Beta minta dangke banya lai dari Yesus Kristus, Tuhan yang katong somba. Beta minta dangke tagal Antua kasi kuat beta biar beta karja

Paulus pung Surat Partama par Timotius

12   Beta minta dangke banya lai dari Yesus Kristus, Tuhan yang katong somba. Beta minta dangke tagal Antua kasi kuat beta biar beta karja

par Antua deng parcaya beta par biking akang. 13Dolo-dolo beta hojat Antua. Beta jua siksa deng biking jahat par orang-orang yang parcaya Antua. Mar Tuhan kasi unju Antua pung hati bae par beta sampe Antua seng hukum beta. Barang, waktu itu beta balong parcaya Yesus deng beta seng tau apa yang beta biking. 14Mala Antua, Tuhan yang katong somba, su kasi berkat basar batambong-tambong par beta. Yesus Kristus yang biking sampe beta bisa parcaya Antua deng sayang orang laeng tagal beta su hidop satu hati deng Antua.

15Kata-kata yang katong dengar kalo Yesus Kristus datang ka dunya par kasi salamat orang-orang yang bardosa, itu memang batul. Jadi, sapa sa musti parcaya akang. La dari samua orang yang bardosa tu, beta ni, orang yang paleng bardosa. 16 Mar Yesus Kristus kasi unju Antua pung hati bae par beta biar orang-orang bisa lia kalo Antua paleng sabar deng beta, orang yang paleng bardosa ni. Akang jadi conto par samua orang yang nanti mau parcaya Antua la hidop tarus-tarus deng Antua.

c 2:1 Kamong di sini ni, Timotius deng orang-orang parcaya.

17 Mari katong samua taru hormat deng puji-puji Allah tarus-tarus. Antua tu, Raja yang pung kuasa dari dolo sampe tarus-tarus. Antua hidop tarus-tarus. Antua seng parna mati.

Seng ada orang yang bisa lia Antua.

Cuma Antua tu Allah. Seng ada yang laeng. Amin.

18Timotius, beta pung ana. Apa yang beta bilang par ale tu, akang iko pasang yang Allah pung Roh parna kasi tau soal ale pung karja par Antua pung juru-juru bicara. Beta kasi inga ale soal pasang tu biar ale lawang orang-orang yang kasi balajar apa yang seng batul. Lawang dong macang deng tantara lawang dia pung musu. 19Ale musti tarus parcaya Yesus Kristus deng biking apapa yang ale tau tu batul. Ada orang-orang yang su bale balakang dari apa yang dong tau itu batul sampe dong seng parcaya Yesus Kristus lai, 20 macang Himeneus deng Aleksander. Beta su kasi pisa dong dua dari basudara yang parcaya Yesus macang beta kasi dong par setang pung bos. Beta biking bagitu biar dong dua tu tobat la jang bicara yang tar batul-batul soal Allah lai.

Jamaat pung sombayang

2

1 Timotius, partama to, beta minta sunggu-sunggu biar kamong c angka hati par Tuhan, sombayang par samua orang, deng minta dangke banya-banya dari Allah par samua yang Antua su biking. 2 Beta minta kamong sombayang par raja-raja deng pamimping-pamimping biar katong samua hidop tanang, dame, iko Tuhan pung mau, deng pung kalakuang bae sampe orang taru hormat par kamong. 3Sombayang macang bagitu, akang bae par katong manusia deng biking Allah pung hati sanang. Allah tu yang Kasi Salamat Katong Manusia. 4Antua mau samua orang salamat deng tau soal Antua pung ajarang yang batul. 5 Allah tu cuma satu deng cuma ada satu orang yang jadi jambatang par Allah deng manusia. Orang tu Yesus Kristus. Yesus Kristus tu batul-batul manusia. 6 Yesus su kasi Antua pung diri mati di kayo salib par tabus samua orang dari dong pung dosa-dosa. Deng cara bagitu, di waktu yang Antua su ator, Allah kasi unju bukti par orang-orang kalo Antua mau kasi salamat samua orang. 7 Mar beta ni, Antua angka par jadi Antua pung utusang. Antua angka beta par pi kasi tau Antua pung ajarang yang batul deng kasi balajar akang par orang-orang yang bukang Yahudi biar dong tu parcaya. Apa yang beta bilang ni batul. Beta seng karang-karang.

d 2:15 Kalimat ini pung arti bukang cuma parampuang yang barana sa yang bisa salamat la yang seng barana seng bisa salamat. Ada orang yang pintar soal Alkitab yang bilang kalo ayat ni pung arti, Tuhan nanti tolong parampuang yang barana biar seng mati. Ada laeng lai yang bilang kalo Allah nanti kasi salamat samua orang tagal parampuang satu yang barana. Parampuang tu Maria.

Nasehat par laki-laki deng parampuang

8 Timotius e, beta minta samua laki-laki yang ada di mana sa kalo dong sombayang, dong musti sombayang deng hati yang barsi. Jang simpang mara deng jang bakalai deng orang laeng.

9Bagitu lai deng parampuang-parampuang. Dong musti bapake bae-bae, pantas, deng biasa-biasa sa. Jang biking rambu deng sagala macang model. Jang talalu bastel deng mas, mutiara, ka pakiang yang mahal-mahal. 10 Mala parampuang-parampuang tu musti biking apa sa yang bae, tagal itu tu pantas par parampuang-parampuang yang bilang kalo dong tu somba Antua. 11 Kalo ada orang yang kasi balajar ajarang soal Allah, parampuang-parampuang tu musti tado. Dong musti taru hormat deng dengar-dengarang par orang yang kasi balajar tu. 12 Beta larang parampuang-parampuang kasi balajar deng parenta laki-laki. Parampuang-parampuang tu musti tado. 13 Barang, Allah biking Adam kamuka baru Antua biking Hawa. 14Adam seng dapa tipu. Mar Hawa yang dapa tipu dari setang pung bos sampe seng iko Allah pung parenta. 15 Biar kata bagitu, Allah nanti kasi salamat parampuang-parampuang tagal dong barana. d Antua kasi salamat dong asal dong tarus parcaya Antua, sayang orang laeng, seng biking dosa, deng bawa diri bae-bae.

Atorang-atorang par jadi penatua

3

1 Ada kata-kata yang bilang bagini, ”Sapa yang batul-batul mau karja jadi penatua, dia pung mau tu paleng bae paskali.” Kata-kata tu memang batul. 2 Jadi, sapa yang mau jadi penatua, dia musti pung hidop batul biar orang seng bisa bilang kalo dia ada biking apapa yang sala. Dia pung bini musti satu sa deng dia seng maeng serong. Dia musti pikirang tajang sampe tau bawa diri bae-bae, pung kalakuang bae sampe orang taru hormat par dia, suka tarima sapa sa di dia pung ruma, deng pintar kasi balajar orang. 3Dia jua bukang pamabo deng tangang seng haringang par pukul orang. Mar dia tu musti pung hati bae deng orang, suka hidop dame deng sapa sa, deng seng mata kepeng. 4Dia musti tau ator dia pung ruma tangga, deng tau ajar dia pung anana biar dong taru

e 3:11 Dalang bahasa Yunani kata ni bisa pung arti ‘parampuang-parampuang yang jadi diaken’.

hormat deng dengar-dengarang par dia. 5 Barang, sapa sa yang seng tau ator dia pung ruma tangga sandiri, bagemana dia bisa ator Allah pung jamaat? 6 Waktu angka orang-orang yang mau jadi penatua, jang angka orang yang baru parcaya Yesus. Barang, dia nanti bisa sombong la Tuhan hukum dia macang deng Antua hukum setang pung bos. 7 Orang yang mau jadi penatua tu musti hidop manis-manis biar orang-orang yang balong parcaya Yesus jua taru hormat par dia. Dia musti hidop bagitu, kalo seng orang-orang nanti bicara yang tar bae-tar bae soal dia la setang pung bos buju dia par biking dosa.

Atorang-atorang par jadi diaken

8Timotius, waktu mau angka orang par jadi diaken, akang pung atorang-atorang macang lai deng penatua. Atorang-atorang-atorang tu bagini. Dia musti pung kalakuang bae sampe orang-orang taru hormat par dia. Dia seng suka bicara parlente-parlente. Dia bukang pamabo deng seng parlente orang par dapa kepeng. 9Dia tu musti tarus parcaya Tuhan pung ajarang yang Antua su kasi tau par katong deng biking apa yang dia tau tu batul. 10Waktu mau angka orang-orang par jadi diaken, kamong musti lia bae-bae kalo orang tu pung hidop batul ka seng. Kalo orang tu pung hidop batul, baru kamong angka dia par jadi diaken.

11 Bagitu lai deng dong pung bini-bini. e Bini-bini tu musti pung kalakuang bae sampe orang-orang taru hormat par dong. Dong musti seng suka carita orang pung busu. Dong jua musti tau bawa diri deng orang-orang bisa parcaya dong dalang apa sa.

12 Orang yang mau jadi diaken tu, dia pung bini musti satu sa deng dia seng maeng serong. Dia musti tau ator dia pung ruma tangga bae-bae. 13 Diaken yang biking dia pung karja bae-bae, orang-orang nanti taru hormat par dia deng dia jua labe barani bicara par orang-orang soal bagemana dia parcaya Yesus Kristus.

Dasar dari katong pung parcaya

14-15Timotius e, beta harap seng lama lai beta bisa pi mangente ale. Mar beta taku kalo beta ni sadiki lama baru datang. Jadi, beta ada tulis nasehat-nasehat ni par ale. Beta tulis akang biar ale tau soal bagemana orang-orang parcaya musti hidop dalang Allah pung famili. Katong

f 3:16 Dalang bahasa Yunani kata ‘Antua’.

g 4:6 Beta di sini ni, Paulus.

orang-orang parcaya ni, Allah yang hidop pung jamaat. Katong musti pegang kuat-kuat Allah pung ajarang yang batul deng jaga ajarang tu biar orang seng bisa roba akang. 16 Seng ada yang bisa malawang kalo ajarang soal Yesus tu, akang bagus paskali. Ajarang tu dolo katong seng tau akang. Mar sakarang ni Allah su kasi tau akang par katong. Ajarang tu bilang bagini,

”Yesus Kristus f datang ka dunya jadi manusia.

Tuhan pung Roh su kasi unju kalo Yesus tu batul-batul Allah pung Ana.

Malekat-malekat su lia Antua.

Orang-orang su kasi tau kabar soal Antua sampe ka ujung dunya. La orang-orang di dunya parcaya Antua.

Antua tarangka ka sorga la Allah pung sinar paleng tarang manyala koliling Antua.”

Jaga diri bae-bae dari ajarang-ajarang yang seng batul

4

1 Timotius, Tuhan pung Roh bilang tarang-tarang kalo nanti waktu Yesus mau bale kombali, ada orang-orang yang su seng parcaya Tuhan lai. Mala dong iko orang-orang yang ajar setang-setang pung ajarang yang seng batul. 2Orang-orang yang ajar tu pung mulu parlente putar bale. Dong su seng tau lai apa yang sala deng apa yang batul. 3 Dong larang orang-orang jang kaweng deng jang makang makanang pamali. Padahal Allah biking samua makanang biar orang-orang yang parcaya Yesus deng yang su tau soal Antua pung ajarang yang batul tarima akang deng minta dangke par Antua. 4 Barang samua yang Antua biking, akang bae. Seng ada yang pamali asal katong tarima makanang tu deng minta dangke dolo baru makang. 5 Samua makanang tu bae tagal Allah pung ajarang su bilang kalo apa yang Antua biking tu bae. Akang jua bae tagal katong sombayang dolo, baru makang.

Yesus Kristus pung orang karja yang bae

6Timotius e, kasi balajar samua yang beta g su tulis ni par basudara dong yang iko Yesus. Kalo ale biking akang, ale nanti jadi Yesus Kristus pung orang karja yang bae. Ale jua nanti labe hari labe tamba kuat tagal ale tarus parcaya Allah pung kata-kata deng ajarang yang batul yang ale su

iko akang. 7 Mar jang pastiu deng carita-carita parlente dolo-dolo deng carita-carita yang seng maso-maso akal yang cuma biking orang seng parcaya Allah. Labe bae ale lati ale pung diri biar ale tarus iko Allah pung mau. Lati akang macang deng orang yang rajing lari pagi biar dia pung badang kuat. 8 Kalo katong rajing lati katong pung badang, akang memang bagus par katong pung badang. Mar akang pung guna cuma waktu katong ada di dunya ni sa. Mar kalo katong rajing lati katong pung diri biar tarus iko Allah pung mau, akang pung guna banya par katong. Barang, Allah su janji kalo akang pung guna bukang cuma di dunya ni sa, mar tarus-tarus sampe di sorga lai.

9 Apa yang beta bilang ni batul. Jadi, sapa sa musti tarima deng parcaya akang bae-bae. 10Tagal itu, katong musti karja karas deng usaha sunggu-sunggu par biking akang. Barang, katong taru harap par Allah yang hidop. Antua tu yang Kasi Salamat samua Manusia. Antua kasi salamat orang-orang yang parcaya Yesus Kristus.

11Timotius, kasi balajar samua ini par jamaat deng suru dong musti