31Dong dua bilang, ”Bapa e! Bapa parcaya Tuhan Yesus sa la nanti Tuhan kasi salamat bapa deng samua orang yang ada di bapa pung ruma.”
32Abis itu, Paulus deng Silas kasi tau Tuhan pung ajarang par antua deng samua orang yang ada lai di antua pung ruma. 33Malam itu jua, kapala bui tu bawa dong dua la kasi barsi dong dua pung luka-luka. La oras itu jua, dong dua kasi sarani antua deng samua orang yang ada di dalang antua pung ruma. 34Tarus, antua bawa dong dua pi ka antua pung ruma la taru makanang par dong dua. Antua deng samua orang yang ada di dalang ruma tu paleng sanang. Barang dong su parcaya Allah.
35Akang pung eso pagi bagini, orang-orang basar di kota tu suru polisi-polisi pi bilang pasang par kapala bui tu. Dong bilang kata, ”Oras ini ni jua! Kasi lapas Paulus deng Silas.”
36Kapala bui tu bale bilang pasang tu par Paulus kata, ”Orang-orang basar di kota ni ada suru beta kasi lapas bapa dong. Jadi, mari pi jua deng dame.”
37Mar Paulus bilang par polisi-polisi tu kata, ”Seng bisa bagitu! Katong ni, orang Roma. Dong su pukul katong paleng banya di muka orang-orang sondor kasi sidang dolo. La bale dong kasi maso katong ka dalang bui. La sakarang ni, dong mau kasi kaluar katong tado-tado? Seng bisa bagitu. Kasi tinggal dong sandiri datang kamari la kasi kaluar katong.”
38Polisi-polisi tu pi bilang apa yang Paulus su bilang par orang-orang basar di kota itu. Waktu orang-orang basar tu dengar kalo Paulus deng Silas tu orang Roma, dong paleng takotang paskali. 39Jadi, dong pi ka bui la minta ampong dari Paulus deng Silas. Abis itu, dong kasi kaluar dong dua dari bui la bilang kata, ”Bapa-bapa e! Pi jua kasi tinggal akang kota ni.”
40Abis kaluar dari bui, Paulus deng Silas pi ka Lidia pung ruma. Di tampa tu, dong dua baku dapa deng basudara-basudara yang iko Tuhan Yesus. Tarus, dong dua kasi kuat basudara-basudara tu pung hati biar
dong tarus parcaya Yesus. Abis itu, dong dua pi kasi tinggal kota tu. Paulus dong di Tesalonika
17:1-9
17
1Paulus deng Silas pi kasi tinggal kota Filipi la bajalang tarus. Dong bajalang langgar kota Amfipolis deng kota Apolonia la sampe di kota Tesalonika. Di kota tu ada orang Yahudi pung tampa sombayang satu. 2Paulus maso ka tampa sombayang tu, macang yang dia jaga biking. Di situ dia baku tukar pikirang deng orang-orang soal nats-nats yang ada di dalang Allah pung tulisang. Dia biking bagitu tarus sampe tiga minggu di waktu orang Yahudi pung hari barenti karja. 3Dia bilang par dong kata, ”Basudara e! Orang yang Allah su Angka par Kasi Salamat Manusia tu musti sangsara dolo la mati, baru Tuhan kasi hidop Antua kombali. Antua itu tu, Yesus. Antua tu yang beta ada bilang par kamong sakarang ni.”4Dengar bagitu, orang Yahudi saparu jadi parcaya. Tarus, dong iko Paulus deng Silas. Bagitu lai deng orang-orang yang bukang Yahudi yang YESUS PUNG UTUSANG-UTUSANG PUNG CARITA 16 , 17
sombayang par Allah. Parampuang-parampuang basar banya lai yang iko Paulus dong.
5Mar orang Yahudi saparu makang hati paskali. Jadi, dong panggel tukang-tukang pukul yang ada di pasar. Tukang-tukang pukul tu kumpul orang banya par biking kaco kota tu. Tarus, dong pi sarang orang satu yang parcaya Yesus pung ruma. Orang tu pung nama Yason. Dong pi ka dia pung ruma par cari Paulus deng Silas biar dong bisa bawa dong dua di muka orang banya. 6Mar bagitu dong seng baku dapa Paulus deng Silas, dong hela Yason deng basudara-basudara laeng yang iko Yesus. Orang-orang tu hela Yason dong ka muka orang-orang basar di kota tu. Dong bataria kata, ”Bapa-bapa e! Dong ini to su biking kaco di sagala tampa. La sakarang ini jua, dong su ada di katong pung kota lai. 7Yason ni su tarima dong tinggal di dia pung ruma. Dong jua seng iko raja basar Roma pung atorang-atorang yang antua su biking par katong samua. La dong bale bilang lai kata, ’Ada Raja satu lai. Antua pung nama Yesus.’ ”
8Pas dengar bagitu, orang-orang basar di kota tu deng orang banya pung hati balisa tagal dong mau biking kaco kota tu. 9Jadi, orang-orang basar di kota tu suru Yason dong kasi kepeng par jadi jaminang biar dong jang biking kaco lai. La orang-orang basar tu kasi lapas Yason dong.
Orang Berea parcaya Paulus pung pasang 17:10-15
10Bagitu su malam, basudara-basudara yang iko Yesus di kota Tesalonika suru Paulus deng Silas pi ka kota Berea. Barang, dong taku orang banya nanti sarang dong. Bagitu sampe di kota tu, dong dua pi ka orang Yahudi pung tampa sombayang. 11Orang-orang di Berea pung pikirang labe tabuka dari orang-orang di Tesalonika. Jadi, deng sanang hati dong tarima pasang soal Yesus. Sabang hari dong baca Allah pung tulisang biar dong bisa tau kalo apa yang Paulus ajar tu batul ka seng.
12Jadi, banya orang Yahudi parcaya Yesus. Ada parampuang-parampuang basar yang bukang Yahudi deng laki-laki yang bukang Yahudi yang parcaya lai.
13Mar bagitu orang-orang Yahudi di Tesalonika dengar kalo Paulus ada kasi tau Allah pung ajarang di Berea, dong tarus pi ka kota tu la tusu-tusu mulu par orang banya deng biking dong pung hati balisa la dong mulai mara Paulus. 14Mar basudara-basudara di Berea yang iko Yesus suru Paulus pi. Jadi, saparu dari dong paparipi antar Paulus ka pante biar dia nai kapal. Mar Silas deng Timotius masi tinggal tarus
di Berea. 15Dong antar Paulus sampe ka kota Atena, baru dong bale kombali ka Berea. Paulus suru dong bilang par Silas deng Timotius kata, ”Silas deng Timotius capat iko beta ka Atena.”
Paulus lia patong-patong di Atena 17:16-34
16Waktu Paulus ada tunggu-tunggu Silas deng Timotius di kota Atena, dia lia bagini di dalang kota ni patong-patong sombayang paleng banya. Jadi, dia pung hati paleng susa paskali. 17Tagal itu, dia baku tukar pikirang deng orang-orang yang bukang Yahudi yang sombayang par Allah deng orang-orang Yahudi di dong pung tampa sombayang. Sabang hari jua di pasar-pasar dia baku tukar pikirang deng orang-orang yang ada di tampa tu. 18Pangajar-pangajar yang pintar dari kumpulang Epikuros deng Stoa jua baku malawang lai deng dia. Saparu dari dong bilang, ”Hoe! Orang ini to tukang kewel sa. Dia mau bilang apa?”
Mar yang laeng bilang lai kata, ”Dia ni to, ada buju-buju katong par iko dia pung dewa-dewa.”
Dong bilang bagitu, tagal Paulus ni ada kasi tau Kabar Bae soal Yesus. Dia ada bilang Yesus su mati la hidop kombali. 19Abis itu, dong bawa Paulus ka gunung kacil satu par mau kasi sidang dia. Gunung tu, akang pung nama Areopagus. Dong tanya dia kata, ”Katong jua mau tau ajarang baru yang ale bilang tu. 20Barang, apa yang ale bilang par katong ni, akang biking katong taherang-herang. Jadi, coba ale bilang akang pung arti do.”
21(Dong tanya dia bagitu, barang samua orang Atena deng orang-orang pandatang yang ada di tampa tu paleng suka par dudu dengar carita-carita yang baru. Dong jaga dudu carita sampe lupa karja.)
22Jadi, Paulus badiri di muka orang banya yang ada di Areopagus tu la bilang kata, ”Orang-orang Atena e! Beta lia dari apa sa yang dong biking, dong tu seng parna lupa dong pung dewa-dewa. 23Beta bilang bagini, tagal beta su bajalang koliling dong pung kota. Beta lia dong pung barang-barang sombayang. Beta jua lia tampa sombayang satu yang ada tulisang bagini, ’Par Allah yang katong seng kanal.’
Jadi, Allah yang dong hormat mar seng kanal tu, beta ada mau kasi tau soal Antua par dong. 24Allah yang su biking dunya deng akang pung isi samua-samua. Antua tu, Tuhan yang pegang samua yang ada di sorga deng yang ada di dunya. Antua jua seng tinggal di dalang barang-barang sombayang yang manusia biking. 25Antua yang kasi napas par biking YESUS PUNG UTUSANG-UTUSANG PUNG CARITA 17
manusia hidop deng kasi samua par manusia. Jadi, Antua seng cari apapa dari manusia, tagal manusia seng bisa tolong Antua. 26Dari manusia satu sa Antua su biking samua negri la suru dong tinggal di samua tampa di dunya ni. Antua jua su ator apa tempo manusia hidop deng mati deng nanti tinggal di mana. 27Antua biking bagitu biar manusia cari Antua. La waktu manusia cari Antua, sapa tau, dong baku dapa deng Antua. Mar Antua tu seng jau dari katong. 28Barang, macang deng orang bilang kata, ’Antua tu yang biking katong hidop, bagara, deng ada di akang dunya ni.’
Dong pung tukang-tukang biking puisi su bilang kata, ’Katong samua ni, Antua pung anana cucu.’
29Tagal katong ni Allah pung anana, jadi katong seng bole pikir kalo Allah tu, macang deng barang-barang yang manusia pintar biking dari mas, perak, ka batu-batu iko dong pung pikirang sandiri. 30Dolo-dolo
Allah seng hukum manusia. Barang, dong seng kanal Antua pung mau tu apa. Mar sakarang ni, Antua seng mau kalo manusia macang bagitu lai. Antua mau samua orang musti kasi tinggal dong pung dosa-dosa la hidop iko Antua. 31Barang, Antua jua su ator kalo satu hari nanti, Antua hukum samua orang yang ada di dunya ni deng batul. Allah jua su angka satu Orang par hukum samua orang. Orang tu su mati la hidop kombali. Jadi, Allah su kasi unju kalo Orang itu yang nanti hukum samua orang.”
32Waktu orang-orang tu dengar kalo orang mati bisa hidop kombali, saparu orang yang ada di tampa tu dudu tatawa Paulus. Ada lai yang bilang kata, ”Bapa e! Katong masi mau dengar bapa pung pasang ni lai, mar nanti laeng kali jua.”
33Jadi, Paulus pi kasi tinggal dong. 34Mar saparu orang dari dong bagabung deng Paulus la jadi parcaya Yesus. Dari dong itu tu, ada satu orang yang pung nama Dionisius. Dia tu satu dari anggota sidang lai di Areopagus. Ada jua parampuang satu yang pung nama Damaris deng orang-orang laeng lai yang bagabung deng Paulus.