109 年全國語文競賽客家語朗讀文章高中學生組（四縣腔）
編號 01 號
【老鄰舍】
張美容原作戴在都市肚，隔壁鄰舍相堵頭1，盡多就笑笑仔、頷下頭，無 麼个有相借問，就算日時頭，儕儕也閂門閉戶罕得來往，看著恁 樣，𠊎特別懷念細人仔時个老鄰舍。
頭擺𠊎戴在莊下个街路肚，鄰舍多，大家長下這家行行、該 家尞尞。像對門做西裝个矮師傅屋下，大家就盡愛去，大人會去 討兜布尾布截來補衫褲，細人仔就拈兜布碎仔2來份家啦，暗晡頭 大人做閒吔，就在厥店亭下尞涼、打嘴鼓，一群細人仔就坐在做 西裝个長桌頂寫作業、讀書，就像自家屋下樣仔。
對門還有一間阿德伯个布店，店肚花剌必駁3个布仔，當餳 人，𠊎兜輒輒去看哪垤布仔較靚，到阿姆過家尞該下，就拉等佢 去剪布做衫，雖然失望个時節較多，毋過，阿姆个「下二擺、下 二擺」，還係分𠊎盡大个期待。在阿德伯个布店，長下夢想自家 著等阿姆做个長衫4，有肨肨个袖仔，有肨肨个裙；有加蕾絲，有
1 相堵頭：音 xiongˊ duˇ teuˇ；面對面遇到。
2 布碎仔：音 bu sui eˋ；碎布。
3 花剌必駁：音 faˊ laˊ bidˋ bogˋ；顏色多而雜。
4 長衫：音 congˇ samˊ；洋裝。
框木米5，像公主樣仔。
「咭咕咭6，兩片生翼，背囊屙屎，肚底絡食。」隔壁做木匠 个阿松伯，緊做事緊做令仔分𠊎兜揣，在脣項看佢鉋枋仔个細人 仔，無人揣得著，阿松伯擎起鉋仔，先摎兩片手扼个柄咭咭𢼛𢼛 敲核來，就開始鉋枋仔，無用个鉋熡7就在鉋仔个背囊頂哱等出，
鉋仔肚底个枋仔就鉋到亮亮，做得用哩，原來答案係鉋仔，實在 生趣。阿松伯毋單止好講笑，厥屋下滿地泥大大細細个樹矻仔8、 勼勼勼勼个鉋熡，也係𠊎兜最愛搞个東西，到這下，鼻公脣像人 還留等香香个木材氣味。
屋下上兩間个點心店乜盡記得，一到𤐙香油9个時節，歸街路 就香到奈毋得，這間點心店這下係有名个百年老店吔，一到尞 日，人就多到尖毋開腳10。𠊎乜長下會跍在錦榮叔个門口看佢鋸竹 仔、破篾仔，像變奇術11樣仔，做出竹交椅、竹椅轎12、竹桌、竹 凳。其他還有剃頭店、糖仔店、冰店、打鐵店等等，逐間就裝滿 𠊎童年个生活。「遠親不如近鄰」，對頭擺个𠊎來講，非常確 實，無想著這下，隔壁鄰舍嗄摎生份人共樣，分人十分个感慨！
5 框木米：音 kiongˊ mugˋ miˋ；鑲如木耳般皺褶的邊。
6 咭咕咭：音 gid guˋ gid；鉋木材的磨擦聲。
7 鉋熡：音 pauˇ loˊ；鉋出來的木頭屑。
8 樹矻仔：音 su kid eˋ；小木頭塊。
9 𤐙香油：音 biag hiongˊ iuˇ；爆紅蔥頭。
10 尖毋開腳：音 jiamˊ mˇ koiˊ giogˋ；比喻人極多。
11 變奇術：音 bien kiˇ sud；變魔術。
12 竹椅轎：音 zugˋ iˋ kieu；嬰兒坐的竹椅。
109 年全國語文競賽客家語朗讀文章高中學生組（四縣腔）
編號 02 號
【還福請人客】
曾秋梅原作正月半，莊肚个媽祖廟在該暗晡个子時會祭拜天公來起福，
祈求保佑風調雨順、國泰民安，莊民身體康健。秋收過後，舊曆 十月十五邊仔，廟項會舉辦盛大个祭拜儀式，來答謝各路神明保 佑莊肚百姓順序平安。有起就愛有還，這儀式𠊎兜講「還福」。
還福係六堆1客家莊个大事，前兩日，婦人家盡無閒，愛打紅 粄。紅粄毋係淨敬神用定定，還愛用紅粄去邀請嫁出去个阿姑、
姑婆，還有阿姆外家頭个親親戚戚來分𠊎兜請，故所愛打當多紅 粄。打粄仔个時節，阿姆打粄仔，𠊎兜細人仔愛𢯭手燒火，鑊頭 水滾無異久，阿姆就會喊：「鑊蓋掀開來，用檳榔扇撥撥啊，分 粄仔扯氣，係無扯氣，蒸出來个紅粄會像老阿婆个面，皺皺就毋 靚哩唷～」紅粄蒸好，就分配邀請个頭路，較遠一息仔个親戚分 吾哥騎自行車去發，阿姑嫁較近，就係𠊎這滿女仔負責送。
還福該日，朝晨八點敬阿公婆，廳下个神桌擺淰素果牲儀，
比看哪房準備个較傪樣。下晝三點邊仔廟項愛普渡，𠊎兜用「里
1 六堆：音 liugˋ duiˊ；包括位於屏東縣的中堆（竹田鄉）、先鋒隊（萬巒鄉）、後堆
（內埔鄉）、前堆（麟洛鄉、長治鄉）、左堆（佳冬鄉、新埤鄉）、右堆（高樹 鄉），以及與高樹鄉同為右堆的高雄市美濃區。
阿卡2」𢱤桌凳，阿姆㧡牲儀、金炮燭去廟坪。毋好看細莊頭，一 家一張桌，桌堵桌，廟坪就擺到過路毋得，尖到淰淰个人，廟肚 香火薰3到人目珠擘都毋得開。廟坪頭前還有做布袋戲，𠊎兜細人 仔拜喏過後，坐在楯頭4項看布袋戲，布袋戲都係講學老話聽毋 識，毋過布袋人公仔弄上弄下當生趣，逐個細人仔都看到嘴勺勺 仔，音響聲加紙炮聲，乒乒砰砰實在鬧熱。
還福第二日係請人客个日仔，親朋好友一打早就來坐尞吔，
屋下煮兩張桌請人客，對阿姑同阿姆佢兩儕來講無問題。毋多知 仔灶下就傳來阿姑个聲說：「阿志牯，菜煮到差毋多哩，好裁桌5 哩唷！」阿哥聽啊著遽遽在食飯間擺桌擺凳，阿姆同阿姑舀湯个 舀湯、兜菜个兜菜。哇～全部都係好食个客家料理，𠊎分封肉个 香味餳到佇毋著，煞煞添一碗飯攞豬肉味，淨這豬肉味𠊎就做得 食兩三碗飯哩！
還福請人客，係𠊎兜客家莊特有个俗。頭擺人講：「一代 親，二代表，三代就閒了了。」故所𠊎還係細人仔个年代，親戚 有來有去个感情，就靠還福請人客來維持，也係順續仔分細人仔 認識老親个方法。
2 里阿卡：音 liˊ a kaˋ；源自日語リアカー，人力手推車。
3 薰：音 fun；用物體燃燒所產生的煙來燻別的東西。。
4 楯頭：音 dunˋ teuˇ；原木段，可當凳子使用。
5 裁桌：音 caiˇ zogˋ；擺桌椅。
109 年全國語文競賽客家語朗讀文章高中學生組（四縣腔）
編號 03 號
【雲】
羅紫云原作有一擺出國去尞，恁好彩分𠊎坐在飛行機窗門脣，該日，天 時當好，看往出，阿姆哀正得，青青个天、白白个雲──青天白 雲，該強強分人毋記得个記憶，做一擺分𠊎看著哩，深深刻印在 吾个腦膈裡肚，不時會出現在夢中。
該雲个色彩仰會恁靚！有白白像當好食个綿綿冰、棉花糖，
也有像軟軟會分人燒暖个白棉花，有个像嬰兒仔恁得人惜想愛偷 唚一下厥紅霞紅霞个面頰卵。還有各種無共樣形投个款式，有像 觀音娘坐在蓮花座上騰雲，也有像關公手擎青龍偃月刀1大戰外星 人，有像高高大大个山仔，乜有像青堂瓦舍个屋仔、皇宮，還有 像走當遽个車仔、馬仔，分風吹散一垤一垤像鯉嫲个魚鱗，又有 像一群細人仔在運動坪打球仔、搞遊戲，還有恁多恁多講毋得出 个樣式，這千姿百態恁醉人分人痴迷个畫面，就係大自然「雲」
个奧妙。
研究雲个科學講安到雲物理學，這離𠊎忒遠哩，無法度理
1 青龍偃月刀：音 qiangˊ liungˇ ienˋ ngied doˊ；漢末三國時關羽所使用的兵器，也稱 關刀。
解，𠊎就知佢係水氣飽足時所形成个，離地面近个就係像𠖄等2面 紗，看毋清楚頭前个濛煙、濛紗煙；離地面遠个就係「雲」，雲 个名仔有當多種，有个雲出現毋會落水，有个雲出現會拚大雨。
天頂个雲千變萬化，根據祖先个經驗諺語，就測得著天時，歇在 山頂个𠊎，愛行路去學校讀書，故所，從細就有這個知識，打早 䟘床定著會企在門前向對門山看，山無戴帽仔、書包仔就輕幾下 兩；係「山戴帽──有水到」，該就刻耐仔愛背水衣仔、遮仔。
尤其分𠊎發夢就會嚇醒个就係六月天晒穀，上煎下煏，全無 好偷閃，故所就愛遽遽同穀晒燥好上倉，除忒愛煞猛耙穀、貶穀 以外，還愛注意天頂雲个變化。阿爸教𠊎：「天頂魚鱗斑，晒穀 毋使翻」；「雲向東一陣風，雲向南水連連」。看著惡雲頭出 現、烏雲弇啊來，水點黏時絮絮疏疏3，噼里啪啦就落等來，耙 穀、收穀毋得掣，緊張到強強會斷氣，係無拚命收穀，阿爸半年 个辛苦就會分水蔭壞，歸屋人就愛承鳥屎食哩。
較早愛靠祖先个經驗傳承來測天時，做事正會順序；現下人 較好命，有氣象局預報，單淨同電視、手機仔打開來就知哩。無 人會自動去關心天頂个雲生到圓抑係扁，正經係時代無共樣哩。
2 𠖄等：音 dungˊ denˋ；蒙著、蓋著。
3 絮絮疏疏：音 xi xi so so；狀聲詞，形容雨點散落的聲音。
109 年全國語文競賽客家語朗讀文章高中學生組（四縣腔）
編號 04 號
【苦瓜个味緒】
鄒瑞梅原作還記得𠊎做細人个時節，一到避暑放尞，𠊎兜六個細人仔當 好同阿爸共下去菜園做事，吾爸盡樂線，一路講笑科、一路唱山 歌，盡暢樂，連上屋个滿叔公、滿叔婆看著也跈等唱山歌。講斯 有影哦，「窮人毋使多，兩斗米就會唱歌」。
阿爸个菜園種當多菜，快菜花、調羹白1、番薯葉、吊菜仔、
菠蘺菜，還有細人仔一等毋好食个苦瓜。阿爸伸手摘兩條苦篤苦 篤个苦瓜放在籃仔肚，斡轉頭同𠊎兜細人仔講：「阿秀、阿德，
你看這苦瓜彎彎翹翹个紋路，就像人生个過程，有彎斡高低；特 別个味緒，就係人生个劇本，苦苦甘甘。」𠊎兜兄弟姊妹聽毋識
，戇戇企等。阿姆在邊脣看著嗄好笑同阿爸講：「樹老心空，人 老就癲倲2。你同十歲子講這兜，佢敢聽有？老癲倲，無愛同你打 嘴鼓哩，來去種菜較贏。」續等就去種菜秧仔，喊𠊎兜細人仔煞 煞去淋菜。
事做忒吔，一陣涼風吹過來，還鬆爽哦！瓜棚頂个細竻瓜也
1 調羹白：音 tiauˇ gangˊ pag；青江菜。
2 癲倲：音 dienˊ dungˊ；糊塗。
跈等風晃來晃去，阿姆摘兜細竻瓜仔分𠊎兜細人仔食，老弟、老 妹食到笑微微仔，清甜清甜个味緒，正經還好食哦！𠊎看等吊在 苦瓜棚項吊晃槓仔个苦瓜，心肝肚想毋解，竻瓜靚靚皮滑滑，食 起來脆脆盡有水分，阿爸嗄毋好食；苦瓜生到恁媸又苦丟丟仔，
阿爸仰會恁愛食，係𠊎就甘願食藥仔，阿姆還會分𠊎一粒糖仔傍 藥仔。
一直到𠊎大咧正知「苦瓜恁苦連皮吃，甘蔗雖甜愛呸渣」。
事情个好壞係無絕對个定論，看你仰般去選擇。阿姆一生勞碌無 怨嘆，日做夜做，刻耐仔做，淨為著家庭同子女，一息都無求自 家个福利，堵著不如意毋順心，目汁吞落肚，就像桌頂个苦瓜共 樣，苦苦甘甘，落嘴嘴尾會轉甘。阿姆刻苦耐勞付出一生人个心 血，包尾望著歸家族个圓滿、子兒有成，其實就做得安心享清福
。毋過，阿姆不求錦衣玉食、高車駟馬，共樣清淡過日，知足常 樂。
臨暗仔个灶下，阿姆炒一盤苦瓜，放在桌頂，細人仔揀食，
嘴翹翹。阿爸挾一垤苦瓜落嘴，嘴角一絲笑容，像係合意自家个 人生。
109 年全國語文競賽客家語朗讀文章高中學生組（四縣腔）
編號 05 號
【弓蕉旗】
郭亭妤原作民國四五十年該下，吾老屋戴在弓蕉市場脣項，該弓蕉市場 係青果合作社用來收貨、出貨个所在。記得該下見到「弓蕉旗1」 个時節，滿哪仔个蕉農做下會㧡弓蕉來這位繳，弓蕉市場个地泥 項擺到淰淰个弓蕉，在該個年代，若係弓蕉顧來靚，做得外銷去 日本，就拿得著較好个價數。
臺灣種个弓蕉香合甜，型款靚又飽2，日本人當阿𧩣，長間 會對臺灣進口弓蕉；毋過日本人買弓蕉个時間無定著，載弓蕉个 船期也無一定，弓蕉市場成半下一禮拜有兩、三日做得收弓蕉，
成半下一禮拜正收一、兩日仔定定。該下吂有電話，愛知合作社 哪時會收弓蕉，有弓蕉愛繳个農民，就愛隨時注意山頂有插白色 个弓蕉旗無？若有看著弓蕉旗，就係合作社通知大家該日有收弓 蕉，愛繳个人就愛遽遽割弓蕉去合作社繳，係講這期無赴著，下 二擺又毋知愛等到哪央時正有好繳哦！
𠊎兜也有一料林在該種弓蕉，尞日𠊎會同阿爸𢯭手共下去林 項做事，阿爸會趕這機會教𠊎仰仔種弓蕉，佢講逐頭秧定著愛間3 有八呎到一丈恁闊，等樹身大頭咧，就愛頓竹仔4同佢撐等，若
1 弓蕉旗：音 giungˊ zeuˊ kiˇ；白色的旗子。通訊不發達的年代，做為青果合作社通知 蕉農當日有收香蕉的信號。
2 飽：音 bauˋ liam；果實飽滿的樣子。
3 間：音 gam；間隔。
4 頓竹仔：音 dun zugˋ eˋ；將竹子用力向下插入土裡。
無，係堵著發大風，驚怕弓蕉樹身會分風吹橫忒，弓蕉打到較大 弓該下，又乜愛用布袋同佢落核5來，恁樣正毋會分果蠅叼著。毋 過盡得人惱个係會有象鼻蟲來咬弓蕉樹身，若係分佢咬入樹身 肚，無幾久歸頭仔弓蕉樹就會橫忒，因爭6恁樣，阿爸就會敲兜仔 農藥在竹篙項，分藥仔掞落弓蕉樹身項，恁樣象鼻蟲就毋敢偎兼 哩。
記得有一年，阿爸个弓蕉顧來異好，打來真靚，阿爸歸日仔 笑頭笑面，按算大船愛入港哩，暢到奈毋得。無想著嗄去挨著神 頭7，弓蕉吂好割就堵著大風搓，啦濟喲8緊報：風搓對菲律賓該向 來，緊行緊偎臺灣哩；氣象專家也喊大家愛注意，講風搓怕會對 中部過。𠊎兜聽著做下當緊張，歸屋下人透大風大雨做下去弓蕉 林𢯭頓竹仔、䌈索仔、刪弓蕉葉9，看做得同損失減到盡少無，結 果連續幾陣大風雨過，歸林个弓蕉做下轉淨淨10！該央時，𠊎看著 阿爸艱苦到硬硬腳膝頭都會出目汁，實在盡毋盼得，又毋知愛仰 仔安慰佢正好。
該載阿爸異擔輸贏，風搓正過忒，佢跈等湊大家共下去整理 弓蕉林，過從頭做起。無幾久，歸林个弓蕉就又青溜溜仔哩！阿 爸該種硬頸、堅耐、毋認輸个精神係𠊎兜个模範，分𠊎兜這陣細 人仔學習著，無論堵著麼个困難，做下愛堅心堅持落去。
5 落核：音 labˋ hed；套緊。
6 因爭：音 inˊ zenˊ；因為。
7 挨著神頭：音 aiˊ doˋ siinˇ teuˇ；比喻運氣不好、遇事不順利，倒楣的樣子。
8 啦濟喲：音 laˇ ji ioˋ；源自日語ラジオ，收音機。
9 刪弓蕉葉：音 xienˊ giungˊ zeuˊ iab；修剪香蕉葉，以減少風阻。
10 轉淨淨：音 zon qiang qiang；毀損殆盡。
109 年全國語文競賽客家語朗讀文章高中學生組（四縣腔）
編號 06 號
【阿公个三種身分】
鄭國南原作客家莊係阿公个胞衣跡，歇到今會八十年吔。
阿太係學老人，因為食頭路个關係，就在這莊頭落腳。阿公 屋下有六姊妹1，細細仔學講話起勢，阿太就教佢學老話。三、四 歲後，尋隔壁个細人仔伴搞尞，佢兜通概係客人，一日到暗攞啊 攞欸，毋使人教，無幾久厥客話就異曉得講吔，顛倒華語係讀國 民學校正學个。
阿公班項有外省人、學老人，乜有客人，哪種人佢都攞得 合，因為講話無麼个腔頭，故所就有人問佢到底係學老人抑係客 人？乜有人挑事問佢係毋係「阿山仔2」？阿公生來高溜高溜仔3， 面形仔長長，白淨白淨，確實有外省人个形投，下後做兵、食頭 路、參加各種活動，都分人有這三種身分个疑狐。恁仔，阿公到 底係麼个人呢？
1 六姊妹：音 liugˋ jiˋ moi；六姊妹，兄弟姊妹有六人，凡兄妹或姊弟中包含有女生客 語盡稱「姊妹」。
2 阿山仔：音 aˊ sanˊ eˋ；當時對外省人的不禮貌稱呼。
3 高溜高溜仔：音 goˊ liuˊ goˊ liuˊ eˋ；瘦瘦高高的。
5 餒：音 neˊ；微弱。
6 沙鼻哩喲：音 saˊ pi lioˊ；猶如說「神氣起來了」。
阿公在客家莊歇吔三代人，食、著、歇、行、教育、娛樂，
跈等時代个腳步變化盡大，唯一無變个係佢既經認定自家係客 人。這下分佢最愁慮个係客話个火種，嗄緊來緊細、緊來緊餒 5。 佢識同人道嘆：「在這臨將會斷薪火个時節，客人愛有危機意識 个覺醒，毋會講客話就無客人，無客人敢還有客家文化？毋好等
『禾黃水落，飯熟火著。』該就冤枉吔哪！」係有心傳承客話，
就同打井共樣，總愛大人儕有堅定个心意正做得著。
屋下就係一隻搖籃，哀仔係推手，爺仔係舵手，細人仔个言 行，就在這兩雙推動搖籃个手項長大，可見爺哀个用心有幾重要 仔。
阿公還識比一個例仔分人聽：「有一個客家同事，厥餔娘係 學老人，降有兩個妹仔。有一日帶佢五歲，又靚又得人惜个大妹 仔來辦公廳，同事相爭弄佢。佢就沙鼻哩喲 6！客話、學老話、華 語同英文對答溜溜滾，這係仰仔學來个呢？問這同事後正知得，
佢同厥餔娘試著阿姆个話做毋得失落，兩片个大人儕都非常認 同，乜盡用心來教自家个話。細人仔歇在爺仔屋下，阿公阿婆就 用客話教佢兜；轉妹家个時節，姐公、姐婆又用學老話教佢兩 儕，在幼稚園上課，還有先生用華語、英文雙語教學。其實學各 種語言，對起勢學講話个細人仔來講，一息仔困難都無，𠊎兜六 姊妹就係最好个例仔。」
雖然阿公係學老底、外省面，毋過，佢還係盡中意佢做客人 个身分。
109 年全國語文競賽客家語朗讀文章高中學生組（四縣腔）
編號 07 號
【時計果
1】
徐姿華原作尞日，同屋下人共下去遶山花，在路脣看著有幾攤仔農家人 在該賣自家種个菜，就行前去遶遶看看啊，有晒到淰黃个筍乾、
烏到出油个老蘿蔔乾、有金黃色飽米个甜包粟、浸青个竻瓜、柑 紅色个大竻瓜、生來像青色玫瑰花个菠蘺菜，嫩青个香緣瓜、各 色个甜椒仔，還有有特殊香氣个山當歸、山胡椒，這兜又靚又萋 个菜像在該相拚，擛手愛餳人去買；菜攤仔頭前，還有用紅色細 網袋仔裝等一袋一袋个時計果，該深吊菜色帶有細黃點个外皮略 略仔皺皺，恬恬等曉得欣賞佢个有緣人。
愐起還細个時節，食雜無這下恁豐湧，一擺放尞，阿哥湊𠊎 同老弟共下去大圳背竹林肚拈野生个時計果，毋過該竹林無人治 理，外圍草當塞，無麼个人敢去；阿哥擎一支伐鐮、揹等袋仔，
𠊎同老弟擐等家濟仔2、著等水靴仔，愛去竹林肚「冒險」哩！
阿哥伐開一條細路仔分𠊎兜行，因為竹仔生到當拶，竹林肚 烏疏疏仔，幾絲日頭花仔對竹葉縫肚照入來，燥忒个竹葉賁賁攤 在地泥項，腳躪著囥在燥竹葉下个竹杈還會嗶嗶噼噼，當刺激。
該位正經有當多時計果，地泥下這一粒該一粒，有兜過潦3吔，連
1 時計果：音 toˇ kie soˋ；源自日語トケイソウ（日語漢字：時計草），百香果。
2 家濟仔：音 gaˊ ji eˋ；草編手提袋。
3 過潦：音 go lauˇ；過熟。
皮都綿忒吔；有兜還當萋，該媸媸皺皺个外皮，一息仔都毋餳 人，毋過擘開來，裡肚金黃个肉包等烏烏个仁，香香酸甜个味 緒，仰會忍得核？兩下半𠊎就囫4忒一粒，還想愛尋尾，阿哥帶頭 緊拈緊食，酸甜个味5對嘴角、手指罅流出來，實在還好食哪！𠊎 兜賠命仔囫，一下仔歸地泥都係𠊎兜擲忒个殼，蚊仔也鼻著香味 哩，在𠊎兜个耳公脣飛來飛去，叼到人這一胮6、該一胮，又癢又 虐削，手黏黏越爪越癢，蚊仔也緊來緊惡，歸陣仔拑過來仰仔掊 到掊毋走，硬硬都會分蚊仔扛走。
老弟分蚊仔叼到無結無煞，哇哇滾討愛轉，阿哥喊𠊎兜遽遽 拈時計果，講愛同家濟仔裝淰正做得轉。老弟起雷追張人7，毋肯 拈還過手賤，緊揪墜下來个時計果藤仔搞，阿哥罵佢、佢越勢挑 挑，這條揪一下、該條𢶀8一下，當多吂異熟个時計果也畀揪揪下 來。佢搞到當歡喜，手拉等一條藤出力𢶀，哱聲仔，一條比大人 手指公還較大尾个燥尾𤊶堵好跌到厥頸根項。老弟著下驚，想愛 用手去扡，阿哥手腳伶俐煞煞跳過去用竹杈同蛇哥掊開，好得阿 哥反應好，無若係分該燥尾𤊶咬著，無死也半條命咧！
自該擺過，老弟當服阿哥，兩兄弟感情也當好；該日拈轉去 个時計果，歸家人做下食得著，阿姆還用時計果來焗冰，冰涼酸 甜个味緒，到今還記得。
4 囫：音 fud；囫圇吞下。
5 味：音 mi；湯汁。
6 胮：音 pongˇ；皮膚上因蚊蟲叮咬產生的小腫塊。
7 起雷追張人：音 hiˋ luiˇ duiˊ diongˊ nginˇ；使性子鬧脾氣。
8 𢶀：音 cui；用力拉扯。
109 年全國語文競賽客家語朗讀文章高中學生組（四縣腔）
編號 08 號
【灌煙腸】
陳志寧原作臘月，過再無一隻月就係過年哩！在物質缺乏个年代，愛食 無恁利便，家家戶戶係有閒，總係會利用這年前，準備兜仔過年 會用著个年貨，做兜仔鹹豬肉、豬膽肝，其中最餳𠊎个就係煙 腸。
在臺灣南部六堆1地區，到吔年下時節，雨水少、日頭本本像 熱天恁烈。這下，係來做鹹豬肉、抑係灌煙腸都係最好个時節。
因為田坵事這下較少，阿婆盡好在這段日仔，加減做兜仔鹹豬肉 同煙腸，好在過年个時節有豐沛个菜色。
𠊎盡好同阿婆𢯭手灌煙腸，好搞又有好食。該兜灌好个煙腸 又做得放盡久，等到開學愛讀書个時節，帶飯篼仔又做得有好加 一項菜。灌煙腸个時節，阿婆除忒會先同賣豬肉个鏡福叔公買幾 斤仔後腿肉，佢乜會加買一息仔肥豬肉。鏡福叔公同這兜肥、腈 个豬肉做下放在機器裡背，佢絞幾下仔，該兜本成係一大垤一大 垤个豬肉，就變到綿綿對機器出口尖出來。阿婆拿吔絞好个豬
1 六堆：音 liugˋ duiˊ；包括位於屏東縣的中堆（竹田鄉）、先鋒隊（萬巒鄉）、後堆
（內埔鄉）、前堆（麟洛鄉、長治鄉）、左堆（佳冬鄉、新埤鄉）、右堆（高樹 鄉），以及與高樹鄉同為右堆的高雄市美濃區。
肉，再同叔公買加一息仔灌煙腸用个豬小腸，這下𠊎俚兩子阿婆 就有好無閒一朝晨哩。
𠊎𢯭手拿面盆、大酒漏仔，阿婆去擐高粱、準備五香散。佢 同絞好个豬肉同五香散攞兜仔高梁酒操操啊，該香味黏時就歸个 灶下都係。續等阿婆用酒漏仔落等2豬腸衣，該兜豬肉就對酒漏塞 入去，豬肉黏黏毋係異好塞入豬腸衣，阿婆就用筷仔揰。等豬肉 塞入腸衣，𠊎就𢯭手揢下去同豬腸塞淰淰。
等豬肉塞淰腸衣，阿婆就用厥手指去夾，佢一夾就用棉紗線 䌈一下做一截，該一截个大細堵堵好帶飯篼仔傍飯。等歸條仔灌 好，該煙腸看起來就像一條大條个鍊仔。將佢兜朗在日頭下晒，
十分餳人食，該晒煙腸个禾埕黏時就香馥馥仔3。阿婆驚貓仔無就 狗仔會來偷食，佢會喊𠊎掌等。但係阿婆從來就毋知，原來佢使 著一隻大貓牯掌。每日佢愛收起來个時節，多多少少都會少一細 截。該截毋見忒个，等到臨暗頭暖燒水个時節就會分𠊎順續仔焙 焙啊做點心。
下後，𠊎出外去讀書吔，社會進步到煙腸愛買就有，毋使自 家做。但係阿婆無胚著，陪佢到百年歸老个該隻大貓仔，係學校 一有放尞就會轉屋下陪佢。該幾下年偷扡阿婆个煙腸个故事，還 本本留在大貓仔个回憶中。
2 落等：音 labˋ denˋ；套著。
3 香馥馥仔：音 hiongˊ pudˋ pudˋ eˇ；香噴噴。
109 年全國語文競賽客家語朗讀文章高中學生組（四縣腔）
編號 09 號
【祕密基地】
林伯殷原作逐年寒天，𠊎會去行屋後背个一條山路，這條山路頭站1有打 紅毛泥，看起來就像係一條普通个產業道路定定，無麼个見奇，
毋過，蹶上山峎頂2，變做泥路後，這條山路黏時就轉成𠊎个祕密 基地，見擺行入這位，𠊎歸隻人就變到非常鬆爽。這條路分大樹 摎竹仔遮塞塞3，晒毋著麼个日頭，地泥下舖淰淰跌下來个樹葉仔 同竹葉，有兜樹仔、竹仔橫在路徑頭，有兜石碫仔同路脣个石䃗 崩忒咧，歸條路看起來就知無麼个人行，這下，會行這條路个 人，大體就係䟓䟓來行山路運動个人。𠊎來這，除忒運動以外，
還做得感受這片山林个恬靜，同時，分風吹、聽鳥鳴、看大樹、
跺樹葉仔，完全聽毋著山下个車仔聲摎機器聲，久吔，𠊎嗄4起私 心，毋盼得分人知這條山路，就驚忒多人來攪操5𠊎个祕密基地。
𠊎个祕密基地會驚人知，係因為祕密基地無恁該尋，還過，
祕密基地係分忒多人知咧，該敢還係祕密基地。還細个時節搞囥 人尋，大家想盡辦法囥起來，無愛分做鬼个人尋著，有幾儕特別
1 頭站：音 teuˇ cam；前面一段。
2 山峎頂：音 sanˊ gien dangˋ；山崗上，山稜線上的高點。
3 遮塞塞：音 zaˊ sedˋ sedˋ；遮得密密的。
4 嗄：音 sa；反而。
5 攪操：音 gauˋ cau；打擾。
有辦法，逐擺就囥到人喊「放牛食草6」正走出來，大家當想知佢 兜囥在哪位，就會偷偷仔跈等佢兜去囥，毋過忒多人囥共下个結 果，總係兩下半就分鬼發覺著，故所，搞囥人尋个時節愛當細心 細意，一方面愛尋所在來囥，一方面還愛提防自家囥个位所會分 別儕知著無？對𠊎來講，祕密基地毋單淨係摎自家囥起來个地方 定定，還較重要个係，祕密基地係放冗7自家个位所，在該，人做 得隨在自然，無麼个愁慮，不論時間長短，就算十分鐘、半點鐘 乜值8。
人个心情總係變去變轉，有時節想尋人坐尞、湊伴搞，有時 節又想尋隻祕密基地囥起來，分自家充電一下。讀國小該下，成 時摎同學冤家過後，𠊎會自家行細路仔穿過學校崁下个竹頭，去 陂塘脣打水漂仔。讀國中个時節，係講考試考毋好，𠊎會騎等自 行車去山肚、去河壩尞。到較大兜仔，堵著想毋解个問題，𠊎會 去圖書館揙兜仔書，無就尋隻角頭9个位所來恬恬坐。這下，𠊎好 去行人少个山路。從細到大，𠊎隨時都有祕密基地，但係，𠊎毋 記得祕密基地換過幾多擺吔？有兜祕密基地也早就尋毋著咧！
最尾，𠊎想偷偷仔請問你一下，你个祕密基地在哪位？有分 人發現無？
6 放牛食草：音 biong ngiuˇ siid coˋ；在此指玩捉迷藏的術語。只剩下少數人未被找 到時，就可以喊這句話，提醒還在躲藏的人可以現身，遊戲要準備重新開始了。
7 放冗：音 biong ngiung；放鬆。
8 乜值：音 me dad；也值得。
9 角頭：音 gogˋ teuˇ；角落。
109 年全國語文競賽客家語朗讀文章高中學生組（四縣腔）
編號 10 號
【田頭田尾齣事
1多】
劉玉蕉原作「唧唧唧、唧唧唧」麼个東西叫2唧唧？土狗仔？草蜢仔？𠊎 輕手輕腳行兼去，誒！佢兜嗄恬聲咧，電線頂高个屋簷鳥相等 𠊎，又乜恬索索仔！仰仔講呢，𠊎毋係人客，嗄有該攪杈著人个 敗勢心情。另聲一喊：「阿爸，𠊎轉來咧！」聲一出，嗄來嚇走 一陣鳥仔。臨暗仔个日頭，柔柔閃到山背去，留著霞痕滿天，靚 到奈毋得哦！
屋脣个兩坵田，係祖產，這下異好價，毋過阿爸毋盼得賣 忒。用天然个方式，阿爸年年蒔田收穀，挨个精米、糙米，歇都 市个阿叔、做生理个阿伯、阿姑、叔婆，做下分有份。田脣、田 角阿婆就會加減種兜仔菜，因為田坵長年無洩藥仔，鳥仔多、蟲 仔也多，無讀書个尞日，愛同阿婆𢯭捉蟲仔，係𠊎發夢都會發痴 驚个事頭，該青青、軟濟濟仔3个菜蟲，在嫩嫩个菜莖、菜葉項蠕 蠕動蠕蠕動，唉！幾得人畏咧！萬一力頭無使好勢，在手尾項佢 還會屙腸翻肚分你看，愐著該伸一層皮个細細生命，就恁樣分你 收忒，若雞嫲皮敢毋會膨膨起4？總講一句，除忒𢯭捉蟲仔這項 事，田頭田尾還係𠊎一放尞轉，就飆上飆落个好所在哦！
1 齣事：音 cudˋ sii；戲碼，名堂、花樣。
2 叫：音 gieu；昆蟲鳥獸發聲。
3 軟濟濟仔：音 ngionˊ jiˇ jiˇ eˋ；軟綿綿。
4 膨膨起：音 pong pong hiˋ；接連冒出來。
蛇哥係人客，毋過異少看著，因為恁樣，𧊅仔聲四時無斷，
正蒔个禾田肚，𧊅仔5拂尾泅水，直直到斷尾生腳、跳上田脣面 晒日頭，佢兜生趣个身影，輒輒餳著𠊎恬恬跍在田脣，撩𧊅
仔、撳細𧊅仔！跋起身，就嚇到這兜大𧊅仔、細𧊅仔發屎驚，相 賽跳落田肚去。𠊎在田脣飆一輪，「𠺣、𠺣𠺣𠺣……」飆幾煞 猛、聲就幾密，實在好搞！跈等𧊅仔聲，禾田肚會出現一圈一圈 个水痕，越遠越大，一圈落6一圈，圓箍想落該倒映在田肚个青天 白雲，還過彎彎翹翹7个屋舍，毋過，自從都毋識落著麼个好東 西。
青溜溜仔个禾仔日見日挷高，清風吹過，禾仔就絮絮疏疏8講 細聲話。阿爸挷稗仔，𠊎褲腳攝高高跈佢落禾田，打赤腳躪入濫 泥肚，腳撓撓，像幾下百隻細魚仔吮腳囊肚、撓腳底，清清涼涼 个感覺，直直透到心肝頭，唉呀！難怪阿爸恁好蒔禾，還好搞 哪！禾黃時節，阿爸愛紮禾稈人嚇鳥仔，田頭放一隻、田尾放一 隻，中央還過愛頓9兩隻，老妹花剌必駁10个衫褲盡適當，衫褲一 著，三角旗一牽，哇！歸大片田坵鬧熱吱唶，實在生趣！毋過，
精砉砉仔个鳥仔無嚇著，嗄輒輒嚇著暗晡頭䟘床屙尿个𠊎。割禾 哩，割禾機同禾仔剃三分頭，一行過田坵就清爽清爽，電線頂高 歸排仔等等絡食个屋簷鳥，今這下急壞哩！
田頭田尾齣事多，打幫阿爸个堅持，網路以外，𠊎這兜還有 另外个一種選項哦！
5 𧊅仔：音 guaiˋ ngiam eˋ；蝌蚪。
6 落：音 labˋ；套。
7 彎彎翹翹：音 vanˊ vanˊ kieu kieu；此處指因受水波影響而歪斜不正。
8 絮絮疏疏：音 xi xi so so；形容細碎而斷續的摩擦聲。
9 頓：音 dun；用力向下打擊。
10 花剌必駁：音 faˊ laˊ bidˋ bogˋ；花色駁雜。
109 年全國語文競賽客家語朗讀文章高中學生組（南四縣腔）
編號 01 號
【老鄰舍】
張美容原作歇在都市項，隔壁鄰舍相堵頭1，最多就㖸㖸仔、頷下頭，無 麼个有相借問，就算日時頭，儕儕也閂門閉戶罕得來去，看著恁 仔，𠊎特別懷念還細時節个老鄰舍。
頭擺𠊎歇在鄉下个街路項，鄰舍多，大家輒常這家行行、該 家尞尞。像對門做西裝个矮師傅屋下，大家就盡愛去，大人會去 討兜布尾布截來補衫褲，細人仔就拈兜布碎仔2來搞家啦飯仔，暗 晡頭大人做閒吔，就在厥个簷頭下尞涼、打嘴鼓，一綱細人仔就 坐在做西裝个長桌項寫作業、讀書，就像自家屋下樣仔。
對門還有一間阿德伯个布店，店裡背花喇必駁3个布仔，一等 餳人，𠊎等輒輒去看哪料布仔過靚，到阿姆過家尞時，就挷等佢 去剪布做衫，雖然失望个時節過多，毋過，阿姆个「下擺、下 擺」，還係分𠊎盡大个期待。在阿德伯个布店，輒輒夢想自家著 等阿姆做个洋裝，有膨膨个袖仔，有膨膨个裙；有加緄邊，有拈 摺4，像公主樣仔。
1 相堵頭：音 xiongˊ duˇ teuˇ；面對面遇到。
2 布碎仔：音 bu sui eˋ；碎布。
3 花喇必駁：音 faˇ laˇ bid bog；顏色多而雜。
4 拈摺：音 ngiamˊ zabˋ；鑲如木耳般皺褶的邊。
「咭𢼛咭5，兩片生翼，背囊屙屎，肚底討食。」隔壁做木匠 个阿松伯，緊做事，緊做令仔分𠊎等揣，在脣口看佢鉋枋仔个細 人仔，無人揣得著，阿松伯拿起鉋仔，先同兩片手揢个柄咭咭𢼛 𢼛敲緪來，就開始鉋枋仔，無用个鉋屑仔6就在鉋仔个背囊項哱等 出，鉋仔底下个枋仔鉋到光溜溜7做得用吔，原來答案係鉋仔，實 在生趣。阿松伯毋單只好講㖸，佢屋下滿地泥大大細細个樹矻 仔、勼勼勼勼个鉋屑仔，也係𠊎等最好搞个東西，到這下，鼻公 脣還留等香香个樹材味緒。
屋下上片兩間个點心店乜盡難忘，一到𤐙蔥頭8个時節，歸條 路就香到佇毋著，這間點心店這下係有名个百年老店吔，一到尞 日，人就多到尖毋開腳9。𠊎乜不時會跍在錦榮叔个門口看佢鋸竹 仔、破篾仔，像變奇術10樣仔，做出凴竹椅、竹椅轎11、竹桌仔、
竹凳仔。其他還有剃頭店、糖仔店、冰店、打鐵店等等，間間囥 滿吔𠊎童年个生活。「遠親不如近鄰」，對頭擺个𠊎來講，非常 確實，無想著這下，隔壁鄰舍嗄同生份人共樣，分人十分感慨！
5 咭𢼛咭：音 gid gog gid；鉋木材的磨擦聲。
6 鉋屑仔：音 pauˇ sebˋ eˋ；鉋出來的木頭屑。
7 光溜溜：音 gongˊ liuˇ liuˇ；光滑的樣子。
8 𤐙蔥頭：音 biag cungˊ teuˇ；爆紅蔥頭。
9 尖毋開腳：音 jiamˊ mˇ koiˊ giogˋ；比喻人極多。
10 變奇術：音 bien kiˇ sud；變魔術。
11 竹椅轎：音 zugˋ iˋ kieu；嬰兒坐的竹椅。
109 年全國語文競賽客家語朗讀文章高中學生組（南四縣腔）
編號 02 號
【還福請人客】
曾秋梅原作正月十五元宵節，該暗晡仔，莊肚个媽祖廟子時會敬天公來 祈福，祈求保佑風調雨順、國泰民安，莊民身體康健。秋收過 後，舊曆十月十五邊仔，廟項會舉辦盛大个敬神儀式，來答謝各 路神明保佑莊肚百姓順序平安。有祈就愛有還，這儀式𠊎等講
「還福」。
還福係六堆客家莊个大事，前兩日，婦人家盡無閒，愛做龜 粄。龜粄毋係淨敬神用个，還愛用龜粄去邀請嫁出去个阿姑、姑 婆，還有阿姆外家頭个親親戚戚來分𠊎等請，故所愛做蓋多龜 粄。阿姆做粄仔个時節，𠊎等細人仔愛𢯭手燒火，鑊頭水滾無幾 久，阿姆會喊：「鑊蓋掀開來，用檳榔扇撥撥啊，分粄仔扯氣，
係無扯氣，蒸出來个龜粄會像老阿婆个面，皺當當就毋靚吔唷
～。」龜粄蒸好，分配邀請工作，過遠一息个親戚分吾哥騎自轉 車去發，阿姑嫁過近，就𠊎這滿妹仔負責送。
還福該日，朝晨八點敬阿公婆，廳下1神桌擺滿素果牲儀，比 看哪家準備過傪个樣仔。下晝三點左右廟項愛渡孤，𠊎等用「里
1 廳下：音 tangˊ haˊ；在六堆地區指的是祭拜祖先的祠堂。
阿卡2」𢱤桌凳，阿姆㧡牲體金香紙燭去廟坪。毋好看細莊頭，一 家一張桌，桌堵桌，廟坪就擺到過路毋得，尖到滿滿个人，廟肚 香火煙到人目珠擘都毋得開。廟坪頭前還有做布袋戲，𠊎等細人 仔唱喏後，坐頓頭仔3看布袋戲，布袋戲都係講學老話聽毋識，毋 過布袋人公仔弄上弄下蓋趣妙，每個細人仔都看到嘴杓杓仔，音 響聲加紙炮聲，並並磅磅實在鬧熱。
還福第二日係請人客个日仔，親親戚戚一大早就來坐尞吔，
煮兩張桌請人客，對阿姑同阿姆佢兩儕來講無問題。無幾久灶下 傳來阿姑个聲說：「阿志牯，菜煮到差毋多吔，好擺桌吔唷！」
阿哥聽啊著，共快在廊仔下4擺桌擺凳，阿姆同阿姑舀湯个舀湯、
捧菜个捧菜。哇～全部都係好食个客家料理，𠊎分封肉个香味餳 到佇毋著，遽啊添一碗飯攞豬肉味，淨這豬肉味𠊎就做得食兩三 碗飯吔啦！
還福請人客，係𠊎等客家莊特有个風俗。頭擺人講：「一代 親，二代表，三代就閒了了。」故所𠊎還細人个年代，親戚有來 有去个感情，就靠還福請人客來維持，順續仔分細人仔認識老親 个方法。
2 里阿卡：音 liˊ a kaˋ；源自日語リアカー，人力手推車。
3 頓頭仔：音 dunˋ teuˇ eˋ；木製小凳子。
4 廊仔下：音 longˇ eˋ haˊ；屋簷下可供通行的部分。
109 年全國語文競賽客家語朗讀文章高中學生組（南四縣腔）
編號 03 號
【雲】
羅紫云原作有一擺出國去尞，恁好彩分𠊎坐在飛行機窗門脣，該日，天 時盡好，看啊出去阿姆哀正得，青青个天白白个雲──青天白 雲，該差一息分人毋記得个記憶，做一擺分𠊎看著吔，深深刻印 在𠊎个腦海裡背，不時會出現在夢中。
該雲个色彩仰會恁靚？有白白像盡好食个綿綿冰、棉花糖，
乜有像軟軟會分人燒暖个白棉花，有个像嬰兒仔恁得人惜，想愛 偷唚一下紅霞紅霞个面頰卵。還有各種無共樣形仔个款式，有像 觀音娘坐在蓮花座項騰雲，有像關公手背1青龍偃月2刀大戰外星 人，有像高高大大个山，乜有像青堂瓦舍个屋仔、皇宮，還有像 走盡遽个車仔、馬仔，分風吹散一片一片像鯉嫲个魚鱗，又有像 一陣細人仔在運動坪打球仔、搞尞，還有盡多盡多講毋得出个樣 式，這千姿百態恁餳人分人痴迷个畫面，就係大自然「雲」个奧 祕～。
研究雲个科學講這安到雲物理學，這離𠊎忒遠吔，無法度理
1 背：音 bi；持拿、高舉。
2 偃月：音 ianˋ ngiad；半月形的器物。
解，𠊎淨知佢係水氣飽足時所造成个，離地面近个就係像戴等面 紗，看毋清楚頭前个濛煙、濛露，離地面遠个就係「雲」，雲个 名稱有盡多種，有个雲出現毋會落雨，有个雲會落大嫲雨。天頂 个雲千變萬化，根據祖先个經驗諺語，就做得預測天時，歇在山 頂个𠊎，愛行路去學校讀書，故所從細就有這個知識，打早䟘床 定著會企在門前向對門山看，山無帽書包就輕幾下兩，係「山戴 帽──有水到」，嘎就刻耐仔愛背水衣、遮仔。
尤其分𠊎發夢就會嚇醒个係六月天晒穀，上煎下煏，全無好 偷閃，故所就愛遽啊同穀晒燥好入倉庫，除仔愛煞猛耙穀、揙穀 以外，還愛注意天頂雲个變化。阿爸教𠊎：「天頂魚鱗斑，晒穀 毋使翻。」、「雲向東一陣風，雲向南水連連。」看著惡雲頭出 現烏雲弇啊來，雨點黏時胥胥疏疏，噼哩啪啦就落等來，耙穀、
收穀毋得掣，緊張到險險會斷氣，係無拚命收穀，阿爸半年个辛 苦就會分雨打走，歸屋下人就愛承鳥屎食吔。
弄擺愛靠祖先个經驗傳承來預測天時，做事就會順序；現下 人過好命，有氣象局預測發報，淨愛同電視、手機仔打開來就知 吔。無人會自動去關心天頂个雲生著圓抑係扁，時代斷真無共樣 吔。
109 年全國語文競賽客家語朗讀文章高中學生組（南四縣腔）
編號 04 號
【苦瓜个味緒】
鄒瑞梅原作還記得𠊎做細人仔个時節，一到避暑放尞，𠊎等六個細人仔 盡好同阿爸共下去菜園做事，吾爸盡樂線，一路講笑科、一路唱 山歌，盡樂暢，連上屋个滿叔公、滿叔婆看著也跈等唱山歌。講 就有影哦，「窮人毋使多，有兩斗米就會唱歌」。
阿爸个菜園種盡多菜，快菜花、調羹白1、番薯葉、吊菜仔、
高麗菜，還有細人仔一等毋好食个苦瓜，阿爸伸手摘吔兩條苦篤 苦篤个苦瓜放在籃仔肚，翻過頭同𠊎等細人仔講：「阿秀、阿德
，你看這苦瓜彎彎翹翹个紋路，就像人生个過程，坎坎坷坷；特 別个味緒，就係人生个劇本，苦苦甘甘。」𠊎等兄弟姊妹聽毋識
，戇戇仔應等。阿姆在脣口看著嗄好㖸啊同阿爸講：「樹老心空
，人老就顛倲。你同十歲子講這兜，佢敢聽有？老顛倲，無愛同 你打嘴鼓吔，來去種菜過有影。」續等就去種菜秧仔，喊𠊎等細 人仔遽啊去淋菜。
事做核吔，一陣涼風吹過來，還鬆爽哦！瓜棚頂个細竻瓜也 跈等風晃來晃去，阿姆摘一息細竻瓜分𠊎等細人仔食，老弟、老
1 調羹白：音 teuˇ gangˊ pag；青江菜。
妹食到笑咪咪仔，清甜清甜个味緒，斷真還好食哦！𠊎看等吊在 苦瓜棚頂吊晃槓仔个苦瓜，心肝肚愐毋解，竻瓜靚靚皮滑滑，食 起來脆脆盡有水分，阿爸嗄毋好食；苦瓜生到恁媸又苦丟丟仔，
阿爸仰仔恁好食，係𠊎就甘願食藥仔，阿姆還會分𠊎一粒糖仔傍 藥仔。
一直到大吔正知「苦瓜恁苦連皮吃，甘蔗雖甜愛呸渣」。事 情个好壞係無絕對个定論，看你仰仔去選擇。阿姆一生勞碌無怨 嘆，日做夜做，刻耐仔做，淨為著家庭同子女，一息都無求自家 个福利，堵著無如意毋順心，目汁吞落肚，就像桌頂个苦瓜共樣
，苦苦甘甘，落嘴嘴尾會轉甘。阿姆刻苦耐勞付出一生人个心血
，包尾望著歸家族个圓滿、子女有成，其實就做得安心享清福。
但係，阿姆無求錦衣玉食、高車駟馬，共樣清淡過日，知足常樂
。
臨暗个灶下，阿姆炒一盤苦瓜，放在桌頂，細人仔揀食，嘴 翹翹。阿爸夾一塊苦瓜入口，一絲笑容，像係合意自家个人生。
109 年全國語文競賽客家語朗讀文章高中學生組（南四縣腔）
編號 05 號
【弓蕉旗】
郭亭妤原作民國四五十年該下，吾老屋歇在弓蕉市場脣口，該弓蕉市場 係青果合作社用來收貨、出貨个所在。記得該下仔見看著「弓蕉 旗1」个時節，一哪仔个蕉農聚概會㧡弓蕉來這位繳，弓蕉市場个 地泥項擺到滿滿个弓蕉，在該個年代，弓蕉係顧來靚，使得外銷 去日本，斯就拿得著過好个價數。
臺灣種个弓蕉香又的甜，形仔靚又踏腹2，日本人盡說，長透 會對臺灣進口弓蕉。毋過日本人買弓蕉个時間無定著，載弓蕉个 船期也無一定，弓蕉市場下把仔一禮拜有兩、三日使得收弓蕉，
下把仔一禮拜正收一、兩日正得。該下仔毋曾有電話，愛知合作 社哪久會收弓蕉，有弓蕉愛繳个農民，就愛隨時注意山頂有插白 色个弓蕉旗無？係有看著弓蕉旗，就係合作社通知大家該日有收 弓蕉，愛繳个人就愛共快割弓蕉去合作社繳，係這期無赴著，下 二到又毋知愛等到哪久正做得繳吔哦！
𠊎等也有一坵田在種弓蕉，尞日𠊎會同阿爸𢯭手共下去做田 坵事，阿爸會趕這機會教𠊎仰仔種弓蕉，佢講每頭秧仔定著愛間3
1 弓蕉旗：音 giungˊ zeuˊ kiˇ；白色的旗子。通訊不發達的年代，做為青果合作社通知 蕉農當日有收香蕉的信號。
2 踏腹：音 teb bugˋ；果實飽滿的樣子。
3 間：音 gam；間隔。
有八尺到一丈恁闊，等樹身大頭吔，就愛種竹篙同佢撐等，係 無，堵著發大風，驚怕弓蕉樹身會分風吹橫核，弓蕉打到過大弓 該下，還愛用袋仔同佢落䟘來，恁仔正毋會分烏蠅、蜂仔拑。毋 過盡得人惱个係會有蛀蟲來咬弓蕉樹身，係分佢咬入樹身肚，無 幾久歸頭弓蕉樹就會轉核4，因致5恁仔，阿爸就會掖兜仔農藥在竹 篙項，分藥仔掞落弓蕉樹身項，恁仔蛀蟲就毋敢行兼吔。
記得有一年，阿爸个弓蕉顧啊盡好，打來實在靚，阿爸歸日 仔笑頭笑面，按算大船愛入港吔，暢啊會瘻。無想著嗄去挨著神 頭6，弓蕉毋曾好割就堵著大風搓，啦濟喲7緊報：風搓對菲律賓該 向來，緊行緊兼臺灣吔，氣象專家乜喊大家愛注意，講風搓怕會 對中部過。𠊎等聽著聚概蓋緊張，歸屋下人𠖄等大風大雨一概去 弓蕉園𢯭種竹篙、䌈索仔、斷弓蕉葉8，看使得同損失減到最少 無，結果連續幾陣大風雨過，歸園个弓蕉做一下轉淨淨！該當 時，𠊎看著阿爸艱苦啊腳膝頭都會出目汁，實在還毋盼得，又毋 知愛仰仔安慰佢正好。
好在阿爸盡擔輸贏，風搓正過核，佢跈等邀大家共下去整理 弓蕉園，再對頭做起。無幾久，歸園个弓蕉又過青柳柳吔！阿爸 該種硬頸、艱韌、毋認輸个精神係𠊎等个模範，分𠊎等這兜細人 仔學習著，無論堵著麼个困難，總講愛堅心堅持下去。
4 轉：音 zon；指房屋、圍牆或體積較大的物體傾倒、塌下來。
5 因致：音 inˊ ziiˋ；因為。
6 挨著神頭：音 aiˊ doˋ siinˇ teuˇ；比喻運氣不好、遇事不順利，倒楣的樣子。
7 啦濟喲：音 laˊ ji ioˋ；源自日語ラジオ，收音機。
8 斷弓蕉葉：音 donˋ giungˊ zeuˊ iab；將香蕉葉截斷以減少風阻。
109 年全國語文競賽客家語朗讀文章高中學生組（南四縣腔）
編號 06 號
【阿公个三種身分】
鄭國南原作客家莊係阿公个胞衣跡，歇到今會八十年吔。
阿太佢等係學老人，因為食頭路个關係，就在這莊頭生根 吔。阿公屋下有六姊妹1，細細仔學講話起勢，阿太就教學老話。
三、四歲後，尋隔壁个細人仔伴搞尞，佢等聚概係客人，一日到 暗攞啊攞仔，毋使人教，無幾久就蓋會嗑吔，顛倒華語係讀國民 學校正學个。
阿公班項有外省人、學老人，乜有客人，哪種人佢都攞得 合，因為講話無麼个腔頭，故所就有人問佢到底係學老人，抑係 客人？乜有人剔試2問佢係毋係「阿山仔3」？阿公生來高浪高浪4， 面刀仔長長，白淨白淨，確實有外省人个形投，下後做兵、食頭 路、參加各種活動，都分人有這三種身分个疑狐。恁仔，阿公到 底係麼个人？
阿公在客家莊歇吔三代人，食、著、歇、行、教育、娛樂，
1 六姊妹：音 liugˋ jiˋ moi；六姊妹，兄弟姊妹有六人，凡兄妹或姊弟中包含有女生，
客語盡稱「姊妹」。
2 剔試：音 ti sii；故意。
3 阿山仔：音 aˊ sanˊ eˋ；當時臺灣籍人士對外省人不禮貌的稱呼。
4 高浪高浪：音 goˊ long goˊ long；高高瘦瘦的。
跈等時代个腳步變化盡大，唯一無變个係佢已經認定自家係客人 吔。這下分佢最愁慮个嗄係客話个火種，緊來緊細、緊來緊細。
佢識同人道嘆：「在這臨將會斷薪火个時節，客人愛有危機意識 个覺醒，毋會講客話就無客人，無客人敢還有客家文化？毋好等
『禾黃水落，飯熟火著。』該就哀哉吔哪！」係有心愛傳承客 話，就同打井共樣，總愛大人儕有堅定个心意正做得著。
屋下就係一隻大搖籃，哀仔係推手，爺仔係舵手，細人仔个 言行，就在這兩雙推動搖籃个手項成長，可見爺哀个教化有幾重 要。
阿公還識比一個例仔分人聽：「有一個客家同事，姐仔係學 老人，降吔兩個妹仔。有一日帶佢五歲，又靚又得人惜个大妹仔 來辦公廳，同事相爭撩佢。這就登真吔！客話、學老話、華語同 英文對答溜溜滾，這斯仰仔學來个呢？問這同事後正知得，佢同 姐仔感著阿姆个話做毋得失落，兩片个大人儕都非常認同，乜盡 用心來教自家个話。細人仔歇啊爺仔屋下，阿公阿婆用客話教佢 等。轉妹家个時節，外阿公、外阿婆就用學老話教佢兩儕，在幼 稚園上課，先生還用華語、英文雙語教學。其實學各種語言，對 起勢學講話个細人仔，一細息困難都無，𠊎等六姊妹就係最好个 例仔。」
雖然阿公係學老底、外省面，毋過，佢還係盡中意佢做客人 个身分。
109 年全國語文競賽客家語朗讀文章高中學生組（南四縣腔）
編號 07 號
【時計果】
徐姿華原作尞日，同屋下人共下去遶山花，在路脣看著有幾攤農家人在 賣自家種个菜，就行前去遶遶看看，有晒啊蠟黃个筍乾、烏到出 油个老菜脯，有金黃色踏腹个甜包黍、浸青个竻瓜、柑紅色个金 瓜、生來像青色玫瑰花个高麗菜，嫩青个香櫞瓜、各色个山椒 仔，還有有特殊香味个山當歸、山胡椒，這兜又靚又萋个菜像在 相拚，擛手愛餳人去買。菜攤頭前，還有用紅色細網袋裝等一袋 一袋个時計果1，該深吊菜色帶有細黃點个外皮還略略仔皺皺，恬 恬仔等等曉得欣賞佢个有緣人。
愐起還細該下，食雜無這下恁傪菜，一擺尞涼，阿哥邀𠊎同 老弟共下去大圳背竹林肚拈野生个時計果，毋過該竹林無人治 理，外圍草蓋塞，無麼个人敢去。阿哥背2一支伐鐮、揹等商展袋 仔3，𠊎同老弟擐等家濟仔、著等靴筒，愛去竹林肚「冒險」吔！
阿哥伐開一條細路分𠊎等行，因致竹仔生啊盡密，竹林肚烏 烏暗暗，幾絲日頭花對竹葉縫照入來，燥核个竹葉賁賁攤在地泥 下，腳躪著庰在燥竹葉下个竹桍還會嗶嗶噼噼，蓋刺激。該息正
1 時計果：音 siiˇ gi goˋ；源自日語トケイソウ（日語漢字：時計草），百香果。
2 背：音 bi；持拿、高舉。
3 商展袋仔：音 songˊ zanˋ toi eˋ；農藥行送的白色尼龍方形提袋。
式有盡多時計果，地泥下這一粒該一粒，有兜个忒熟吔，連皮都 綿核，有兜个還蓋萋，該醜醜皺皺个外皮，一息都毋餳人，毋過 擘開來，裡肚金黃个肉包等烏烏个子，香香酸甜个味緒，仰忍得 核？三兩下就囫核一粒，還想愛討尾，阿哥帶頭緊拈緊食，酸甜 个湯對嘴角、手罅項流出來，實在還好食哪！每一個人潑命囫，
一下仔歸地泥都係𠊎等擳核个殼，蚊仔也鼻着羼4吔，在𠊎等个耳 公脣飛來飛去，叼到這一胮、該一胮，又癢又虐削，手黏黏越爪 越癢，蚊仔也緊來緊惡，歸陣拑過來仰仔掊都掊毋走，硬硬都會 分蚊仔扛走吔。
老弟分蚊仔叼啊無結無煞，哇哇滾討愛歸，阿哥喊𠊎等遽啊 拈時計果，講愛同家濟仔裝滿正使得歸，老弟頓屈打潑賴，毋肯 拈還過手賤，緊揪垂下來个時計果藤搞，阿哥罵佢，佢越致剔 試，這條揪一下該條捝5一下，蓋多毋曾熟个時計果也畀掞掞下 來，佢搞啊蓋暢，手挷核一條藤出力捝，哱一聲，一條比大人手 指公還過大尾个青竹絲正正跌啊厥頸根項，老弟著驚一下，想愛 用手去扡，阿哥手腳伶俐一下仔跳過去用竹椏同蛇哥掊開，好得 阿哥反應遽。係無，分該青竹絲咬著，無死也半條命吔！
對該擺過後，老弟盡服阿哥，兩兄弟感情乜蓋好。該日拈歸 去个時計果，歸家人聚概食得著，阿姆還用時計果來做冰，冰涼 酸甜个味緒，到今還記得。
4 羼：音 hian；氣味。
5 捝：音 duiˋ；用力扯。
109 年全國語文競賽客家語朗讀文章高中學生組（南四縣腔）
編號 08 號
【撐灌腸】
陳志寧原作臘月，再過無一隻月就係過年吔！物質缺乏个年代，愛食無 恁利便，家家戶戶係有閒，總係會利用年前，準備兜仔過年會用 著个年貨，做兜仔臘肉、豬膽肝，其中最餳人个就係灌腸。
在臺灣南部六堆地區，到吔年下時節，雨水少，日頭本本像 熱天恁烈。這下，係來做臘肉，抑係撐灌場都係最好个時節。因 為田坵事這下過少，阿婆盡好在這段日仔，加減做兜仔臘肉同灌 腸，好在過年个時節有傪菜个菜色。
𠊎盡好同阿婆𢯭手撐灌腸，好搞又好食。該兜撐好个灌腸又 做得放盡久，等到開學愛讀書个時節，帶飯包又做得有好加一項 菜。撐灌腸个時節，阿婆除仔會先同賣豬肉个鏡福叔公買幾斤後 腿肉，佢乜會加買一細息个肥肉。鏡福叔公同這兜肥腈个豬肉做 一下放在機器裡背，佢絞吔幾下，該兜本成係一塊一塊个豬肉，
就變做綿綿，對機器出口跌出來。阿婆拿吔絞好个豬肉，再同叔 公買加一息撐灌腸用个細腸仔，這下𠊎等兩子阿婆就有好無閒一 朝晨吔。
𠊎𢯭手拿面盆仔、大酒漏仔，阿婆去擐高粱、準備五香散。
佢同絞好个豬肉同五香散攞兜仔高梁酒操操啊，該香味黏時就歸 个灶下都係。跈等阿婆用酒漏仔落等細腸仔，該兜豬肉就對酒漏 塞入去，豬肉黏黏毋係盡好塞入細腸仔，阿婆就用筷仔捅1。等豬 肉塞入細腸仔，𠊎就𢯭手揢下去，同細腸仔塞滿滿。
等豬肉塞滿細腸仔，阿婆就用厥手指𨃰2，佢一𨃰就用綿線䌈 一下做一節，該一節个大細堵堵好帶飯包傍飯。等歸條撐好，該 灌腸看起來就像一條大條个鍊仔。將佢等晾3啊日頭下晒，十分餳 人食，該晒灌腸个禾埕黏時就香馥馥仔4。阿婆驚貓仔抑係狗仔會 來偷食，佢會喚5𠊎掌等。但係阿婆從來就毋知，原來佢使著一隻 大貓牯掌。每日佢愛收揫个時節，多多少少都會少一細截。該截 毋見核个，等到臨暗頭暖燒水个時節，就會分𠊎順續仔炕炕啊做 點心。
下後，𠊎出外去讀書吔！社會進步啊灌腸愛買就有，毋使自 家做。但係阿婆毋知得，陪佢到百年歸老个該隻大貓仔，係學校 一有放尞就會歸屋下陪佢。該幾下年偷爪6阿婆灌腸个故事，嗄本 本留在大貓仔个回憶中。
1 捅：音 tung；用器具將阻塞物通開。
2 𨃰：音 giam；姆指頭到其他手指頭的距離。
3 晾：音 longˇ；把東西放置在陽光下曝晒或通風的地方使其乾燥。
4 香馥馥仔：音 hiongˊ pugˋ pugˋ eˊ；形容香氣濃郁的樣子。
5 喚：音 vonˋ；使喚。
6 爪：音 iauˋ；抓。
109 年全國語文競賽客家語朗讀文章高中學生組（南四縣腔）
編號 09 號
【祕密基地】
林伯殷原作每年寒天，𠊎會去行屋後背个一條山路，這條山路頭段1打紅 毛泥，看起來就像一條普通个產業道路定定，無麼个特別，毋 過，跋上山峎頂2，變做泥路後，這條山路黏時就轉做𠊎个祕密基 地，見擺行入這跡位，𠊎歸個人就變到非常鬆爽。
這條路分大樹同竹仔抵塞塞3，晒毋著麼个日頭，地泥下攤滿 滿跌下來个樹葉仔同竹葉，有兜樹仔、竹仔橫在路徑項，有兜石 碫同路脣个石䃗㪐核4吔，歸條路看起來就知無麼个人行，這下，
會行這條路个人，大體就係䟓䟓來行山路運動个人。𠊎來這，除 吔運動以外，還做得感受這片山林个恬靜，同時，分風吹、聽鳥 仔啾、看大樹同蹬樹葉，完全聽毋著山下个車聲同機器聲，久 吔，𠊎嗄起私心，毋盼得分人知這條山路，就驚忒多人來勞攪𠊎 个祕密基地。
𠊎个祕密基地會驚人知，係因為祕密基地無恁好尋，還過，
祕密基地係分忒多人知吔，該敢還係祕密基地。還細个時節搞庰
1 頭段：音 teuˇ ton；前面一段。
2 山峎頂：音 sanˊ gien dangˋ；指山頂上。
3 抵塞塞：音 daiˋ sedˋ sedˋ；遮得密密的。
4 㪐核：音 lodˋ hedˋ；崩落。
人尋，大家想盡辦法庰起來，無愛分做鬼个人尋著，有幾儕特別 有辦法，每擺就庰到人喊「放牛食草5」正走出來，大家盡想知佢 等庰在哪位，就會偷偷仔跈等佢等去庰，毋過忒多人庰共下个結 果，總係無兩下就分鬼發覺著，故所，搞庰人尋个時節愛蓋細心 細意，一方面愛尋所在來庰，一方面還愛提防自家庰个位所會分 別個人知無？對𠊎來講，祕密基地毋單只係同自家庰起來个地方 定定，過重要个係，祕密基地係放冗自家个所在，在該，人做得 隨在自然，無麼个愁慮，無論時間長短，就算十分鐘、半點鐘乜 值。
人个心情總係變去變轉，有時節想尋人坐尞、湊伴搞，有時 節又想尋一個祕密基地庰起來，分自家充電一下。讀國小該下，
有時同同學吵事後，𠊎會自家行細路穿過學校崁下个竹頭，去陂 塘脣打水漂仔。讀國中个時節，有時考試考毋好，𠊎會騎等自行 車去山肚、去河壩尞。到大吔，堵著一息問題，𠊎會去圖書館揙 兜書，無就尋一個角頭个位所來恬恬坐。這下，𠊎好去行人少个 山路。從細到大，𠊎隨時都有祕密基地，但係，𠊎毋記得祕密基 地換過幾多擺吔？有兜祕密基地乜早就尋毋著吔！
最尾，𠊎想偷偷請問你一下，你个祕密基地在哪位？有分人 發現無？
5 放牛食草：音 biong ngiuˇ siid coˋ；在此指玩捉迷藏的術語。只剩下少數人未被找 到時，就可以喊這句話，提醒還在躲藏的人可以現身，遊戲要準備重新開始了。
109 年全國語文競賽客家語朗讀文章高中學生組（南四縣腔）
編號 10 號
【田頭田尾趣妙多】
劉玉蕉原作「唧唧唧、唧唧唧」麼个東西噭唧唧？土狗？草蜢？𠊎輕手 輕腳行兼去，唉！佢等嗄禁聲1吔，電線頂高个禾鷝仔相等𠊎，又 乜恬索索仔！仰仔講呢？𠊎毋係人客，嗄有該勞攪著人壞勢个心 情。開聲一喊：「阿爸，𠊎歸來吔！」聲一出，嗄來嚇走一陣鳥 仔。臨暗个日頭，柔柔仔閃到山背去，留著霞光滿天，靚到毋知 愛仰仔講哦！
屋脣个兩坵田，係祖公業，這下盡好價，毋過阿爸毋盼得賣 核佢。用天然个方式，阿爸年年蒔田收穀，礱个精米、糙米，歇 城市个阿叔、做生理个阿伯、阿姑、叔婆，聚概分有份。田脣、
田角阿婆就會加減種兜仔菜，因致田坵長年無射藥仔，鳥仔多蟲 仔也多，無讀書个尞日，愛同阿婆𢯭扭蟲仔，係𠊎發夢都會發青 驚2个事頭，該青青、軟濟濟3个菜蟲，在嫩嫩个菜莖、菜葉項蠕蠕 仔動蠕蠕仔動，唉！幾得人畏仔！萬一力頭無使好勢，在手尾項 佢還會屙腸翻肚分你看，愐著該伸一層皮个細細生命，就恁仔分 你收核，若雞嫲皮敢毋會緊起？總講一句，除吔𢯭扭蟲這事頭，
田頭田尾還係𠊎一放歸，就飆上飆落个好所在哦！
1 禁聲：音 gim sangˊ；聲音軋然而止。
2 發青驚：音 bodˋ qiangˊ giangˊ；受驚嚇覺得害怕。
3 軟濟濟：音 ngionˊ jiˇ jiˇ；軟綿綿。
蛇哥係人客，毋過盡少看著，因致恁仔，𧊅仔聲四時無斷，
正蒔个禾田肚，𧊅仔拂尾泅水仔，直直到斷尾生腳、跳上田脣 項晒日頭，佢等生趣个身影，輒輒餳等𠊎恬恬仔跍在田脣，撩𧊅
、撳細𧊅！跋䟘身，嗄嚇著這兜大𧊅、細𧊅，相爭跳落田肚 去。𠊎田脣飆一擺，「𠺣、𠺣𠺣𠺣……」飆幾下，聲就幾密，實 在好搞！跈等𧊅仔聲，禾田肚會出現一圈一圈个水痕，越遠越 大，一圈落4一圈，圓圈仔想落該倒映在田肚个青天白雲，還過彎 彎翹翹5个屋舍，毋過，自從都毋識落著麼个。
青柳柳个禾仔日見日抽高，清風吹過，禾仔就窸窸窣窣講細 聲話。阿爸挷稗仔，𠊎褲腳攝高高跈佢落禾田，打赤腳躪入濫泥 肚，腳肢肢，像幾下百隻細魚仔吮腳囊、肢6腳底，清清涼涼个感 覺，直直透到心肝頭，唉呀！怪毋得阿爸恁好蒔禾，還好搞仔 哪！禾黃時節，阿爸愛紮禾稈人7嚇鳥仔，田頭放一個、田尾放一 個，在中還過愛釘兩個，老妹花喇必駁个衫褲盡適當，衫褲一 著，三角旗一牽，哇！歸大片田坵鬧熱濟炸8，實在生趣！毋過，
精砉砉个鳥仔無嚇著，嗄輒輒嚇著暗晡頭䟘床屙尿个𠊎。割禾 吔，割禾機器同禾仔剃三分頭，一行過田坵就光溜光溜，電線頂 高歸排仔等絡食个禾鷝仔，今這下急壞咧！
田頭田尾趣妙多，打幫阿爸个堅持，網路以外，𠊎這兜還有 另外个一種選項哦！
4 落：音 labˋ；套。
5 彎彎翹翹：音 vanˊ vanˊ kieu kieu；此處指因受水波影響而歪斜不正。
6 肢：音 ji；用手指搔癢
7 禾稈人：音 voˇ gonˋ nginˇ；稻草人。
8 熱鬧濟炸：音 nau ngiad jiˇ jiaˇ；形容非常熱鬧。
109 年全國語文競賽客家語朗讀文章高中學生組（海陸腔）
編號 1 號
【老鄰舍】
張美容原作戴在都市肚，隔壁鄰舍相堵頭，最多就笑笑仔、頷下頭，無 麼个有相借問，就算日時頭，儕儕也閂門閉戶罕得來往，看著恁 樣，𠊎特別懷念細人仔時个老鄰舍。
頭擺𠊎戴在莊下个街路肚，鄰舍多，大家長下這家行行、該 家尞尞。像對門做西裝个矮師傅屋下，大家就當愛去，大人會去 討兜布尾布截來補衫褲，細人仔就拈兜布碎仔來份家啦仔。暗晡 頭大人做閒咧，就坐在佢个店亭下尞涼、打嘴鼓，一群細人仔就 在做西裝个長桌頂寫作業、讀書，就像自家屋下樣。
對門還有一間阿德伯个布店，店肚花剌必駁个布，非常餳 人，𠊎輒輒去看哪垤布較靚，到阿姆過家尞个時節，就拉等佢去 愛剪布來做衫，雖然失望个時節較多，毋過，阿姆个「下二擺1、 下二擺」，還係分𠊎盡大个期待。在阿德伯个布店，長下夢想自 家著等阿姆做个長衫2，有膨膨个袖，有膨膨个裙；又加蕾絲，又 框木米3，像公主樣。
1 下二擺：音 ham+ baiˊ；下一次。
2 長衫：音 chong samˋ；洋裝。
3 框木米：音 kongˋ／kiongˋ mug miˊ；鑲如木耳般皺褶的邊。
「咭𢼛咭4，兩片生翼，背囊屙屎，肚底討食。」隔壁做木匠 个阿松伯，一頭做事，一頭做令仔分𠊎兜揣，在脣頭看佢鉋枋仔 个細人仔，無人揣得著，阿松伯擎起鉋仔，先摎兩片手扼个柄咭 咭𢼛𢼛敲核來，就開始鉋枋仔，無用个鉋圾5就在鉋仔个背囊頂哱 等出6，鉋仔肚底个枋仔就鉋到亮亮7做得用咧，原來答案係鉋仔，
實在生趣。阿松伯毋單淨好講笑，佢屋下滿地泥大大細細个樹矻 仔8、勼勼勼勼9个鉋圾，還係𠊎兜最愛搞个東西，到這下，鼻空脣 像人還留等香香个木材味道。
屋下上兩間个點心店乜盡難忘，一到𤐙香油10个時節，歸街路 就香到奈毋得，這間點心店到這下係有名个百年老店咧，一到尞 日，人就多到尖毋開腳。𠊎乜長下會跍在錦榮叔个門口看佢鋸竹 仔、破篾仔，像變奇術樣，做出竹交椅、竹椅轎11、竹桌、竹凳。
其他還有剃頭店、糖仔店、冰店、打鐵店等等，間間填淰𠊎童年 个生活。
「遠親不如近鄰」，對頭擺个𠊎來講，非常確實，無想著這 下，隔壁鄰舍嗄摎生份人共樣，分人十分个感慨！
4 咭𢼛咭：音 gidˋ gogˋ gidˋ；敲打時發出的聲音。
5 鉋圾：音 pau seb；鉋出來的木頭屑。
6 哱等出：音 budˋ nenˊ chud；湧出來。
7 亮亮：音 langˇ langˇ；很平整。
8 樹矻仔：音 shu+ kudˋ er；小木頭塊。
9 勼勼勼勼：音 giu giu giuˇ giuˇ；彎曲收縮。
10 𤐙香油：音 biagˋ hiongˋ rhiu；爆紅蔥頭。
11 竹椅轎：音 zhug rhiˊ kiau+；嬰兒坐的竹椅。
