Gladhen Basa Jawa : Sesorah/ Pidato
Ayo bebarengan nyemak tuladha teks pidhato ngisor iki!
Assalamualaikum Wr. Wb.
Bapak-bapak, Ibu-ibu warga dhusun Sukamaju ingkang dahat kinurmatan, para kanca anggota Karang Taruna ingkang kula tresnani.
Puji syukur kita aturaken dhumateng Gusti Allah ingkang Maha Agung, jalaran kita tansah pinaringan rahmad, taufik, saha hidayahipun saengga kita saged pepanggihan ing kawontenan sehat walafiat lan rahayu wilujeng.
Bapak-bapak, Ibu-ibu, para kanca Karang Taruna ingkang kinurmat, bombong raosing manah kula dene ing adicara rapat koordinasi kangge nyiapaken kegiatan pameran Usaha Kecil Menengah (UKM) menika panjenengan saged rawuh sedaya. Mugi mugi menapa ingkang kita rancang sesarengan mlampah kanthi lancar.
Bapak-bapak, Ibu-ibu saha para kanca anggota Karang Taruna, ancas tujuan pepanggihan menika kangge ngrancang adicara pameran. Mangga sesarengan kita ngrancang jadwalipun.
Lajeng prodhuk unggulan menapa ingkang badhe dipunpameraken. Ingkang baku prodhuk
unggulan kedah ingkang dados ciri khas dhusun Sukamaju mriki. Mangga sabibaripun kula matur, kita ngempal manut seksi-seksi ingkang sampun kasusun. Minangka ketua panitia kula gadhah pangajab adicara ing enjing menika ngasilaken keputusan ingkang sae.
Bapak-bapak, Ibu-ibu lan para kanca anggota Karang Taruna ingkang kinurmat, mbokbilih cekap semanten anggen kula matur, menawi wonten tetembungan utawi solah tingkah ingkang kirang mranani kula nyuwun agunging samodra pangaksami.
Wassalamualaikum Wr. Wb.
Kanggo mangerteni isine teks pidhato ing dhuwur, wangsulana pitakon-pitakon ngisor iki!
1. Sapa sing pidhato manut teks ing dhuwur?
...
2. Pidhato kasebut ing adicara apa?
...
3. Sapa wae sing diundang ing adicara kasebut?
...
4. Apa ancas lan tujuan ing tetemonan kasebut?
...
5. Apa isine pidhato ing dhuwur?
...
Tugas Proyek :
1. Gawea cengkorongan pidhato kanthi tema bebas!
2. Adhedhasar cengkorongan mau, gawea teks pidhato!
3. Kumpulna wayah pasinaonan tatap muka ing sekolah.
