107 年全國語文競賽客家語朗讀文章高中學生組（南四縣腔）
編號 01 號
【打窯仔】
劉玉蕉原作打早，就聽著阿婆交代阿姆，去市場斫兜豬肉、買兜萋魚歸來，
「欸，奇怪！有麼人做生日係無？」問過阿婆正知，係滿姑愛轉妹 家，怪毋得阿婆恁歡喜！探著滿姑歸來个時間，𠊎走去莊頭阿惜姨 个雜貨店等，𠊎頭望望仔緊探。姑丈个車仔毋曾駛兼，𠊎就走出去 擛手吔，姑丈車仔一頓恬𠊎就跋上車，滿姑㖸等講：「屎朏毋曾坐 燒，就愛下車吔，恁大神氣！」知佢歡喜，𠊎尖入車肚就同姑表姐 妹大聲搞起來。
滿姑帶个戇想蓋餳人，每一個人都有一份以外，車仔後斗還有 一大布袋个番薯仔，阿婆講：「番薯仔恁多仰結煞，無就來打窯仔 好吔，屋背田項个泥，上禮拜正犁過，應該乜燥吔，𠊎等來打窯仔，
愛無？」「好哦！登真喔！」聽著有好搞，𠊎等黏時就應好。
起窯吔喲，阿爸扐三矻大泥團做門，窯身就尋像厥拳頭恁大个 泥矻仔來結，疊高吔還過愛慢慢縮口，幾下到，結到半爛燦就屙下 來，「唉，老刀嫲毋利吔，無恁好搣囉！」臨尾還勞攪姑丈𢯭手，
正順順仔結好。窯仔一起好，阿哥就發號命令吔，佢喊𠊎同姑表姊 妹去撿樵杈，阿姊負責起火、架樵，大阿姊蓋倚勢仔得，火畀掌到
猛猛猛，紅紅个火尾對泥矻縫項鑽出來，像愛食核人樣仔，害𠊎等 閃啊遠遠遠，無幾久，泥矻親像甜柿仔紅啾啾吔！
「好勢吔喲，樵莫過架吔，火退出來，做得擳番薯入去吔！」
阿婆恁仔講。
火炭掊開來，番薯就一粒一粒擳入窯仔裡肚。「哇！」表阿哥 个擔竿一𢫦下去，紅紅个泥矻跈等屙下來，堵好弇在番薯項，「建 設難，破壞容易」，細人仔輪等𢫦泥矻，每一個都搣啊歸頭歸面，
臨尾還係姑丈來收尾，佢同幼泥掖啊頂項，用砂耙再頓畀踏1，頂項 再插一支青，恁仔一息煙都無出吔，正喊𠊎等去搞。真無簡單結䟘 來个窯仔，這下看起來就像一個番薯壟呢！
庰人尋毋曾搞罅，遠遠就鼻著香味吔，影著阿姆在該開窯，𠊎 等遽遽圍過去看佢變奇術，阿姆驚怕番薯畀挖綿，細心細意在該定 定仔挖，緩緩仔掊，香氣餳啊𠊎等口涎溚溚跌，肚屎乜嘰哩咕嚕緊 抗議。田脣項，𠊎等比比坐，香香个番薯塞歸嘴，天恁清，番薯恁 香，在屋背个田項，𠊎等搞啊斷烏正歸屋。
1 頓畀踏：音 dun biˋ teb；踩踏使之緊密。
107 年全國語文競賽客家語朗讀文章高中學生組（南四縣腔）
編號 02 號
【味道】
李夢花原作有一種味道，毋係用舌嫲嚐得出，係用心肝正感受得著；有一 種味道，毋係嚐過就記入心，係隨時就會揬著心肝頭个，毋會添放 核。
阿姆日日㧡水畜豬仔，愛顧一家大細食著，歸日舂頭磕額，菜 味刻耐仔攞飯攪，這苦丟丟仔个日仔，到細人仔日見日大吔後正轉 甜，這係阿姆个味道。
阿爸每日滿身大汗，為了家庭疲爬極蹶2煞猛做事，底衫仔總係 溚溼。記得還細時節有一擺發燒，阿爸揹等3𠊎去看醫生，頭那凴等 阿爸賁賁闊闊个背囊，有一種燒暖个幸福、鼻著該鹹渧渧个汗水 味，係𠊎熟事个阿爸个味道。
𠊎个味道係仰仔个呢？青春年華个記憶，有期待、乜做得發夢 个時光，反叛个年紀，除核讀書，心肝肚該粒少女个心，總係期待 學校該個緣投个細倈仔同學，做得偎近分享𠊎个心情故事。就像毋 曾翕熟个青柿仔樣，浹浹又澀澀仔。酸澀跈等成長，火炕刀削到尾 轉甘，這係𠊎酸柑茶樣个戀愛味道。
2 疲爬極蹶：音 piˇ paˇ kid kiad；忙碌又疲憊。
3 揹等：音 bi denˋ；背著。
還有一種安到人情味，在客家莊一哪仔都有，這片張伯姆喊：
入來坐！該片阿火伯喊：來泡茶！這杯釅茶个溫度，分客家莊个青 草有味、日頭有味，連空氣都帶有和挼同醹醹个4熱心，還有人情味，
這係𠊎出外打拚最想念个情感。都市人情薄如紙，就算歇兩對門就 毋相識，每一個人就像帶一層保護色，相互之間毋敢交陪忒深，故 所歸莊下正尋得轉簡單个安然自在。
幸福係麼个味呢？無閒洎杈5个人，做得轉擺一下鼻花香；耕田 个人，做得收成歸間穀倉；做爺哀个人，做得看著一家大細康健平 安；單身哥仔望結婚，做得食著姐仔个飯菜香。每一個人感受著幸 福甜甘味進前，會受著苦澀澀个艱難，係畏苦，毋去打拚，就毋會 有成功个日仔，當然乜毋會有歡喜个味緒，嫩筍乜愛經過雨涿日炙 正會變老竹。
人生情感个酸、甜、苦、辣、鹹、澀，你嚐過幾多種？鼻公酸 軟、生活苦、目汁鹹，下把仔還有兜仔辣，這轉甜个過程係毋係過 有搭碓？有時節你會試著跼到敨氣毋出，愛想著：頭前有烏影，背 後就有日頭箭等。俗話講：「有情食水甜。」換一個想法、換種心 情來感受，全部都會係甜液液仔个味道。
4 醹醹个：音 neuˇ neuˇ ge；濃濃的。
5 無閒洎杈：音 moˇ hanˇ qi ca；非常忙碌。
107 年全國語文競賽客家語朗讀文章高中學生組（南四縣腔）
編號 03 號
【阿婆个菜園】
羅瑞霞原作吾婆歇在竹東入去个五指山裡背，在該山林壁壢角个半山排，
該係𠊎最好去个所在，也係𠊎最想念个地方。
還細該下，係堵著尞日，阿爸就會駛車仔，載阿姆還有𠊎三姊 妹，行過彎彎斡斡个山路，跋過一個大崎，車仔停啊半山排鄰舍个 禾埕。阿爸牽𠊎同老妹，阿姆揇老弟，再過慢慢仔行一截石碫仔，
在一間伙房屋个大門前停下來，禾埕肚晒鹹菜个阿婆看著𠊎等一家 人歸來，笑咪咪仔行過來開大門，嘴項緊念，「恁早呢！」這間紅 磚屋，係阿公同阿婆歇个所在，也係阿爸个胞衣跡。
見擺到尞日，阿婆知𠊎等會歸去看佢，早早就買便蓋多食个東 西，放在冰箱肚，準備分𠊎恁多姊妹食。下把仔係講阿爸有事情停 跎6，過慢歸到，阿婆就會開始心望望仔，遠遠就看著佢个頭那探啊 探仔7，係看著𠊎等腳一伸出車門，隨開容笑面，嘴緊念講︰「仰恁 慢呢?」正式係阿婆惜孫仔，一息都毋會差。
阿婆在河壩脣有一坵菜園，該係𠊎恁多姊妹最好去个所在。菜 園裡肚種蓋多菜，春天時，阿婆會帶𠊎恁多姊妹去菜園摘菜，還會
6 停跎：音 tinˇ toˇ；擔擱。
7 探啊探仔：音 damˊ a damˊ eˊ；伸出頭張望。
教𠊎等認菜，這係蕹菜、該吊菜色吊等个係吊菜仔、還有該青青有 竻个係竻瓜，講啊核隨手摘下來，衫袖捽捽啊就拿分𠊎食，講︰「這 瓜仔無射藥仔，食吔會過康健。」下把仔會跍下來，在菜廂脣挷草、
捉菜蟲。記得第一擺教𠊎等認識麼个係菜蟲，阿婆手伸入菜葉肚，
捉一尾青色軟軟還緊停動个菜蟲，老弟看啊著該蠕蠕動8又 緊趖个 東西，嚇到面呷青9，大聲盡噭，阿婆看著嗄哈哈大㖸講︰「戇孫仔！
這係菜蟲，無麼个好驚个啦！仰會恁無膽呢？」
菜園脣口，有一大坵閒田，阿婆知𠊎好食甘蔗，就在閒田項種 幾下行甘蔗，冬下時甘蔗好食吔，阿婆乜會帶等𠊎去甘蔗園，喊𠊎 坐在菜園个田脣，佢自家拿刀仔去剁甘蔗，順續將頭尾削核，再過 剁一截一截仔，拿分𠊎囓，哇！還甜喔！阿婆看著𠊎食著恁滿足，
面項笑咪咪仔問講︰「好食無？有甜無？」該下𠊎淨顧食，緊頷頭，
阿婆看著乜盡歡喜！
時間過啊蓋遽，十過年過去吔！𠊎等大吔，阿婆乜轉唐山賣鴨 卵去吔！毋過，想著阿婆个菜園，這下毋知變啊仰仔。心肝肚總係 掛吊等，舊年，𠊎喊阿姆載𠊎歸去山肚看該間細細時節，長透歸去 尞个伙房屋，還挑工行去河壩脣看菜園。毋過，行到河壩脣，看著 該頭擺个菜園跡，草生到比人還過高，唉！阿婆無在，菜園乜荒核 吔！
8 蠕蠕動：音 nugˋ nugˋ tungˊ；不停的鑽動。
9 面呷青：音 mien gab qiangˊ；臉色鐵青。
107 年全國語文競賽客家語朗讀文章高中學生組（南四縣腔）
編號 04 號
【椰仔樹】
李得福原作老屋家个禾埕脣，種幾下頭椰仔樹，生啊三層樓屋恁高，阿公 用鉛線網圍等椰仔園，不准𠊎等入去尞，驚怕椰仔葉，無就細椰仔 跌下來，會㧻著10細人仔个頭那。每下晝日頭轉影吔，椰仔葉將西 曬个日光遮等，放尞日𠊎等會兜楯頭仔11，坐在禾埕尾个涼跡項聽 阿公講古，講頭擺仔發大水崩河頭12，大水打對早仔角莊來，沉死13 盡多人，家家戶戶都庰在茅屋頂高；有兜人跋上椰仔樹頂高庰，椰 仔樹又乜救著蓋多分大水打到浮浮胖胖14个老百姓。記得，高天天 个椰仔樹，樹影下無愁無慮个臨暗，有阿公講都講毋核个傳仔。
樹頂椰仔打到滿樹時，阿爸會請隔壁莊个阿順牯來摘，看佢將 大索䌈在腰仔項，手爬腳箭像猴仔跋樹一樣，三兩下就跋上椰仔樹 頂，將一桍一桍重鈂鈂仔个椰仔用索仔溜下來。阿爸在樹下𢯭手解 索仔，續手將粒把椰仔扐起來搖搖啊，係有水聲會瀝瀝落落15響，
10 㧻著：音 dug doˋ；被掉下的東西重擊。
11 楯頭仔：音 dunˋ teuˇ eˋ；沒有椅背的凳子。
12 崩河頭：音 benˊ hoˇ teuˇ；河岸崩塌河水淹沒。
13 沉死：音 ciim xiˋ；淹死。
14 浮浮胖胖：音 peuˇ peuˇ pang pang；在水上漂浮流動。
15 瀝瀝落落：音 li li log log；起起落落的聲響。
這粒椰仔定著壞核吔，裡背个椰仔水會臭臭食毋得。過大粒个椰仔 較老氣，水毋多賣無人愛只好留來自家食。靚个一斤賣十過个銀，
繳𠊎等細人仔个學費盡足。在五、六十年代該下，農家人係過煞猛 兜仔，畜兩隻豬嫲來養豬子16賣，抑係種幾頭椰仔樹，就做得繳子 弟讀大學。
暗晡頭食飽夜，阿爸會將大大粒个椰仔洗淨放在砧枋項，用菜 刀將硬硬又賁个椰仔殼，一刀一刀定定仔削核，裡背有一粒圓圓个 內殼，再細義个用刀尾挑開肚臍瓣，椰仔水就噴出來吔，再將內殼 倒汫17放在水勺畀跌水，無一久鮮甜个椰仔水就歸勺嫲，屋家人老 嫩大細一儕一杯退心火。伸个內殼用菜刀剖開來，有一層白色个椰 仔瓤，用調羹仔挖來食，甜甜蓋像食果凍一樣。聽講老椰殼乜係做 弦仔个材料。
摘椰仔个日仔，食飽夜後在禾埕尞涼，細人仔儕儕都扐等有瓤 个半析椰仔，用扁調羹仔挖瓤食，阿婆乜輒常在禾埕尾唱山歌，幼 秀又丟18个歌聲毋會輸電視項个歌星。還細食椰仔瓤聽阿婆唱山歌 个日仔，蓋像昨晡日。
愐起，高溜高溜个椰仔樹，越分𠊎懷念，懷念該椰影下阿公阿 婆个身影，同𠊎心肝肚有椰仔味个童年。
16 養豬子：音 iongˊ zuˊ ziiˋ；生小豬。
17 倒汫：音 do jiang；倒立讓汁液流出。
18 丟：音 diu ；音域高。
107 年全國語文競賽客家語朗讀文章高中學生組（南四縣腔）
編號 05 號
【掌牛驚魂】
廖聖涵原作人類个好朋友就係狗仔，𠊎相信蓋多人輒常聽著，抑係看著同 狗仔有關个真實故事；毋過除了狗仔以外，人類个好朋友就係牛 仔。頭擺臺灣係農業社會，莊下人大部分係耕作，因為科技無發達，
下下都愛靠人力，故所每家每戶畜牛仔係蓋平常个事情；大概犁 田、拖車、載穀、載菜、載禾稈這兜過重个事頭，全愛靠牛仔來完 成，人同牛仔就像兄弟姐妹共樣，乜係屋下个一分子。
有時讀書个時節，放學歸來屋下就愛𢯭做事，事頭實在蓋多，
像日頭落山个時節，愛將日時頭放出去絡食个雞鴨鵝仔尋歸來，還 愛看雞仔、鴨仔、鵝仔有食飽無？若係無食飽，愛用拈轉來个禾串 分雞仔食，鴨仔鵝仔愛用冇穀19，牛拖牛車載番薯歸來，愛煮一大 桶个番薯葉加糠仔20，牛仔一下仔就食淨淨；乜還愛煠豬菜分豬仔 食；大嫂在灶下無閒煮飯，𠊎等做細人仔个、嘛無好閒，𢯭擇菜、
洗菜、㧡水、燒火……。食飯食飽後就在大禾埕尞涼，該下無冷氣 嘛無電扇，都係用葵扇撥啊撥仔來撥涼。
19 冇穀：音 pang gugˋ；穀粒空虛不精實。
20 糠仔：音 hongˊ eˋ；糙米碾出的皮層。
莊下个所在蚊仔、烏蠅、黃蚻歸壁角，日時頭烏蠅一哪仔都係，
暗晡頭換蚊仔來鬥熱鬧，就算行路，蚊仔、烏蠅乜跈啊頭那頂，圓 身邊脣，就像狗仔跈路共樣；還過蚊仔乜在禾埕尾同該隻牛仔吵到 頭拂21腳跳，仰仔綯都綯毋核，大哥喊𠊎拿火把去牛欄將蚊仔衝衝22 啊，毋過蚊仔無衝著嗄將牛仔个毛燒淨淨，實在還衰唷！
牛仔一年透天都蓋無閒，一直到過年前个隻把月仔正有好轉擺
23，記得有一年个寒假，𠊎屋下該隻牛仔在牛欄肚忒多日吔，阿姆 喊𠊎將牛仔牽去食草行行啊，牛仔看著𠊎盡歡喜頭那緊晃緊拂，𠊎 等屋下後背有一條細條路，路脣个草仔浸青，牛仔緊食草𠊎緊唱 歌，心情輕鬆又快樂，正歡喜著一下仔，突然間看著，牛嫲食草个 頭那緊拂，目珠金金緊看𠊎，就像會將𠊎食核一樣，𠊎著驚一下，
牛索一放啊核，拚命牯起腳盡走，牛仔乜跈啊後背走來，人講：「牛 走直、蛇走彎。」𠊎跳過一條差毋多 2 米闊个大水圳，牛仔乜無認 輸，咻一下就跳過去，同別人田肚个番薯、番豆蹬核蓋闊，臨尾該 隻無乖个牛仔，分𠊎二阿哥修理啊真悿，這下想起來還蓋驚。
21 頭拂：音 teuˇ fin；頭甩動
22 衝衝：音 cung cung；用濃煙驅趕。
23 轉擺：音 zonˋ baiˋ；休息一下。
107 年全國語文競賽客家語朗讀文章高中學生組（南四縣腔）
編號 06 號
【阿姆个菜園角】
彭瑞珠原作阿姆个菜園角，有一頭葉仔花24。該葉仔花，原本單淨係一細 截个樹枝仔，分人細心細意个插在菜園角。佢像種佢个人共樣恁 牛，毋驚熱天發風搓、毋驚天公做大水，佢做佢緊生緊高、緊大緊 靚。到佢有半頭恁高个時節，阿姆就去倒幾支仔硬程个桂竹，插啊 厥脣口分佢递25。佢緊递緊暢、緊递緊高，递到同屋簷恁高，不時 開到滿樹桃紅色个花。
探得著屋簷个花，還毋甘願，像係自家會尋路樣仔，又續等递，
递到二樓阿姆間房个窗仔面前，還知毋好遮著阿姆个窗仔，日日在 窗仔下同日頭共下，喊阿姆䟘床。阿姆看等該頭靚花，就算日頭忒 早喊佢䟘床吔，乜毋會譴。阿姆總係笑咪咪仔看等該頭花，毋知係 看佢仰恁會大，抑係看樹頂有恁多个鳥仔在該吵事，盡趣妙。
不時，阿姆還會兜一張矮凳仔在樹下坐。轉熱个時節，葉仔花 煞猛递藤，屋簷鳥在樹頂做竇，打早就一樹嘰嘰啾啾，比好呷个𠊎
24 葉仔花：音 iab eˋ faˊ；九重葛。
25 递：音 taiˊ；蔓延。
還過嘰啦26！暑假尞核，𠊎做𠊎上臺北讀書，佢做佢起勢開花，阿 姆有時在樹下个日頭縫仔臥頭看花，有時會行去菜園个另外一頭，
遠遠仔看該一樹个花。
一樹个花，寒天乜緊開。有時節，天時寒、日頭放尞、烏雲賁 賁，又落起雨來，過靚个花乜活跳毋起來，過靚个色水乜看毋清楚，
阿姆就會心焦。一放學，就會接著阿姆个電話「外背做寒吔，你自 家在外地有著燒來無？毋好凍著吔！烏天暗地時，毋好走上走下，
𠊎蓋愁喔！恁暗个天，連在屋側角都看毋真該葉仔花啊！」
該葉仔花，種在阿姆个菜園角，係𠊎上臺北讀書个前一年，阿 姆喊𠊎去森雄叔屋下，同佢討來个樹枝種起來个花。國中生个𠊎像 牛樣仔，同泥挖到深深、撳到踏踏27，葉仔花走毋得，毋會橫，在 菜園角項乖乖仔大。𠊎哪知，該花係愛代去外地讀書个𠊎，同阿姆 共下做伴个？好得，該花乜知愛日日乖乖仔大、年年開到靚靚，代 𠊎安慰阿姆該恁多年愁慮个心情。
26 嘰啦：音 gia la；聲音亮又多話。
27 撳到踏踏：音 kim do teb teb；壓得非常緊實。
107 年全國語文競賽客家語朗讀文章高中學生組（南四縣腔）
編號 07 號
【遮仔】
張美容原作無聊个落雨天，一個人無落無著，企在門口看等路項擎等遮仔 上上下下个人，有半行半走緊拚拚仔个，也有定定仔行享受雨中散 步个；有一儕人擎等遮仔孤栖、孤栖个，也有兩儕扳等肩頭共下抵 一支遮仔个，𠊎心肝肚想：「一遮一世界，遮仔底下一定庰等盡多 故事。」
看等門角企等像一條瓜仔个遮仔，撐開來，就係𠊎心肝肚个一 蕊花。還細時節，在街路項看著一支紅色間等28青花个細遮仔，愛 到會死，起先阿姆嫌忒細支抵雨毋著毋肯買，毋過看𠊎目汁含等，
最尾還係買分𠊎。這支遮仔變𠊎个寶貝，一落雨，𠊎就著起紅色个 水靴筒、擎等紅遮仔，這家行、該家尞，風神唉唉仔29。好天時，
遮仔乜無好閒，毋係拿來搞家啦飯仔，就係擎等來跳舞，該遮仔花
到蓋遽喔，遮仔下个細阿妹仔㖸到合嘴毋揫。啊！快樂、純真个 童年！讀小學，見放學堵著落雨時，阿姆就會送遮仔來學校，順續仔 帶𠊎歸去，歸路仔兩子哀叨叨嘀嘀30，阿姆下到仔緊叮囑：「水窟毋
28 間等：音 gam denˋ；摻雜。
29 風神唉唉仔：音 fungˊ siinˇ ngai ngai eˋ；很神氣的樣子。
30 叨叨嘀嘀：音 doˇ doˇ didˋ didˋ；說個不停的樣子。
好蹬著吔、濫濫31个所在愛閃開、遮仔愛看風向正毋會綻核32。」遮 仔外背風合雨，遮仔裡背有阿姆滿滿个愛！到過大兜仔在都市讀 書，阿姆一看啊著天時變吔就愛𠊎帶遮仔去，𠊎最驚帶一支遮仔背 尾又出大日頭，分人看著就像毋識出去个山精大戇共樣。再過講，
該下个年紀小說看多吔，總試著涿等雨毛仔行在路項，係蓋羅曼蒂 克个事情，故所不時會為著愛帶遮仔，抑係毋帶遮仔同阿姆齬齬齖 齖33，唉！毋識人好个少年！
緣分實在係奇妙个東西，大吔就會堵著一個人，甘願自家涿 溼，乜愛同你擎遮仔抵雨；甘願自家光頭落杓，乜愛同你擎遮仔抵 日頭，陪你行過坎坎坷坷个人生，毋管外背雨有幾大、日頭有幾烈 仔，遮仔肚總係燒暖、安全个。當然，𠊎心肝肚還有一支最重要个 遮仔，雖然看毋著也摸毋著，毋過，佢總係在𠊎堵著大風大浪、失 志無助个時節，同𠊎揞密密34、抵塞塞35，保護到好好，該就係爺哀 同𠊎撐起來个愛个大遮仔，在這支遮仔下，𠊎無愁無慮、安然自在 長大！
熱天時个遮仔頂，有白雪雪仔个桐花在該跳舞，落雨天就有滴 滴涿涿个雨水在該唱歌仔，擎等遮仔行在路項个人，一定同𠊎共 樣，毋知有幾多故事在遮仔下演出！
31 濫濫：音 lam lam；泥濘不堪。
32 綻核：音 can hed；如花蕾般反向撐開。
33 齬齬齖齖：音 ngi ngi ngia ngia；吵架。
34 揞密密：音 emˊ med med；遮蔽得無縫隙的樣子。
35 抵塞塞：音 daiˋ sadˋ sadˋ；遮得很緊密。
107 年全國語文競賽客家語朗讀文章高中學生組（南四縣腔）
編號 08 號
【檳榔樹】
謝惠如原作還細該下，屋下田坵仔有種檳榔樹，對田頭到田尾一行一行種 到筆直，行同行之間有留蔭、排水个水壢。橫行又乜一頭一頭挷直 線種，看起來嶄然靚。阿爸講行同行个闊度種一丈闊，做事行路過 方便，種菁仔樹退行時，每一頭个距離就種八尺闊，橫直闊度愛種 罅擺來，另日樹仔大吔，葉仔同葉仔正毋會相唚36，割檳榔菁个割 篙鐮37正過吔得。
每年五月份到九月份，爺哀五更早就䟘床去菁園割菁仔，農家 人打早做事過涼爽，晝吔日頭過烈，眼珠看天頂个檳榔菁會晟眼38。 隔壁个叔公不時都會㖸講：「恁早出去做事愛同鬼仔搶食咩？」割 下來一弓一弓个菁仔，用細貨車載歸來簷頭下放。暗晡頭食核夜，
爺哀會坐在火光下剪菁仔，一粒一粒對菁弓項剪下來，天光日再載 去行口賣，阿姆講畜子女个飯餐錢，倈仔妹仔个學書銀，全部靠檳 榔菁賣个錢來打所費。
放暑假个時節，阿哥同𠊎愛𢯭手剪菁仔，老妹過細毋會使剪仔
36 相唚：音 xiongˊ jimˊ；原為嘴對嘴相吻，此指互相碰觸之意。
37 割篙鐮：音 godˋ goˊ liamˇ；用玻纖維做成有伸縮性的長竿，上綁細薄鋒利如彎月形 的鐮刀。
38 晟眼：音 cangˇ ngianˋ；刺眼。
驚剪著手，故所負責摘菁絲，摘一朝晨正摘著一細面盆，阿姆會褒 講：「阿妹妹恁壁哦!」每年到七、八月仔，學生仔放暑假吔，菁仔 乜堵好大出，阿姆愛𢯭手割，使兩支割篙鐮正趕事，𠊎等細人仔愛 去菁園仔𢯭擐菁仔，一弓一弓放上貨車項。從細𠊎等就係在田坵仔 勞動中大个。
阿爸同割篙鐮一節一節挷到 8 想高39，大概有四丈零長，割菁 仔時菁篙仔搖來搖去，蓋像拿等大水筆，向等天頂寫無字天書；下 把仔又像在綠色畫布項畫符誥，阿爸使个通天筆，每一畫都會通天 透地。四歲个老妹著靴筒、蒙洋巾、戴帽仔，坐在工寮前个藤椅凳 項，蓋像細大人在指揮𠊎等做事，有時會問：「阿爸，你仰無煮檳 榔分𠊎傍飯？」阿爸應講：「檳榔毋係菜，無人煮來傍飯个。」老 妹講：「嘎你做得同菁仔像葡萄共樣，洗來分𠊎食看啊好食無？」
阿爸㖸到蓋大聲講：「做事聽著妹仔屎講話就毋會𤸁吔！」
自民國 68 年賽洛瑪風搓後，菁仔大䟘價，比種其他个農作物 過好，賣過多錢，故所，農民大量種檳榔樹，田坵仔無人愛蒔禾仔 吔。六堆个農民三十零年來，好得有種檳榔樹，生活過啊毋會差。
39 8 想高：音 badˋ xiongˋ goˊ；八節長的高度，一節約 5 尺半。
107 年全國語文競賽客家語朗讀文章高中學生組（南四縣腔）
編號 09 號
【菜瓜】
徐姿華原作記得，阿婆好種菜，佢喊阿爸在屋面前搭瓜棚來種菜瓜，菜瓜 蓋會打，不時自家食毋去，還使得送分鄰舍，該兜鄰舍蓋愛食阿婆 種个菜瓜，又萋又甘甜。
每年正月半進前，阿婆就會同自家點个菜瓜秧種啊瓜棚下，佢 日日用心照顧，幼幼个菜瓜秧，盡遽抽高、递藤，阿婆每日都會去 巡菜瓜棚，驚怕正在該递藤个嫩芽，會分風吹㪐40核，佢會細心細 意同瓜藤牽歸瓜棚下，用索仔略略仔固定在豆隸41項，分佢好順利 递上去，兩、三禮拜後，菜瓜藤就递到棚頂吔。
五、六月仔，菜瓜蓋會開花、蓋會打，行在路項遠遠都看得著 屋面前該歸棚淰黃个菜瓜花，阿婆知𠊎等細孲仔圖豺42，當晝睡䟘 來，佢會去菜瓜棚摘十過蕊公个菜瓜花，略略仔洗淨再搵攪好个麵 粉卵落鑊烰43，烰一下仔嫩嫩个菜瓜花就虬44起來，烰啊金黃金黃，
香香酥酥个味緒餳到會害人液口涎水，阿婆用碗裝分𠊎這兜，𠊎等 細孲仔暢到麼个樣仔，共快捧等碗就走去簷脣下坐等食，該燒燒、
酥酥還過甜香、甜香个味緒，𠊎到今還記得。
40 㪐：音 lodˋ；脫落。
41 豆隸：音 teu li；支撐藤蔓類的細直長的竹枝。
42 圖豺：音 tuˇ saiˊ；貪吃。
43 落鑊烰：音 log vog peuˇ；下油鍋炸。
44 虬：音 kiuˇ；蜷曲。
煮菜瓜，阿姆一等壁，佢有時會用薑嫲菣香，有時換用七層插 來調味，不管仰仔煮，該菜瓜湯就係恁好食，燒燒食蓋甜、蓋好食，
冷冷食來攪燒飯還過登真，因為係自家種个菜瓜，阿姆就毋驚人 食，做一下用兩條菜瓜煮一碗公湯，該菜瓜湯真係菜瓜个湯，無加 半息水，正會恁清甜、恁好食。
阿婆盡做家，有時節菜瓜庰在葉仔下無巡著，兩日無摘過老 吔，阿婆會同佢留等，留來做種抑係留來做菜瓜布，等到這枋留下 來个老菜瓜，皮變黃黃赤赤吔，阿婆就會割下來，同菜瓜皮剝核，
拿去水壢脣抑係圳溝脣，緊拌45緊洗，將菜瓜皮、菜瓜肉同菜瓜仁 做一下拌拌洗淨，伸著白淨白淨、黃臘黃臘个菜瓜布，再過同菜瓜 布拿去晒燥，就變做洗碗同鑪豬皮46蓋好用个菜瓜布吔！
八月半吔，菜瓜打過少吔，阿婆同阿姆會同菜瓜藤割核，菜瓜 藤一割核，阿姆就會共快用盎仔來承菜瓜水，莫看該菜瓜藤恁大 棚，正式會出菜瓜水个係菜瓜藤生在地泥下个頭，該菜瓜藤過壯 个，正承得著幾下罐菜瓜水，這菜瓜水係該個年代盡好个保養品，
老老嫩嫩个細妹仔人聚概蓋好用菜瓜水來搽面，聽講搽吔菜瓜水面 會過白、過幼呢！
這菜瓜，雖然毋係麼个難得个植物，毋過因為佢一身都係寶，
對花、果到藤，一概有厥个用途，正會人人都愛佢；𠊎等乜毋好看 輕自家，愛學習菜瓜个精神，發揮自家个能力，自然就會有人欣賞 𠊎等啦！
45 緊拌緊洗：音 ginˋ panˊ ginˋ seˋ；邊摔打邊洗。
46 鑪豬皮：音 lu zuˊ piˇ；此處指「洗身」，洗澡。
107 年全國語文競賽客家語朗讀文章高中學生組（南四縣腔）
編號 10 號
【身影】
徐貴榮原作年正過啊核，春雨落無停，冷咻咻仔！看等加兩日就愛開學上 臺北，屋下還無半息錢，毋知愛仰結煞正好？愐無計吔！無奈何，
阿爸講來去同阿明伯先撥兜仔看啊！
阿明伯係車頭个副站長，月月有月給，兼開礱米間，又輒輒貌 炭仔請人燒，吾爸就係長透分佢請去燒炭个工人。該日朝晨，打早 七點零，雨正落啊過，天還濛濛，歸路仔濕溚溚仔，熟熟个路，哪 有麼个心情去欣賞雨後个景致。阿爸同𠊎背等皮箱仔行頭前，𠊎擐 等包袱仔跈在後背，衫袋肚袋無兩尖錢。
去到阿明伯屋下，阿明伯親暱暱仔行等出來，阿爸講：「吾倈 仔愛上臺北讀書，先撥五百個銀分𠊎好無？等好天𠊎正做還你，分 你堵數47！」五百個銀，對這下來講，買毋著麼个，一日个菜錢就 毋只，毋過在四十年前，係一般人半隻零月个工錢。
「有麼个問題！上臺北淨五百個銀仰會罅擺？」阿爸毋敢借恁 多，等阿明伯問核，回講「罅啦！罅啦！吾倈仔讀公費學校。」阿 爸對阿明伯手項接著五百個銀个時節，頷頭又頷頭，承蒙又承蒙，
47 堵數：音 duˇ sii；抵帳。
緊講加兩日仔，係好天就會跈等上工做事。𠊎心肚仔想：怕係阿明 伯看著阿爸一生人忠實耿直，做人做事毋識梟心；又怕係看𠊎馴良 乖巧，正恁「阿莎力48」，實在還感心哪！
𠊎接過該五百個銀，𠊎知，阿明伯个大恩大德，做毋得添放核，
共快同阿明伯講多謝。阿明伯送𠊎兩子爺到門口，阿爸又同佢講加 一擺「多謝！」頷加一下頭。該五百個銀，車票買核三十六個半，
就伸著四百零銀定定，愛用一學期呢！行到月臺，阿爸同𠊎講：「車 錢蓋貴，毋好恁輒歸來，學期結束正歸好吔！」
天色濛濛，車頭西片个山紅花49開吔！探頭看阿爸，恁寒个落 雨天，赤腳嫲踏50，戴等笠嫲，著等舊衫，頭犁犁仔、慢慢仔行下 月臺，𨃰過51鐵枝路，一步一步順等「均工52」，行上䃗崁，歸屋下 个身影，到今都還記得；阿爸个話，還在耳公頭，「車錢恁貴，毋 好恁輒歸哦！」窮苦人个無奈呀！又想著該下仔同阿明伯撥錢時，
頷頭多謝个情景，求人無簡單啊！
火車開行吔！初中正畢業个𠊎，想著麼个呢？開始留戀起故鄉 來，目汁含等，蓋多个理想，跈等火車載到臺北。
48 阿莎力：音 aˊ sa liˋ；日語，乾脆。
49 山紅花：音 sanˊ fungˇ faˊ；山杜鵑、野杜鵑。
50 赤腳嫲踏：音 cagˋ giogˋ maˊ dab；打赤腳。
51 𨃰過：音 kiam go；跨過。
52 均工：音 giunˊ gungˊ；當地話把「枕木」稱為「均工」。
