LITURGI NATAL KELUARGA HURIA HKBP PAMUTARAN
Minggu, 22 Desember 2024
Prolog Liturgi : Saluhut do ditompa Debata, langit, tano dohot nasa isina. Ditompa do angka suru-suruan, pahan-pahanan, dungi jolma. Saluhutna i manjadi marhite sian hapistaran dohot hagogoon ni Debata di bagasan huasoNa. Tabege ma pangantusion na sintong taringot panompaon.
Liturgi I. No 1
Mansai uli saluhut na tinompa ni Debata, angka dolok dohot rura, angka suan-suanan na rumatarata, saluhutnai patuduhon hinauli ni panompaon ni Debata, tung na so hadodoan do parbinotoanNa. Boha do ulaning i? songon dia do dibahen Debata manompa nasa na adongi? Sian dia do bahan manang alat ni Debata laho manompa saluhutna i?
Liturgi I. No.2
Ia panompaon na pinatupa ni Debata songon on do i. Ndada marhite-hite alat manang ulaula Debata manompa, ai ndada songon pande Debata manompa nasa na adong, alai lobi sian i do. Holan marhite hataNa sambing do. Molo didok Debata jadi ma ho natiur;
jadi do. Songon I do sude. Sandok molo didok Debata jadi, manjadi ma songon na nidokNa i.
Liturgi I. No.3
Ido tutu, tung halongangan do panompaon ni Debata, ai ndang sian na adong Debata manompa, alai sian naso adong do gabe adong. Ndang adong naso tarpatupa debata.
Angka dia ma na tinompaNa i?
Di mula ni mulana ditompa Debata ma langit dohot tano. Ditompa ma muse na tiur.
Digoar Debata ma natiur i arian, jala dibahen Debata ma parsirangan ni na tiur sian na holom, goar ni na holom i borngin.
Liturgi I. No. 4
Di ari panduahon ditompa Debata ma hajanghajang di parsitongaan ni angka aek, bahen parsirangan ni aek tu aek. Di ari patoluhon ditompa Debata ma tano manang darat asa tarida ma mahiang. Jala parpunguan ni angka aek digoari latu. Jadi dipatubuhon tano duhut-duhut dohot suan-suanan marparbue tudos tu mansam ma.
Liturgi I. No.5
Di ari paopathon, ditompa Debata ma panondang di hajanghajang ni langit asa disondangi tano on. Di ari palimahon, ditompa Debata ma akang dengke dohot nasa na marhosa, angka na majilir di bagasan aek, ro di nasa pidong na matonga-tonga langit na masiboan mansam na.
Liturgi I. No. 6
Di ari paonomhon, ditompa Debata ma jolma tumiru rupaNa, tudos tu pangalahoNa, baoa dohot boruboru ditompa, asa dirajai sandok tano on. Dungi di ida Debata ma sude na tinompaNa I nunga denggan situtu.
Liturgi I. No.7
Alai dung ditompa Debata nasa na adong, didok Bibel i, maradian do Ibana di ari papituhon. Songon dia do lapatan ni i? Ai naung maradian do Debata sahat tu nuaeng?
Manang ndang adong be ulaon ni Debata dung panompaon i?
Liturgi I. No.8
Ndang songon i lapatan ni i. Bege hamu asa hupatorang. Dung sun ditompa Debata nasa na adong, maradian do Ibana tutu sian nasa ulaon panompaon, alai ndang maradian Ibana sian ulaonNa, torus do Debata mangulahon angka na denggan na ringkot di ngolunta, dipasupasu do hita saluhutna. Tapuji jala tapasangap ma Debata naung manompa hita dohot na ringkot di hita jala dipasingkop do marhite pasu-pasuNa di ngolunta. Antong ta endehon ma puji-pujian ni Debata. Amen
Prolog Liturgi II : Diginjang ni roha i do marhabangsa sibolis mangelaela jolma asa lam tangkang mangalaosi Patik ni Debata panghorhon na gabe uhumon Debata ma tapaihut-ihut ma Liturgi on.
Liturgi II. No. 1
Mansai sonang jala denggan do inganan ni jolma na parjolo I dibahen Debata di porlak Eden i. Ndang adong na hurang, singkop do sude diparade Debata di jolma na tinompaNa i.
Liturgi II. No. 2
Nuaeng tabege ma mula ni dosa dohot pangonai na tu jolma na parjolo i. didok di Bibel ta, ulok do na paoto-otohon jolma i gabe dibuat jala dipangan si Hawa parbue ni haui, laos dilehon tu si Adam.
Liturgi II. No. 3
Ia parbue ni hau i, i ma parbue ni hau na diparsitongaan ni porlak i, na so boi jama on apalagi ma panganon. Didok Debata do : “unang pangan hamu sian i, jala unang jama hamu, asa unang mate hamu”. Alai tung mansai bisuk do sibolis mangelaela jolma i asa manundali Debata. Disuan hon sibolis ma roha diri tu jolma i gabe pia matana marnida, laos dipangan, gabe mardosa ma.
Liturgi II. No. 4
Alai anggo nuaeng ndang adong be songon ulok dohot parbue ni hau songaon na tarsurat i. Alai, panginona ni dosa i do di hajolmaon sahat tu tinggi on, na mambahen uhuman ni Debata. Ia gombaran ni parbue ni hau na di parsitongaan ni porlak Eden I nuaeng, I ma : hisap-hisap manang hinagiot ni pardagingon na sai tongtong mangalaosi Patik, aturan dohot Hata ni Debata.
Liturgi II. No. 5
Alai tandap do parulaon ni daging, I ma : parmainanon, hahodaron, pargandombuson, hasipelebeguon, hadatuon, parmusuon, parbadaan, pangiburuon, lessem, teal, rimas, ungut-ungut dohot angka na so tama di adopan ni Debata.
Liturgi II. No. 6
Ia si Hawa gambaran nuaeng ima : angka parompuan manang ina na so jolo marpanungkun tu si Adam, sinondukna i. Atik pe naung pinadomu ni Debata nasida jala nunga diaturhon baoa i do ulu di rumatangga, songon Kristus, Ulu ni Huria i.
Liturgi II. No. 7
Dibahen i ndang denggan molo so jolo marsisungkunan laho mambuat haputusan di rumatangga, ai i do bonsir hasesega ni keluarga. Songon I do ngolu ni marhuria, ingkon sungkunon jala niundukhon do angka aturan ni Huria hombar tu lomo ni roha ni Debata.
Liturgi II. No.8
Nang si Adam pe mardosa do, ai diloas ibana do si Hawa pulik gabe mura dihusipi angka sibolis. Sai tongtong ma marsada ni roha ama dohot ina jala rap mangula asa ndada mura dipalindak-lindak angka parjahat na laho manegai parrumatanggaon. Rap renta ma ama dohot ina dohot ianakhon na tu gareja, asa unang diunjuni sibolis i. Amen.
Prolog Liturgi III : Ragam cara dibahen sibolis si laho mangago jolmai, alai ndang dipasombu Debata na masa I sahat tu ujung na, ai Parasiroha Ibana, alani I diparbaga-baga laho paluahon jolma I sian dosa.
Liturgi III. No. 1
Anggo ninna rohanta nian pintor diuhum Debata ma jolma I saleleng ni leleng na ala nunga mardosa; alai ndang songon I sangkap ni rohaNa, alai so tardodo holong dohot asi ni rohaNa i. dilehon dope tingki parasian laho paubahon roha.
Liturgi III. No. 2
Songon sintong na mangolu Ahu, ninna jahowa; tung so lomo do rohangku mida hamatean ni parjahat, na lomo do rohangKu mida hamu mulak ni parjahat I tumadingkhon dalan na, asa mangolu ibana.
Liturgi III. No.3
Parasiroha jala pardenggan basa do Jahowa, lambat tarrimas jala parasiroha godang.
Ndang dibahen tu hita hombar tu angka dosanta, jala ndang dibasoshong tu hita hombar tu angka hajahaton ta. Songon asi ni roha ni ama-ama mida angka anakna, asi ni roha ni Debata di angka na manhabiari Ibana.
Liturgi III. No.4
Ro ma ham utu Ahu, asa mangolu tondimuna, ninna Jahowa. Tung sura rara dosamu na songon abit bunga dapdap, bontar do bahenonKu songon itak, nang pe rara songon abit hasumba gabe songon hapas do muse.
Liturgi III. No.5
Songon on do hata ni Jahowa : nunga pola hupasisi angka pangalaosim songon ombun, jala songon ombun manorop angka dosam. Sai mulak ma ho tu ahu, ai Ho do sipalua ahu.
Liturgi III. No.6
Ai songon on do holong ni rohaNa mida portibi on, pola do AnakaNa na sasada I dilehon, asa unanng mago ganup na porsea di Ibana asa hangoluan na hot ro di saleleng ni lelengna di Ibana.
Liturgi III. No.7
Molo tongtong do hita mangolu di bagasan Hata ni Debata, pos ma rohanta, sai na donganan ni Debata do hita laho mangalo hisap-hisap ni daging dohot maningggalhon dosanta.
Liturgi III.No.8
Antong rap ma hita manjanghon Sipalua I, taungkap ma rohanta asa bongot Raja I di rohanta. Lam marsihohot ma hita umbege, mangguruhon dohot mangulahon hataNa jala dapotan upa ma hita di haroroNai . Amen
Prolog Liturgi IV : Lam di patuduhon Debata do tu jolma I, holong dohot asi ni rohaNa, diparbaga do haroro ni Sipalua laho paluahon jolma I sian ihotihot ni sibolis i.
Liturgi IV. No.1
Nunga mandate roha ni bangso paimahon haluaon sian Debata, ai tarbuang do bangso Israel ala ni dosana, masihol bangso Israel mulak tu bona pasogit na tu huta Jerusalem, asa sumuang muse marsaor nasida di Bagas joro. Sai hira na ditadinghon Debata do panghilalaan nasida, alani I maimaima do bangso I di haroro ni Mesias Sipalua i.
Liturgi IV. No.2
Ro do hata ni Debata tu Panurirang Jesaya mandok; apuli; apuli hamu ma bangsoKi, ninna Debata muna. Hata apulapul ma dok ham utu roha ni isi ni Jerusalem, jala jouhon hamu ma tu nasida nunga marujung parungkilon na, ai nunga sesa dosana I, ai nunga dijalo sian tangan ni Jahowa silompit dua singkat ni saluhut dosa na.
Liturgi IV. No.3
Ro do hata ni Debata tu panurirang Jesaya mandok : tung sura rara dosamuna songon abit bunga dapdap, bontar do bahenonku songon itak; nangpe rara songon abit hasumba, gabe songon hapas do muse. Di ari sogot, uli jala marmula tunas ni Jahowa, gabe huhut uli parbue ni tano I di angka na malua sian Israel.
Liturgi IV.No.4
Ai ndada pangkiranKu, pingkiran muna I, jala ndada dalanmuna angka dalanKu, ninna Jahowa. Tangan diparpiar ni murukKu hutabunihon do bohingKu satongkin maradophon ho, alai marhite-hite denggan basa saleleng ni lelengna asianKu ho, ninna Jahowa sipalua ho.
Liturgi IV. No.5
Alai anggo ho huta Betlehem Efrata, mametmethu do ho nian anggo tung pola jujuron tu angka huta marribu-ribu di Juda, hape sian ho do haroroan ni na gabe panggomgomi ni Israel, jala angka haroroanna sian na hinan, sian angka ari na robi saleleng-leleng na.
Liturgi IV. No.6
Ida ma, gabe-gabean ma sada na marbaju jala tumuhon sada anak, jala bahenonna goarna: Immanuel. Hehe ma ho, marsinondang ma ho, ai na ro ma panondangmu, jala hamuliaon ni Jahowa binsar di atasmu. Alani pauli hamu dalan ni Jahowa, patigor hamu di adaran dalan balobung ni Debata. Ingkon gohan do nasa rura, jala parejeton nasa dolok-dolok dohot buntul-buntul, jala gabe na hornop do na manangkok tuat, jala gabe rura tanggurung ni dolok.
Liturgi IV.No.7
Ai nunga tubu di hita sada posoposo, dilehon tu hita sada Anak, pamper tu abaraNa do sogot harajaon, jala bahenonnna goarNa: Sipartahi halongangan, ulubalang ni Debata, Ama saleleng ni leleng na, Raja Hadameon.
Liturgi IV.No.8
Alai jongjong anggo Ibana, jala marmahan mangasahon gogo ni Jahowa, marhitehite hamuliaon ni goar ni Jahowa Debata na; jadi maringan ma nasida, ai timbul ma ibana disi ro di angka ujung ni tano on. Amen.
Prolog Liturgi V : Nunga jumpang tingkina hombar tu baga-baga ni Debata taringot Sipalua, na tinubuhon ni si Maria, na gabe-gabean sian Tondi Porbadia di huta Betlehem.
Liturgi V.No.1
Dungi ro ma uju I parenta sian Kaesar Agustus, ingkon suraton nasa jolma di gomgoman na. Pamilangan parjolo ma I, uju digomgomi si Kirenius tano Siria.
Liturgi V.No.2
Jadi borhat ma sasude, asa disurati, ganup tu bona ni pinasa na. Borhat ma nang si Josep dohot si Maria, na sian Galielea, sian Nazareth, nangkok tu luat Judea tu huta ni si Daud na margoar Betlehem, ala sian pomparan jala marga ni siDaud ibana. Pasurathon dirina rap dohot si Maria, oroan na I naung gabegabean. Jadi di na disi nasida, gok ma ari ni hangoluan na.
Liturgi V.No.3
Ditubuhon ma anak buha bajuna, diborhos ma, dipekhon ma tu bagasan panggagatan, ala so adong inganan na asing di parmian nasida. Jadi adong ma marborngin di lading ma disi angka parmahan, mangingani pinahan nasida. Jadi didapothon sada Suru-suruan ma nasida, jala marsinondang ma sangap ni Tuhan I humaliang nasida, gabe mabiar situtu ma.
Liturgi V. No.4
Alai didok Suru-suruan I ma tu nasida; unang mabiar hamu, ai barita halalas ni roha godang do huboan tu hamuna, parsaulian ni sandok bangsoi. Ai naung tubu do di hamu saborngin on, dihuta ni si Daud, Sipalua I, I ma Kristus Tuhan i. On ma partindandaan di hamu: posoposo do dapoton muna, na binorhos peak di panggagatan.
Liturgi V. No.5
Hasitna I tubu na tinaon ni si Josep I, tarlumobi ma si Maria naung gabegabean, alai ingkon oloan nasida ma parenta ni Kaesar, jala mardalan masai dao jala maol situtu sidalanan i. Boasa ingkot songon i?
Liturgi V.No.6
Ai toho do I hansit, alai unang alo tu haporseaon ta, molo ingkon songoni sitaonon ni si Josep dohot si Maria. Ai laos disi do sangkap hatuaon ni Debata. Dipardalanan na tu Betlehem I do masa hasasaut ni bagabagaNa marhite hatutubu ni Jesus, Tuhan Sipalua hita.
Liturgi V.No.7
Sasintong na mansai maol do siat tu pingkiran jala ndang tarjalo roha. Hape laos songon I do dibahen Debata dalanNa jala hurang tarjalo roha do, boasa diinganan na lea hatutubu ni Sipalua I, di bara ni pinahan.
Liturgi V.No.8
Ai songon timbo ni angka langit sian tano on, songon ido tumimbo angka dalanKu sian dalanmuna I, jala angka pingkiranKu sian pingkiran muna I, ninna Jahowa. Alani unang manigor maralo tu rohanta, molo pe songon I dalan dibahen Debata. Nang di pardalanan ngolunta on pe, molo masa pangunjunan dohot parungkilon, unangn pintor mandele, atik dalan ni Debata do I laho mambahen hasonangan ni hita. Tapuji ma goarNa na marmulia i. Amen.
Prolog liturgi VI : Nunga ro rajanta Sipalua I, ndada holan hita dipalua, alai dohot do nangn portibi on. Sude ma nasa na manggulmit, nasa ulu ni tot marsomba tu Ibana, Raja Hadameon i.
Liturgi VI.No. 1
Puji ma Jahowa ala tondingku, jala nasa rohangku dibagasan mamuji goarNa na badia i.
ibana manesa dosam sudena. Ibana pamalum angka sahitmu sudena, Ibana paluahon ngolum sian hamagoan, Ibana matumpalhon denngan basa dohot asi ni roha.
Liturgi VI. No.2
Puji ma Jahowa ale tondingku, dipamahap do rohangku mahite-hite denggan basa, Ibana do patupahon angka pambahenan hatigoran, Ibana do pabotohon angka dalanNa.
Liturgi VI.No.3
Puji ma Jahowa, hamu angka parrangan parbanua ginjang, na mangoloi angka parentaNa, na sai tongtong tangi tu angka hataNa. Hamu anngka naposoNa na mangulahon lomo ni rohaNa.
Liturgi VI.No.4
Puji ma Jahowa, hamu ale angka na tinompaNa, di sude inganan na hinarajaanNa. Puji ma Jahowa, ale tondingku jahowa do nampuna sude portibi on dohot nasa isina.
Liturgi VI.No.5
Ibana do nampuna portibi on dohot nasa na mangolu di bahasan na. Ai Ibana do paojakhon I di bagasan ni aek na bagas di toru ni tano on, jala pahothon I di atas ni laut angka na bagas i.
Liturgi VI.No.6
Puji ma Tuhan I, Debata ni Israel, ala ditopot bangsonNa jala dipatupa haluaonna.
Dipatindang do di hita tanduk haluaon, di bagas ni si Daud naposoNa i. Hombar tu na hinatahonNa marhite soara ni angka panurirangNa na badia I sian na robi.
Liturgi VI.No.7
Ari on do najinadihon ni Jahowa, marolopolop jala marlas ni roha ma hita disi. I ale Jahowa sai manumpak ma Ho! Iale Jahowa sai Ho ma mambahen manjadi! Pinasupasu ma na ro marhite-hite goar ni Tuhan i.
Liturgi VI.No.8
Beta ma hita saluhutna mamuji Goar ni Jahowa na marmulia I, ai Parasiroha bolon jala Pardenggan basa, hamoraon dohot hasangapon dohot hagabeon na saleleng-lelengna dilehon tu hita. Amen
Prolog liturgi VII : Nuaeng begeon ta ma hatorangan na dumasip taringot tu Jesus Sipaluai i. ibana Sipalua naung rot u portibi on manaluhon dosa dohot hamatean asa malua, mamora na porsea.
Liturgi VII.No.1
Dung I toropan do nasida na gabe porsea ala ni hata ni Jesus. Gabe didok nasida ma tu boru-boru I; ndang be ala ni pandokmi, umbahen na porsea hami; ai nunga hubege jala hutanda hami sandiri, Ibana do tutu Sipalua portibi on.
Liturgi VII.No.2
Dung I ninna si Petrus dohot angka apostel I ma mangalusi: Ingkon oloan do ibana di Debata asa di jolma. Dipahehe Debata ni angka amanta do Jesus, na pinasuman muna, uju digantung hamu Ibana tu hau. Tu siamunNa do dipabankit Debata Ibana gabe Partogi jala digantung hamu Ibana tu hau. Tu siamunNa do dipabangkit Debata Ibana gabe pargogo jala Sipalua, laho mangalehon tu halak Israel hamubaon ni roha dohot hasesaan ni dosa.
Liturgi VII.No.3
Mandok mauliate ma hamu di Ama I, naung patauhon hamu, manjalo tohap na dibagasan hatiuron I, siteanon ni angka na badia i. ai nunga diroro hita sian gomgoman haholomon I, jala dipaunsat hita tu bagasan harajaon ni Anak, haholongan ni rohaNa.
Liturgi VII.No.4
Dibagasan Ibana do adong di hita haluaon I, I ma hasesaaan ni angka dosanta. Ibana do suman ni Debata na so darida I; na parjolo tubu sian nasa na tinompa dohot andorang so haojak ni tano on.
Liturgi VII.No.5
Ai marhite sian ibana do ditompa saluhutna, na dibanua ginjang dohot na dibanua tonga on, na tarida dohot na so tarida I, angka habangsa, angka harajaon, angka gomgoman, angka parhuasoon, saluhutna I do ditompa marhite-hite Ibana, jala marhapetean tu Ibana.
Liturgi VII.No.6
Jala di jolo ni saluhutna do Ibana, jala saluhutna di do hot di bagasan Ibana. Ibana do ulu ni pamatang I, ima huria i. ibana do parmulaan, naung parjolo tubu sian angka na mate, asa Ibana parjolo di na saluhutna. Ai ditontuhon Debata do naeng maringanan di bagasan Ibana sandok hagogok na i.
Liturgi VII.No.7
Nang sian Jesus Kristus, sitindangi haposan I, na parjolo tubu suan angka na mate sigomgom angka raja ni tano on! Ibana do manghaholongi hita jala dipalua hita sian angka dosanta marhite-hite na badia i.
Liturgi VII.No.8
Dijadihon do hita gabe harajaon hamalimon ni Debata, AmaNa i. di Ibana ma hasangapon dohot hagogoon rodi saleleng-lelengna. Ida ma, na ro ma Ibana di bagasan ombun! Idaon ni nasa mata do Ibana, nang angka naung manullang Ibana, gabe mangangguhi be ma saluhut bangso ni tano on mida Ibana. Ima tutu. Amen
Prolog liturgi VIII: Parbuehon ma haporseaon dohot pamujianmi tu Debata dibagasan ngolum marhite-hite parange na tama, daulat, burju mangula jala masihaholongan.
Liturgi VIII.No.1
Diungkap Sipalua I do pintu harajaon ni Banua ginjang laho mangarahon angka na niasianna, asa malua nasida sian gomgoman dosa jala maringan di huta na pinauli ni Debata.
Liturgi VIII.No.2
Didok Jesus, Sipaluai I do; ahu do pintu I, paluahon do ganup na bongot sian Ahu, na laho bongot jala laho ruar ma ibana, dapotan jampalan, asa adong hangoluan di nasida.
Liturgi VIII.No.3
Nunga taboto jala nunga diungkap pintu I tu hita, alai mansai dao do I sian portibi on, asa roha ni na so tumanda Ibana. Hite pe soratan jala loja digosa-gosa portibi on dipardalanan ta laho manjumpangi pintu I, antong boha na ma?
Liturgi VIII.No.4
Didok do muse: Ro ma hamu tu Ahu, hamu angka na loja jala na sorat asa hupasonang hamu Ahu do panondang ni portibi on, naso tupa mardalan di naholom na mangihuthon Ahu.
Liturgi VIII.No.5
Haporseai ma na tutudo ibana pangapul na sumurung dohot pandaoni bolon di angka na marsak dohot na marsahit, dilehon do tu hita aek dohot roti hangoluan asa ndada be mauas dohot male angka na manganhon sian i.
Liturgi VIII.No.6
Dung I dipaborhat do hita tu portibi on laho mangarahon angka donganta, ai didok do:
ahu do mamillit hamu jala Hupadiri hamu, asa laho hamu marparbue, jala asa mian parbuemuna i. alani I dungo jala jobas ma hita mangilahon tona parsuruonNa I, hohosi ma gontingmu jala pagalak ma palito di tanganmu.
Liturgi VIII.No.7
Beta hamu dongan laho mangula di porlak ni Tuhan I, asa dapotan na tama hita, jala parangehon ma na tama jala marroha na daulat ma hita asa masihaholongan sama hita songon Kristus i manghaholongi hita.
Liturgi VIII.No.8
Antong solukhon hamu ma holong na sian Kristus Jesus, Tuhanta i. Ai I do patukhon hita laho manghaholongi dongan jolma. Amen
Prolog liturgi IX: Dibaga-bagahon Debata haluaon di angka na manghabiari Ibana jala mangulahon hataNa. Boha panghorhon na burju mangihuthon Ibana dohot mangulahon lomo ni rohaNa? Tangkas ma tapaihut-ihut liturgi on.
Liturgi IX.No.1
Munsat pe angka dolok jala humuntal angka robean, alai anggo parrohaonku na so tupa munsat sian ho, jala padan ni hadameonKu na so tupa humordit, ninna Jahowa si asi I ho.
Liturgi IX.No.2
Songon sintong na mangolu ahu ninna Tuhan Jahowa, tung na so lomo do rohangku mida hamatean ni angka parjahat, na lomo do rohangKu mida hamumulak ni angka parjahat I, tumadingkon dalan na, asa mangolu ibana.
Liturgi IX.No.3
Parasi roha jala pardenggan basa do Jahowa, lambat tarrimas jala parasiroha godang.
Ndang dibaloshon tu hita hombar tu angka hajahatonta. Songon asi ni roha ni amana mida angka anakna, asi ni roha ni Jahowa di angka na manghabiari Ibana.
Liturgi IX.No.4
Songon on do hata ni Jahowa: nunga diarsahi ho Ahu marhite sian angka dosam, jala nunga dilojai ho Ahu marhite sian angka hajahatonmu. Ahu tutu Ahu sandiri manelesei angka pangalaosim asa ni hadirionKu, jala ndang be Hupaingot-ingot angka dosam.
Liturgi IX.No.5
Roma hamu tu Ahu asa mangolu tondimuna ninna Tuhan Jahowa. Tung sura rara dosamuna songon abit bunga dapdap, bontar do bahenonKu songon itak, gabe songon hapas do muse.
Liturgi IX.No.6
Songon on do panghaholongion ni Debata: Nunga pola hupasisi angka pangalaosim songon ombun, jala songon ombun nasumorop angka dosam. Sai mulak ma ham utu Ahu, ai Ahu do sipalua ho.
Liturgi IX.No.7
Songon on do hata ni Jahowa: Unang ho mabiar, ai Ahu do siluluhon ho; nunga pola hujou goarmu Ahu siluluhon ho, asa mangolu ho dohot pinomparmu sogot.
Liturgi IX.No.8
Satongkin do hutadingkon ho, alai papunguonKu ma ho muse marhite-hite angka asi ni roha godang! Tagan di parpiar ni murukHu hutabunihon bohingKu satongkin maradophon ho, ninna Jahowa sipalua ho.
Liturgi IX.No.9
Humonghot hita, gabe dosa do ibana na so tumanda dosa hian dibahen Debata, asa habe hatigoran ni Debata hita, marhite-hite ibana. Jala asa malua hita sian dosa gabe tu hangoluan na so ra suda.
Liturgi IX.No.10
Ala di panghaholongion ni Debata di portibi on, dilehon do tu hita NakNa, habe jolma, na tubu di Betlehem! Antong sai tarpuji ma goarmu, ala naung ditingkir hita bangsoNa.
Digotu-togu tu hatiuron dipadomu Ho do hami na holong sian Ho, gabe saor muse dohot Ho, gok halalas ni roha do hami ala ni i. Ala ni hasangapon ma di Debata na diginjang dame ma di tano on diangka jolma halomoan i. Amen
Prolog liturgi X : Nunga ro jala nunga marsaor Ibana di hita nang di rohan ta, aha do panghorhonna molo hita mangihuthon Ibana dohot mangulahon lomo ni rohaNa? Tangkas ma tapaihut-ihut liturgi on.
Liturgi X.No.1
Martua ma napogos tondi, ai di nasida do harajaon banua ginjang. Burju ma ibana mangulahon lomo ni roha ni Debata sa dipamora ibana.
Liturgi X.No.2
Martua ma namarsak roha, ai siapulon do nasida. Benget ma rohana jala sabam manaon angka parungkilon I, apusan ni Debata do iluilu sian mata nasida.
Liturgi X.No.3
Martua ma nalambok roha, ai teaon ni nasia do tano on. Halambohon do paombunhon rimas jala halashonon na hinadeak ni hadameon.
Liturgi X.No.4
Martua ma na mauas male mida hatigoran, ai dipabosuron do nasida. Laoon na ma jala daion na ma denggan basa ni Jahowa.
Liturgi X.No.5
Martua ma na asi roha, ai siasian do nasida. Martua ma parroha na ias, ai idaon nasida do Debata. Tatingkathon ma marngolu masiurupan, mardiakoni sosial, asa dipabosur Debata hita marhite-hite asi ni rohaNa na godang i.
Liturgi X.No.6
Martua ma siboan dame, ai goaron do nasida anak ni Debata. Molo dung anak ni Debata nasida, marhuaso ma nasida di sude hamoraon dohot hamuliaon ni Debata. Taradoti ma hadameon di luat ta, di huria nang di tonga ni bagasta be, ai I do dihalomohon Debata.
Liturgi X.No.7
Martua ma na pinaburu-buru ni halak ala ni hatigoran, ai di nasida do harajaon banuaginjang. Las ma rohamuna jala marolop-oloop, ai godang do upamuna di banuaginjang I, ai songo I do dipaburu-buru angka panurirang na jumolo sian hamu.
Liturgi X.No.8
Martua ma hamu molo marhapantunon ham utu sasude, haholongi ma angka dongan, habiari ma Debata jala pasangap ma angka raja.
Liturgi X.No.9
Martua ma angka na mamio angka na pogos, angka na martihas, na pangpangon dohot na mapitung asa lehenonmu mangan, ai baloson ni Debata ma dihamu rap mangan di harajaonNa i.
Liturgi X.No.10
Antong paserep ma roham jala parbadia I laho manjanghon hata ni Debata dohot mangulahon, ai didok do: Martua ma angka na tumangihon Hata ni Debata jala na umpeopsa. Amen
Prolog liturgi XI : Nunga salpu barita hatutubu ni Jesus ima na tuat tu portibion laho manopot jolma pardosa. Haroroni Kristus mampangkorhon do di ngolunta sahat tu partingkian nuaeng, antong songon dia do hita mangkangoluhon haroro ni Kristus dibagasan ngolunta siganup ari? Ingkon do marhite haporseaon, pangkirimon, dohot mangolu dibagasan holong.
Liturgi XI.No.1
Ditonga-tonga ni portibion na lam maju on, marsiadu jolma mangalului hamoraon, huaso, harajaon, hasangapon, laos songoni do nang pinarsinta ni halak batak ima hagabeon, hamoraon dohot hasangapon.
Liturgi XI.No.2
Ai dipajongjong portibion do huaso hasangaponnna di atas ni sitaonon ni angka na lea dohot na dangol. Disituasi ni zaman na lam berkembang on, lam tubu jala berkembang do angka tondi-tondi ni zaman na maralo tu ulaon ni Tondi Parbadia. Ima tondi na ahut tu
diri mangarajai torop jolma. Alai saborngin on nunga tubu sipaluai, na ginohan ni Tondi ni Jahowa, ima Kristus Jesus Tuhan ta i.
Liturgi XI.No.3
Hasangapon di Debata ninna do, alai dirina do dipaburnang-burnang, Dame ninna alai ndang adong ninna Dame i.
Liturgi XI.No.4
Torop do halak na mambuat hasangapon tu dirina huhut pasiding pardamean tu donganna jolma.
Liturgi XI.No.5
Hape ianggo Jahowa dipatorutoru do hasangaponna naung gabe jolma Ibana, na tubu diingangan na lea lao manesa dosanta.
Liturgi XI.No.6
Asa malua hita sian dosa dohot hamatean. Alani I, tama do ta paimbaru haporseaonta marhite hatutubu ni Jesus na ta pestahon dibagasan borngin on.
Liturgi XI.No.7
Dame, ido mual ni haluaon dohot las niroha na pinarbaga ni Debata jala ido jambarta dilehon Debata. Antong tama ma hita mardame dohot Debata, nang mardame sama hita.
Liturgi XI.No.8
Dame diganup jabu, luat, huta, singkola, punguan, nang hurianta. Asa marsangap Debata jala marlasniroha hita huhut gabe lomo ni roha ni Debata ma hita.
Prolog liturgi XII: Tapuji ma Debata disaluhut na angka pambahenanNa tu portibion na mangalehon Jesus Kristus anakNai mamboan las ni roha, dame, haluaon, dohot pos ni rohanta. Antong tapasahat ma pujianta marhite liturgi.
Liturgi XII.No.1
Pinuji ma Tuhan Debata ni Israel, ala ditopot do hita gabe bangsoNa, jala dipatupa haluaon di bangsoNa.
Liturgi XII.No.2
Pinuji ma Tuhan Debata ni Israel ai dipatindang do di hita tanduk haluaon, dibagas ni si Daud naposoNai.
Liturgi XII.No.3
Pinuji ma Debata na pasahathon barita nauli ima barita angka lasniroha na paluahon hita jolma dohot portibion hombar tu na hinatahonNa marhite-hite soara ni angka panurirang na badiai sian na robi ni na robi.
Liturgi XII.No.4
Pinuji ma Debata Ama, Ama I Tuhan Jesus Kristus, ama ni saluhut na gabe Raja ni angka raja, jala Tuhan ni angka tuhan.
Liturgi XII.No.5
Ai ibana do pargogo na so hatudosan, na manompa langit dohot tano, dohot nasa na adong dihasiangan on.
Liturgi XII.No.6
Pinuji ma Debata mual ni hangoluan ni diportibion, Ibana do Alfa dohot Omega, naso marmula dohot na so marujung, Ibana do na patubuhon hangoluan dihasangapon on, patubuhon angka suansuanan ni sisik ni tano on.
Liturgi XII.No.7
Ibana do pangoluhon ragam ni pahan-pahanan, dohot angka pidong na martonga-tonga langit. Saluhutnai tung singkop do jala ndang hahurangan.
Liturgi XII.No.8
Puji ma Tuhan naung manompa jala naung pangoluhon hita jolma maringan di hasiangan on, huhut tongtong mangaramoti hita jala naung jumolo paradehon saluhutna na ringkot dingolunta, asa tung singkop jala marhasonangan. Amen
