8:32-33 Yes. 53:7-8
macang deng domba pung ana lai yang orang gunting akang pung bulu-bulu.
33Dong biking malu Antua deng hukum Antua yang seng batul-batul.
La orang-orang tu bale bunu Antua
sampe seng ada satu orang lai yang bisa carita Antua pung turunang. Barang, Antua seng ada turunang.”
34Tarus, orang Etiopia tu tanya par Pilipus kata, ”Coba bilang par beta do! Yesaya ada carita sapa dalang dia pung kitab ni? Dia carita dia pung diri sandiri ka orang laeng?”
35Tarus, Pilipus mulai kasi tau par antua pake nats yang tadi tu. La dari nats tu, Pilipus kasi tau Kabar Bae soal Yesus. 36Dong dua bajalang tarus sampe di kolang satu yang ada aer. Orang Etiopia tu bilang par Pilipus kata, ”Lia do! Di tampa ni ada aer. Bisa kaseng kalo ale kasi sarani beta?”
9:1-19a Kis. 22:3-16, 26:9-18
37[Pilipus bilang, ”Kalo tuang pung hati batul-batul parcaya par Yesus, beta nanti kasi sarani tuang.”
Antua bilang, ”Iyo! Beta parcaya kalo Yesus Kristus tu, Allah pung Ana.”]
38Tarus, antua suru orang yang bawa kareta tu kasi barenti kareta. Abis itu, dong dua turung dari kareta, tarus bajalang maso ka kolang tu la Pilipus kasi sarani antua. 39Bagitu dong dua kaluar dari kolang, takajo bagini, Tuhan pung Roh bawa Pilipus ka tampa laeng. La antua seng dapa lia Pilipus lai. Abis itu, antua bajalang tarus deng antua pung kareta tu deng hati paleng sanang. 40Mar Pilipus ni, orang baku dapa dia di kota Asdot. Tarus, dia pi bajalang kasi tau Kabar Bae soal Yesus di kota-kota laeng lai sampe di kota Kaisarea.
Saulus parcaya Tuhan Yesus 9:1-19a
9
1Waktu Yesus pung utusang-utusang ada kasi tau Kabar Bae par orang-orang, Saulus ni pung dara mandidi paskali. Dia tarus ancang par bunu orang-orang yang iko Yesus. Jadi, dia pi ka orang Yahudi pung Imam Basar 2la bilang kata, ”Tolong biking surat sapanggal jua par orang Yahudi dong pung pamimping-pamimping tampa sombayang yang ada di kota Damsik. Beta minta surat tu biar kalo beta baku dapa laki-laki ka parampuang yang iko Tuhan Yesus pung ajarang, beta bisa tangkap dong la bawa dong ka kota Yerusalem par kasi sidang dong.”3Tarus, waktu Saulus ada bajalang pi ka Damsik, bagitu su mau sampe di akang kota tu, takajo bagini, sinar puti mangkilat dari sorga koliling dia. 4La oras itu jua, dia jatu ka tana. Tarus, dia dengar bagini ada suara yang bilang par dia kata, ”Saulus, Saulus e! Mangapa ale siksa Beta la?”
5Saulus bilang, ”Tuhan e! Tuhan tu sapa?”
Antua bilang, ”Beta ni Yesus yang ale siksa tu. 6Jadi sakarang ni ale badiri. Tarus, maso ka dalang kota tu. Bagitu ale sampe di dalang kota, nanti ada yang kasi tau par ale apa yang ale musti biking.”
7Samua orang yang ada bajalang sama-sama deng Saulus tu taherang-herang sampe dong seng bisa bicara. Barang dong jua dengar suara tu, mar seng lia sapa-sapa. 8Abis dengar Yesus bilang bagitu, Saulus badiri la buka dia pung mata. Mar dia seng dapa lia apapa. Jadi, dia pung tamang-tamang pegang dia pung tangang la bawa maso dia ka YESUS PUNG UTUSANG-UTUSANG PUNG CARITA 8 , 9
Damsik. 9Dari hari itu sampe akang pung tiga hari, Saulus pung mata tinggal buta. Dia jua sondor makang deng minong.
10Di Damsik tu jua, ada orang satu yang parcaya Yesus. Dia pung nama Ananias. Satu kali bagini, Tuhan datang kasi unju rupa par dia la bilang kata, ”Ananias e!”
Ananias bilang, ”Tuhan e! Beta ni.”
11Tuhan bale bilang dia kata, ”Badiri, la pi ka Yudas pung ruma yang ada di jalang yang nama Jalang Lurus. Bagitu ale sampe di tampa tu, ale tanya par orang-orang kata, ’Saulus yang datang dari kota Tarsus tu ada di mana?’ Barang, pas oras ini jua Saulus ada sombayang. 12Beta su kasi lia par Saulus orang satu yang pung nama Ananias. Jadi, ale nanti datang par dia la taru tangang di atas dia la dia bisa dapa lia kombali.”
13Ananias bilang par Tuhan kata, ”Tuhan e! Orang banya su carita par beta soal dia tu. Dong bilang kalo dia tu su biking kajahatang paleng banya par Tuhan pung orang-orang di Yerusalem. 14La sakarang ni, dia su ada di akang tampa ni. Orang Yahudi pung imam-imam kapala jua su kasi kuasa par dia tangkap orang-orang yang parcaya Tuhan.”
15Mar Tuhan bilang par dia kata, ”Pi sa! Barang, Beta su pili dia par jadi Beta pung utusang. Biar dia jua pi kasi tau soal Beta par orang-orang yang bukang Yahudi, orang-orang yang bukang Yahudi pung raja-raja,
deng orang-orang Israel. 16Beta sandiri nanti kasi unju par dia kalo dia musti sangsara paskali tagal dia kasi tau orang soal Beta.”
17Abis Tuhan bilang bagitu, Ananias tarus pi ka ruma yang Saulus ada tinggal tu. Sampe di ruma tu, dia maso la taru tangang di atas Saulus pung kapala la bilang kata, ”Sudara Saulus e! Tuhan suru beta datang par ale ni. Antua tu, Yesus. Antua tu yang datang kasi unju diri par ale di jalang waktu ale mau datang kamari. Antua jua yang suru beta datang par biking bae ale pung mata. Tuhan pung Roh jua yang nanti kasi kuasa par ale.”
18Takajo bagini, ada apapa satu jatu dari Saulus pung mata. Akang macang deng ikang pung sisi. Tarus Saulus dapa lia kombali. Abis itu, dia badiri la Ananias kasi sarani dia. 19aTarus, dia makang la jadi kuat kombali.
Saulus kasi tau Kabar Bae soal Yesus par orang-orang di Damsik 9:19b-25
19bSaulus tinggal deng orang-orang yang iko Yesus di kota Damsik kurang labe dua tiga hari bagitu. 20La oras itu jua, dia kasi tau soal
Yesus par orang-orang yang ada di orang Yahudi pung tampa-tampa sombayang. Dia bilang par dong kalo Yesus tu Allah pung Ana.
21Samua orang yang dengar apa yang Saulus bilang tu jadi herang. Tarus, dong baku tanya kata, ”Dia ini ni yang su bunu basudara-basudara yang iko Yesus di kota Yerusalem to? Dia jua datang kamari par mau tangkap basudara-basudara yang iko Yesus la pi bawa dong par orang Yahudi pung imam-imam kapala.”
22Mar Saulus ni pung kuasa labe hari labe batamba tarus par kasi balajar orang. Orang Yahudi yang ada di Damsik taherang-herang tagal YESUS PUNG UTUSANG-UTUSANG PUNG CARITA 9
9:23-25 2Kor. 11:32-33
dia kasi bukti kalo Yesus tu, Orang yang Allah su Angka par Kasi Salamat Manusia.
23Saulus tinggal di kota tu lama lai. Waktu dia ada tinggal di kota tu, orang Yahudi ada baku skongkol lai par mau bunu dia. 24Mar apa yang dong mau biking par dia tu, dia su dapa tau akang kamuka. Dong siang malam jaga dia tarus di Damsik pung pintu-pintu maso tu par mau bunu dia. 25Mar satu malam bagini, Saulus pung anana bua kasi salamat dia. Dong kasi maso dia ka dalang bakol basar yang dong su ika deng tali la kasi turung dia deng bakol dari jandela iko tembok yang ada koliling akang kota tu.
Saulus bakumpul deng orang-orang laeng yang iko Yesus 9:26-31
26Waktu Saulus sampe di kota Yerusalem, dia coba bakumpul deng orang-orang yang iko Yesus yang ada di tampa tu. Mar dong samua taku dia, jadi dong seng tarima dia. Barang, dong seng parcaya kalo dia tu batul-batul su jadi Yesus pung ana bua. 27Mar Barnabas tarima dia sa la pi bawa dia ka Yesus pung utusang-utusang. Tarus, Barnabas kasi tau par dong samua kata, ”Saulus ni su baku dapa deng Tuhan. Antua jua su bicara lai deng dia waktu dia ada bajalang pi ka kota Damsik. Saulus jua su barani kasi balajar orang-orang soal Yesus di Damsik.”
28Jadi, Saulus tinggal tarus deng dong utusang-utusang di Yerusalem. Dia barani pi koliling akang kota tu par kasi tau soal Tuhan Yesus tu par orang-orang. 29Dia jua jaga baku soal jawab deng orang Yahudi yang bicara bahasa Yunani. Mar dong tu ada cari jalang lai par bunu dia. 30Bagitu basudara-basudara yang iko Yesus tau kalo orang-orang ada mau bunu dia, dong bawa dia pi ka kota Kaisarea. La dari kota itu, dong bawa dia deng kapal ka kota Tarsus.
31Waktu Paulus su pi ka Tarsus, orang-orang yang parcaya Yesus yang tinggal di propinsi Yudea, Galilea, deng Samaria tu pung hidop jadi tanang. Tuhan pung Roh tolong dong, jadi dong parcaya Tuhan labe sunggu-sunggu lai. Dong taru hormat par Tuhan deng Tuhan pung Roh tolong dong tamba banya tarus.
Petrus biking bae Eneas di Lida 9:32-35
32Satu kali bagini, waktu Petrus pi bajalang koliling-koliling, dia pi mangente Tuhan pung orang-orang di kota Lida. 33Di kota itu jua, dia baku dapa deng laki-laki satu yang pung nama Eneas. Laki-laki ni su dalapang taong tinggal sa di atas tampa tidor tagal lumpu. 34Petrus baku dapa dia la bilang kata, ”Eneas e! Yesus, Orang yang Allah su Angka par Kasi Salamat Manusia tu, su kasi bae ale. Jadi, ale bangong la manyimpang ale pung tampa tidor tu.”
Oras itu jua, dia bangong. 35Bagitu samua orang yang ada di Lida deng kota Saron lia kata Eneas tu su bae, dong samua kasi tinggal dong pung dosa-dosa la jadi parcaya Tuhan.
Petrus kasi hidop Dorkas di Yope 9:36-43
36Di kota Yope ada parampuang satu. Dia tu, Yesus pung ana bua lai. Dia pung nama Tabita. (Dalang orang Yunani pung bahasa, dia pung nama tu Dorkas.) Dorkas ni pung hidop paleng bae paskali. Dia jua jaga tolong orang-orang kasiang. 37Waktu Petrus ada di kota Lida, Dorkas ni dapa saki sampe mati. Tarus, orang-orang kasi mandi dia pung mayat la taru akang di kamar yang ada di atas. 38Lida ni akang seng jau dari Yope. Bagitu orang-orang yang iko Yesus yang ada di Yope tau kalo Petrus ni ada di Lida, dong suru dua orang pi ka Petrus la bilang kata, ”Petrus e! Bakira capat iko katong ka Yope do!”
39Oras itu jua, Petrus manyimpang la pi sama-sama deng dong. Bagitu dong sampe di tampa tu, dong bawa Petrus ni ka kamar yang ada di atas. Sampe di atas, samua parampuang janda tu badiri urung Petrus la manangis. Dong kasi unju lai par dia pakiang-pakiang deng baju-baju panjang luar yang Dorkas su manjae akang waktu dia masi hidop.
40Mar Petrus suru samua parampuang-parampuang janda tu kaluar, tarus dia tikang lutu la sombayang. Abis itu, dia bale muka ka Dorkas pung mayat tu la bilang kata, ”Tabita e! Bangong!”
Oras itu jua, Dorkas buka mata. Bagitu dia lia Petrus, dia dudu. 41Tarus, Petrus pegang dia pung tangang la bantu kasi badiri. Abis itu, Petrus panggel parampuang-parampuang janda tu deng basudara-basudara yang iko Yesus la kasi unju par dong kalo Dorkas tu su hidop kombali.
42Kabar soal Petrus kasi hidop Dorkas ni orang bicara akang di samua YESUS PUNG UTUSANG-UTUSANG PUNG CARITA 9
Yope sampe orang banya jadi parcaya par Tuhan Yesus. 43La dari oras itu jua, Petrus tinggal di kota tu. Dia tinggal sadiki lama di Simong pung ruma. Simong tu pung karja jadi tukang biking kuli binatang.
Tuhan pung malekat suru Kornelius panggel Petrus 10:1-8
10
1Satu kali bagini, di kota Kaisarea ada laki-laki satu. Dia pung nama Kornelius. Dia tu kapitang tantara Roma di pasukan satu yang akang pung nama Pasukan Italia. 2Kornelius deng dia pung basudara samua sombayang par Allah deng dia dengar-dengarang lai par Antua. Dia jua jaga tolong orang-orang Yahudi yang kasiang deng kepeng. Dia tu jaga sombayang tarus-tarus par Allah.3Satu kali bagini, kurang labe jam tiga siang, Allah pung malekat satu datang kasi unju rupa par Kornelius la bilang kata, ”Kornelius e!”
4Kornelius nganga malekat tu, tarus dia takotang paskali la bilang kata, ”Tuhan e! Ada apa?”
Malekat tu bilang, ”Ale pung sombayang tu, Allah su dengar akang. Bagitu lai deng apa yang ale su biking par orang-orang kasiang. Tagal itu, Antua inga ale tarus-tarus. 5Jadi, sakarang ale suru satu dua orang pi ka kota Yope la panggel laki-laki satu datang ka mari. Dia pung nama Simong yang orang jaga panggel dia tu Petrus. 6Petrus ni ada tinggal di Simong tukang biking binatang pung kuli pung ruma. Ruma tu di pinggir pante.”
7Bagitu malekat tu pi kasi tinggal Kornelius, oras itu jua, dia panggel dia pung orang suru-suru dua orang deng tantara satu. Tantara itu biasa jaga dia. Tantara tu jua dengar-dengarang par Tuhan. 8Tarus, Kornelius carita par dong samua parkara yang Tuhan pung malekat su bilang par dia. Abis itu, dia suru dong tiga pi ka Yope.
Petrus lia apapa satu turung dari langit 10:9-16
9Eso hari bagini, kurang labe jam dua balas siang, Petrus nai ka Simong pung atas ruma par sombayang. Waktu itu jua, orang-orang yang dapa suru dari Kornelius tu su mau sampe di kota Yope. 10Waktu Petrus ada sombayang, dia rasa lapar paskali, jadi dia mau makang. Bagitu dong ada mamasa makanang par dia, takajo bagini, Tuhan kasi lia apapa par dia. Mar dia ni ada sadiki sadar. 11Dia lia bagini, langit ada tabuka la ada apapa satu yang turung dari langit. Akang macang deng kaeng
basar satu. Kaeng tu turung dari langit deng akang pung ujung-ujung tagantong. 12Dalang kaeng basar tu jua ada sagala macang binatang. Binatang-binatang tu ada yang pung kaki ampa, ada yang maraya, deng ada burung-burung. Binatang-binatang tu orang Yahudi seng bole makang akang. Barang akang pamali. 13Tarus, ada suara yang bilang par dia kata, ”Petrus e! Bangong suda. Tarus, potong binatang-binatang tu la makang!”
14Mar Petrus bilang, ”Jang! Jang Tuhan. Beta ni balong parna makang binatang-binatang macang bagitu. Barang akang pamali.”
15Mar suara tu bale bilang par dia kata, ”Apa yang Beta, Allah, bilang bisa makang, jang ale bilang itu pamali.”
16Samua tu akang jadi sampe tiga kali, baru kaeng tu bale nai ka langit.