Matur suksema santukan galahe sane becik puniki kapica ring pasikian titiange. Bapak utawi Ibu guru, sane dahat suksemayang titiang. pasawitran titiang sareng sami sane tresna sihin titian sadurung titiang matur amatra, pinih riin ngiring sareng-sareng ngastiti bhakti ring Ida Sang Hyang Widhi Wasa, majalaran antuk nguncarang panganjali umat.
“Om Swastyastu”
Ring genah lan galahe sane becik puniki, lugrayang tityang matur amatra sane mamurda Ngelestariang Bahasa Bali
Basa Bali, kaucap pinaka silih tunggil baga ring Kebudayaan Bali kawentennyane dahat mabuat, sane mawinan Kebudayaan Bali punika prasida kasolahang miwah kasobyang. basa Bali pinaka unteng kebudayaan Bali patut kadadosang ulu ring jiwa pramana para kramane pinaka dasar pawangunane ring Bali.
Ring aab jagate sekadi mangkin sane ketah kebaos era global, aab jagat awor tan pawates, wenten mekadi ajerih pikayunan para krama Baline indik Basa Bali pacang rered, santukan panglimbak ilmu pengetahuan miwah teknologi sekadi mangkin sane tanpa pawates, nylisik nyusup ring kahuripan krama Baline. Indik asapunika patut mangda iraga sareng sami sayaga, nepasin kawentennyane, mangda panglimbak puniki kawigunayang taer anggen ngalimbakang basa, aksara miwah sastra Bali.
Panglimbak miwah palestarian Basa Bali patut pinaka gegambelan krama Bali makasami, mangda punapi antuk basa Bali puniki prasida mawiguna ring sawewengkon wewidangan pewangunan ring Bali.
Pemerintah Provinsi Bali sampun neglaksananyang makudang-kudang utsaha negeninin indik pamargi negelestariang basa Bali mangda kawentenan nyane setata ajeg. Inggih punika ngetuang Peraturan Daerah nomor 1 tahun 2018 indik Bahasa, Aksara dan sastra Bali sane kasobyahang ring peraturan Gubernur Bali no 80 tahun 2018 indik perlindungan miwah penggunaan Bahasa, aksara dan Sastra Bali, lan parikrama Bulan Bahasa Bali.
Parikrama Bulan Bahasa Bali puniki kamargiang nyabran warsa ring bulan Pebruari saantukan peraturan pemerintah punika. Iraga pinaka sisya patut nyarengin parikrama punika sekadi nyarengin lomba nyurat aksara bali, karaoke lagu-lagu bali, muah pidarta Bahasa bali. Iraga para sisya sane kabaos generasi milenial patut uning lan prasida mebahasa bali saantukan raga pinaka penerus sane pacang ngewangun Bali. Malarapan antuk kalaksanayang Parikrama Bulan Bahasa Bali puniki
kaaptiang sumangdane, Kawentenan Basa, Aksara, miwah Sastra Baline prasida sayan nglimbak tur ajeg utamane ring para sisya sekadi iraga.
Ida-dane miwah sameton sami sane banget kesuksemayang titiang, Kadi asapunika titiang prasida matur-atur ring galahe sane becik puniki, mogi-mogi wenten pikenohipun. Ring wesananing atur, banget titiang nglungsur geng rena pengampura pet wenten atur titiang sane nenten munggah ring arsa. Matur suksma antuk ring uratian ida-dane sinamian, Pinaka panguntat, puputang titiang antuk parama santih.
”Om Santih, Santih, Santih, Om”
