4:24 Kel. 20:11, Neh. 9:6, Msm. 146:6 4:25-26 Msm. 2:1-2 4:27 Mat. 27:1-2, Mrk. 15:1, Luk. 23:1, 7-11, Yoh. 18:28-29
Orang-orang yang parcaya Yesus pung sombayang 4:23-31
23Waktu orang Yahudi pung pamimping-pamimping sidang su kasi lapas Petrus deng Yohanis, dong dua pi par dong pung tamang-tamang. Dong dua carita soal samua yang orang Yahudi pung imam-imam kapala deng tatua-tatua bilang par dong. 24Waktu dong dua pung tamang-tamang dengar dong dua pung carita, dong sama-sama sombayang par Allah bagini, ”Bapa e, Bapa pung kuasa paleng basar. Bapa yang biking langit, daratang, lautang, deng akang pung isi samua. 25Dolo-dolo, katong pung moyang raja Daud jadi Bapa pung orang suru-suru yang jaga iko Bapa pung mau. Bapa pung Roh kasi tau par antua soal Bapa pung pasang. Tarus, antua tulis akang bagini,
’Mangapa orang-orang yang bukang Yahudi mara-mara? La mangapa lai orang-orang Yahudi baku skongkol par
biking apapa yang seng ada akang pung guna?
26Raja-raja ada siap-siap par mau parang.
Pamimping-pamimping di dunya ada bakumpul. Dong samua mau malawang Tuhan
deng Orang yang Antua su Angka par Kasi Salamat Manusia.’
27Apa yang raja Daud tulis tu su jadi. Di kota Yerusalem ni, raja Herodes deng gubernur Pilatus su bakumpul sama-sama deng orang-orang Yahudi deng orang-orang yang bukang Yahudi par baku skongkol malawang Yesus. Yesus tu, Bapa pung Orang karja yang seng bardosa. Bapa su Angka Antua par kasi Salamat Manusia. 28Bapa yang pung kuasa. Bapa yang kasi biar dong bunu Antua. Bapa su ator dari kamuka par akang musti jadi iko Bapa pung mau. 29Sakarang ni, Bapa lia dong ada ancam katong. Jadi, katong yang su jadi Bapa pung orang suru-suru, katong minta Bapa tolong buka jalang biar katong bisa kasi tau Bapa pung ajarang par orang-orang deng barani paskali. 30Bapa kasi kuasa par katong biar katong bisa kasi bae orang-orang saki deng biking tanda-tanda herang pake Yesus pung kuasa. Yesus tu, Bapa pung Orang karja yang seng bardosa.”
4:32 Kis. 2:44-45
31Waktu Petrus, Yohanis, deng dong pung tamang-tamang su abis sombayang, skrek lai, tampa yang dong ada bakumpul tu bagoyang. Tuhan pung Roh yang pung kuasa par dong samua la dong mulai kasi tau Allah pung ajarang deng barani paskali.
Orang-orang yang parcaya Yesus hidop satu hati 4:32-37
32Orang-orang yang parcaya Yesus tu, dong hidop satu hati. Kalo satu orang dari dong ada pung apapa, dia seng parna pake ka makang sandiri. Dia bage akang deng samua orang biar dong samua rasa. 33La deng Allah pung kuasa basar, Yesus pung utusang-utusang tarus-tarus pi kasi tau soal Tuhan Yesus yang su hidop kombali. Allah kasi berkat basar par dong samua. 34Seng ada satu orang lai dari dong yang kurang apapa. Barang, sapa dari dong yang ada pung tana ka ruma, dia pi jual akang
35la bawa akang pung kepeng par Yesus pung utusang-utusang. Tarus, Yesus pung utusang-utusang bage kepeng tu par orang-orang, iko dong
satu-satu pung parlu.
36Bagitu lai deng Yusup. Yusup tu, orang dari suku Lewi. Dia asal dari pulo Siprus. Yesus pung utusang-utusang jaga panggel Yusup tu, Barnabas. Barnabas pung arti ’Ana yang kasi kuat orang pung hati’.
37Yusup ni pi jual dia pung tana sapotong la bawa akang pung kepeng par Yesus pung utusang-utusang.
Ananias deng Sapira mati 5:1-11
5
1Ada laki-laki satu nama Ananias. Dia pung maitua nama Sapira. Dong dua ni sama-sama jual dong pung tana sapotong. 2Kepeng dari jual tana tu, Ananias simpang akang pung saparu par dia. La akang pung sisa, dia kasi par Yesus pung utusang-utusang. Dia pung maitua tau lai kalo dia biking bagitu.3Tarus Petrus tanya dia bagini, ”Ananias e! Mangapa ale kasi biar setang pung bos basar parenta ale sampe ale su parlente Tuhan pung Roh? Ale su jual tana la simpang akang pung kepeng saparu par ale sandiri ka? 4Waktu ale balong jual akang tana tu, akang masi jadi ale pung to? Bagitu lai waktu ale su jual akang, akang pung kepeng tu ale pung lai. Ale mau kasi akang pung kepeng ka seng itu ale pung hak. Mar YESUS PUNG UTUSANG-UTUSANG PUNG CARITA 4 , 5
mangapa ale bilang kalo akang pung kepeng cuma ini sa? Ale bukang parlente katong sa, mar ale jua su parlente Allah.”
5Abis Ananias dengar Petrus bilang bagitu, dia jatu la mati. Samua orang jadi takotang paskali waktu dengar dia mati. 6Tarus, anana muda babarapa orang datang. Dong bungkus dia pung mayat deng kaeng la pi bakubur dia.
7Akang pung tiga jam bagitu, Ananias pung maitua datang di Petrus pung tampa. Mar dia sondor tau sadiki lai kalo dia pung laki su mati.
8Petrus tanya dia, ”Sapira e! Coba ale bilang yang batul par beta do. Ale deng ale pung laki jual tana deng harga bagini ka?”
Sapira bilang, ”Batul. Akang pung harga bagitu suda.”
9Petrus bale bilang lai, ”Mangapa ale deng ale pung laki baku skongkol par coba Tuhan pung Roh? Ale tau, dong yang ada badiri di muka pintu tu, dong baru abis bakubur ale pung laki. Dong nanti bawa ale pung mayat la pi bakubur lai.”
10Abis Petrus bilang bagitu, skrek lai, Sapira jatu di Petrus pung kaki la mati. Waktu anana muda maso ka dalang, dong dapa dia su mati. Tarus, dong angka dia pung mayat la pi bakubur dia di sabala dia pung laki. 11Orang-orang yang parcaya Yesus deng samua orang laeng yang dengar soal Ananias deng Sapira mati jadi takotang paskali.
Yesus pung utusang-utusang biking tanda-tanda herang 5:12-16
12Yesus pung utusang-utusang biking banya tanda-tanda herang di muka orang-orang. La samua orang yang parcaya Yesus jaga bakumpul di teras satu yang akang pung nama Teras Salomo. Dong samua satu hati. 13Banya orang taru hormat par dong. Mar orang-orang yang seng parcaya Yesus seng barani pi bakumpul deng dong. 14La orang-orang yang parcaya Tuhan Yesus, laki-laki deng parampuang, batamba banya tarus. 15Yesus pung utusang-utusang biking banya tanda-tanda herang sampe orang-orang bawa orang-orang saki ka jalang basar. Dong taru orang-orang saki di atas tikar ka tandu biar waktu Petrus langgar, dia pung sombar bisa kana babarapa orang dari dong la dong bae. 16Orang banya dari kampong-kampong yang tinggal dekat kota Yerusalem datang lai bawa dong pung orang-orang saki deng orang-orang yang takana. La dong samua jadi bae.
Malekat kasi kaluar Yesus pung utusang-utusang dari bui 5:17-25
17Orang Yahudi pung Imam Basar deng antua pung anana bua dari kumpulang Saduki jalus paskali tagal apa yang Yesus pung utusang-utusang su biking. 18Jadi, dong tangkap Yesus pung utusang-utusang la kasi maso dong ka dalang bui. 19Mar akang pung malam, Tuhan pung malekat satu buka pintu-pintu bui la bawa Yesus pung utusang-utusang kaluar. Malekat tu bilang bagini, 20”Sakarang kamong pi ka orang Yahudi pung Tampa Sombayang Pusat pung kintal, la kasi tau par orang-orang Tuhan pung ajarang samua soal Yesus yang bisa biking dong hidop tarus deng Antua.”
21Tarus, Yesus pung utusang-utusang iko apa yang malekat tu su bilang par dong. Akang pung amper siang, dong maso di orang Yahudi pung Tampa Sombayang Pusat pung kintal. Di tampa tu, dong mulai kasi balajar orang-orang soal Yesus.
Mar waktu itu jua, orang Yahudi pung Imam Basar deng antua pung anana bua ada kumpul samua orang Yahudi pung pamimping-pamimping sidang. Dong suru babarapa orang pi ambe Yesus pung utusang-utusang dari bui par mau pariksa. 22Mar bagitu orang-orang yang dapa suru tu sampe di bui, dong seng baku dapa lai deng Yesus pung utusang-utusang. Tarus, dong bale kombali la kasi tau soal apa yang dong su lia tu. 23Dong bilang, ”Bapa-bapa e! Waktu katong sampe, pintu bui tu masi takonci mati deng orang yang jaga bui masi ada di muka pintu lai. Mar bagitu katong buka pintu bui, katong seng lia satu manusia lai di dalang.”
24Waktu kapala pasukan yang jaga orang Yahudi pung Tampa Sombayang Pusat deng orang Yahudi pung imam-imam kapala dengar bagitu, dong jadi tabingong-bingong. Dong bilang, ”Apa lai yang su jadi deng Yesus pung utusang-utusang tu?”
25Skrek bagini, satu orang datang par dong la bilang kata, ”Bapa-bapa e! Orang-orang yang bapa-bapa dong kasi maso ka dalang bui tu, sakarang ni ada kasi balajar orang banya di Tampa Sombayang Pusat pung kintal.”
Orang Yahudi pung pamimping-pamimping kasi sidang Yesus pung utusang-utusang
5:26-42
26Abis dengar Yesus pung utusang-utusang ada kasi balajar orang di Tampa Sombayang Pusat pung kintal, kapala pasukan bawa antua pung