102
BIMBINGEN PA MAMRE GBKP TAHUN 2015
TANGGAL 06 - 12 SEPTEMBER 2015 Tema : Tri Tugas Panggilan Gereja (Eklesiology)
Ogen : Perbahanen Rasul-Rasul 4:32-37
Tujun : - Gelah Mamre GBKP meteh ras ngangkai dahin Gereja
- Gelah mamre ngasup ndahiken dahin persadan, kesaksin, ras pelayanen. I. Penaruh .
Kenangkihen Tuhan Jesus ku surga ras nusurna kesah si Badia, merupaken titik tolak pertumbuhen ras perkembangen gereja. Aminna gereja i Yerusalem me pemenana i gelari Ekklesia42, tapi justru i darat Yerusalem sendiri me si menjadi model Ekklesia (gereja) ku belang-belang doni enda. gereja e me gereja Antiokia, Gereja e i pajekken kalak Jahudi Helenis eme campuren kalak Jahudi ras si la Jahudi. i Anthiokia me pertama kali persadan kalak sitek man Kristus i gelari kalak Kristen (christianoi).43 E maka banci siertiken maka gereja eme persadan kalak siidilo I bas gelap nari kubas terang Kristus, ras persadan e i gelari kula Kristus (Ef. 1:22, 5:23; Kol.1:18). Adi siperdiateken perdalanen gereja selaku kula Kristus I doni enda labo berjalan alu mulus, tapi lit nge tantangen sinihadapina.44 Tapi Selaku gereja eme kula Kristus, semakin dibabat semakin merambat. Persadan kalak sitek man Kristus e iatur alu dahin gereja, eme jadi sira ras terang, ras seh paksa gundari enda gereja bertumbuh ras berkembang arah telu pendahin gereja eme: Persadan, kesaksin, ras pelayanen. Uga kita I babai meteh ras ngangkai ras ndahiken dahin e, i bas bahan PA nta sekalenda si orati me rikutken kitab perbahanen Rasul-Rasul 4:32-37.
42
Ekklesia(Yunani), eme ek ras kaleo, siertina ndilo ku darat (memanggil keluar) bandingken 1 Petrus 2:9. I bas masyarakat Yunani kuno, ekklesia eme ingan masyarakat lako ndungi persoalenna I teruh pemerintah si sibersifat demokratis (Perb. 19:39). Kata Ekklesia sendiri I pake I bas tahun 639-559 sM si I pake I Athen (Yunani) sebagai bentuk demokrasi, lima abad kenca sie Ekklesia I pake kalak Kristen sijadi gelar persadanna siertina persadaan kalak siidilo lako ersada (Ibr. 8)
43
Nen Perbahanen rasul-rasul 11:26, Ensiklopedi Alkitab Masa Kini Jilid 1 A-L,YKBK/OMF, Jakarta, 1998, hal. 333.
44
Seh abad ke-3, gereja lit I bas masa penindasen ija kegeluhen kalak Kristen i musuhi ras isiksa, terutama I teruh pemerintahen kaisar Diocletianus ras peganti-pengantina (303-311), tapi ibas tahun 312 kenca Constantinus jadi Kristen kegeluhen gereja ntahpe kalak Kristen mulai bernafas dengan lega, terlebih ibas tahun 313 I pedarat me keputusen Milan salah sada keputusen e mereken kebebasen man kalak Kristen.
II. Tafsiran
Tafsiren Singkat kerna Perbahanen Rasul-rasul 4:32-37.
Perbahanen rasul-rasul45 4:32-37 nuriken kerna kegeluhen kalak Kristen sipemena i Yerusalem.(ayat 32-35) bagepe berita kerna Barnabas (ayat 36-37). Tapi secara keseluruhen nuriken kerna kiniersadan kalak sierkiniteken (kesatuan orang yang beriman). Menurut Perbahanen rasul-rasul 2:42-47, persadan perpulungen e teridah arah, persadan si labo saja berbagi kai silit i bas ia tapi pe ersada i bas kelompok doa, memecah roti, man ras-ras bagepe ngejapken keriahen ras-ras.46I bas ayat 32, Lukas ningetken cara nggeluh kalak Kristen sipemena njabab kerna sura-sura kalak Yunani si jadi alamat utama kitab enda. perlu sigaris bawahi maka pengertin milik bersama i bas perpulungen e erpalasken kubas keriahen ukur ras sukarela labo pemaksaan atau sada kearusen. Bagi Barnabas sindayaken tanehna, ras mereken hasil taneh siidayaken e sepenuhna lako i pakeken perpulungen e.47Solidaritas e nuriken kerna tanda keleng ate Kristus nggo nusur kutengah-tengah perpulungen e (ayat 33). Lit pe si mendasari pendahin enda eme kesaksin rasul kerna kekeken Tuhan Jesus (Perb. 2:22-36,3:13-15,4:10-11), kesaksin si isertai alu tanda sengget (Perb. 2:43, 3:6, 4:30, 5:12-16). Kesaksin rasul enda i dorong arah karunia Kuasa Kesah si Badia si i bereken man kerina perpulungen e (Perb. 4:31). Sierbanca turah ukurna lako muat bagin alu mereken kai silit i bas ia guna i pakeken ras-ras.48Rasul Paulus sendiri ngerana kerna pentingna lako nampati ras mpepulung dana lako isumbangken man kalak musil i Yerusalem (Roma 15:26). Baik Lukas bagepe Paulus ngidah maka dahin berita simeriah ras nampati perpulungen alu mereken kai silit i bas ia lako i pakeken ras-ras merupaken perintah Jesus Kristus (bnd. Luk. 6:20 b, 12:33, 18:22, mat. 19:21).49
Tri Tugas Gereja I bas perpulungen sipemena jadi model i bas pendahin gereja paksa enda. Adi siidah uga peran gereja si pemena, maka teridah me kiniersadanna, kesaksinna bagepe pelayanenna. Maka kai silit i bas ia la guna kepentingenna saja tapi i pakeken guna kepentingen bersama, umpamana bagi rumah Maria, nande Markus i pake perpulungen lako ingan ertoto (Perb,. 12:12). Labo saja perpulungen e ersada tapi pe teridah kegeluhenna jadi kesaksin, hal
45
Kitab Perbahanen rasul-rasul I suratken Lukas berkisar tahun 62-64 M ras si jadi tema kitab enda eme Perb. 1:8., nen Willi Marxen, pengantar Perjanjian Baru, BPK-GM, Jakarta, 1999, hal. 202 band. John Drane, Memahami PerjanjianBaru, BPK-GM, Jakarta,1996, hal.279.
46
Martin Harun, Kamu akan menjadi saksiKu, Kanisius, Yogyakarta, 1990, hal.60.
47
Sumbangen duit sibage I perluken man perpulungen sebab perpulungen rata-rata musil, para janda ras kalak sikekurangen, tapi erkiteken litna solidaritas sad ape lalit sikekurangen.
48
D Gutherie, dkk, tafsiran alkitab masa Kini 3, YKBK/OMF, Jakarta,2012, hal.348.
49
Ulrich Beyer dan Simamora Evalina, Memberi dengan Sukacita, BPK-GM, Jakarta,2008,hal. 2-4
104
enda teridah erbuena kalak si pulung bagepe melala tanda-tanda sengget simbelin siibahan rasul-rasul.(bnd. Perb. 5:12-16). Tentu iarapken pe maka peran gereja seh paksa genduari enda arus tetap ngusih pendahin gereja sipemena, uga perpulungen sipemena i babai erkiniteken bagepe sada penggejapenna, ras kai silit i bas ia i pakeken guna kemulian Dibata tentu arus jadi pendilo man Mamre GBKP.Adi siperdiateken, kerna motto mamre Erdiate ras Erpemere tentu labo sekedar slogan saja tapi icidahken arah perbahanen sinyata. Salah sada siiprogramkem Mamre GBKP I bas ikut mpersiapken generasi gereja ras bangsa arah program beasiwa Mamre situhuna enggo mehuli, saja perlu ngenda i evaluasi tole uga kerina Mamre i libatken lako muat bagin guna jadi saluren pasu-pasu alu slogan dari kita untuk kita guna kemulian Dibata, arah bimbingen enda nggo perlu siarihken maka sipepulung mata uang terkecil ras isetorken bagepe i kelola Mamre ras e pagi i pergunaken lako nekolahken anak-nakta siberkualitas baik i bas bidang Teologia, ras bidang umum sidebanna, bagepe bicara iperluken nampati kalak si lit ibas kepiceten erkiteken pinakit, rsd.
III. Pengkenaina.
Seh kel serana adi ateta ncakapken kerna tugas gereja i bas paksa enda, erkiteken Buena pendahin sinimai ilebe-lebe gereja. Baik tugas ku bas (internal) siberkaiten kubas pertumbuhen dana,pendidiken (SDM), pemeliharan bangunen, melatih pemimpin, ras sidebnna. Bagepe tugas ku darat (eksternal) eme menjalin hubungen ras kalak sideban (oikumene), erdiakonia man kalak silemah ntah musil, er PI, menjalin perdamaian bagepe ngelakoken keadilen, rsd. Saja perlu sieteh maka tugas gereja silebih utama eme melipat gandaken gereja e terus- menerus.50 Kerina dahin i bas tri tugas gereja e saling mendukung sada ras sidebanna, em sebanna kesaksin, tanpa persadan ras pelayanen ibarat orator ntah pe kalak sibeluh erpidato, persadan tanpa kesaksin ras pelayanen eme i barat sekalak dermawan bage halna pelayanen tanpa persadan ras kesaksin ibarat gereja e mate. Arah oratenta I bas PA enda , ibabai me kita lako ngidah ras ngejapken maka kerina dahin gerejanta eme arus jadi tanggung jawabta selaku mamre. Uga kita tetap encidahken kiniersadanta, kesaksinta bagepe pelayanennta merupaken pendilo Dibata kutengah-tengahta. Mengutip pandangen Rick Warren lit 5 dimensi pertumbuhen gereja si membutuhken peran serta kita khusuna Mamre I bas inganta masing-masing, eme: gereja sibertambah akrab arah persadan, gereja bertambah kesetianna arah pengajaren (pemuridan), gereja bertambah kuat
50
Bndken. Pertambahen ajar-ajar 12 (Mark. 3:13-19), 120 (Perb. 1:15), 3000 (Perb. 2:41-47), 5000 (Perb. 4:4), 10.000 (Perb. 21:10), nen.Maitimoe, Membina Jemaat Misioner, BPK-GM, Jakarta, 1986, hal. 13.
(megegeh) arah ibadahna, gereja reh belinna arah pelayanenna ras gereja bertambah luas arah penginjilenna.51uga gelah mamre ngasup ndahiken dahin enda, mari pindo gegeh man si mada Gereja. Selamat melayani.
IV. Diskusi
4. Coba i diskusikenndu, kai nge ertina, “Kerina kalak sienggo erkiniteken e ersada ukurna dingen ersada pe penggejapenna” (ayat 32 a)? ras ugakin iidahndu penerapen kata enda itengah-tengah perpulungen Mamrenta? 4. Adi siidah gereja si pemena enggo ndalanken Tri Tugas gereja alu mehuli,
menurut kita uga nge pelaksananna i tengah-tengah mamrenta?
4. Adi siperdiateken Tritugas Gereja, persadan, kesaksin ras pelayanen, kai-kai saja nge siperlu sibuat baginnta guna kiniulin gerejanta?
Usul Ende-Enden : PEE No. 70:1,3; PEE No. 72:1-3; PEE No. 93:1,2; PEE No. 105:1-3; PEE No. 108:1,2
Daftar Pustaka.
Alkitab , Padan Si Mbaru ibas cakap Karo si genduari. Jakarta, 1987 Beyer Ulrich, Memberi Dengan Sukacita, BPK-GM, Jakarta, 2008 Drane John, Memahami Perjanjian Baru, BPK-GM, Jakarta, 1996
David Black, John Stambaugh, Dunia Sosial Ke Kristenan Mula-mula, BPK-GM, Jakarta, 1997 Douglas J.D, dkk, Ensiklopedi Alkitab Masa Kini jilid 1 A-L, YKBK/OMF, Jakarta, 1998
Guthrie, dkk, Tafsiran Alkitab Masa Kini 3 Matius-Wahyu, YKBK/OMF, 2012 Harun Martin, Kamu Akan Menjadi SaksiKu, kanisius, Yogyakarta, 1990
Jurnal Beras Piher Vol. 2, No 2, Calvin dan Calvinisme, Moderamen GBKP Kabanjahe,2004 Jurnal Beras Piher ed. 6, Vol. 8, Gereja, Negara dan Politik, Moderamen GBKP,2013 Marxsen Willi, Pengantar Perjanjian Baru, BPK-GM, Jakarta,1999
Warren Rick, The Purpose Driven Church, Gandum Mas, Malang, 2006
Pdt. Masmur Ginting STh 085297253157
51
Rick Warren, Purpose Driven Church,Gandum Mas, Malang, 2006, hal. 55
106
BIMBINGEN PA MAMRE GBKP TAHUN 2015
TANGGAL 13 - 19 SEPTEMBER 2015 (Perdamen / HAM)
Tema : Erdiate man kalak si medanggel Ogen : Jesaya 61:1-4; Masmur 130:1-8
Tujun : - Gelah Mamre ertanggung jawab nandangi kalak si medanggel kegeluhenna
- Gelah Mamre nuduhken sikapna si erdiate nandangi hak asasi setiap manusia
III. Penaruh
Manusia i bas nggeluhken geluhna i bas doni enda labo lit si pulah i bas perbeben-perbeben geluh. Saja, perbeben tep-tep kalak pelain-lain, lit si erbebe kerna perduiten (ekonomi), hubungen si la meriah ras kalak si deban (sosial), ngadi sekolah ntah la ngasup nerusken sekolah anak-anak (pendidiken), ndatken tekanan ntah jadi korban “ketidakadilan” aturen si lit (politik), pinakit si ertahun-tahun la madan (kesehaten), ras sidebanna. Arah litna perbeben-perbeben kegeluhen e erbahanca kegeluhen manusia medanggel tuhu ras dem kiniseran. Adi tetap lalit dalan pulah, lalit si nampati maka banci saja mpeturah masalah si terbelinen, eme bene pengarapenna, piahna turah ukur jahat gelah pulah i bas perbeben e nari.
Litna kegeluhen sekalak medanggel banci saja erkiteken ulih perbahanena, tapi banci saja jadi erkiteken korban ketidakadilen, penindasen, rsd. Si enda labo jadi persoalen kel, tapi si jadi persoalen eme: uga ninta? Kai si arus si lakoken tupung si gejab medanggel ntah pe tupung si idah kecibal kegeluhen kalak si deban si medanggel?
III. Tafsiran Mazmur 130 : 1-8
Mazmur enda i gelari ende-enden ziarah, megati i endeken bangsa Israel tupung nginget-nginget uga Tuhan enggo mulahi bangsa Israel i Mesir nari seh i taruhkenNa ku tanah Kanaan. Bangsa Israel nggejabken penampat Dibata i bas erbage-bage persoalen geluhna. Arah Mazmur enda mulihi i persingeti maka sirang ras Dibata medanggel naring si kerajangen manusia, guna si e maka pemazmur sedar maka mulih kempak Dibata (jera dingen robah), tetap erpengarapen man Dibata ras ndalanken kata Dibata, gelah pulah i bas kiniseran nari.
Kalak si medanggel kegeluhenna i lebuhnalah Tuhan, iakukenna dosa-dosana, sebab sadar ia maka banci saja lit kesalahan ras kelepaken si enggo ilakoken maka turah perbeben i bas geluhna. Kesalahan ras kelepakan banci saja pe ilakoken raduken ras kalak si deban emaka perlu kel pertobatan massal, kerina arus jera ras mulih kempak Dibata. Arah mulih ku Dibata ngenca dalanna maka banci pulah i bas kecibal si medanggel. Arah ngarapken penampat Dibata ngenca banci manusia pulah i bas kiniseran nari.
Yesaya 61 :1-4
Bangsa Israel enggo mulih i pembuangen Babel nari, tapi kai si idapetina? Rumah pertoton ras tembok Yerusalem enggo runtuh ras kecibal bangsa Israel tuhu-tuhu medanggel, lanai lit arapen, putus asa ras tuhu-tuhu dem kiniseran. Padahal paksa si e si i perluken e me semangat kiniersadan guna majekken Israel mulihi. I bas kecibal si bage me i gejabken Nabi Yesaya maka ia enggo i pilih Tuhan, sendalanen ras si e lit tanggung jawab si arus i dalanken e me mpekena-kena kegeluhen kalak si medanggel.
Yesaya nggit ndalanken pendilo Tuhan guna muat bagin ras kepate nandangi kiniseran si lit i tengah-tengah kegeluhen bangsa Israel. Yesaya ngaku maka Kesah Tuhan si erdolat si ngkuasai geluhna emaka kepate ia guna mpekena-kena bangsa Israel, mereken pengarapen ras semangat si mbaru. Yesaya tek, i bas ia muat bagin guna mpekena-kena bangsa Israel, si tuhuna Tuhan nge si erdahin arah ia. Tuhan enggo kepate ras mediate nandangi kecibal bangsa Israel, Yesaya jadi alat saja nge ngenca.
Arah dua bahan pengoratenta, teridah maka kalak si kecibal geluhna medanggel, erlebuhlah ku Tuhan ras i bereken Dibata kesah si Badia man banta guna atau muat bagin i bas nampati, mulahi ras mpegegehi kalak si medanggel kegeluhenna. Tuhan teridah erdahin arah kalak si nggit mpekena-kena kegeluhen kalak si lit i bas kiniseran. Keleng ate Dibata i sehkenNa arah kalak si nggit nehken kekelengen man kalak si deban.
III. Pengkenaina
Tupung Jesus reh ku rumah pertoton, tupung i ogeNa Pustaka Si Badia maka kitab Nabi Yesaya enda me si ogekenna “Kesah Tuhan lit i babongKu, sabab enggo i pilihNa Aku guna meritaken Berita Si Meriah man kalak si musil. I suruhNa Aku erberita man kalak si tertaban maka i pulahi me ia, janah kalak si pentang erpengidah me, kalak si itindas ipulahi me. Janah mpebetehken masana Tuhan mulahi bangsaNa.”(Luk. 4:18-19). Pedah Jesus pe “...Kukataken man bandu: Kai si
108
ibahanndu man sekalak si musilna i bas seninangKu enda, e me si tuhuna perbahanenndu man bangKu” (Matius 25 : 40).
Jadi Dibata tuhu-tuhu kepate nandangi kalak si medanggel kegeluhenna, emaka kita pe arus kepate nandangi kecibal kegeluhen kalak si medanggel geluhna. Labo perlu ertak-tak kerna ise siman sampaten e, tapi si penting eme mediate-kepate ras erpemere nandangi kalak si lit i bas kiniseran, alu bage terpuji gelar Dibata arah kegeluhenta.
Megati kalak ertak-tak guna nampati, banci saja nambahi dahin (ndarami page tutun) iakapna, mperhitungken untung rugi, ras sidebanna, si erbahanca kegeluhen kalak medanggel lenga pulah i bas kiniseran nari. Ngidah kecibal si bagenda rupana me maka Mamre i dilo gelah encidahken bukti nyata motto Mamre GBKP “Mamre erdiate, Mamre erpemere”. Mamre arus erdiate nandangi kecibal kegeluhen masyarakat si lit i sekelewetna, jenari mereken kai kin si banci i bereken guna nampatisa segelah pulah i bas kiniseranna nari.
III. Diskusi
2. Kai nge si jadi alasen Yesaya maka mediate, kepate ras erpemere ia nandangi kalak si lit i bas kiniseran?
2. Perdiatekenlah kecibal kegeluhen masyarakat si lit i bas sekelewetta (la erndobah ise pe). Lit nge si paksa enda medanggel sangana kecibal geluhna? Program kai banci si lakoken secara pribadi ntah secara persadan katagorial Mamre gelah kalak si medanggel e banci pulah i bas kiniseranna nari?
Usulen Ende-Enden: PEE 110:1,3; KEE. 187:1,3; PEE. 10:1,2,11; PEE. 22:1,3-5; PEE. 63:1-3 Pdt. Kalvinsius Jawak, M.Si