(Pangerangu Mangili & Tidahu/Lewa)
(Bahasa Sumba Dialek Mangili)
Ninya na tau kapola, Mbani Hohaya tamuna. Ba nawau na kapolana, hi nalua padihu la luku, ka kubahaya wána. Tákaka la luku, dihunanyaka.
Bahananyaka na kapolana. Ndau namunyai dumu na kurangu, hi nanátikuya na kapolana i Mbani Hoha.
Mbaninanyaka i Mbani Hoha. Hi naápaya na kurangu. Na álaka padihu, balinanyaka la uma, hi nangándiya na kurangu. Táka náhu la ngarangia ningu tau mapaaunya: “Ha Mbani Hoha, li páku na kau unu wai mbana ka nambana na wai palunjumu, kau ngangu watarau kahángga ka nakahánggambu na taimu,” wánanya.
Linanyaka i Mbani Hoha, tákaka:”Ka nggika yia kutua ninya na kurangunggu,” hi wánanya na mangu umangu. “Kau tuayaka ána hiana la lihina na bai manu,” hi wánanya.
Ununanyaka wai mbana, ngangunanyaka wataru kahángga. Táka na bai manu ána ndau nátikuyai na kurangu, ka matinanyaka na kurangu. Ka mbaninanyaka i Mbani Hoha.”Na kurangunggu, na kurangunggu, ba ndia kura juaya, ba kura wáli kapolanggunya,” wánaka.
“Ha kau pitiyaka ána nana na bai manu kau ngándiya,” hi wáda da mangu umangu. Ka lakunanyaka i Mbani Hoha, hi nangándiya na bai manu. Táka la hau pangiangu, hilu paaunanyai tau.”Ha Mbani Hoha, li páku na, kau unu wai mbana ka nambana na wai palunjumu, kau ngangu wataru kahángga ka na kahánggambu na taimu,” wádanya.
Ka laku linanyaka i Mbani Hoha, tákaka:”Ka nggi yia kutua ninya na bai manunggu,” hi wánanja da mangu umangu. “Kau tuayaka ana hiana la lihi meu,” hi wádanya. Ka tuananyaka la lihi meu.
Ka ununanyaka wai mbana, ngangunanyaka wataru kahángga i Mbani Hoha. Táka ndau kauyai dumu meu na bai manu, matinanyaka na bai manu. Ka mbaninanyaka i Mbani Hoha:”Na bai manunggu, na bai manunggu, ba ndia manu juaya, manu wáli kurangunggunya, ndia kura juaya, kura wáli kapolanggunya,” wána.
“Ha kau pitiyaka ána nana na meu kau ngándiya,” hiwádanya. Ka lakunanyaka i Mbani Hoha, hi nangándiya na meu. Tákaika náhu la ngarangia, hilu ningui mapaaunya:”Ha Mbani Hoka, li páku na, kau unu wai mbana ka nambana na wai palunjumu, kau ngangu wataru kahángga ka nakahánggambu na taimu,” wádanya.
Laku linanyaka i Mbani Hoha, tákaka:”Ka nggika yia kutua ninya na meunggu,” hi wána. “Ha tuayaka ána hiana la lihina na bai wai,” hi wádanya.
Ka tuananyaka na meuna la lihina na bai wai. Ndau napaya na bai wai dumu, na nggapi njukulu pamatimaaya na meu. Na álaka paunu wai mbana pangangu wataru kahángga, na nggilakunyaka na meuna mbada matinaka ána. Ka mbaninanyaka i Mbani Hoha:”Na meunggu, na meunggu, ba
Dongeng-dongeng & Cerita Rakyat Asli Sumba
62
ndia meu juaya, ba meu wáli manuya, ba ndia manu juaya, ba manu wáli kuranguya, ba ndia kura juaya, kura wáli kapolaya,” wána.
“Ha Mbani Hoha, kau ngándiyaka ána nana na bai wai,” hi wádanya. Ka lakunanyaka i Mbani Hoha, hi nangándiya na bai wai na manjukulunya na meuna.
Táka náhu la ngarangia hilu ningui mapaaunya:”Ha Mbani Hoha, li pákuna kau unu wai mbana ka nambana na wai palunjumu, kau ngangu wataru kahángga ka nakahánggambu na taimu,” wádanya. Ka linanyaka i Mbani Hoha, tákaka:”Ha ka nggika yia kutua ninya na bai wainggu,” hi wánanja da mangu umangu.
“Kau honduyaka ana hiana la lihina na njara,” hi wádanya. Ka hondunanyaka na bai waina la lihi njara. Táka ndau nggapi tilayai dumu njara na bai wai, ka matinanyaka. Naálaka paunu wai mbana pangangu wataru kahángga, na nggilakunya na bai waina, ka mbáda matinaika.
Ka mbaninanyaka i Mbani Hoha:”Ai na wainggu, na wainggu, ba ndia wai juaya, ba bai wai wáli meuya, ba ndia meu juaya, ba meu wáli manuya, dia manu juaya, manu wáli kuranguya, ndia kura juaya, kura wáli kapolaya,” wana.
Napaha da mangu umangu,”Ha Mbani Hoha, pitiyaka ána nana na njara kau ngándiya,” hi wádanya. Ka lakunanyaka i Mbani Hoha, hi nairuya na njara. Táka náhu la ngarangia hilu ningui mapaaunya. “Ha Mbani Hoha, li pakuna ka unu wai mbana ka nambana na wai palunjumu, kau ngangu wataru kahángga ka nakahánggambui na taimu,” wádanya.
Laku linanyaka i Mbani Hoha, tákaka:”Ka nggika yia ku hondu ninya na njaranggu,” hi wánanja da mangu umangu. “Honduyaka ána hiana la lihina na karambua,” hi wádanya. Ka hondunanyaka i Mbani Hoha na njarana la lihina na karambua. Táka na karambua duna wámu, ndau nggápi hikuyai na njara, namati memanguma.
Na álaka pa unu wai mbana, pa ngangu wataru kahángga, nanggila-kunyaka na njarana, ka mbáda matinaika, ba nahikuya karambua. Ka mbaninanyaka i Mbani Hoha,”Na njaranggu, na njaranggu, ba ndia njara juaya, njara wáli waiya, ndia wai juaya, wai wáli meuya, ndia meu juaya, meu wáli manuya, ndia manu juaya, manu wáli kuranguya, ndia kura juaya, kura wáli kapolaya,” wána.
Da hemaya mangu umangu:”Ha Mbani Hoha, apa ngga hiu mbani tumu nu, ngándi baliaya ána nana na karambua,” hi wádanya. Ka lakunanyaka i Mbani Hoha hi nairuya na karambua. Táka náhu la ngarangia hilu ningui mapaaunya:”Ha Mbani Hoha, li páku na, kau unu wai mbana ka nambana na wai palunjumu, kau ngangu wataru kahángga ka nakahanggambu na taimu,” wáda manyai.
Laku linanyaka i Mbani Hoha, tákaka:”Ka nggika yia ku hondu ninya na karambuanggu,” hi wánanja da mangu umangu. “Honduyaka ana hiana la
lumbu uma uhu,” hi wádanya. Ka hondunanyaka lai nu na karambua.
Táka ndau ájirunyai dumu na uma parai na karambua, ka njorunanyaka na uma uhu, hi napinjalunya na karambua, ka matinanyaka.
Na álaka pa unu wai mbana pa ngangu wataru kahángga, na nggilakunyaka na karambuana, ka mbada matinaka la napu uma. Ka mbaninanyaka i Mbani Hoha:”Na karambuanggu, na karambuanggu, ba ndia karambua juaya, karambua wáli njaraya, ndia njara juaya, njara wáli waiya, ndia wai juaya, wai wáli meuya, ndia meu juaya, meu wáli manuya, ndia manu juaya, manu wáli kuranguya, ndia kura juaya, kura wáli kapolanggunya,” wana.
Na napaha da mangu umangu,”Ha Mbani Hoha, ngandi baliayaka ána nana na uma uhu,” hi wádanya. Ka nyanggarunanyaka na uma uhu, hi nangándiha da iana da wituna la hingi luku. Ndau namunyai dumu na iwa, handáka warimaananja da ia da witu umana i Mbani Hoha.
Ka mbaninanyaka i Mbani Hoha, na manyamalu hi naununya na wai luku, ka lupa kupamihiya wána láti. Na ununyaka nu, ka pupu-pupuhunanyaka na kambuna, ka lundu pua wána maduaka ba nakapoku na kambuna. Ka matinanyaka.
Nuya hi tapangera yiangu nahu:Ambu lalu hundadanya budi na angunda, napa ta ngalangudu mandia hámu, hi wanda yiangu.