Ogen : Heber 13:4
Tema : “Ergaken Perjabun”
Tujun : Gelah Mamre Setia Ibas Perjabunna IV. Pengantar
Penelitian sekalak mahasiswa pasca sarjana Psikologi kerna dampak ekonomi terhadap terjadinya perselingkuhen alu sampel masyarakat semi kota dan kota, idatkenna sada kesimpulen maka : Dilaki selingkuh umumna idukung oleh punya uang/ er-sen. Tapi, diberu selingkuh cenderung ipengaruhi butuh/ingin dapat uang. Ertina saling membutuhken merupaken salah sada penyebab perselingkuhen. Mungkin Lit perpayona walau pe tentu labo enda saja penyebabna. Mbue denga. Sipenting, kai nge ndia siban jadi gegehta gelah ula kita ndabuh kubas praktek perselingkuhen si mengundang ukumen Dibata man banta? Mari erlajar kita arah Kata Dibata enda.
IV. Tafsiren
Heber 13:4 isi eme nasehat kerna kegeluhen Kristiani ntah pe idealna kegeluhen kalak Kristen. Salah sada sijadi bahasenta sendah eme kerna Ngergaken Perjabun (ayat 4). Ertina, tuntuten ayat enda eme : hubungen perjabun harus iergai secara umum. Lit 2 hal situasi simelatarbelakangi pentingna kalak Kristen ngergai perjabun ibas konteks zamanna e. Pemena, lit ‘pertapa’ si la ngergaken perjabun alu la erjabu, bahken lit simengibiri dirina guna menjamin kai siianggabna ‘kebadiaan’ dirina. Sipeduaken, Lit ka sebagian kalak si ndabuh kubas perbahanen amoral alu perjinahen/ perselingkuhen ras ngelakoken pebahanen sijahat, si la wajar ilakoken kalak Kristen. Secara khusus, sipeduaken enda me siman bahasenta.
Menurud penulis kitab Heber enda, kehadirenta (kekristenen) i doni enda, harus mpetandaken sada gagasen simbaru kerna kebadian perjabun, eme : tiap pribadi-pribadi Kristen arus ngasup ngasup ngkuasai dirina sendiri ras ngelumbaken kiniulin ibas kegeluhen perjabunna. Alu sie me kalak Kristen ibas zaman e ngasup ngergaken perjabunna ras ncidahken kebadiaan dirina man doni enda seh maka kalak sideban la njumpai lit kesalahen ibas dirina. Ibas dampar sideban,penulis kitab heber mpersingeti gelah kebadiaan perjabun e iperjuangken kalak Kristen ibas zaman e alu kesadaren kerna pedah Dibata si ngukum kalak sierlagu la mehuli ras erlua-lua (selingkuh). Alu pedah e, kalak Kristen iarapken
128
patuh man Dibata. Sebalikna, harus pe ipahami secara kiniteken maka ‘akar’ perselingkuhen e rehna arah kinilapatuhen man Dibata, labo erkiteken memang kita “sehat/ normal” si ngalami erbage-bage godaan ibas diberu nari, situasi simendukung, fasilitas si lit, rsd.
Dibata pe rusur ngandingken hubungenNa ras manusia ibas bentuk perjabun (ndehara ras perbulangen). Gambaren enda nampati kita guna ngangkai maka bagi bangsa Tuhan ‘selingkuh’ alu nembah dibata-dibata sideban sebage bentuk kinilaptuhenna man Dibata, bage me pe kalak Kristen, harus menyadari maka kinilasetianta man ndeharanta situhuna eme gambaren kinilasetiannta man Dibata simpersada kita/ simereken ndeharanta e man banta.
IV. Pengkenaina
Ibas sada PA Mamre, pernah lit pernyataan sekalak Mamre, nina : “Ula kita erbual, kerina kita pasti pernah selingkuh, mungkin porsina saja siberbeda. Mungkin sebagin kita ibas tahap PDKT alu si sms/ BBM-men, sebagin nggo pernah jumpa, rusur jumpa walau pe lit teman sideban tambahna, sebagin nggo pernah ntah rusur erdalan dua-dua, nonton, belanja, rsd. Deba nggo ras pe medem bahken lit kang nggo erjabu la resmi ras banci jadi nggo lit pe anakna je…..”
Mengamati pernyataan temannta enda, mungkin banci kita menduga maka praktek perselingkuhen lanai sada hal sitabu/ mehangke ntah nggo semal itengah-tengah masyarakat, banci jadi ikut pe ije anggota Mamre. Semoga dugaan enda Salah! Lepas soal benar ntah salah, kita banci ndatken pelajaren simeherga maka dunia perselingkuhen kepe banci jadi semakin subur. Tentu sienda ncidahken tanda-tanda krisis iman ntah pe kurangna kepatuhen nandangi Tuhan. Itengah-tengan tantangen zaman simabai kita harus bersaing enda erbahanca kita semakin menjadi egois, oppurtunis, hedonis, rsd. Dampakna, tentu kontrol masyarakat nandangi praktek perselingkuhen pe semakin menipis sebab kerina terfokus kubas dahin/ kepentingenna. Tambah ka tegnologi simempermudah komunikasi ikut mendukung praktek perselingkuhen enda. Melala kel faktor simemungkinken perselingkuhen e terjadi. Simbelinna eme faktor komunikasi keluarga si kurang mehuli sierbahanca hubungen keluarga lanai harmonis. Dampakna, ndehara ras perbulangen kehilangan kai siibutuhkenna ibas pasangenna e nari. Janah adi lit lawan jenisna sibanci memenuhi kebutuhenna eme ‘kran’ simemungkinken turahna ‘rasa nyaman/ senasib rassa’ sikemudian jadi awal perselingkuhen terjadi. Ras mbue kalak memanfaatken ‘kebutuhen/ kehausen’ (baik jasmani bagepe rohani) guna menaklukken lawan jenisna (strategi playboy/ playgirl). Eme pentingna kita njagai komunikasi simehuli ibas jabunta. Ibas dampar sideban, perlu kel sipahami bentuk kebutuhen pasangenta/ ndeharanta si berbeda ras
kebutuhenta secara psikis. Sekalak penulis erbahan judul bukuna : “Man are from Mars and Women are from Venus”. Isi buku enda nggambarken maka bagi perdauhna jarak planet Mars ku Venus, bageme dauhna perbedaan kebutuhen dilaki ras diberu. Ibas jabu, siibutuhken dilaki ibas ndeharana nari eme “Penghargaan,” ertina tetap iperiksana/ ituntutna maka ia merasa dirina meherga arah perlakuan ndeharana; Tapi siibutuhken ndehara ibas perbulangenna nari eme “rasa cinta” simencakup perhatian, pengertian, romantic, rst. Emaka ibas segi sienda, kunci keharmonisen keluarga eme, masing-masing harus berjuang mengenal dan memenuhi kebutuhan psikis pasangenna e.
Melala denga faktor-faktor penyebab terjadinya perselingkuhen, CLBK (cinta lama bersemi kembali) misalna, Tapi sipentingna tentuna adi ateta la ndabuh kubas perselingkuhen eme memastiken/ menjamin kepatuhenta man Dibata. Ertina, bicara kurang gia siakap kita iergai ndeharanta, sekali pe lit sennta/ fasilitasta, lit ka godaan ras kesempaten pe mendukung, rsd kepatuhenta man Dibata e njagai kita guna ngkuasai dirinta ras ngelumbaken kiniulin simpedauh kita ibas perselingkuhen. Tetap pe siinget maka harus siergaken perjabun e alu kebadiaan ras kesetian, sebab Dibata ngukum kalak si la ngergaken perjabunna. IV. Diskusi
Studi Kasus
A sekalak Mamre cakap-cakap ras piga-piga temanna sada sektor. Nina :”Maka aku kisat reh ku Pjj, mbiar aku lanai kita kari siangkan sapih-sapih Mamre. Adi akulah sindeheri ndehara kena banci nge itolakna aku. Tapi adi ndehara kena kari ersura-sura ndeher ras aku lanai kari terkuasaiku diriku…” ‘Megi pernyataanna e, piga-piga Mamre ndai ngerana alu sora megang : “Ganteng kel akapmu bam!” ; “La padah ko reh ku pjj adi ena nge isina ‘utuk takal’ mu ena!”, rsd.
3. Sue ras bahan PAnta sendah, Kai nge akapndu sihilang/ sisalah ibas perukuren Mamre A enda?
3. Uga ka tanggapenndu kerna reaksi Mamre sideban e?
3. Uga nge idealna sikap si bijaksana Mamre sipatuh man Tuhan sincidahken maka ia tuhu-tuhu ngergaken perjabunna?
Ende-enden : KEE No. 200: 1,2; PEE No. 63 : 1-3; KEE No. 62:1;PEE No. 124 :2
Pdt. Mestika Nusantara Ginting, STh, M.Psi 081375139574
130
BIMBINGEN PA MAMRE GBKP TAHUN 2015
TANGGAL 08 - 14 NOPEMBER 2015 Kede kopi/Ngkawil Tema : “Makeken waktu alu mehuli”
Ogen : Epesus 5:15 - 17 Tujun :
- Mamre ngasup makeken waktu alu maksimal guna kiniulinna
- Mamre ngasup mbagi waktu alu seimbang erdahin, ersantai, ersembah rikutken si ngena ate Dibata
I. Pepatah Tionghoa kuno ngataken "satu inci waktu sama dengan satu inci emas nilainnya tetapi satu inci emas tidak bisa menggantikan satu inci waktu" pepatah enda nuriken kerna pentingna waktu si seh kel ergana. Ibas PA-nta sekali enda kita ngerana kerna “Makeken Waktu Alu Mehuli”. Ibas kinata kegeluhen, lit memang kalak si enggo pentar makeken waktu, lit ka pe silenga pentar makeken waktu ras lit ka pe si enggo over dosis ibas makeken waktu. Masyarakat ibas kota – kota besar New York, London, Jepang, rsd, umumna enggo pentar makeken waktu ija waktu tuhu – tuhu i ergai, emaka setiap waktu si lit i pergunaken tuhu – tuhu guna hal si erguna. Lit ka pe si makeken waktu over dosis, adi ibas masyarakat i Indonesia teridah e ibas menjamurna istilah 24 Jam, umpamana : Rumah makan 24 Jam, Tempel Ban 24 Jam, Rumah Sakit 24 Jam ntah kedepan enda pe mungkin lit ka pagi gereja si buka 24 Jam, alu alasen enggo jadi sada kebutuhen i tengah – tengah kemajun zaman. Ibas sisi sideban maka lit ka si la makeken/mpergunaken waktu alu mehuli, santai – santai saja seh maka melala waktu si terbuang guna hal – hal si la erguna.
II. Tekanen Paulus ibas pengajarenna nandangi kalak Efesus ibas paksa sie eme gelah kegeluhen kalak kristen arus tetap ibas panggilenna eme nggeluh ibas konsep pengajaren kekristenen simendasar alu ngusih kerina kegeluhen Kristus si lit ibas terang kata Dibata. Pengajaren si isehken Paulus enda memang erdasarken pengalamen pribadina, ija ia nggejap jadi kalak bodoh adi la makeken kesempaten nggeluh alu mehuli tupung ia ngayak – ngayak pengikut Jesus, tapi kenca ia ndatken pendilo ibas Tuhan nari, ia menyadari kebodohen ras mengalami pertobaten si erbahanca ia mencapai kualitas kegeluhen simehuli ras mpergunaken kesempaten si lit ibas geluhna guna hal – hal si mehuli, lit pe pilihen utamana eme jadi perberita si meriah.
IV. Guna banci pentar makeken waktu, perlu ipahami kerna konsep waktu ibas kegeluhen anak – anak Dibata eme :
2. Waktu eme Kegeluhen. Ertina asakai dekahna kita nggeluh eme waktuta, alu bage iarapken tuhu – tuhu kita bijaksana ibas makeken waktu terlebih ibas mpermuliaken Dibata ibas kegeluhenta. Alu bage, arus dage si ergai waktu ras memahami sifat waktu si ibereken Dibata man banta sebab kerina pagi waktu si ibereken Dibata e arus ipertanggungjawabken i lebe – lebe Dibata sang pemilik waktu.
2. Waktu eme Kesempatan. Maksudna kesempaten ibas pimpinen Tuhan gelah banci sitangkap kerina kesempaten si penting si lit ibereken Dibata dingen kalak si bodoh nge ngenca si nia-niaken kesempatan.
2. Waktu eme Cataten. Ibas waktu kerina si jadi ibas kegeluhenta i catat janah pagi kerina pagi i pertanggungjawabken man Dibata ertina waktu paksana ncatat lagu langkahta. Emaka perlu megermet alu sembarangen make waktu, perlu pentar/bijaksana.
IV. Ibas Kitab Ende – endenta No 76 : 3 syairna ”.... nggo terbuang wari – wari la ku pergunaken pe”, banci jadi ungkapen syair lagu enda melala jadi ibas kegeluhenta terlebih – lebih Mamre erkiteken enterem denga memang si idah Mamre (terlebih ibas kuta), la mpergunaken kesempaten si lit alu mehuli, la si ukuri maka kesempaten ntah waktu si lit si ibereken Dibata man banta seh kel kap ergana, mekatep kel riahen siakap koyok i kede kopi encakapken politik si la pernah erkedungen, njerleng ras ngukuri buah catur ngayak ben, engkawil la erngadi – ngadi, tunduh erkiteken malas, nonton bola seh ngayak terang janah masang taruhen, erjudi, rsd. La sisadari maka kerina e engekeriken waktu, akibatna lolo kerina dahin dingen daging pe reh tuana.
Mamre GBKP iarapken kegeluhenna erkualitas ibas kai pe, sebab ia kap bapa si man ikutenken, jadi teladan ibas jabu, emaka enggo me seh paksana rukur kita kerna hal – hal simehuli ibas kegeluhenta terlebih ibas makeken waktu alu mehuli, paksa erdahin tutus ateta erdahin, paksa kita ras keluarganta si pergunakenlah guna erbahanca kegeluhen jabunta reh harmonisna. Banci kita ercatur tapi inget waktu, banci kita engkawil tapi hanya sekedar refreshing ntah ndalanken hobby, nonton bola, rsd. Ula min erkiteken hobby enda erbahanca kita lanai semangat ibas ndahiken - dahin si arusna si dahiken. Sipenting kel si arus ilakoken Mamre eme makeken kesempaten si lit guna ersada ras Dibata alu erbahan saat teduhta, ngaturken waktu ku gereja, PJJ ras PA – PA gelah alu bage
132
kegeluhen pertendinta pe tetap reh ulina. Si enda isingetken man banta sue ras pemahamen kerna konsep waktu bagi si enggo isingetken idatas ndai, waktu eme kegeluhen, waktu eme kesempaten ras waktu eme cataten. Paulus enggo memahami ras makeken waktu e alu mehuli dingen i praktekkenna e ibas kegeluhenna guna pebelangken Berita si Meriah ras ndalani kegeluhen alu mehuli. Diskusi :
1. Turiken kuga Paulus makeken waktu ibas kegeluhenna, ope denga denga ia ndatken pendilo ibas Tuhan nari ras kenca ia ndatken pendilo ibas Tuhan nari.
1. Turiken pengalamenta, enggo me sipergunaken waktunta sedekah enda alu maksimal guna kiniulin ? turiken alasenna.
Ende – enden : PEE 23 : 2. 3; PEE 16 : 1. 2 ; KEE 76 : 3 ;KEE 181 : 1. 3 ; PEE 121 : 1. 2 Daftar Pustaka :
2. Alkitab Edisi Studi, LAI,Jakarta 2001
2. Pemahaman Alkitab Setiap Hari Efesus, William Barclay,BPK,1995. 2. Aktor – Aktor Allah, Max Lucado, BPK,2009
Pdt. Israel H. Sembiring, STh 081376375703
Tanggal 15 - 21 Nopember 2015
BIMBINGEN PA MAMRE GBKP TAHUN 2015
TANGGAL 22 – 28 NOPEMBER 2015 Tema : Pluralisme
Ogen : Juna 4:1-10
Tujun : Gelah turah jiwa pluralisme Mamre nandangi kerina jelma ise ras kuga gia ia, sebab Dibata pe keleng ateNa kerina bangsa-bangsa, ula bagi pandangen Nabi Juna
I. Penaruh
1. Siinget mulihi kerna sura-sura kalak Kristen nai-nai nari gelah doni si sada e kerinana jadi Kristen. Tapi seh asa genduari sura-sura e bagi enggo siidah sendiri labo erkernepna kalak si labo Kristen e. Genduari enda kalak di luar Kristen labo erurakna tapi erkembangna (amin pe upaya missioner Kristen ilakoken) janah kenyataanna erteremna pe kalak si labo Kristen reh ku benua eropa ija marenda Berita si Meriah reh ku Indonesia (bnd. Sehna Berita si Meriah man Kalak Karo reh i negeri Belanda nari).
2. Ngidah kinata kegeluhen kalak si labo Kristen e erteremna, banci kin tetap kita ngidah kalak si deban e sebage kalak si labo lit kebenarenna? Ijenda me si jadi permasalahen man banta. Pluralisme agama (pengangkan kerna kebenaren ras keselamaten alu erbage-bage cara, labo tunggal) e merupaken tantangen si mendesak man banta erkiteken pendekaten eksklusif (di luar agamanta la lit kebenaren) sinikembangken kalak Kristen si erupaya guna mengkristenken doni enda kerinana, labo erbahanca kalak si labo Kristen e erurakna tapi erteremna (I Asia nteremen nge kalak si labo Kristen asangken kalak Kristen. I Pilipina nge ngenca nteremen kalak Kristen asangken kalak si labo Kristen). 3. Guna ngangkai kerna kai kin pluralisme e, ibabai me kita arah keleng ate Dibata
si enggo icidahkenna man kalak Niniwe si sedekah enda, secara umum, jahat perbahanenna kerina (Juna 1:2). Keleng ate Dibata e nuduhken man banta labo si kerajangen bangsa Tuhan saja. Tapi keleng ate Tuhan e isehkenna man kerina bangsa. Ijenda me banci siidah keleng ate (keselamaten) Dibata e labo saja itujuken man bangsa tertentu tapi pe man kerina kalak.
II. Tafsiran
1. Ise kin Juna e? Juna ertina nderapati. Nderapati si ingkar janji. Sekalak nabi si nalihken perentah Tuhan. Isuruh ku Niniwe lawes ia ku Jope. Niniwe emekap ibu kota Asyur, musuh Israel si beda kinitekenna ras bangsa Tuhan. Ku Niniwe eme Juna isuruh Tuhan lako meritaken kerna kesalahan ras kejahaten si enggo ilakokenna. Emaka banci sikataken Juna sekalak nabi si labo mberitaken kerna
134
kinijeran (pertobaten) kalak Niniwe bagi nabi-nabi si deban si biasana beritaken kerna kinjeran. Tapi dahinna emekap sebatas momoken kerna pengkernepen kuta Niniwe sedekah empat puluh wari nari (3:4).
2. Persoalen si jadi emekap, Juna kecewa ras nembeh kal atena janah merawa pe ia nandangi perbahanen Tuhan si engkelengi kalak Niniwe. Perbahanen Tuhan si labo ngukum tapi engkelengi kalak Niniwe, erkiteken tangkas iidah Tuhan lit perubahen ku kempak si mehuli perbahanen kerina kalak Niniwe termasuk rajana (penguasa). Terjadi pertobaten nasional. Kerina ia ngelakoken tanda-tanda lahiriah keagamaan (puasa, make uis guni Juna 3:6-9). Sikap ras perbahanen kalak Niniwe eme erbahanca Dibata la sahun ngukum kalak Niniwe tapi ikelengiNa (iselamatkenNa). La sahun ikernepken Tuhan bagi sinimomoken nabi Juna, sue ras perentah Tuhan. Salih ukur Tuhan janah la surung iukumNa kalak Niniwe e (3:10).
3. Perbahanen Tuhan si ngekelengi (nelamatken) kalak Niniwe e, erbahanca Juna selaku nabi Tuhan bereaksi. Nembeh dingen merawa ia, kecewa nandangi perbahanen Tuhan si menganulir ukumenna nandangi kalak Niniwe. Teraloken kita nge sikap nembeh ate Juna sekalak nabi Tuhan. Ma sekalak nabi Tuhan labo banci merawa (bnd. Sekalak Pertua ntah Diaken, ia sekalak si sabar, terkuasaisa dirina … I Tim.3:2). Ma labo biak sekalak nabi Tuhan merawa ntah nembeh ate? Merawa Juna labolah ije ncidahken ke-karakter-enna sebage Juna labo sebage nabi.
4. Lit telu hal erbahanca Juna merawa. Si pemena, la iarapkenna kinijeran (pertobaten) kalak Niniwe. Sabab JUna erpengakap, labo mungkin nari kalak Niniwe e jera. Emaka paksa ia ermomomo labo lit ikatakenna gelah ngadi kalak Niniwe erbahan kejahaten. Tapi sinimomokenna emekap kerna pengkernepen kuta Niniwe si nandangi reh; sipeduaken, metersa ras gampangsa akapna Dibata mersespons kinijeran kalak Niniwe erbahanca mela akap Juna siniutus Dibata momoken pengkernepen kuta Niniwe e; peteluken, ieteh Juna Dibata e perkeleng dingen perkuah, la minter merawa, melias tetap nggit ngobah keputusenNa. Emaka igejapken Juna dirina ipaksa Dibata ku Niniwe janah mela akapna erkiteken keputusen Dibata si la ngkernepken tapi ngkelengi (nelamatken) kalak Niniwe. Emaka juna erkesimpulen: buatlah kesahku, ulin aku mate asangken nggeluh (4:3).
5. Bujur kin kam merawa Juna, nina Dibata? Alu tegas Juna ngaloi penungkunen Tuhan e. Seh kal bujurna aku merawa janah pangen aku mate perban nembehna ateku (4:9). Kai nge hak Juna maka merawa kal ia nandangi keputusen Tuhan e? Tuhu teridah kal karakter pribadina si ngerajaisa labo karakter sekalak nabi si ngerajaisa. Sabab karakter sekalak nabi emekap
terjeng nerusken sinisuruh Dibata labo mendikte keputusen Dibata. Si jelas, kekecewaan Juna erkiteken la bagi ukurna si jadi nandangi kalak Niniwe. Perukurenna, iukum nari nge kalak Niniwe e tapi keputusen Dibata lain. Ialemi Dibata anak kuta Niniwe e.
III. Pengkenaina
4. Arah turi-turin Juna enda, teridah keleng ate Dibata e labo banci ibatasi. Keleng ate Dibata seh man kerina kalak, kerina bangsa. Janah keleng ate Dibata e isehkenna perban kinidolaten Dibata si mutlak nandangi kerina tinepaNa. Dibata e emekap perkeleng (rahmani), si erbiak ngalemi asangken ncedaken (menghancurken). Emaka keleng ate Tuhan e iberekenna man kalak Niniwe. Keleng ate Tuhan e labo eksklusif (man kita ngenca) tapi isehken man kerina kalak, kerina bangsa, kerina kalak si labo kalak Kristen saja emaka sifatna universal.
4. Ngidah biak keleng ate (keselamaten) Dibata isehken man kerina kalak, sebage Mamre iajuk guna ersaksi i tengah-tengah kalak si erbage-bage kinitekenna (pluralisme). Perlu ipeturah-kembangken sikap ntah pengidahta nandangi kalak si deban si beda kinitekenna ras kita e pe termasuk nge wilayah keleng ate Dibata. Keleng ate Dibata banci teridah arah kegeluhen kalak si beda kinitekenna ras kita. Sijadi pendilo man Mamre emekap gelah Mamre ersaksi kerna keleng ate Dibata e alu ncidahken perbahanenta ngikutken sura-sura Tuhan ras nggeluh ibas kinijeran.
IV. Diskusi :
3. Engkai maka nabi Juna isuruh ku Niniwe lompat ia ku Jope?
3. Engkai maka merawa, nembeh nabi Juna nandangi keleng ate Tuhan si isehkenNa man kalak Niniwe?
3. Uga pengidah ntah pe kesaksin Mamre GBKP nandangi kalak si beda kinitekenna ras kita. Seh nge keleng ate (keselamaten) e man bana?
Ende-enden : KEE 22:1,2,3,4; KEE 25:1, 3,4 ; KEE 41: 5,7; KEE 59:1,2; KEE 56:1-3 Bahan bacaan:
3. Wesley Ariarajah, Alkitab dan Orang-orang yang Berkepercayaan lain, 3. A.A. Yewangoe, Theologia Crucis di Asia,
3. Harold Coward, Pluralisme: Tantangan Bagi Agama-agama
3. Ephenetus Tarigan, Pluralisme Agama di Indonesia: Suatu upaya Memposisikan Kehadiran
Agama Kristen di Tengah-tengah Pluralisme Agama di Indonesia, Tesis STT HKBP Pematang
Siantar
Pdt. Ephenetus Tarigan MTh, (082276710147)
136
TEAM SINIKAPKEN PA MAMRE GBKP TAHUN 2015
0. Pdt. Seth Perangin-angin, MTh (Koordinator)
0. Pdt. Albert Purba, MTh
0. Pdt. Prananta Jata Manik, STh, M.M
0. Pdt. Vicardo. Ginting, STh
0. Pdt. Dikky A. Bangun, STh
0. Pdt. Erick Jhonson Barus, DTh
0. BPP Mamre GBKP
CATATAN : ... ... ... ... ... ... ... ... ... ... ... ... ... ... ... ... ... ...