si tatalayanken mulihi kegeluhen si ertanggungjabab i bas jabu. Selaku bapa, arus muat bagin lako jadi pengulu i bas jabu. Selaku nande, arus nandai kecibal kerina isi jabuna dingen jadi ingan tunande, janah selaku anak, erbahanca merim kegeluhen jabu e. Bage pe nandangi sangkep geluhta, kerina kita ermeriah ukur lako jadi pancur pasu-pasu Tuhan alu nehken si ngena ate Tuhan dingen nggit ngaloken ia kuga ia litna ras mereken penampat asa gegeh ras kengasupenta.
Emaka, guna sie marilah ras-ras kita muat bagin i bas Kebaktin ta enda alu ibabai serayan Tuhan si enggo iaturken Runggun Gereja. Man bandu serayan Tuhan, mesikel kal kami lako megiken Kata Dibata i bas wari/berngi enda segelah kerina kita jadi aron Dibata si muat bagin i bas jabu ras sangkep geluh. Itaruhken kami kam alu pertoton....
Ertoto - Perp. Tedis -
Rende : KEE GBKP NO. 33 : 1
Dibata nandaisa si tek man baNa e. LiasNa nandangisa, Senang akapna me. IsampatiNa ia, I bas kiniseran.
Geluh tah mate gia, ‘ La banci lang senang. Geluh tah mate gia, ‘La banci lang senang.
3. Votum – Salam
L I bas gelar Dibata Bapa si nepa kiniraturen nggeluh, i bas gelar Jesus Kristus si jadi usihen geluh manusia, ras i bas gelar Kesah Si Badia si mere kepentaran guna mbangun kegeluhen si mulia ras ukur ersuruh lako muat bagin ibas kiniulin jabu ras sangkep geluh e.
Perkuah ate ras dame i bas Dibata Bapa, AnakNa Jesus Kristus, ras i bas kerembaken Kesah Si Badia ras kita (kam) kerina gelah. Amin
P Amin...Amin...Amin... (Iendeken)
4. Berita Kerna Sura-Sura Ras Perbahanen Dibata (Invocatio)
L Nina TUHAN man Nuah, "Bengketlah kam ras kerina keluargandu ku
bas kapal e. Sada kam nari ngenca i bas doni enda erbahan si mehuli Kuakap. (Kejadin 7:1)
PEKAN PENATALAYANEN GBKP TAHUN 2017 31 Erpalasken Kata Dibata enda, sipuji IA alu ras kita ngendeken : KEE GBKP NO. 264 : 1, 3
1. Ateku tedeh man baNdu o Tuhan, Malem me ateku jumpa si erkuasa Aku megegeh di ras kam o Tuhan, Sabab Kam me kapen Ulu sinasana Kubegi KataNdu, Kata tuhu-tuhu. Keke me ukurku nehken peratenNdu 3. Ib’reNdu pedah, kuakap pe megah, Tambah pengertin’ dat kiniulin
Tambah pemeteh, turah kapen gegeh, PemereNdu sampur, ras kusehken bujur. Kubegi KataNdu, Kata tuhu-tuhu. Keke me ukurku nehken peratenNdu
5. Pujin Man Dibata Si Jadi Usihen Ibas Muat Bagin Itengah-Tengah Jabu Ras
Sangkep Geluh : - Perp. Kundul -
L Benana nari pe Dibatanta enggo nepa kiniraturen nggeluh i bas kerina tinepa dingen la ipelepasNa kita ndalani kegeluhen enda sisada-sisada. IsikapkenNa teman nggeluh rikut ras kade-kade man banta, gelah lit inganta nehken keleng ate, nuri-nuri ras megi-megi kerna perbahanen Dibata si mejin.
Sukut Bujur Tuhan sebab enggo iberekenNdu man kami sembuyak senina kami si jadi teman kami lako ndalani kegeluhen kami ras Kam.
L Jabu ras sangkep geluh ilitken Dibata bage ipekena-kenaNa segelah lit ingan man banta – subuk bapa, nande ras anak-anak - guna nampati ras pe isampati. Emaka sekalak-sekalak kita ertanggungjabab lako ndalani kecibal geluhta sue ras si ngena ateNa dingen kerina siilakoken kita e erkiteken kita ngusih kerina perbahanenNa itengah-tengah doni sue ras si enggo icidahken Tuhan ta Jesus Kristus e.
Anak Beru Asa gegeh ras kengasupen si lit, ipakeken kami kerinana guna mereken si mehulina man Tuhan ras pe man kalimbubu kami. L Bage pe sigejapken kal maka kita kerina ipersada Dibata
segelah arah persadan enda reh kuhna kengasupenta ngelaken kekelengen Tuhanta man teman manusia bage pe man kerina
PEKAN PENATALAYANEN GBKP TAHUN 2017 32 tinepa. Enda me biak Dibata si enggo isuankenna i bas budayanta.
Kalimbubu Bujur Tuhan sebab ipakeNdu kami lako nehken keleng ateNdu man anak beru kami ras man teman kami sidebanna.
L Andiko ulina perbahanen Tuhan i bas ngaturken kegeluhen manusia. Emaka Pujilah Tuhan! Pujilah IA erkiteken enggo ituduhkenNa orat nggeluh si mehuli. Tetapkenlah i bas ukurta (ndu) maka kidekah kita (kam) nggeluh la kita (kam) lupa perbahanen Dibata man banta (ndu). Turikenlah dingen ajarkenlah e man anak-anakta (ndu), ras man kempu-kempunta (ndu), gelah turah i bas ia biak nggeluh si mehuli. Tuan Rumah Bujur Tuhan sebab itamakenNdu kami itengah-tengah sangkep
geluh kami si erkeleng ate man kami.
L Emaka mari dage sikataken bujur man Tuhan, nandangi teman nggeluh, kade-kade ras kiniersadan si enggo isikapkenNa man banta. Perukuren ras perbahanen Tuhan me si erbahan geluh ta mehuli. Tuhan lah jadi usihen kegeluhen ta.
L Sipuji Tuhanta alu ras kita rende ibas : KEE GBKP NO: 191 : 1, 4
1. I ban kelengNdu e, i ban liasNdu e, la ’ku bene. Aku idilo Kam, bas lias ateNdu, Kusurga e. 4. Tergejap me tuhu, penegu-neguNdu, senang aku.
Mejuah-juah me, ras isi jabu pe, liasNdu nge.
6. Kinilangasupen Manusia Nggeluh I Bas Perukuren Dibata
L Menaken kin Dibata nepa Adam ras Hawa, sura-suraNa enggo ikatakenNa niNa "Ertuahlah kam jadi nterem, demi dingen taluken doni enda, kuasai kerina nurung, perik-perik i awang-awang, bage pe kerina rubia-rubia i daraten”. I bas enggo iberekenNa tuah man banta dingen ipasu-pasuNa jabu nta alu mereken kerina keperlun geluhta, enggo nge kita nggeluh i bas perukuren Dibata e sentudu ras si ikatakenNa e ?
(Paksa Teneng)
L I bas bagin orat geluhta, pegancih kap cibal ta kerina. Kimaun kita selaku sukut, banci ka selaku Kalimbubu bage pe jadi Anak Beru. Enggo nge ndia sibabai jabu nta guna muat bagin ibas keriahen ukur guna kiniulin kegeluhen sangkep geluh ta e ?
PEKAN PENATALAYANEN GBKP TAHUN 2017 33 L O turang ras senina, selaku sekalak si erkiniteken man Tuhan, enggo
nge sicidahken biak-biak anak Tuhan e itengah-tengah kegeluhenta si teridah arah pengerana, perbahanen ras perukurenta si mehuli erpalasken Kata Dibata nandangi kerina isi jabu ras sangkep geluhta ? Mari siakuken salah lepakta man Dibata, alu ngendeken : KEE GBKP No. 417:1, 2
1. Kam Yesus Tuhanku, palas kegeluhenku. Reh aku ngadap man baNdu. Tegu lah min aku, i bas ndalani geluhku, ‘lah ula celus nahengku. Dengkehken sorangku erlebuh o Tuhan, Ngendesken pingko-pingko ngku Alemi min salah lepakku o Tuhan, ‘lah atan bas kiniulin.
2. Kam Yesus Tuhanku, sampati min geluhku, alemi Tuhan dosangku La kap lit terligen i bas adep-adepenNdu, kerina salah lepakku. Dengkehken sorangku erlebuh o Tuhan, ngendesken pingko-pingkongku Alemi min salah lepakku o Tuhan, ‘lah atan bas kiniulin.
7. Berita Pengalemi Dosa : - Perp. Tedis
L Tuhan e perkuah dingen perkeleng kap, la pedas IA merawa. IA dem alu keleng ate si tetap. Labo kita ibuangkenNa i bas keterbatasen ras dosanta. Emaka, selaku persuruhen Dibata aku nehken kataNa man banta (ndu) kerina si ngakuken dosa ras kesalahenna, dingen jera i bas dosa ras kesalahenta (ndu) nari, niNa :
“Tapi icidahken Dibata perkuah ateNa man bangsaNa, ialemiNa dosa-dosana, janah la ikernepkenNa, la ipulahiNa nembehNa”. (Masmur 78:38).
Sipuji Tuhan erkiteken dosanta enggo ialemiNa, alu ngendeken : KEE GBKP NO. 423 : 1, 2
1. Kam nebusi aku Tuhan, Kam si mpeteneng tendingku. Tendi si ndube tertaban, TeguNdu ku adepenNdu Malem kal ateku Bapa, Ban keleng ateNdu Kupuji gelarNdu Bapa, Mulia gelarNdu.
TeguNdu lah aku Tuhan, I bas pusuhku Kam ringan PetetapNdu aku Tuhan, ’Lah dosa talu me kuban 2. Kam ngalemi aku Tuhan, Kam si mpepalem pusuhku
Pusuh si megati nogan, Mbaru perbahan kelengNdu Malem kal ateku Bapa, Ban keleng ateNdu
Kupuji gelarNdu Bapa, Mulia gelarNdu.
TeguNdu lah aku Tuhan, i bas pusuhku Kam ringan PetetapNdu aku Tuhan, ’lah dosa talu me kuban
PEKAN PENATALAYANEN GBKP TAHUN 2017 34
8. Kata Dibata : -Perp. Kundul-
a. Ngoge Kata Dibata Bagin Si Pemena : Kejadin 19 : 12 – 22
L Ketuahen kalak si megiken Kata Dibata, dingen si makekenca i bas geluhna si teptep wari, Haleluya.
P Haleluya... Haleluya... Haleluya... (Iendeken) b. Renungen : Masmur 128 : 1 – 6 (Ibenai ras idungi alu pertoton)
Invocatio : Nina TUHAN man Nuah, "Bengketlah kam ras kerina keluargandu ku bas kapal e. Sada kam nari ngenca i bas doni enda erbahan si mehuli Kuakap. (Kejadin 7:1)
O g e n : Kejadin 19 : 12 – 22 Renungen : Masmur 128 : 1 – 6
T e m a : “Aron Dibata si Muat Bagin I bas Jabu ras Sangkep Nggeluh” Perkembangen Agama Kristen ibas abad pemena (“jemaat
mula-mula”) terjadi arah Perpulungen Jabu-Jabu (Perkumpulan Rumah Tangga).
Paksa sie langa bo lit gedung gereja dingen kalak Kristen pulung i bas rumah-rumah ngawan ni perpulungen Tuhan. Perpulungen e igelari pe
“Jemaat di rumah” ntah pe “Perpulungen i rumah” (bdk. Roma 16:5; 1
Korinti 16:19; Kolose 4:15 ras Pilemon 1:2). Perpulungen e igelari pe perpulungen si ertoto ras erlajar erkiteken lit empat hal si utama ilakokenna ibas ia pulung. Sipemena, sisampat-sampaten. Sipeduaken, radu ras erlajar kerna kai sini iajarken rasul paksa sie. Sipeteluken, radu ras ertoto. Dingen sipeempatken, man ras-ras. Kerina si pulung ije radu ras muat bagin rikutken gegeh ras kengasupen si lit ibas ia ibas palas keriahen ukur ras keleng ate Tuhan.
Sipulung ibas perpulungen e, eme si mada jabu – kuh kerina isi jabu ije : bapa, nande, anak-anak, juak-juak (adi lit) – bage pe jiran tetangga rikut pe ras sangkep geluhna (“sanak saudaranya”). Tapi, si jadi intina kal eme simada jabu (tuan rumah) eme orangtua ras anak-anakna. Ibas sie, orangtua me jadi guru nandangi anak-anakna guna ngajarken kegeluhen ibas kekelengen erpalasken kerina perbahanen Tuhan Jesus si enggo inanamina pe. Orangtua me si pemenana ngajarken kerna Kata Dibata e man anak-anakna labo gereja sabab paksa sie gereja iertiken eme
persadan kalak si tek. Langa bo lit gedungna, langa bo lit katekisasi (erlajar
ngawan) na. Sendalanen pe ras sini ikataken R.A. Kartini ibas buku Habis
Gelap Terbitlah Terang : “Pendidikan di Indonesia haruslah dimulai dengan pendidikan dari orangtua” emaka orangtua me si ngajarken isi jabu e
kerna kebenaren Kata Dibata. Carana eme arah pengerana, perukuren ras
