107 年全國語文競賽客家語朗讀文章高中學生組（四縣腔）
編號 01 號
【𤌍 窯仔】
劉玉蕉原作打早，就聽著阿婆吩咐阿姆，去市場割兜仔豬肉、買兜仔萋魚 轉來，「欸，恁古怪！有麼人做生日係無？」問過阿婆正知，係滿 姑愛轉妹家，怪毋得阿婆恁歡喜！探著滿姑轉來个時間，𠊎走去莊 頭阿惜姨个雜貨店等，𠊎頭勾勾仔緊眺望。姑丈个車仔吂駛兼，𠊎 就走出去擛手哩，姑丈車仔一頓恬，𠊎就蹶上車，滿姑笑等講：「尸 朏吂坐燒，就愛下車吔，恁大閒情！」，知佢歡喜，𠊎尖入車肚就 同姑表姊妹仔大聲搞起來。
滿姑帶个等路異餳人，逐儕都有一份以外，車後斗還有一大布 袋个番薯，阿婆講：「番薯恁多仰結煞，無就來𤌍窯仔好啦，屋背 田項个泥，上禮拜正翻過，大體怕燥哩，來𤌍窯仔，愛無？」「好 哦！讚啦！」聽著有好搞，𠊎這兜黏時就應好。
起窯哩喲，阿爸扐三矻大泥團做門，窯身就尋像厥拳頭嫲恁大 个泥矻來結，疊高吔還過愛慢慢收兼來，幾下到，結到半爛燦又屙 下來，「唉，老刀嫲無鋼哩，無恁該喢1哦！」臨尾還勞攪阿姑丈𢯭
1 喢：音 sa；大口吃、快速吸入。
手，正順勢搣好。窯一起好，阿哥就發號命令哩，佢喊𠊎摎姑表姊 妹去撿樵草，阿姊負責起火、架樵，大姊當分人倚恃得，火畀掌到 猛猛猛，紅紅个火舌對泥矻縫項鑽出來，像愛食忒人樣仔，害𠊎這 兜閃到遠遠遠，無幾久，泥矻就像甜柿恁仔紅啾啾哩！
「好勢哩喲，樵莫過架，火退出來，就做得擲番薯入去哩！」
阿婆恁仔講。火炭掊2開來，番薯就一粒一粒擲入窯裡肚去。「哇！」
表阿哥个擔竿一𢫦落去，紅紅个泥矻跈等屙下來，堵好弇在番薯面 項，「建設難，破壞容易」，細人仔輪等𢫦泥矻，逐個都搣到一頭一 面，背尾還係姑丈來收尾，佢同幼泥掖上去，再用砂耙頓畀拶，上 背還插一支香，恁仔一息煙都無出，正喊𠊎兜去搞。真無簡單結起 來个窯，這下看起來就像一個番薯壟呢！
囥人尋吂搞罅，遠遠就鼻著香味哩，影著阿姆在該開窯，𠊎這 兜遽遽偎近去看佢變奇術，阿姆驚怕番薯摟綿忒，細心細意在該慢 慢仔挖，定定仔摟，香氣餳到𠊎這兜口涎溚溚跌，肚屎乜嘰哩咕嚕 緊抗議。田脣項，𠊎兜比比坐，香香个番薯塞歸嘴仔。天恁清，番 薯恁香，在屋背个田項，𠊎兜搞到斷烏正轉屋。
2 掊：音 boiˊ；推開、撥開。
107 年全國語文競賽客家語朗讀文章高中學生組（四縣腔）
編號 02 號
【味道】
李夢花原作有一種味道，毋係用舌嫲試得出，係愛用心肝正感受得著；有 一種味道，毋單淨試過就記入心，係隨時就會揬著心肝頭，毋會分 人添放忒。
阿姆日日㧡水、餵豬仔，愛顧一屋大小食著，歸日仔舂頭磕額
3，菜湯腳刻耐仔攪飯，這苦篤篤个日仔，到細人仔日見日大了後正 轉甜，這係阿姆个味道。
阿爸逐日汗流脈落，為著家庭疲爬極蹶煞猛做事，厥底衫仔總 係溚潦。記得還細時節有一擺作燒4，阿爸背等𠊎去分先生看。吾頭 那凴等阿爸賁賁闊闊个背囊，有一種燒暖个幸福，鼻等該鹹渧渧仔
5个汗水味，係𠊎熟事个阿爸个味道。
𠊎自家个味道又係仰般个呢？青春年華个記憶，係有期待、乜 做得發夢个時光。反叛个年紀，除忒讀書，心肝肚該粒細阿妹仔个 心，總係期待學校該緣投个細倈同學做得偎近𠊎，分享𠊎个心情故 事。就像吂翕熟个青柿樣仔，浹浹6又澀澀。該酸澀跈等成長个火焙
3 舂頭磕額：音 zungˊ teuˇ ngab ngiagˋ；形容非常忙碌、到處奔波的情形。
4 作燒：音 zogˋ seuˊ；發燒。
5 鹹渧渧仔：音 hamˇ diˇ diˇ eˋ；形容味道很鹹。
6 浹浹：音 giabˋ giabˋ；澀味，類似未成熟的柿子、香蕉的單寧口感。
刀削到尾轉甘，這係𠊎酸柑茶樣仔戀愛个味道。
還有一種味道，安到人情味，在客家莊滿哪仔都有。這片張伯 姆喊：「落來坐！」該片阿火伯喊：「來泡茶！」這杯釅茶个溫度，
分客家莊个青草有味、日頭有味，連空氣都帶有和善熱心醹醹个人 情味，這係𠊎出外打拚最思念个情感。都市人情薄如紙，就算歇兩 對門乜毋相識，各儕就像帶層保護色，相互毋敢交攞忒深，故所轉 莊下正尋得轉這簡單个安然自在。
幸福又係麼个味緒呢？無閒洎杈个人，做得停跎一下鼻花香；
耕田个人，做得收成歸間穀倉；做爺哀个人，做得看著一屋大細康 健平安；單身哥仔，做得食著餔娘个飯菜香。愛感受著幸福个甜甘 味進前，成時會先受到苦澀澀个艱難，係畏苦，毋去打拚，就毋會 有成功个日仔，當然乜毋會有歡喜个滋味。嫩筍，乜愛經過水涿日 炙正會變老竹。
人生个酸、甜、苦、辣、鹹、澀，你感受過幾多種？鼻公酸、
生活苦、目汁鹹，下把仔還有兜仔辣，這轉甜个過程係毋係較有搭 碓？成時你試著會跼到敨氣毋出个時節，愛想著：頭前有烏影，後 背就有日頭箭等。人講：「有情，食水甜。」換隻想法、換種心情，
用情來感受，全部都會係甜香个味道。
107 年全國語文競賽客家語朗讀文章高中學生組（四縣腔）
編號 03 號
【阿婆个菜園】
羅瑞霞原作吾婆歇在竹東落去五指山裡背山林壁壢角个半山排，該係𠊎最 好去个所在，也係𠊎最想念个位所。
從細細仔開始，總愛堵著尞日，阿爸就會駛車仔，載阿姆還過 𠊎三姊妹，行過彎彎斡斡个山路，蹶一隻大崎，正摎車仔停在半山 排鄰舍个禾埕。阿爸牽𠊎摎老妹、阿姆揇老弟，再過慢慢仔行一截 石碫仔，在一間伙房屋大門前停下來。禾埕肚晒等鹹菜个阿婆看著 𠊎兜一家人轉來，笑咪咪仔行過來開大門，嘴項緊講：「恁早呢！」
這間紅磚屋，係阿公摎阿婆歇个所在，乜係阿爸个胞衣跡。
見擺到尞日，阿婆知𠊎兜會轉去看佢，早早就買便當多食个東 西，放在冰箱肚，準備分𠊎恁多姊妹食。下把仔係講阿爸有事情停 跎，較慢轉到，阿婆就會開始心焦，遠遠就會看著佢个頭那勾啊勾 仔。係看著𠊎兜个腳一伸出車門，佢黏時就目笑鼻笑，緊講︰「仰 恁慢呢！」真實係阿婆惜孫，一滴都毋會差。
阿婆在河壩脣種有一坵菜園，該係𠊎恁多姊妹最好去个所在。
菜園裡肚種當多菜，春天个時節，阿婆會渡𠊎恁多姊妹去菜園摘 菜，還會教𠊎兜認菜：這係蕹菜、該吊菜色吊等个係吊菜仔，還有
該青青有竻个係竻瓜仔。講忒隨手就摘下來，衫袖捽捽啊就拿分𠊎 食。佢講︰「這瓜仔無打藥仔，食吔會康健」。下把仔佢會跍下來，
在菜廂脣挷草、捉菜蟲。記得第一擺教𠊎兜認識麼个係菜蟲，阿婆 手伸落菜蓋7裡肚，捉一尾青色軟軟還緊停動个菜蟲，老弟看著該緊 停動又廿廿趖8个東西，嚇到面壢青，大嫲牯聲盡噭，阿婆看著嗄大 笑講︰「戇孫仔！這係菜蟲，有麼个好驚啦？恁無膽得著。」
菜園脣頭，有一坵閒田，阿婆知𠊎好食甘蔗，在閒田種幾壟甘 蔗。冬下時甘蔗好食哩，阿婆會帶等𠊎去甘蔗園，喊𠊎坐在菜園个 田脣，就擎等刀仔去斬甘蔗，順續仔摎頭尾削忒，再過剁一截一截 仔，拿分𠊎喫。嗬，還甜哦！阿婆看𠊎食著滿足，面項笑咪咪仔問 講︰「好食無？有甜無？」該下𠊎淨顧食，緊頷頭，阿婆看著乜盡 歡喜！
時間過到當遽，十過年過去哩；𠊎兜大咧，阿婆乜轉唐山賣鴨 卵去咧。毋過，想著阿婆个菜園，這下毋知變到仰般？心肝肚總係 憶等。舊年，𠊎喊阿姆載𠊎轉去山肚看該間還細時節，長透轉去尞 个伙房屋，還䟓工行去河壩脣看菜園。毋過，行到河壩脣，看著頭 擺个菜園跡，草生到比人還較高。唉，阿婆無在吔，菜園乜荒忒咧！
7 菜蓋：音 coi habˋ；指所有蔬菜外層較老較黃的葉子。
8 廿廿趖：音ngiam ngiam soˇ；一拱一拱地蠕動。
107 年全國語文競賽客家語朗讀文章高中學生組（四縣腔）
編號 04 號
【椰子樹】
李得福原作老屋个禾埕脣，種幾下頭椰子樹，生到三棧樓恁高，阿公用鉛 線網圍等椰仔園，不准𠊎兜入去尞：驚怕椰仔葉無就細椰子係跌下 來，會擲著細人仔个頭那。逐下晝日頭轉影，椰子葉將西晒个日光 遮等，放尞日𠊎兜會兜楯頭9，坐在禾埕尾个涼跡項聽阿公講古。講 頭擺發大水崩河頭10，大水打對佐仔閣莊來，浸死11盡多人，家家戶 戶都跋上茅屋頂高；有兜人跋上椰子樹頂高囥，椰子樹乜救著盡多 分大水打到浮浮冇冇12个老百姓。記得，高天天个椰子樹，樹影下 無愁無慮个臨暗頭，有阿公講都講毋忒个傳仔。
樹頂椰子打到滿樹時，阿爸會請隔壁莊个阿順牯來摘，看佢將 大索䌈在腰仔項，手爬腳箭像猴仔蹶樹樣仔，三兩下就跋上椰子樹 頂，將一杷一杷重鈂鈂仔个椰子用索仔溜下來。阿爸在樹下𢯭手解 索仔，續手將粒把椰子扐起來搖搖啊，係有水聲會瀝瀝落落13響，
這粒椰子定著壞忒吔，裡背个椰子水會臭臭食毋得。忒過大粒个椰 子較老氣，水毋多賣無人愛僅可留來自家食。靚个一斤賣十過個
9 楯頭仔：音 dunˋ teuˇ eˋ；樹墩凳子。
10 崩河頭：音 benˊ hoˇ teuˇ；河岸崩塌河水淹沒。
11 浸死：音 jim xiˋ；淹死。
12 浮浮冇冇：音 poˇ poˇ pang pang；在水上漂浮流動。
13 瀝瀝落落：音 lid lid log log；物體在容器內撞擊產生的聲音。
銀，繳𠊎兜細人仔个學費盡足。在五、六十年代該下，農家人係較 煞猛兜仔，畜兩隻豬嫲來養豬子14賣，抑係種幾頭椰子樹，就做得 繳子弟讀大學。
暗晡頭食飽夜，阿爸會將大大粒个椰子洗淨放在砧枋項，用菜 刀將硬硬又賁个椰子殼，一刀一刀定定仔削忒，裡背有一粒圓圓个 內殼，再細義个用刀尾挑開蒂頭窟，椰仔水就噴出來吔，再將內殼 倒漀15放在水勺畀跌水，無幾久鮮甜个椰子水就歸杓嫲，屋下人老 嫩大細一儕一杯退心火。伸个內殼用菜刀剖開來，有一層白色个椰 子瓤，用調羹仔挖來食，甜甜就像食果凍樣仔。聽講老椰殼乜係做 冇瓠弦16个材料。
摘椰子个日仔，食飽夜後在禾埕尞涼，細人仔儕儕都扐等有瓤 个半析椰子，用扁調羹仔挖瓤食，阿婆乜輒常在禾埕尾唱山歌，幼 秀又丟滴个17歌聲毋會輸電視項个歌星。還細食椰仔瓤聽阿婆唱山 歌个日仔，就像係昨晡日樣仔。
愐起，高溜高溜个椰子樹，越勢使𠊎懷念，懷念該椰影下阿公 阿婆个身影，還過吾心肝肚有椰子味个童年。
14 養豬子：音 iongˊ zuˊ ziiˋ；生小豬。
15 倒漀：音 do jiang；倒立讓汁液流出。
16 冇瓠弦：音pang puˇ hienˇ；客家大椰胡，殼仔弦。
17 丟滴个：音 diu didˋ ge；音域高。
107 年全國語文競賽客家語朗讀文章高中學生組（四縣腔）
編號 05 號
【攔牛驚魂】
廖聖涵原作狗仔係人類个好朋友，𠊎相信異多人輒常聽著抑係看著摎狗仔 有關个真實故事。若係講除忒狗仔以外，人類个好朋友怕就係牛 仔。以前臺灣係農業社會，莊下人大部分都係耕種，因為科技無恁 發達，項項都愛靠人力。故所，逐家都畜牛仔係異平常个事情；大 體犁田、拖車、載穀、載菜、載禾稈這兜較重个事頭，都愛倚恃牛 仔來完成。人摎牛仔就像係兄弟姊妹仔共樣，牛仔乜算係屋下个一 丁。
頭過𠊎還在該讀書个時節，放學轉來屋下就愛𢯭做事，事頭當 多當多：像係臨暗仔个時節愛同日時頭放出去絡食个雞仔、鴨仔、
鵝仔尋轉來，還過愛看雞仔、鴨仔、鵝仔有食飽無？若係食無飽，
雞仔愛餵拈轉來个禾串分雞仔食；鴨仔、鵝仔愛餵冇穀。牛仔拖牛 車載番薯轉來，愛煮一大桶个番薯葉加糠仔，牛仔一下子就食淨 淨；還過愛煠豬菜分豬仔食。大嫂在灶下無閒煮飯，𠊎兜做細人仔 个乜無好閒，𢯭擇菜、洗菜、㧡水、歕火……。食飯食飽了後，就 在禾埕尞涼，該央時無冷氣乜無電扇，都係用旗扇撥啊撥欸撥涼。
莊下个所在蚊仔啦、烏蠅啦、黃蚻啦滿壁角，日時頭烏蠅滿哪
位都係，暗晡頭換蚊仔來鬥熱鬧。就算係行路，蚊仔、烏蠅乜跈在 頭那頂、圓身脣，就像狗仔跈路共樣。綯在禾埕尾該條牛仔分蚊仔 吵到頭那緊拂、腳緊蹬，硬硬綯毋會緪，大哥喊𠊎擎火把去摎牛仔 逐蚊仔，毋過蚊仔無逐著嗄摎牛仔个毛燒淨淨，實在異壞。
牛仔歸年透天都異無閒，一直愛到過年前成個月仔正有好尞。
記得有一年个寒假，吾屋下該隻牛仔綯在牛欄異多日咧，吾姆喊𠊎 摎牛仔牽去食草、行行啊。牛仔看著𠊎異歡喜，頭那緊搖。𠊎兜屋 下後背有一條細路仔，路脣个草仔異青，牛仔緊食草、𠊎緊唱歌仔，
心情異輕鬆。正在該歡喜定定，旋旋風看著牛仔毋食草、頭那緊拂，
目瞋瞋仔18看𠊎，就像愛摎𠊎食落去共樣。𠊎一下著驚，牛索放忒 拚起腳緊走，牛仔乜跈在後背走一路來。人講，「牛走直，蛇走彎。」
𠊎跳過一條平常時定著跳毋過个，差毋多有兩米闊个大水圳溝；牛 仔乜毋認輸，咻一下就跳過去，摎別人田肚个番薯、番豆跺壞異闊。
包尾，該條無乖个牛仔分吾二哥修理到異悿頭；現下想起來，𠊎都 還會驚。
18 目瞋瞋仔：音 mugˋ ciinˊ ciinˊ eˋ；瞪大雙眼怒視著。
107 年全國語文競賽客家語朗讀文章高中學生組（四縣腔）
編號 06 號
【阿姆个菜園角】
彭瑞珠原作阿姆个菜園角，有一頭葉仔花19。該花，原本單淨係一細截个 樹枝仔，分人細心細意个插在菜園角。佢像種佢个人共樣恁牛，毋 驚熱天發風搓、毋驚天公做大水，做佢緊生緊高、緊大緊靚。到佢 有半個人恁高个時節，阿姆就去倒幾支仔堅韌个桂竹20，插在厥脣 頭分佢递。佢緊递緊暢、緊递緊高，递到屋簷恁高，不時開到滿樹，
桃紅色个花。
探21得著屋簷个花，還毋甘願，像係自家會尋路樣仔，又續等 递，递到二樓阿姆間房个窗門前，還知毋好遮著阿姆个窗門，日日 在窗門下摎日頭共下，喊阿姆䟘床。阿姆看得著該頭靚花，就算日 頭忒早喊佢䟘床吔，佢乜毋會譴。阿姆總係笑咪咪仔看等該頭花，
毋知係看佢仰恁會大？抑係看樹頂有恁多鳥仔在該冤家，恁生趣。
不時，阿姆就會兜一張矮凳仔在樹下坐。轉熱个時節，葉仔花 煞猛递藤，屋簷鳥在樹頂做竇，打早一樹就嘰嘰啾啾，比唊嘴22个
19 葉仔花：音 iab eˋ faˊ；九重葛。
20 桂竹：音 gie zugˋ；桂竹。
21 探：音 damˊ；伸出，向外延伸。
22 唊嘴：音 giab zoi；多話。
𠊎還較唊嘴！暑假尞忒，𠊎做𠊎上臺北讀書，佢做佢起勢開花，阿 姆不時在樹下个日頭縫仔臥頭看花，成時還會行去菜園个另外一 片，遠遠看該一樹个花。
一樹个花，寒天乜緊開。係講，天時寒、日頭放尞、烏雲賁賁，
又合落起雨來，較靚个花乜活跳毋起來，較靚个色水乜看毋清楚，
阿姆就會心焦。一放學，就會接著阿姆个電話：「外背做烏𪐞𠘆23哦，
你自家在外地啊，知好著燒來無？毋好寒著哦！烏天暗地啊，毋好 弄弄仔走24，𠊎斯異愁！恁暗个天，連在屋側角都看毋真哦，該葉 仔花啊！」
該葉仔花，種在吾姆个菜園角，係𠊎上臺北讀書个前一年，阿 姆喊𠊎去森雄叔屋下，摎佢討來个樹枝仔，種起來个花。國中生仔 个𠊎，牛樣仔摎泥挖到深深、撳到拶拶，葉仔花毋會走、毋會橫，
在菜園角乖乖大。𠊎哪會知，該花係愛代去外地讀書个𠊎，摎阿姆 做伴个？好得，該花知好乖乖大、年年開到靚靚，代𠊎，安慰著該 恁多年來阿姆愁慮个心情。
23 做烏𪐞𠘆：音 zo vuˊ du sem；天空灰暗，天氣陰雨、寒冷。
24 弄弄仔走：音 nung nung eˋ zeuˋ；到處閒晃。
107 年全國語文競賽客家語朗讀文章高中學生組（四縣腔）
編號 07 號
【遮仔】
張美容原作無聊个落水天，一儕人無落無著，企在門前看等路項擎等遮仔 上上下下个人，有帶行帶走緊拚拚仔个，也有定定仔行享受雨中散 步个；有一儕人擎支遮仔孤栖孤栖个，也有兩儕扳等肩頭共下抵一 支遮仔个，𠊎心肝肚想：「一遮一世界，遮仔底下一定囥等盡多故 事。」
囥在門角企等像一條瓜仔个遮仔，撐開來，就係𠊎心肝肚个一 蕊花。還細時節，在街路看著一支紅色間等25青花个細遮仔，愛到 奈毋得，先前阿姆嫌忒細支抵水毋著毋肯買，毋過看𠊎目汁含等，
最尾還係買分𠊎。這支遮仔變到吾个寶貝，一落雨，𠊎就著起紅水 靴、擎等紅遮仔，這家行、該家尞，風神唉唉仔26。好天時，遮仔 也無閒著，毋係拿來搞份家啦，就係擎等來跳舞，該遮花捩到幾轂 哪，遮仔下个細阿妹仔笑到嘴斯合毋密27。啊！快樂、純真个童年！
讀小學，見放學堵著打風馳，阿姆就會送遮仔來學校，順續仔 帶𠊎轉，一路兩子哀叨叨叨叨28，阿姆一下仔、一下仔叮嚀：「水窟
25 間等：音 gam denˋ；混著，混合摻雜。
26 風神唉唉仔：音 fungˊ siinˇ ngai ngai eˋ；很神氣的樣子。
27 合毋密：音hab mˇ miˊ；合不攏。
28 叨叨叨叨：音 doˇ doˇ do do；形容話多，說個不停的樣子。
毋好跺落去、濫濫个位所愛閃開、遮仔愛看風向正毋會綻忒。」遮 仔外背風合水，遮仔裡背有阿姆淰淰个愛！到𠊎較大兜仔在都市讀 書，阿姆一看著天愛變愛變仔就愛𠊎帶遮仔去，𠊎最驚擎支遮仔背 尾嗄出大日頭，分人看著就像毋識出空个山精大戇樣仔。再過講，
該隻年齡小說看多吔，總試著迎等雨毛仔行在路項，係幾羅曼蒂克 个事情，故所常下為著愛帶遮仔、毋帶遮仔摎阿姆齬齬齖齖29，唉！
毋知人好个少年！
緣分實在係奇妙个東西，大咧就會遇著一個人，甘願自家涿 溼，也愛摎你擎遮仔抵水；甘願自家光頭落杓，也愛摎你擎遮仔抵 日頭，陪你行過坎坎坷坷30个人生，不管外背水幾大、日頭幾烈，
遮仔肚總係溫暖、安全个。當然，吾心肝肚還有一支最重要个遮仔，
雖然看毋著也摸毋著，毋過，佢總係在𠊎堵著大風大浪、失志無助 个時節，摎𠊎揞密密、抵塞塞，保護到好好，該就係爺哀摎𠊎撐起 來个愛个大遮仔，在這支遮仔下，𠊎無愁無慮、安然自在長大！
熱天時个遮仔頂，有白雪雪个桐花在該跳舞，落水雨天就有滴 滴涿涿31个雨水在該唱歌仔，擎等遮仔行在路項个人，一定摎𠊎共 樣，毋知有幾多故事在遮仔下演出！
29 齬齬齖齖：音 ngi ngi ngia ngia；原指猫或狗彼此相爭時呲牙裂嘴的樣子，後比喻為 吵架的意思。
30 坎坎坷坷：音 kamˊ kamˊ koˊ koˊ；坎坷。
31 滴滴涿涿：音 did did dug dug；狀聲詞，此處指雨打在傘上的聲音。
107 年全國語文競賽客家語朗讀文章高中學生組（四縣腔）
編號 08 號
【檳榔樹】
謝惠如原作還細該下，屋下田坵仔有種檳榔樹，對田頭到田尾一行一行仔 種到筆直，行同行之間有留蔭水、放水个水壢。橫行又乜一頭一頭 个挷直線種，看起來嶄然靚。阿爸講，行同行个闊度種一丈闊，做 事行路較方便，種菁仔樹退行時，每一頭个距離就種八尺闊，橫直 闊度愛種罅擺來，另日樹仔大吔，葉仔同葉仔正毋會相唚仔32，割 檳榔菁个割篙鐮33正過吔得。
每年五月份到九月份，爺哀五更早就䟘床去菁園割菁仔，農家 人打早做事較涼爽，晝吔日頭當烈，目珠看往半天高个檳榔菁會晟 眼。隔壁个叔公不時都會笑講：「恁早出門做事，愛同鬼仔搶食 ！」喺 割下來一弓一弓个菁仔，用細貨車載轉來大步簷34下放。暗晡頭食 飽夜，爺哀會坐在火光下剪菁仔，一粒一粒對菁弓項剪下來，天光 日再載去行口賣，阿姆講畜子女个飯餐錢，倈仔、妹仔个學費，全 部靠檳榔菁賣个錢來打所費。
32 相唚仔：音 xiongˊ jimˊ eˋ；原為嘴對嘴相親，此指互相碰觸之意。
33 割篙鐮：音 godˋ goˊ liamˇ；用玻纖維做成有伸縮性的長竿，上綁細薄鋒利如彎月形 的鐮刀。
34 大步簷：音 tai pu iamˇ；寬闊的屋簷。
放暑假个時節，阿哥同𠊎愛𢯭手剪菁仔，老妹較細毋曉得使剪 仔，驚怕佢剪著手，故所負責摘菁絲，摘一朝晨正摘著一細面盆仔，
阿姆會奢35佢講：「阿妹妹恁慶哦！」逐年到七、八月仔，學生仔放 暑假哩，菁仔也堵好大出，阿姆愛𢯭手割，使兩支割篙鐮正趕事，
𠊎兜細人仔愛去菁園𢯭擐菁仔，一弓一弓放上貨車項。從細𠊎兜就 係在田坵仔勞動中大个。
阿爸將割篙鐮一節一節挷到 8 想高36，大概有四丈零長，割菁 仔時竹篙搖來搖去，就像拿等大水筆，向等天頂寫無字天書；下把 仔又像在綠色畫布項畫符誥，阿爸使个通天筆，每一畫都會通天透 地。四歲个老妹著靴筒、蒙大手帕、戴帽仔，坐在工寮前个藤椅凳 項，就像細大人仔在該指揮𠊎兜做事，成時會問：「爸爸，你仰仔 無煮檳榔分𠊎傍飯？」阿爸應講：「檳榔毋係菜，無人煮來傍飯。」
老妹講：「該，你做得摎菁仔像葡萄共樣，洗來分𠊎食看啊好食無？」
阿爸笑到當大聲講：「做事聽著妹仔屎講話，就毋會𤸁哩！」
自民國 68 年賽洛瑪風搓後，菁仔大起價，比種其他个農作物 較好，賣較多錢，故所，農民大量種檳榔樹，田坵仔無人愛蒔禾仔 哩。六堆个農民三十零年來，好得有種檳榔樹，生活過得毋會差。
35 奢：音 saˊ；誇讚。
36 8 想高：音 badˋ xiongˋ goˊ；八節長的高度，一節約 5 尺半。
107 年全國語文競賽客家語朗讀文章高中學生組（四縣腔）
編號 09 號
【菜瓜】
徐姿華原作記得，阿婆好種菜，佢喊阿爸在屋面前搭瓜棚來種菜瓜，菜瓜 當會打，長透自家食毋忒，還做得送分鄰舍，該兜鄰舍當愛食阿婆 種个菜瓜，又萋又甜。
逐年正月半之前，阿婆就會同自家點37个菜瓜秧種落瓜棚下，
佢日日用心照顧，幼幼个菜瓜秧，當遽挷高、递藤，阿婆逐日會去 巡菜瓜棚，驚怕當在該递个嫩芽，分風吹㪐忒，佢會細心細意同瓜 藤牽轉瓜棚下，用索仔略略仔固定在豆隸竹項，分佢好順利跋往 上，兩、三禮拜過，菜瓜藤就递到棚頂哩。
五、六月仔，菜瓜當會開花、當會打，行在路項遠遠都看得著 屋面前該歸棚淰黃个菜瓜花，阿婆知𠊎兜細孲仔个嘴豺，當晝睡䟘 來，佢會去菜瓜棚摘十外蕊公个菜瓜花，略略仔洗淨搵攪好卵个麵 粉落鑊烰，烰一下仔嫩嫩个菜瓜花就虬起來，烰到金黃金黃，香香 酥酥个味緒餳到𠊎兜口涎水溚溚跌，阿婆用碗裝分𠊎這兜，𠊎兜細 孲仔暢壞咧，擎等碗就走到簷脣下坐等食，該燒燒、酥酥還過甜香、
甜香个味緒，𠊎到今還記得。
煮菜瓜，阿姆一等慶，佢成下會用薑嫲菣香，成下換用七層塔
37 點：音 diam；種子播入土中的動作。例：點菜仁。
來調味，毋管仰仔煮，該菜瓜湯就係恁好食，燒燒食當甜、當好食，
冷冷食來攪燒飯過還較慶，因為係自家種个菜瓜，阿姆當毋驚人 食，做下用兩條菜瓜煮一碗公湯，該菜瓜湯係正正菜瓜个湯，無加 半息水，正會恁清甜、恁好食。
阿婆異做家，下把仔菜瓜囥在葉下無巡著，兩日無摘過潦38咧，
阿婆會同佢留等，留來做種抑係留來做菜瓜布，等到這留下來个老 菜瓜皮變黃黃赤赤，阿婆就會割下來，同菜瓜皮剝忒，拿到坑脣抑 係圳溝脣，緊拌緊洗39，將菜瓜皮、菜瓜肉同菜瓜籽做下拌拌洗淨，
伸著白淨白淨、黃炣黃炣个菜瓜布，再過同菜瓜布拿去晒燥，就變 做洗碗同洗身當好用个菜瓜布哩！
八月半哩，菜瓜打較少咧，阿婆同阿姆會將菜瓜藤割忒，菜瓜 藤一割忒，阿姆就會遽遽用盎仔來承菜瓜水，莫看該菜瓜藤恁大 棚，正經會出菜瓜水个係菜瓜藤生在地泥下該頭，該菜瓜藤較壯旺 个，就承得著幾下罐菜瓜水，這菜瓜水係該個年代當華麗个保養 品，老老嫩嫩个細妹人做下當好用菜瓜水來搽面，聽講搽了菜瓜水 面會較白、較幼呢！
這菜瓜，雖然毋係麼个難得个植物，毋過因為佢一身都係寶，
對花、果到藤，做下有厥个用途，正會人人都愛佢；人也毋好看 輕自家，愛學習菜瓜精神，發揮自家个能力，自然就會有人欣賞
啦！
38 過潦：音 go lau；太熟。
39 緊拌緊洗：音 ginˋ panˊ ginˋ seˋ；邊摔打邊洗。
107 年全國語文競賽客家語朗讀文章高中學生組（四縣腔）
編號 10 號
【身影】
徐貴榮原作年正過忒，春雨落無停，寒咻咻仔！看等加兩日就愛開學上臺 北，屋下還無半點錢，毋知愛仰結煞正好？愐無計哩！無奈何，阿 爸講來去摎阿明伯先撥兜仔看啊！
阿明伯係車頭个副驛長，月月有月給，兼開礱間，又輒輒貌炭 仔請人燒，吾爸就係長透分佢請去燒炭个工人。該日朝晨，打早七 點零，雨正落過，天還濛濛，歸路濕溚溚仔，熟熟个路，哪有麼个 心情去欣賞雨後个景致。阿爸摎𠊎背等皮箱行頭前，𠊎擐等包袱跈 在後背，衫袋肚袋無兩點錢。
去到阿明伯屋下，阿明伯親暱暱仔行等出來，阿爸講：「吾倈 仔愛上臺北讀書，先撥五百箍分𠊎好無？等好天𠊎正做還你，分你 堵數40！」五百箍，對這下來講，見毋著麼个，一日个菜錢就毋止，
毋過在四十年前，係一般人半個零月个工錢。
「有麼个問題！上臺北五百箍仰會罅？」阿爸毋敢借恁多，等 阿明伯問忒，回講：「罅啦！罅啦！吾倈仔讀公費學校。」阿爸從 阿明伯手項接著五百箍个時節，頷頭又頷頭，承蒙又承蒙，緊講加 兩日仔，係好天就會跈等上工做事。𠊎心肚想：怕係阿明伯看著阿
40 堵數：音 duˇ sii；抵帳。
爸一生人忠實耿直，做人做事毋識梟批；又怕係看𠊎馴良乖巧，正 恁「阿莎力41」，實在還感心哪！
𠊎接過該五百箍，𠊎知，阿明伯个大恩大德，做毋得毋記得，
煞煞摎阿明伯恁仔細。阿明伯送𠊎兩子爺到門前，阿爸又摎佢講加 一到「恁仔細！」頷加一下頭。該五百箍，車單買忒三十六箍半，
就伸著四百零定定，愛用一學期呢！行到月臺，阿爸摎𠊎講：「車 錢當貴，毋好恁輒轉來，學期結束正轉好啦！」
天色濛濛，車頭西片个山紅花42開咧！探頭看阿爸，恁寒个落 雨天，赤腳馬踏，戴等笠嫲，著等舊衫，頭犁犁、慢慢行下月臺，
𨃰43過鐵枝，一步一步順等枕木，行上䃗崁，轉屋个身影，到今都 還記得；阿爸个話，還到耳公頭：「車錢恁貴，毋好恁輒轉哦！」
窮苦人个無奈啊！又想著該下摎阿明伯撥錢時，頷頭多謝个情景，
求人無恁該啊！
火車發行哩！初中正畢業个𠊎，想著麼个呢？開始留戀起故鄉 來，目汁含等，當多个理想，跈等火車載到臺北。
41 阿莎力：音 aˇ sa liˋ；乾脆。源自日語「あっさり(assari)」。
42 山紅花：音 sanˊ fungˇ faˊ；山杜鵑、野杜鵑。
43 𨃰過：音 kiam go；跨過。
